Kantu Tistimunhas di Jeová ki bu konxe? Talvês bu ten un vizinhu, un koléga di skóla ô di trabadju ki é Tistimunha di Jeová. Ô talvês un di nos dja pâpia ku bo di Bíblia. Má nos é kenha? Pamodi ki nu ta pâpia ku otus algen di kuzas ki nu ta kridita na el?

Nos é sima tudu algen. Nos manera di ser ku nos manera di vive é diferenti. Alguns di nos ta staba na otus relijion i otus di nos nen ka ta kriditaba na Deus. Má, antis di nu bira Tistimunha di Jeová, nu tra ténpu pa studa i konxe dretu kuzê ki Bíblia ta fla. (Atus 17:11, BPK) Nu seta kuzê ki nu prende na Bíblia i nu disidi adora Jeová Deus.

Studa Bíblia ta djuda-nu. Sima tudu algen na mundu, nos tanbê nu ten prublémas i nos é ka perfetu. Má nu odja ma óras ki nu ta faze kel ki Bíblia ta fla, nos vida ta bira mutu más midjór. (Salmo 128:1, 2) Kel-li é un di kes razon ki ta leba-nu pâpia ku otus algen di notísias sábi ki nu prende na Bíblia.

Nu ta vive sima lei di Deus ta manda. Kes lei ki Bíblia ta inxina, ta djuda-nu ten kualidadis sima onestidadi i bondadi. Tanbê ta pô-nu ruspeta tudu algen i xinti sábi ku nos mê. Kes lei di Deus ta djuda-nu anda ku bon juís, konporta dretu i ten un família unidu. Sima nu sabe ‘Deus ka ta faze skodjénsa’. Nton, nu ta trata tudu nos irmons na mundu interu sima família. Diferénsas ka ta dividi-nu, nos é unidu pa kuzas ki nu ta kridita na el. Nos é sima tudu algen, má nu ta marka diferénsa! — Atus 4:13; 10:34, 35, BPK.

• Na kuzê ki Tistimunhas di Jeová é sima tudu algen?

• Kuzê ki Tistimunhas di Jeová prende na Bíblia? Modi ki Bíblia ta djuda-s?

Txeu algen ta atxa ma Tistimunhas di Jeová é nómi di un relijion ki ka dura ki parse. Má, dja ten más di 2.700 anu ki gentis ki ta sirbiba úniku Deus verdaderu txomadu di se ‘tistimunhas’. (Isaías 43:10-12) Antis, pesoas ta txomaba nos di Studantis di Bíblia. Má, di 1931 pa li, nu pasa ta uza nómi Tistimunhas di Jeová. Pamodi?

Pa mostra ken ki é nos Deus. Nómi Jeová ta parse uns 7 mil bês na kópias antigu di Bíblia. Má, na txeu traduson di Bíblia, es tra nómi Jeová i es poi Sinhor ô Deus. Deus verdaderu fla Muizes ma se nómi é Jeová i El fla-l: ‘Kel-li é nha nómi pa tudu ténpu’. (Êxodo 3:15) Asi, Jeová distrinsa se kabésa di tudu deus falsu. Nu ta xinti orgulhu pamô nu ta konxedu pa nómi santu di Deus.

Pa mostra trabadju ki nu ten ki faze. Na ténpu antigu, monti algen mostra ses fé na Jeová i es sirbi-l di tistimunha. Abel, un bon ómi, foi primeru tistimunha. Sima ténpu ba ta bai, Nué, Abraon, Sara, Muizes, Davidi i otus faze párti di kes ‘txeu tistimunha ki ta rodea-nu sima núven’. (Hebreus 11:4—12:1) Sima un algen ta sirbi di tistimunha na tribunal pa djuda un pesoa ki ka faze nada mariadu, nos tanbê nu sta disididu na pâpia ku tudu algen verdadi sobri nos Deus.

Pa mostra ma nu ta faze sima Jizus ta fazeba. Na Bíblia Jizus ta txomadu di ‘tistimunha fiel i verdaderu’. (Apocalipse 3:14) Jizus fla ma ‘el faze algen konxe nómi di Deus’ i ma el ‘ta daba tistimunhu di verdadi’ sobri Deus. (João 17:26; 18:37) Pamodi kel-li, ken ki ta sigi Kristu di verdadi ten ki uza i djuda pesoas konxe nómi di Deus, ki é Jeová. Tistimunhas di Jeová ta sforsa pa faze kel-li.

• Pamodi ki Studantis di Bíblia pasa ta uza nómi Tistimunhas di Jeová?

• Dja faze kantu ténpu ki Jeová ten tistimunhas na Téra?

• Ken ki é midjór Tistimunha di Jeová?

Bíblia dja flaba ma dipôs di mórti di Kristu, ta parseba na meiu di se sigidoris alguns ki ta inxinaba kuzas ki ka staba na Bíblia. (Atus 20:29, 30, BPK) Ku ténpu é kel-la própi ki kontise. Es pasa ta mistura kuzas ki Jizus inxina ku ideias di otus relijion ki ka ta sigiba leis di Jeová. É si ki parse kristons falsu. (2 Timóteo 4:3, 4) Modi ki nu pode sta sértu ma oji nu ta ntende Bíblia dretu?

Txiga ténpu di Jeová mostra verdadi. Jeová dja flaba ma na ‘ténpu di fin, konhisimentu di verdadi ta biraba rei di txeu.’ (Daniel 12:4) Na 1870, un grupu pikinoti di pesoas ki staba ta djobe verdadi, odja ma kes kuza ki igrejas ta inxinaba ka staba na Bíblia. Nton, ku npenhu, es kumesa ta piskiza pa es djobe kuzê ki Bíblia ta inxina di verdadi. Jeová bensua-s ses sforsu.

Ómis di kunfiansa studa Bíblia ku kuidadu. Studantis di Bíblia, ki dipôs pasa ta uza nómi Tistimunhas di Jeová, ta studaba di mésmu manera ki nu ta studa oji. Es ta studaba Bíblia asuntu pa asuntu. Óras ki es atxaba un párti di Bíblia difísil di ntende, es ta konparaba el ku otus versíklu pa djuda-s ntende. Óras ki es txigaba un konkluzon ki éra sima kel ki Bíblia ta fla, es ta skrebeba el. Kantu es dexa Bíblia splika se kabésa, es torna atxa verdadi sobri nómi di Deus i di se Reinu, kuzê ki Deus krê pa Téra i pa nos, kuzê ki ta kontise ku algen óras ki móre i ki speransa ten pa kenha ki dja móre. Ses piskiza faze-s fika livri di txeu kuza mariadu i di mintiras ki igrejas ta inxinaba. — João 8:31, 32.

Na 1879, Studantis di Bíblia dja ntendeba ma éra ténpu di faze tudu kel ki es pode pa spadjaba verdadis di Bíblia. Pamodi kel-li, na kel anu es kumesa ta faze un revista ki ti oji nu ta uza. Gósi nu sta na 240 país i nu ta uza más di 750 língua pa spadja verdadis di Bíblia. Nunka ‘konhisimentu di verdadi bira rei di txeu’ sima gósi.

• Dipôs di mórti di Kristu, kuzê ki kontise ku verdadis di Bíblia?

• Kuzê ki djuda-nu diskubri verdadis di Palavra di Deus otu bês?

Pa txeu ténpu, Tistimunhas di Jeová ta uzaba, inprimiba i distribuiba txeu traduson di Bíblia. Má nu odja ma meste- da di un novu traduson di Bíblia pa djuda algen ten más ‘konhisimentu izatu di verdadi.’ É kel-li ki Deus krê pa tudu nos. (1 Timóteo 2:3, 4) Nton na 1950, nu kumesa ta lansa pártis di nos traduson di Bíblia, Tradução do Novo Mundo, ki ta uza palavras faxi di ntende. Dja el traduzidu di manera izatu pa más di 130 língua.

Mesteda di un Bíblia faxi di ntende. Sima ténpu ta pasa, línguas ta muda, i txeu traduson ta uza palavras trapadjadu, difísil di ntende i ki ka sta uzadu más. Tanbê, atxadu kópias antigu di Bíblia ki é más izatu i ki ta parse más ku kes primeru kópia. Kel-li djuda ntende midjór kes língua ki Bíblia skrebedu, ki éra ebraiku, aramaiku i gregu.

Mesteda di un traduson ki ta da kunfiansa ma el é Palavra di Deus. Pesoas ki ta traduzi Bíblia ka debe traduzi sima es krê. Es ten ki ruspeta kel ki es atxa skrebedu na kes testu más antigu. Má, na kuazi tudu traduson di Bíblia, nómi di Deus, Jeová, ka ta parse.

Mesteda di un Bíblia ki ta da se Autor valor. (2 Samuel 23:2) Na Tradução do Novo Mundo podu nómi di Jeová otu bês, na uns 7 mil lugar undi ki el ta parseba, sima ta staba na kes kópia más antigu di Bíblia. Li dibaxu sta un izénplu. (Salmo 83:18) Dipôs di txeu anu ta piskiza ku kuidadu, nu faze un traduson di Bíblia sábi di lé, pa- modi el ta mostra-nu klaru kal ki é ideias di Deus. Ka ta nporta si bu tene ô nau Tradução do Novo Mundo na bu língua, nu ta nkoraja-u pa bu kria kustumu di lé Palavra di Deus tudu dia. — Josué 1:8; Salmo 1:2, 3.

• Pamodi ki nu atxa ma mesteda di un novu traduson di Bíblia?

• Si bu krê prende kal ki é vontadi di Deus, kuzê ki bu ten ki faze tudu dia?