Ómis ki ten responsabilidadi na kongregason ka ta pagadu. Sima kes primeru kriston ta fazeba, tanbê oji enkaregadus ki sta kualifikadu ta “toma kónta” di kongregason di Deus. (Atus 20:28, BPK) Ansions é ómis konsentradu, ki ta ama Jeová txeu. Es ta toma kónta di kongregason i es ta pastora ovelhas di Deus. Es ta faze-l ‘ka pamodi es ta xinti forsadu, má di livri vontadi; nen pa ganha dinheru, má ku npenhu i alegria’. (1 Pedro 5:1-3) Kuzê ki es ta faze pa djuda-nu?

Es ta kuida di nos i es ta proteje-nu. Pa irmons na kongregason fika más amigu di Jeová, ansions ta orienta-s i ta proteje-s. Dja ki es sabe ma é Deus ki da-s es responsabilidadi inportanti, es ka ta kontrola kongregason sima ki é es ki ta manda, má es ta djuda tudu algen xinti sábi i sta kontenti. (2 Coríntios 1:24) Sima un pastor ki ta da se midjór pa kuida di kada un na se rebanhu, ansions ta faze di tudu pa es konxe kada algen na kongregason. — Provérbios 27:23.

Es ta inxina-nu modi ki nu pode faze vontadi di Deus. Tudu simana, ansions ta organiza runions na kongregason pa djuda-nu pa nos fé fika fórti. (Atus 15:32, BPK) Kes ómi li, ki ta sirbi Deus di tudu korason, ta da-nu bon izénplu pamodi es ta sta na frénti di trabadju di pregason. Es ta sai ku nos na pregason i es ta inxina-nu prega di un monti manera.

Es ta da koraji pa kada un di nos. Ansions di nos kongregason, ta vizita-nu na nos kaza ô es ta pâpia ku nos na Salon di Reinu. Es ta uza Bíblia pa djuda-nu i pa konsola-nu, pa nu pode mante nos amizadi ku Jeová. — Tiago 5:14, 15.

É ka sô kongregason ki ansions ta djuda, txeu di es ten ki tra ténpu pa trabadja i pa kuida di ses família. Es merese nos ruspetu pamodi es é ómis trabadjador! — 1 Tessalonicenses 5:12, 13.

• Kuzê ki ansions ta faze na kongregason?

• Modi ki ansions ta mostra ma es ta preokupa ku nos?

Bíblia ta fala di dôs grupu di ómis ki ten responsabilidadi di kuida di asuntus di kongregason: ‘enkaregadus i ajudantis di kongregason’. (Filipenses 1:1) Normalmenti na kada kongregason ten un grupu di kes irmon li. Modi ki ajudantis di kongregason ta djuda-nu?

Es ta djuda grupu di ansion di ses kongregason. Ka ta nporta ses idadi, ajudantis di kongregason ten txeu amor pa Jeová, es é di kunfiansa i es é trabadjador. Es ta trabadja pa Salon di Reinu i pa kongregason fika ben organizadu. Kel-la ta djuda ansions konsentra na inxina i kuida di kongregason.

Es ta djuda kongregason. Alguns ajudanti di kongregason ta skodjedu pa resebe kes algen ki ta bai runion i mostra-s undi ki es ta xinta. Otus ta kuida di son, distribuison di publikasons, kóntas di kongregason i es ta fla irmons na ki lugar ki é pa es bai faze pregason. Es ta djuda konpo i linpa Salon di Reinu. Tanbê ansions pode pidi-s pa es djuda kes algen más grandi. Ka ta nporta trabadju ki es dadu, es ta faze-l di korason i asi es ta ganha ruspetu di tudu algen na kongregason. — 1 Timóteo 3:13.

Es ta da bon izénplu di ómis ki ta sigi Kristu. Ajudantis di kongregason ta skodjedu pamodi ses manera di vive ta mostra ma es é amigu di Deus. Óras ki es ten un párti na runion, es ta faze-l di manera ki ta djuda nos fé fika más fórti. Óras ki nu ta odja ses izénplu na pregason, nu ta xinti más vontadi di prega. Dja ki es ta trabadja unidu ku ansions, kongregason ta fika ku un anbienti sábi, unidu i xeiu di alegria. (Efésios 4:16) Ku ténpu, óras ki ajudantis di kongregason sta priparadu, es pode skodjedu pa ser ansion.

• Kal ki debe ser konportamentu di un ajudanti di kongregason?

• Modi ki es ta djuda kongregason fika ben organizadu?

Kel párti di Bíblia skrebedu na língua gregu, ta fala txeu di Barnabé ku apóstlu Polu. Algun ténpu dipôs di mórti di Jizus, es ta viajaba i vizitaba kongregasons. Pamodi? Es ta preokupaba, di verdadi, si ses irmons staba dretu. Apóstlu Polu flaba ma el krê ‘ba vizitaba ses irmons’ pa el djobe modi ki es staba. Sikrê el tinha ki viajaba kaminhu lonji, el ta baba da-s koraji. (Atus 15:36, BPK) Oji enkaregadus di grupu di kongregason ta faze mésmu kuza.

Es ta da-nu koraji. Kada enkaregadu di grupu di kongregason ta vizita uns 20 kongregason. Es ta vizita kada kongregason dôs bês pa anu i kada vizita ta dura un simana. Nu pode prende txeu di ses spiriénsa i di spiriénsa di ses mudjer, si es é kazadu. Es ta sforsa pa konxe tudu algen na kongregason, grandi ku pikinoti, es gosta txeu di bai ku nos na pregason i partisipa na faze algen studu di Bíblia. Enkaregadus, djuntu ku ansions, ta faze vizitas pa da irmons koraji ku konsedjus. Na runions ku na asenbleias es ta faze diskursus ki tanbê ta da-nu txeu koraji. — Atus 15:35, BPK.

Es ta preokupa ku kada un di nos. Enkaregadus di grupu di kongregason ta preokupa di korason ku nos amizadi ku Jeová. Es ta faze runion ku ansions i ku ajudantis di kongregason pa djobe modi ki kongregason sta ta bai i pa da-s konsedjus ki ta djuda-s kuida di ses responsabilidadi. Es ta djuda pionerus ten midjór rezultadu na pregason, es gosta di konxe pesoas ki ten poku ténpu ki txiga na kongregason i sabe modi ki ses amizadi ku Jeová sta. Kada enkaregadu di grupu ta sta prontu pa djuda-nu sima nos ‘kunpanheru i algen ki ta trabadja djuntu ku nos’. (2 Coríntios 8:23) Nu debe ten amor i fórti fé na Jeová sima es. — Hebreus 13:7.

• Pamodi ki enkaregadus di grupu ta vizita kongregasons?

• Modi ki ses vizita pode djuda-u?

Dipôs ki kontise un dizastri, Tistimunhas di Jeová ta organiza pa bai faxi pa ba konsola ses irmons ki fika prujudikadu. Kel sforsu li é próva di kel grandi amor ki nu ta xinti pa kunpanheru. (João 13:34, 35; 1 João 3:17, 18) Modi ki nu ta djuda-s?

Nu ta kontribui ku nos dinheru. Dipôs ki Jizus móre, kontise un grandi fómi na un zona di Israel ki txomaba Judea. Kes kriston di Antiukia manda dinheru pa djuda ses irmons. (Atus 11:27-30, BPK) Di mésmu manera, óras ki nu sabe ma nos irmons na algun párti di mundu sta ta pasa pa txeu difikuldadi, nu ta kontribui na nos kongregason i dipôs kes kontribuison ta mandadu pa kunpra kuzas pa djuda kes ki tene más falta. — 2 Coríntios 8:13-15.

Nu ta djuda-s ku kuzas ki es meste kel óra. Kes ansion ki sta na lugar di dizastri ta djobe si kada algen di kongregason sta dretu. Kumison di Ajuda ta orienta ntréga di kumida, agu pa bebe i ropa. Tanbê es ta ranja gazadju i es ta djuda kes algen ki sta duenti. Monti Tistimunha di Jeová ki ten spiriénsa ta oferese ses kabésa pa bai, na ses kusta, ti kel lugar di dizastri pa ba trabadja, pa djuda kes algen ô pa konpo kazas i kes Salon di Reinu ki fika stragadu. Kuzê ki ta pô-nu bai faxi pa ba djuda é union ki nu ten na nos organizason i spiriénsa ki nu ta ganha óras ki nu ta trabadja djuntu. Nu ka ta djuda sô nos irmons. Óras ki nu pode nu ta djuda tanbê otus algen, sikrê es é di otu relijion. — Gálatas 6:10.

Uza Bíblia pa konsola-s i pa djuda-s lida ku ses sentimentu. Ken ki sufri dizastri ta meste konsolu más ki otus algen. Na kes óra la, Jeová ki é ‘Deus di grandi konsolu’, ta da-s forsa. (2 Coríntios 1:3, 4) Nu gosta di fala di kes promésa di Bíblia ku kes algen ki sta frontadu. Nu ta da-s sertéza ma, ka ta dura, Reinu di Deus ta ben kaba ku tudu disgrasas ki ta da-nu dór i ta pô-nu ta sufri. — Apocalipse 21:4.

• Modi ki Tistimunhas di Jeová ta konsigi bai faxi pa djuda óras ki ta kontise un dizastri?

• Modi ki nu ta uza Bíblia pa konsola kes algen ki skapa di dizastri?

Poku ténpu antis di Jizus móre, el pâpia ku kuatu di se disiplus: Pedru, Tiagu, Juan ku André. Kantu el fla kal ki ta sérba sinal di se prezénsa na ténpu di fin, el faze un pergunta mutu inportanti: ‘Kenha ki é di verdadi skravu fiel i prudenti ki se donu pô-l pa el toma kónta di kes otu skravu di kaza, pa da-s kumida déntu d’óra?’ (Mateus 24:3, 45; Marcos 13:3, 4) Jizus, ‘donu’ di se disiplus, staba ta da-s sertéza ma, na ténpu di fin, el ta skodjeba un ‘skravu’ pa sénpri da kumida spritual ô konhisimentu di Deus pa tudu se sigidoris. Kel skravu li é kenha?

El é un grupu pikinoti di sigidoris di Jizus unjidu ô skodjedu ku spritu santu. Grupu Enkaregadu di Óbra di Tistimunhas di Jeová é ‘skravu’ fiel i prudenti. El ta da otus ki ta adora Jeová kumida spritual na óra sértu. Nu ta dipende di skravu pa nu resebe ‘kumida déntu d’óra’. — Lucas 12:42.

El ta kuida di família di Deus. (1 Timóteo 3:15) Jizus da skravu grandi responsabilidadi pa toma kónta di trabadju ki organizason di Jeová sta ta faze na Téra. Skravu ta kuida di kuzas material di organizason i di kontribuison ki ta dadu. El ta orienta trabadju di pregason i el ta uza kongregason pa inxina-nu. ‘Skravu fiel i prudenti’ ta uza publikasons ki nu ta uza na pregason, prugramas di runion ku asenbleias pa da-nu kumida spritual ki nu meste déntu d’óra.

Skravu é fiel pamodi el ta sigi verdadis di Bíblia i órdi ki el dadu pa prega notísias sábi; el é prudenti pamodi el ta kuida dretu di asuntus di Kristu na Téra. (Atus 10:42, BPK) Nu pode odja ma Jeová sta ku ‘skravu fiel i prudenti’ pamodi es óbra sta ta bira más grandi i kumida spritual sta ta fika más txeu. — Isaías 60:22; 65:13.

• Kenha ki Jizus enkarega pa da konhisimentu di Deus pa se disiplus?

• Pamodi ki ‘skravu’ é fiel i prudenti?

Dipôs ki Jizus móre, un grupu pikinoti di ‘apóstlus i ansions’ na Jiruzalen éra grupu enkaregadu pa tomaba disizons inportanti na nómi di tudu kongregason di sigidoris di Kristu skodjedu ku spritu santu. (Atos 15:2) Óras ki es ta tomaba un disizon es ta staba di akordu pamodi es ta fazeba kuzê ki staba na Skrituras i es ta dexaba spritu di Deus orienta-s. (Atus 15:25, BPK) Oji tanbê ta fazedu kuzas di mésmu manera.

Deus ta uza-l pa faze Se vontadi. Kes irmon skodjedu ku spritu santu ki ta sirbi na Grupu Enkaregadu es ta da Palavra di Deus txeu valor. Es sabe organiza nos trabadju i kuida di asuntus ki ten aver ku nos adorason. Tudu simana, es ta djunta pa djobe kuzê ki tudu nos irmons na mundu interu meste. Sima na ténpu dipôs ki Jizus móre, es ta uza kartas, enkaregadus di grupu di kongregason i otus algen pa da orientason ku bazi na Bíblia. Kel-la ta faze povu di Deus fika unidu na manera di pensa i di faze kuzas. (Atus 16:4, 5, BPK) Grupu Enkaregadu di Óbra di Tistimunhas di Jeová ta kuida di priparason di nos kumida spritual i el ta da-nu koraji pa pregason pode fika na primeru lugar na nos vida. Óras ki ta skodjedu un irmon pa toma un responsabilidadi, é grupu enkaregadu ki ta orienta.

El ta dexa spritu di Deus orienta-l. Grupu Enkaregadu di Óbra di Tistimunhas di Jeová ta pidi orientason di Jeová, ki é Donu di Séu ku Téra, i di Jizus ki é Kabésa di kongregason. (1 Coríntios 11:3; Efésios 5:23) Kes ki ta faze párti di Grupu Enkaregadu di Óbra di Tistimunhas di Jeová ka ta atxa ma é es ki é xéfi di povu di Deus. Es i tudu kes otu skodjedu ku spritu santu, ta sigi Jizus pa undi ki el bai. (Apocalipse 14:4) Grupu Enkaregadu ta da txeu valor pa orasons ki nu ta faze pa es.

• Dipôs di mórti di Jizus, kenha ki ta fazeba párti di grupu enkaregadu?

• Modi ki Grupu Enkaregadu ta pidi orientason di Deus oji?

Betel é un nómi na língua ebraiku ki siginifika ‘kaza di Deus’. (Génesis 28:17, 19) Es nómi ta konbina ku kes lugar ki Tistimunhas di Jeová ta uza na mundu interu pa organiza i orienta trabadju di pregason. Grupu Enkaregadu di Óbra di Tistimunhas di Jeová ta trabadja na sedi mundial, na Nova York, Mérka. Di la el ta organiza trabadju di kes filial na otus país. Kes ki ta trabadja na Betel, é konxedu pa “família di Betel” pamodi es ta mora djuntu, es ta trabadja djuntu, es ta kume djuntu i es ta studa Bíblia djuntu. — Salmo 133:1.

Un lugar spesial undi tudu algen é sima un família i es ta da ses midjór na trabadju. Na tudu Betel, kes ómi ku kes mudjer ki ta trabadja la, toma konpromisu di faze vontadi di Deus i apoia Se Reinu pa ténpu interu. (Mateus 6:33) Ninhun di es ka ta pagadu pa ses trabadju, má es ta dadu lugar di mora, kumida i ajuda pa otus dispéza. Kada un di es ta skodjedu pa trabadja na un lugar: na skritóriu, na kuzinha, na lugar di kume, na lugar di inprimi, na linpéza, na lugar di laba ropa i na otus lugar.

Un lugar di txeu trabadju ki ta djuda pregason. Obijetivu prinsipal di tudu Betel é faze verdadis di Bíblia txiga na más txeu algen. Es folhetu é un izénplu di kel-li. El skrebedu ku orientason di Grupu Enkaregadu i es uza konputador pa manda-l pa monti ekipa di traduson na mundu interu. El mandadu pa txeu Betel pa inprimidu na mákinas ki ta inprimi rei di faxi. Dipôs el mandadu pa más di 110 mil kongregason. Pa faze tudu kes kuza li, família di Betel ta da un grandi ajuda pa kel ki é trabadju más inportanti gósi: pregason di notísias sábi di Reinu di Deus! — Marcos 13:10.

• Ken ki ta trabadja na Betel i modi ki ta tomadu kónta di es?

• Tudu ki ta fazedu na Betel ta djuda ki otu trabadju ki é más inportanti gósi?

Família di Betel ta faze txeu tipu di trabadju pa kuida i orienta pregason na un ô más di un país. Es ta skodjedu pa trabadja na ekipas di traduson, pa inprimi revistas, pa poi kapa na livrus, pa guarda i distribui publikasons, pa faze gravasons ô pa orienta asuntus na lugar ki es ta toma kónta di el.

Kumison di Filial ta orienta trabadjus. Kumison di Filial ten três ô más ansion ku txeu spiriénsa. Grupu Enkaregadu di Óbra di Tistimunhas di Jeová ta da kada Kumison di Filial responsabilidadi di orienta trabadju di filial. Kumison di Filial ta dexa Grupu Enkaregadu sabe modi ki trabadju di pregason na ses país sta ta bai i si ten algun prubléma. Kes informason ki es ta da, ta djuda Grupu Enkaregadu sabe ki asuntus ki es debe pâpia di el na publikasons, na runions i na asenbleias. Reprizentantis di Grupu Enkaregadu ta mandadu sénpri pa ba vizita kes filial i pa orienta Kumison di Filial modi ki es debe faze ses trabadju. (Provérbios 11:14) Ta fazedu un runion spesial. Reprizentanti di sedi mundial ta faze un diskursu pa da koraji pa tudu kes algen ki ta mora na kes lugar ki kel filial ta kuida di es.

Es ta djuda kongregasons na kes lugar ki es ta toma kónta. Irmons ki ten responsabilidadi na filial ta disidi si ta fazedu un novu kongregason. Tanbê ten irmons ki ta toma kónta di trabadju di pionerus, misionárius i enkaregadus di grupu di kongregason, ki ta sta na kes lugar ki filial ta kuida di es. Es ta organiza asenbleias, kongrésus i tanbê konstruson di Salons di Reinu. Es ta manda publikasons pa kada kongregason. Tudu kuza ki ta fazedu na filial é pa djuda trabadju di pregason fika sénpri ben organizadu. — 1 Coríntios 14:33, 40.

• Modi ki Kumison di Filial ta djuda Grupu Enkaregadu di Óbra di Tistimunhas di Jeová?

• Ki trabadju ta fazedu na un filial?

Nu ta faze publikasons na uns 750 língua pamodi nu krê da nos midjór na pregason di ‘notísias sábi pa tudu nasons, tribus, línguas i povus’. (Apocalipse 14:6) Modi ki nu ta konsigi faze es grandi trabadju? Nu ta konsigi faze-l ku ajuda di nos ekipa di skritoris na mundu interu i di nos tradutoris ki ta trabadja ku npenhu. Es tudu é Tistimunhas di Jeová.

Ta skrebedu primeru na inglês. Grupu Enkaregadu di Óbra di Tistimunhas di Jeová ta orienta trabadju ki ta fazedu na Sekson di Skritoris na sedi mundial, na Mérka. Es sekson ta orienta kenha ki ta skodjedu pa ser skritor na sedi mundial i na alguns filial. Nu ta konsigi fala di asuntus di un monti kultura i ki ta interesa leitoris di un monti país pamodi nu ten un ekipa di skritoris di txeu lugar.

Ta mandadu pa tradutoris. Dipôs di konpodu tudu i dadu autorizason, testu ta mandadu pa ekipas di traduson na mundu interu pa konputador. Es ta traduzi i es ta djobe si testu sta dretu na ses língua. Es ta sforsa pa skodje ‘palavras sértu di verdadi’ ki ta da kel mésmu ideia di inglês na língua ki sta ta traduzidu pa el. — Eclesiastes 12:10.

Konputadoris ta poi trabadju bai más faxi. Konputador ka ta toma lugar di skritoris i tradutoris. Má simé, disionárius na konputador i prugramas di konputador pa faze piskiza, ta poi ses trabadju bai más faxi. Tistimunhas di Jeová faze un Sistéma di Konputador pa Trabadja Testu na un Monti Língua (MEPS), ki ta da pa konpo testu na senténas di língua. Ku es prugrama di konputador, fotus i dizenhus ta podu djuntu ku testu i ta fika prontu pa bai inprimi.

Pamodi ki nu ta faze tudu es sforsu pa traduzi pa un monti língua? Pamodi vontadi di Jeová é ‘pa tudu tipu di algen salva i pa es ten un konhisimentu izatu di verdadi.’ — 1 Timóteo 2:3, 4.

• Modi ki nos publikasons ta skrebedu?

• Pamodi ki nu ta traduzi pa un monti língua?

Tudu anu, nos organizason ta faze i ta distribui senténas di milhon di Bíblia i di otus publikason sen kobra nada. Nu ta faze Salons di Reinu i monti filial i nu ta kuida di es. Nu ta kuida di milharis di algen ki ta trabadja na Betel, di misionárius i nu ta djuda pesoas óras ki ta kontise un dizastri. Talvês bu pode pergunta: ‘Di undi ki dinheru ta ben pa nu konsigi faze tudu kel-li?’

Nu ka ta pidi dinheru nen nu ka ta kobra nada pa nos trabadju. Nos trabadju di pregason na mundu interu ta kusta txeu, má nu ka ta pidi ninhun dinheru pa el. Nos revista A Sentinela di agostu di 1879, flaba ma nu ta kridita ma Jeová ta kuida di nos i ‘nunka nu ka ta dipende di ómis nen nu ka ta pidi-s pa sustenta nos trabadju’. I, ti oji, nu ka faze kel-li! — Mateus 10:8.

Nos trabadju ta sustentadu ku kontribuisons di livri vontadi. Monti algen ta da txeu valor pa nos trabadju di inxina Bíblia na mundu interu i es ta apoia-l ku ses kontribuison. Tistimunhas di Jeová, es mê, es ta da ses ténpu, ses forsa, ses dinheru i otus kuza, ku alegria, pa djuda pa vontadi di Deus fazedu na mundu interu. (1 Crónicas 29:9) Na Salons di Reinu i na nos asenbleias ku kongrésus, ten kaxas ki nu pode faze kontribuison na es, si nu krê. Kontribuisons tanbê pode fazedu através di nos site, jw.org. Txeu di kel dinheru ta ben di pesoas ki ka é riku, sima kel viúva póbri ki Jizus ngaba pamodi el poi dôs muéda, ki ka baleba kuazi nada, na kaxa di oférta di ténplu. (Lúkas 21:1-4, BPK) Nton, un kalker algen pode fika ta ‘tra algun kuza pa poi di párti’ pa el da ‘konfórmi se korason disidi’. — 1 Coríntios 16:2; 2 Coríntios 9:7.

Nu ten sertéza ma Jeová sénpri ta da forsa pa ken ki krê ‘onra-l ku ses kuza di valor’, pa djuda óbras ki ten aver ku Reinu i pa se vontadi fazedu na Téra. — Provérbios 3:9.

• Di ki manera nos organizason é diferenti di otus relijion?

• Modi ki kontribuisons ta uzadu?

Sima nómi Salon di Reinu ta mostra, asuntu di Bíblia ki más ta faladu la é Reinu di Deus, ki tanbê éra téma di pregason di Jizus. — Lúkas 8:1, 2, BPK.

Es é lugar pa adora Deus di verdadi. É na Salon di Reinu ki ta organizadu pregason sobri notísias sábi di Reinu di Deus na zóna undi ki el ta fika. (Mateus 24:14) Ses tamanhu i ses fórma pode ser diferenti, má es tudu é un kaza sinplis. Txeu di es é uzadu pa más di un kongregason. Na últimus ténpu, nunbru di publikadoris i kongregasons sta ta bira más txeu. Pamodi kel-li nu faze un monti Salon di Reinu (más ô ménus sinku Salon pa dia). Modi ki nu ta konsigi faze kel-li? — Mateus 19:26.

Es ta fazedu ku kontribuisons ki ta dadu pa kel-la. Kes kontribuison li, ta mandadu pa filial pa uza pa kes kongregason ki meste faze ô konpo ses Salon di Reinu.

Es ta fazedu pa txeu tipu di algen ki ta trabadja sen kobra nada. Na un monti país, ta fazedu Grupus di Konstruson di Salons di Reinu. Pesoas di kel grupu li i otus ki krê djuda, ta bai di un kongregason pa kel otu na mésmu país pa pode faze Salons di Reinu, sikrê é na lugar izoladu. Na otus país, Tistimunhas di Jeová ku txeu spiriénsa ta skodjedu pa orienta na konstruson i na konpo Salon di Reinu na sértu lugar. Na tudu lugar di konstruson, ten txeu algen di zóna ki é kualifikadu i ki ta sta la ta trabadja di livri vontadi. Má kenha ki ta faze trabadju más txeu é kes irmon ki ta bai uza kel Salon di Reinu. Spritu di Jeová i sforsu di korason di se povu, ta faze tudu kel-li kontise. — Salmo 127:1; Colossenses 3:23.

• Pamodi ki lugar undi nu ta adora Deus ta txomadu Salon di Reinu?

• Modi ki nu ta konsigi faze Salons di Reinu na mundu interu?

Lugar undi ki nu ta adora Jeová é na Salon di Reinu. Pamodi kel-li, nu ta atxa ma é un ónra i un párti inportanti di nos adorason mante-l linpu, bunitu i ben kuidadu. Nos tudu nu pode djuda faze kel-li.

Djuda na linpéza dipôs di runion. Dipôs di tudu runion, txeu irmon i irman, ta djunta pa linpa faxi i ruma Salon di Reinu ku alegria. Un bês pa simana ta fazedu un linpéza jeral. Un ansion ô un ajudanti di kongregason ta orienta trabadju. Normalmenti es ta sigi un lista di trabadju. Konfórmi nisisidadi, kada un ta djuda na trabadjus sima bare i laba ô aspira txon, linpa puera, ruma kaderas, linpa i dizinfeta kazas-di-banhu, linpa janélas ku spedjus, bota lixu fóra, linpa párti di fóra di Salon i kuida di plantas. Peloménus un bês pa anu ta tradu un dia pa fazedu un linpéza konplétu. Óras ki nu ta poi nos kriansas ta partisipa na alguns trabadju, es ta prende ma nu debe ruspeta lugar di adora Deus. — Eclesiastes 5:1.

Djuda konpo kes kuza ki sta stragadu. Tudu anu ta fazedu un inspeson pa djobe si tudu kuza déntu ku fóra di Salon di Reinu sta dretu. Óras ki djobedu tudu kuza, sénpri ta konpodu kes kuza ki sta stragadu. Asi salon ta fika sénpri ben konpodu pa dipôs ka gastadu dinheru atoa. (2 Crónicas 24:13; 34:10) Si un Salon di Reinu ta sta linpu i ben kuidadu, el é un lugar ki ta sirbi dretu pa adora nos Deus. Óras ki nu ta partisipa na es trabadju, nu ta mostra ma nu ta ama Jeová i lugar undi ki el ta adoradu. (Salmo 122:1) I tanbê ta djuda pesoas di nos zóna fika ku un bon inpreson di nos. — 2 Coríntios 6:3.

• Pamodi ki nu ka debe dexa di kuida di nos lugar di adorason?

• Kuzê ki ta fazedu pa Salon di Reinu fika sénpri linpu?

Bu ta gostaba di faze piskiza pa sabe más di Bíblia? Bu krê prende más di un testu di Bíblia ô di un algen, di un lugar ô di un kuza ki Bíblia ta fala di el? Dja bu kustuma pergunta si Palavra di Deus pode djuda-u ku algun prubléma ki bu ten? Nton, bu pode uza bibliotéka di Salon di Reinu.

El ten publikasons ki ta djuda-u txeu na piskiza. Talvês bu ka ten tudu kes publikason di Bíblia, di Tistimunhas di Jeová, na bu língua. Na bibliotéka di Salon di Reinu bu ta atxa txeu di kes publikason novu. Bu pode atxa txeu traduson di Bíblia, un bon disionáriu ku otus livru inportanti pa piskiza. Bu pode sta avontádi pa uza bibliotéka antis i dipôs di runion. La pode ten un konputador ki ten Watchtower Library (Bibliotéka di Tori di Vijia) na el. Watchtower Library é un prugrama di konputador ki ten un monti di nos publikason i un sistéma di piskiza undi bu pode djobe un asuntu, un palavra ô un testu di Bíblia.

El ta sirbi sábi pa studantis di runion Vida i pregason. Bibliotéka di Salon di Reinu pode sirbi-u sábi pa bu faze piskiza pa bu pripara bus diziginason. É enkaregadu di runion Vida i pregason ki ten responsabilidadi di kuida di bibliotéka. El ta kuida ki tudu publikasons novu podu na bibliotéka i pa sta ben organizadu. Bu pode pidi-l ô pidi kel algen ki sta ta studa Bíblia ku bo pa mostra-u informason ki bu meste. Má ninhun livru di bibliotéka ka pode sai di Salon di Reinu. Nu debe uza livrus ku kuidadu, nu ka debe riska-s nen skrebe na es.

Bíblia ta splika ma si nu krê atxa ‘konhisimentu di Deus’, nu debe djobe-l ‘sima tizoru ki sta sukundidu’. (Provérbios 2:1-5) Bibliotéka di Salon di Reinu é lugar sértu pa kumesa djobe kes ‘tizoru’ li.

• Kuzê ki ten na bibliotéka di Salon di Reinu ki pode djuda-u faze piskiza?

• Kenha ki pode djuda-u uza bibliotéka dretu?

Jizus Kristu fla se disiplus: ‘Nhos dexa nhos lus límia na meiu di mundu, pa es pode odja nhos grandi trabadju i pa es da glória pa nhos Pai, ki sta na Séu.’ (Mateus 5:16) Pa nu pode faze kel-la, nu ta uza tekinolojia mudernu i internet, má nu ta uza-l dretu. Nos site, jw.org, é lugar na internet na undi ki nu ta atxa informasons di trabadju ki Tistimunhas di Jeová ta faze i di kuzê ki es ta kridita na el. Nton, ki tipu di informason bu ta atxa la?

Respóstas di Bíblia pa perguntas ki más ta fazedu. Bu pode atxa respóstas pa alguns di kes pergunta más inportanti. Pur izénplu, nu ten kes folhetu Sufrimentu ta kaba un dia? i Mortus pode vive otu bês?, ki sta na más di 600 língua. Tanbê bu pode lé Tradução do Novo Mundo na más di 130 língua i publikasons ki ta djuda-nu ntende Bíblia, sima livru Kuzê ki nu pode prende na Bíblia? i kes revista A Sentinela i Despertai! más novu. Bu pode lé ô obi txeu di kes publikason li na internet. Si bu krê bu pode diskarega-s na kes formatu txeu konxedu sima MP3, PDF ô EPUB. Bu pode ti inprimi alguns pájina na otu língua pa da un algen ki krê sabe más. Tanbê ten vídius di publikasons ki bu pode odja na uns 20 língua jestual. Bu pode tanbê diskarega dramas tradu di Bíblia, leitura di Bíblia dramatizadu i múzikas sábi pa bu obi óras ki bu krê ralaxa.

Informasons verdaderu sobri Tistimunhas di Jeová. Tanbê ta podu kes últimu notísia i vídius di trabadjus ki nu ta faze na mundu interu, kuzas ki sta ta kontise ku Tistimunhas di Jeová i modi ki nu ta sforsa pa djuda pesoas óras ki kontise un dizastri. Bu pode atxa notísias di kongrésus ki sta pa ben fazedu i nderésu di nos filial.

Kes-li é manera di nu dexa lus di verdadi límia na tudu kantu di mundu. Pesoas di tudu kontinenti, ti di kel kontinenti más friu i lonji ki ta txomadu Antártida, sta ta djudadu konxe verdadi. Nu ta faze orason pa ‘palavra di Jeová kontinua ta omenta faxi’ na mundu interu pa glória di Deus. — 2 Tessalonicenses 3:1.

• Modi ki nos site jw.org sta ta djuda más algen prende verdadi di Bíblia?

• Kuzê ki bu krê djobe na nos site?