Txeu algen dexa di bai igreja pamodi es ka atxa ninhun konsolu nen respóstas dretu pa ses pergunta. Nton, pamodi ki bu debe bai runion ki Tistimunhas di Jeová ta faze? Kuzê ki bu ta atxa la?

Nu ta xinti alegria di sta na meiu di algen ki ta mostra amor i ta preokupa ku kunpanheru. Dipôs ki Jizus móre, kristons ta staba djuntadu pa grupu ki ta txomada kongregason. Es ta fazeba runion pa adora Deus, pa studa Bíblia i pa da kunpanheru koraji. (Hebreus 10:24, 25) Na kel ténpu, kongregason éra xeiu di amor, tudu algen ta xintiba ma es staba na meiu di ses amigus di verdadi: ses irmons na fé. (2 Tessalonicenses 1:3; 3 João 14) Nu ta sigi ses izénplu i nu ta xinti mésmu alegria.

Nu ta odja valor di prende faze kuzê ki Bíblia ta fla. Sima na ténpu ki Bíblia skrebedu, oji tanbê ómis, mudjeris i minís pikinoti ta sta tudu djuntu na runion. Ómis ki sabe inxina Bíblia ta uza-l pa djuda-nu sabe modi ki nu pode faze na nos dia-dia kuzê ki Bíblia ta fla. (Deuteronómio 31:12; Neemias 8:8) Tudu algen pode kanta i partisipa na runion pa mostra ses fé na Deus. — Hebreus 10:23.

Nu ta djudadu pa nos fé fika más fórti. Apóstlu Polu skrebeba pa un di kes kongregason di se ténpu i el fla: ‘N tene gana odja nhos... pa nu da kunpanheru koraji, ku nos fé, kel di nhos ku kel di meu.’ (Romanos 1:11, 12) Na runion, sta djuntu ku irmons ta faze nos fé fika más forti i nu ta xinti más gana di faze kel ki Bíblia ta fla.

Bu sta konvidadu pa sisti nos runion i bu ta odja bo mê kes kuza ki nu studa na es lison. Bu ta ser resebidu sima un konvidadu spesial! Na runion bu ka ta paga nada nen bu ka ta pididu dinheru.

• Ki izénplu nos runion na kongregason ta sigi?

• Pamodi ki sisti runion é bon pa nos?

Sikrê nu ten ki anda kaminhu lonji na sól, na béntu ô na txuba, nu ka ta fika sen bai runion. Pamodi ki mésmu ku prublémas di vida i kansera dipôs di un dia di trabadju, Tistimunhas di Jeová ta sforsa txeu pa sta ku ses irmons na fé?

Nos irmons ta djuda-nu lida ku prublémas di vida. Modi ki pesoas na kongregason ta trata kunpanheru? Apóstlu Polu fla ma nu debe ‘nporta ku kunpanheru’. (Hebreus 10:24) Kel-li ta mostra ma nu debe tenta konxe dretu nos irmons i preokupa ku es. Óras ki nu konxe otus irmon na kongregason, nu ta odja ma alguns di es konsigi rezolve prublémas ki ta parse ku di nos i kel-la ta djuda-nu faze sima es.

Nu ta ranja grandis amigu. Na nos runion nu ta sta djuntu ku nos grandis amigu. Fóra runion, tanbê nu ta pasa ténpu djuntu ta divirti má di un manera dretu. Pamodi ki é bon nu sta djuntu ku nos irmons? Nu ta pasa ta da kunpanheru más valor i ta faze nos amor fika más fórti. Nton, ôki nos irmons ta pasa pa prublémas nu ta djuda-s na óra. (Provérbios 17:17) Óras ki nu ta sta djuntu ku tudu nos irmons di kongregason, nu ta mostra ma nu ta preokupa ku kunpanheru. — 1 Coríntios 12:25, 26.

Midjór kuza ki bu pode faze é ranja amigus ki ta faze vontadi di Deus. Kes tipu di amigus li, bu ta atxa-s na meiu di Tistimunhas di Jeová. Ka bu dexa nada inpidi-u di sta djuntu ku nos.

• Pamodi ki é bon nu sta djuntu na runion?

• Ki dia ki bu krê bai konxe nos kongregason?

Kes primeru runion ki sigidoris di Kristu ta fazeba éra sinplis. Es ta kantaba, fazeba orason i es ta studaba pártis di Bíblia. (1 Coríntios 14:26) Nos runion tanbê é kuazi sima kel-la.

Nu ta fala di asuntus di Bíblia i di kuzas ki nu ta meste na nos vida. Na fin di simana, kada kongregason ta djunta pa obi un Diskursu di Bíblia di 30 minutu. El ta mostra modi ki Bíblia é inportanti na nos vida i na ténpu ki nu sta ta vive gósi. Nos tudu nu pode abri i odja na nos Bíblia kuzê ki sta ta fladu. Dipôs di diskursu, nu ten Studu di Sentinéla, ki ta dura un óra. Ken ki krê pode partisipa. Nu ta uza un téma na revista Sentinéla pa studa, pa nu prende modi ki nu pode sigi konsedjus di Bíblia na nos vida. Na más di 110 mil kongregason, na mundu interu, ta studadu mésmu asuntu.

Nu ta djudadu midjora nos manera di inxina. Fóra fin di simana, tanbê nu ten otu runion di três párti ki ta txomadu Nos vida i nos trabadju di pregason. Es runion ta fazedu ku bazi na Folhetu di studu pa runion ‘Vida i pregason’, ki ta fazedu tudu mês. Primeru párti di es runion ki é ‘Tizorus di Palavra di Deus’ ta djuda-nu konxe midjór un párti di Bíblia ki tudu algen na kongregason ta lé antis di bai runion. Dipôs ten kel párti ‘Faze bu midjór na pregason’ ki ten dimonstrasons ki ta mostra modi ki nu pode pâpia ku otus algen sobri Bíblia. Ten un irmon enkaregadu ki ta da alguns konsedju pa djuda-nu midjora nos leitura i nos manera di pâpia ku otus algen. (1 Timóteo 4:13) Últimu párti di runion ki é ‘Vive sima un kriston’, ta mostra modi ki nu pode aplika prinsípius di Bíblia na nos vida. Na fin ten un párti ku perguntas i respóstas pa djuda-nu ntende Bíblia más dretu.

Óras ki bu bai pa un di nos runion, di sertéza bu ta fika spantadu ku edukason di Bíblia ki nu ta dadu ki é bon ki bale. — Isaías 54:13.

• Kuzê ki bu pode obi na runion di Tistimunhas di Jeová?

• Kal di nos runion bu ta gostaba di bai sisti?

Dja bu repara na fotus di es folhetu modi ki Tistimunhas di Jeová ta bisti dretu pa bai ses runion? Pamodi ki nu ta preokupa ku nos manera di bisti i di konpo?

Pa mostra ma nu ta ruspeta nos Deus. Nu sabe ma Deus ka ta julga algen pa kel ki ta parse. (1 Samuel 16:7) Má, óras ki nu ta djunta pa adora-l, nu ta krê mostra di korason ma nu ten ruspetu pa Jeová i pa nos irmons. Si nu sta ta bai inkontra ku un Rei ô ku un Prizidenti, di sertéza nu ta preokupa ku nos manera di bisti. Asi tanbê, nos manera di konpo i di bisti óras ki nu ta bai runion, ta mostra ma nu ta ruspeta Jeová Deus ki é ‘Rei pa tudu ténpu’, i ki nu ta ruspeta tanbê lugar ki nu ta bai adora-l. — 1 Timóteo 1:17.

Pa mostra ma nu ta sigi kel ki Bíblia ta fla na nos vida. Bíblia ta fla ma kristons ten ki bisti ku bon juís i ruspetu pa ses kabésa i pa otus. (1 Timóteo 2:9, 10) Si nu ten ‘bon juís’ nu ta skodje ropa bunitu má ki ka é dislexadu, nen izajeradu ki ta txoma txeu atenson pa nos. I, bisti ‘ku ruspetu’ krê fla ma nu ka debe bisti ropa skizitu, pertadu ô kurtu ki ta mostra pártis di korpu ki ka debe. Mésmu ku kel ki Bíblia ta fla li, inda nu pode skodje bisti di txeu manera diferenti. Sen fla nada, nu pode faze ‘ensinu di nos Salvador fika más bunitu’. I tanbê nu pode ‘da Deus ónra’ si nu sta ben bistidu i bunitu. (Tito 2:10; 1 Pedro 2:12) Óras ki nu bisti dretu pa bai runion, nu pode djuda pesoas ten un bon inpreson di nos adorason pa Jeová.

Ka bu dexa di bai runion sô pamodi ropa. Nos ropa ka meste ser karu ô di moda, basta el sta linpu i ben konpodu.

• Pamodi ki nos bistiménta é inportanti óras ki nu ta adora Deus?

• Kuzê ki Bíblia ta fla sobri manera ki nu debe bisti?

Si bu sta ta studa Bíblia ku Tistimunhas di Jeová, talvês bu ta pripara pa kada studu. Bu pode prende más txeu si bu pripara antis di bai runion na kongregason. Si bu pripara sénpri dretu i di mésmu manera, bu ta ten midjór rezultadus.

Skodje ki óra i na undi ki bu ta studa. Ki óra ki bu ta konsigi tra más pruvetu? Sédu palmanhan antis di trabadju? Ô di noti óras ki minís ba deta? Sikrê bu ka ta konsigi studa txeu ténpu, skodje kantu ténpu bu pode studa i ka bu dexa nada trapadja-u. Djobe un lugar kétu i fitxa tudu kuza ki ta tra-u atenson sima rádiu, tilivizon ô telemóvel. Faze orason antis di studa, ta djuda pa kes preokupason di kel dia ka diskonsentra-u di studa Palavra di Deus. — Filipenses 4:6, 7.

Sublinha kes pontu inportanti i pripara pa partisipa. Primeru, faze un leitura brévi pa panha un ideia di asuntu. Odja téma ô kapítlu, djobe modi ki kada subtéma ten aver ku téma i djobe fotus ô dizenhus i perguntas di rezumu di studu ki ta mostra kal ki é pontu más inportanti. Dipôs lé kada parágrafu i atxa respósta pa se pergunta. Djobe i lé testus di Bíblia ki sta skrebedu i pensa na modi ki es ta splika kel asuntu. (Atus 17:11, BPK) Óras ki bu atxa respósta, sublinha ô marka alguns palavra ô frazi inportanti ki ta djuda-u lenbra respósta na runion. Si bu krê, bu pode labanta mô na runion i faze un komentáriu kurtu na bus palavra, sima bu ntende.

Studa kes asuntu diferenti ki ta studadu na runion tudu simana ta djuda-u konxe Bíblia midjór. — Mateus 13:51, 52.

• Modi ki sénpri bu debe pripara pa runion?

• Modi ki bu pode pripara pa partisipa na runion?

Désdi ténpu antigu, vontadi di Jeová é pa tudu família pasa ténpu djuntu, sta unidu ku kunpanheru i fika más Se amigu. (Deuteronómio 6:6, 7) Pamodi kel-li, kes família ki é Tistimunha di Jeová, ta tra ténpu tudu simana pa adora Deus. Di un manera diskontraídu, es ta pâpia di asuntus ki es ta meste i ki ta djuda-s fika más amigu di Deus. Sikrê bu ta mora bo sô, ténpu ki bu ta tra pa studa ta djuda-u fika más amigu di Deus. Bu pode faze un planu pa studa un asuntu di Bíblia ki bu krê.

É un óra pa djuda-nu fika más amigu di Jeová. ‘Si bu bira más amigu di Deus el ta bira más bu amigu.’ (Tiago 4:8) Nu ta konxe Jeová midjór si nu prende más txeu di se manera di ser i di kuzas ki el ta faze, ki sta na Bíblia. Un manera faxi di nu kumesa faze adorason na família é uza un párti di ténpu pa lé Bíblia. Si bu krê, bu pode sigi prugrama di leitura di Bíblia ki sta uzadu na runion ‘Vida i pregason’. Kada un na família pode lé un párti di Bíblia na vós altu i dipôs tudu es pode fla kuzê ki es prende.

É un óra pa djuda família fika más amigu di kunpanheru. Maridu ku mudjer, pai ku mai ku fidju, ta fika más amigu di kunpanheru óras ki es ta studa Bíblia djuntu. Dia di adorason na família é un dia di simana ki tudu algen na família ta tene gana pa txiga, pamodi el ta pô-s ta fika kontenti i ku pas na korason. Pai ku mai pode skodje un asuntu inportanti ki ses fidju meste, konfórmi ses idadi. Es pode uza asuntus di revistas A Sentinela i Despertai! ô es pode tra asuntus na internet, na jw.org. Es pode pâpia de un prubléma ki ses fidju pasa na skóla i modi ki el pode lida ku el. Tanbê es pode odja prugramas ki ta dadu na nos site JW Broadcasting (tv.jw.org) i dipôs pâpia sobri kuzê ki es prende na kel prugrama. Ô talvês nhos pode atxa sábi trena kántikus ki ta ba uzadu na runion i nhos pode toma un lanxi dipôs di adorason na família.

Tudu simana família pode uza es momentu spesial pa adora Jeová tudu djuntu. Kel-li ta djuda-s xinti alegria na studa Palavra di Deus. Jeová ta bênsua txeu kel sforsu ki es ta faze. — Salmo 1:1-3.

• Pamodi ki nu ta tra ténpu pa faze adorason na família?

• Kuzê ki pai ku mai pode faze pa adorason na família fika sábi pa tudu algen?

Pamodi ki kes algen li sta rei di kontenti? Es sta na nos asenbleia. Kes algen ki ta sirbiba Deus na ténpu antigu, ta obiba ku se órdi di djuntaba três bês pa anu. (Deuteronómio 16:16) Nos tanbê nu ta tene gana pa asenbleias ku kongrésus txiga. Nu ta djunta três bês pa anu: nu ten dôs asenbleia di un dia i un kongrésu rijional di três dia. Pamodi ki asenbleias ku kongrésus é bon pa nos?

Ta djuda-nu fika más unidu ku kunpanheru. Sima israelitas na ténpu antigu ta xintiba filís na lova Jeová na meiu di txeu algen, nos tanbê nu ta gosta txeu di sta djuntu pa adora Deus na momentus spesial. (Salmo 26:12; 111:1) Es runion ta da-nu xansi di konxe Tistimunhas di Jeová di otus kongregason i ti di otus país. Na óra di almosu, nu ta kume la mê, djuntu ku nos irmons, sima un família. Kel-li ta da-nu más un xansi di faze amigus. (Atus 2:42, BPK ) La, kada un di nos ta xinti kel amor ki ta mante ‘nos irmons unidu na mundu interu’. — 1 Pedro 2:17.

Ta djuda nos amizadi ku Deus fika más fórti. Israelitas ta traba txeu pruvetu di kes runion grandi ki es ta fazeba, pamodi la es ta ‘ntendeba palavras’ di Skrituras. (Neemias 8:8, 12) Sima es, nos tanbê nu ta da txeu valor pa kes kuza ki nu ta inxinadu sobri Bíblia na asenbleias. Tudu kes kuza ki ta inxinadu é tradu di Bíblia. Nu ta obi diskursus ku dimonstrasons pa nu prende modi ki nu pode faze kel ki Deus krê na nos vida. Obi pesoas ta konta spiriénsa di modi ki es kontinua ta sirbi Deus mésmu ku txeu prubléma na ses vida, ta da-nu koraji. Na kongrésu rijional, ta ten dramas tradu di Bíblia ki ta sirbi di izénplu pa nos vida. Na tudu asenbleia, pesoas ki krê mostra ma es krê da ses vida pa Deus, ta batizadu.

• Pamodi ki nu ta sta rei di kontenti na asenbleias?

• Kuzê ki bu ta ganha óras ki bu bai pa un asenbleia?

Antis di Jizus móre el fla: ‘Es notísias sábi di reinu ta ben ser pregadu na mundu interu, pa sirbi di tistimunhu pa tudu nasons; i dipôs fin ta ben.’ (Mateus 24:14) Má, modi ki es pregason ta sérba fazedu na mundu interu? Nu ta faze-l sima Jizus ta fazeba kantu el staba na Téra. — Lúkas 8:1, 2, BPK.

Nu ta bai djobe pesoas na ses kaza. Jizus inxina se disiplus prega notísias sábi di kaza en kaza. (Mateus 10:11-13; Atus 5:42; 20:20, BPK) Na kel ténpu kes disiplu dadu un lugar pa es prega. (Mateus 10:5, 6; 2 Coríntios 10:13) Sima es, nos pregason oji é ben organizadu i kada kongregason ten un lugar pa prega. Kel-la ta djuda-nu faze kel ki Jizus manda ki é “pâpia pa tudu algen”. — Atus 10:42, BPK.

Nu ta faze di tudu pa nu atxa algen na undi ki es sta. Jizus da-nu bon izénplu. El prega na lugaris ki tinha txeu algen, sima bera-mar i na djuntu di posu ki é lugar ki ta tradu agu. (Marcos 4:1; João 4:5-15) Sima Jizus, nu ta pâpia di Bíblia ku pesoas na tudu lugar: na rua, na merkadu, na prasa ô pa tilifóni. Tudu bês ki ta da, nu ta pâpia di notísias sábi di Bíblia ku vizinhus, kolégas di skóla ô di trabadju i ku nos família. Pamodi sforsu ki nu ta faze, milhons di algen na mundu interu pode obi ‘notísias sábi pa ses salvason’. — Salmo 96:2.

Bu ta konsigi lenbra di algun algen ki bu pode pâpia ku el di notísias sábi di Reinu di Deus i splika-l modi ki kel-la ta djuda-l na se futuru? Ka bu guarda es notísia di speransa sô pa bo. Kumesa ta pâpia di el gósi!

• Ki ‘notísias sábi’ nu debe prega?

• Di ki manera Tistimunhas di Jeová ta prega sima Jizus?

Algen ki ta abri kaminhu pa un lugar, pa sirbi pa kes algen ki ta ben se tras, txeu bês ta txomadu di “pioneru”. Nu pode fla ma Jizus éra un pioneru, pamodi el mandadu pa Téra pa prega mensaji ki ta salva vida, nton el abri kaminhu pa salvason. (Mateus 20:28) Oji, sigidoris di Jizus ta imita se izénplu. Es ta pasa tudu ténpu ki es pode ta ‘faze disiplus’. (Mateus 28:19, 20) Alguns ta partisipa na un sirvisu ki ta txomadu sirvisu di pioneru.

Pioneru é un algen ki ta uza txeu di se ténpu na pregason. Tudu Tistimunhas di Jeová ta prega notísias sábi. Má, alguns faze planu na ses vida pa es sirbi di pioneru fíksu i es ta faze 70 óra pa mês na pregason. Pa kel-la txeu di es ta ranja un trabadju ki ka ta toma-s txeu ténpu. Otus ta skodjedu pa ser pioneru spesial pa es bai pa lugaris ki ta mestedu di más algen pa prega. Es ta faze 130 óra ô más pa mês na pregason. Pioneru ta sta kontenti di leba un vida sinplis, es ta kúnfia ma Jeová ta kuida di es. (Mateus 6:31-33; 1 Timóteo 6:6-8) Kes ki ka ta pode ser pioneru fíksu ô spesial pode sirbi sima ses situason ta da. Es pode ser pioneru ajudanti ki ta faze 30 ô 50 óra pa mês na pregason.

Pioneru ta prega pamodi el ten txeu amor pa Jeová i pa otus algen. Sima Jizus, nu ta da kónta ma pesoas sta frontadu ku prublémas di vida i es meste mésmu di konxe Deus i sabe kuzê ki el krê pa nos. (Marcos 6:34) Kel ki nu sabe di Bíblia pode djuda-s oji i da-s speransa sértu pa futuru. Pioneru ta uza txeu di se ténpu i forsa pa djuda algen sabe notísias sábi pamodi el ten txeu amor pa es. (Mateus 22:39; 1 Tessalonicenses 2:8) Nton, se fé ta fika más fórti, el ta bira más amigu di Deus i se vida ta bira más filís. — Atus 20:35, BPK.

• Modi ki bu ta splika kuzê ki é un pioneru?

• Pamodi ki algen ta krê ser pioneru?

Désdi monti ténpu, un marka di Tistimunhas di Jeová é edukason ki es ta resebe di Deus. Kes ki ta prega ténpu interu ô ta uza txeu di ses ténpu na pregason, ta trenadu pa es da ses midjór na ses trabadju. — 2 Timóteo 4:5.

Skóla pa Pioneru. Na fin di ses primeru anu di sirvisu, pioneru fíksu ta konvidadu pa bai pa un skóla di 6 dia. Kel skóla ta djuda-s fika más amigu di Deus, midjora na tudu manera di prega i tanbê ta djuda-s ka dizisti di ses sirvisu.

Skóla pa Pregadoris di Reinu. Es skóla di dôs mês é pa trena pionerus ki ten spiriénsa i ki ka ten prubléma na dexa lugar undi es ta mora pa bai pa undi mestedu di más algen pa prega. Es ta imita izénplu di Jizus Kristu, ki é midjór pregador ki dja vive na Téra. É sima si kada un di es fla: ‘Ale-m li, manda-m N bai.’ (Isaías 6:8; João 7:29) Óras ki es ta muda pa lonji, es ten ki kustuma ku un vida sinplis. Talvês kultura, klima i kumida ki ka ten nada ver ku kel ki es sta kustumadu ku el. Alvês es ten ki prende un otu língua. Es skóla é pa irmons ku irmans ki é solteru ô kazadu, ki ten di 23 ti 65 anu di idadi. Skóla ta djuda-s midjora ses kualidadi spritual ô kes kualidadi ki ta mostra ma es é amigu di Deus. Es meste kes kualidadi li na lugar ki es ta mandadu. Tanbê ta djuda-s ganha más kapasidadi pa es pode ser uzadu midjór pa Jeová i pa se organizason.

Skóla di Jiliádi di Tori di Vijia. Na língua ebraiku, un di kes língua ki Bíblia skrebedu, “Jiliádi” ten aver ku “Tistimu- nhu”. Désdi 1943, anu ki Skóla di Jiliádi kumesa, más di 8 mil algen ki dja faze es kursu mandadu pa da tistimunhu “pa tudu kantu di mundu” i ku bons rezultadu. (Atus 13:47, BPK) Pur izénplu, na Peru, ka tinha ninhun kongregason kantu nos misiónarius txiga la. Má gósi, la ten más di mil kongregason. Na Japon, kantu es kumesa ta prega la, tinha ménus di 10 Tistimunhas di Jeová. Oji, ten más di 200 mil. Na kes sinku mês di Skóla di Jiliádi, studantis ta faze un studu konplétu di Palavra di Deus. Pionerus spesial, misionárius, enkaregadus di grupu di kongregason ku pesoas ki ta trabadja na Betel pode ser konvidadu pa es skóla pa es resebe txeu trenamentu pa faze nos trabadju na mundu interu fika firmi i fórti.

• Skóla pa Pioneru ta sirbi pa kuzê?

• Ken ki pode bai pa Skóla pa Pregadoris di Reinu?