PERGUNTA 5

Kuzê ki N debe faze si nhas koléga di skóla ta faze-m abuzu?

PAMODI KI É INPORTANTI

Manera ki bu ta reaji pode midjora ô piora situason.

KUZÊ KI BU TA FAZEBA?

Imajina kel situason li: Oji Juanzinhu ka krê ba skóla, nen manhan nen nunka más. Dja ten três mês ki tudu kuza kumesa. Kolégas di skóla kumesa ta inventa kuzas pa pâpia mal di el. Dipôs es pô-l un monti nómi. Alvês es ta botaba se livrus na txon i es ta finji ma ka foi di abuzu. Tanbê, ta staba un grupu se trás, un algen ta pintxa-l i óras ki el vira, el ka ta konsigi sabe é kenha. Onti situason fika más pior pamodi el resebe un mensájen ta fla ma algen sta ba sota-l. . .

Si bo éra Juanzinhu, kuzê ki bu ta fazeba?

PARA I BU PENSA!

Bu ka meste fika di mô maradu! Má tanbê bu ka meste briga. Kuzê ki bu debe faze?

MANTE KALMU. Bíblia ta fla: ‘Tolu ta mostra tudu se raiba, má algen ki ten sabedoria ta mante kalmu i el ta kontrola-l.’ (Provérbios 29:11 ) Si bu kontínua kalmu, nen ki é sô pa fóra, ken ki sta faze-u abuzu pode dizisti.
KA BU DISKONTA. Bíblia ta fla: ‘Ka nhos paga ningen mal ku mal.’ (Romanos 12:17 ) Si bu diskonta situason ta piora.
FUJI DI PRUBLÉMA. Bíblia ta fla: ‘Algen spértu ta odja prigu i el ta sukundi’. (Provérbios 22:3 ) Faze tudu kel ki bu ta pode, pa bu fika lonji di kes algen ki pode pô-u na prubléma. Tanbê, ivita kes lugar undi bu sabe ma es pode sta.
PRIPARA UN RESPÓSTA KI TA DEXA-S SPANTADU. Bíblia ta fla: ‘Un respósta mansu ta branda raiba.’ (Provérbios 15:1 ) Tanbê bu pode brinka ku kel situason. Pur izénplu, si algen txoma-u di gordu bu pode fla: “É simé, N meste perde uns kilu!”
BA BU KAMINHU. Nora, ki ten 19 anu, fla: “Fika kaladu ta mostra ma bo é responsável i más fórti ki kel algen ki sta mexe ku bo. Asi bu ta mostra ma bo é diferenti di el i ma bu ta kontrola bu kabésa.” – 2 Timóteo 2:24.
PRENDE KÚNFIA MÁS NA BU KABÉSA. Kes ki ta faze algen abuzu, txeu bês ta sta ta djobe kolégas ki ten poku kunfiansa na ses kabésa i ki ka ta diskonta. Má óras ki es odja ma bu ka ta da-s xansi di kontrola-u, txeu bês es ta kaba pa dizisti.
KONTA ALGEN. Un mudjer ki éra prufesóra fla: “N ta fla tudu algen ki ta fazedu abuzu pa ka sufri kaladu. Konta algen é midjór kuza ki bu pode faze i asi bu pode ivita ki otu algen pasa pa mésmu situason.”

Un rapazinhu ta lida ku algen ki sta faze-l abuzu ku kunfiansa na se kabésa — Ten kunfiansa na bu kabésa ta da-u kel forsa ki ken ki ta faze-u abuzu ka ten

**KUZÊ KI BU SABE SOBRI ABUZU DI KOLÉGAS**
VERDADERU Ô FALSU	RESPÓSTAS
1 Dja ten txeu mil anu ki algen kumesa ta fazedu abuzu.	1 Verdaderu. Pur izénplu, Bíblia ta pâpia di uns jiganti, ki éra konxedu pa nefilins. Ses nómi siginifika ‘Kes ki ta poi otus algen kai’. – Gênesis 6:4.
2 Abuzu di kolégas é sô brinkadera. É ka ninhun prubléma.	2 Falsu. Txeu jóven ta mata kabésa pamodi abuzu di ses koléga.
3 Briga é midjór manera di lida ku abuzu di kolégas.	3 Falsu. Txeu bês kes algen ki ta abuza di ses koléga é más fórti ki kes ki ta fazedu abuzu. Pur isu ka bale péna tenta diskonta.
4 Si bu odja algen ta fazedu abuzu, é midjór finji ma nada bu ka odja.	4 Falsu. Na kel situason li, nu ka debe faze di kónta ma nada ka kontise. Si bu odja algen ta fazedu abuzu i bu ka fla nada, bu sta kontribui pa prubléma envês di tenta djuda rezolve.
5 Kes algen ki ta abuza di ses koléga ta da pa fórti, má es ten medu.	5 Verdaderu. Alguns di kes algen ki ta abuza di ses koléga ta da pa bon, má na fundu es ten medu i es ta dispreza otus algen pa es pode xinti supirior.
6 Kes algen ki ta abuza di ses koléga pode muda ses konportamentu.	6 Verdaderu. Si kes algen ki ta abuza di ses koléga djudadu, es pode muda ses manera di pensa i di aji.