-
Kuzê ki é Reinu di Deus?Vive filís pa tudu ténpu! — Un livru pa studa Bíblia
-
-
LISON 31
Kuzê ki é Reinu di Deus?
Kel mensaji más inportanti di Bíblia é Reinu di Deus. Jeová ta ben uza se Reinu pa bira Téra un paraízu. Kuzê ki é Reinu? Modi ki nu sabe ma el sta ta governa? Kuzê ki Reinu dja faze? I kuzê ki el ta ben faze na futuru? Kel lison li i kes otu dôs lison ta ben responde kes pergunta li.
1. Kuzê ki é Reinu di Deus i ken ki é se Rei?
Reinu di Deus é un govérnu ki Jeová faze. Se Rei é Jizus Kristu, ki ta governa la di Séu. (Mateus 4:17; João 18:36) Bíblia ta fla ma Jizus ta ‘ben ser Rei pa tudu ténpu’. (Lucas 1:32, 33) Dja ki Jizus é Rei di Reinu di Deus, el ta ben governa tudu algen na Téra.
2. Ken ki sta ba governa ku Jizus?
Jizus ka ta ba governa el sô. Algen di ‘tudu tribu, língua, povu i nason ta ben reina sobri Téra’ djuntu ku el. (Apocalipse 5:9, 10) Kantu algen ki ta ba governa ku Jizus? Désdi ki Jizus ben Téra, milhons di algen bira ta sigi-l. Má é sô 144 mil ki ta ba governa ku Jizus na Séu. (Lé Apocalipse 14:1-4.) Tudu kes otu algen ta ben vive na Téra dibaxu di Reinu di Deus. — Salmo 37:29.
3. Pamodi ki Reinu di Deus é mutu más midjór ki govérnus di ómi?
Mésmu ki kes ómi ki ta governa tenta faze kuzas dretu, es ka ten puder pa faze tudu kuza ki es krê. Tanbê, kes otu ki ta ben governa na ses lugar, txeu bês ka ta pensa sima es i es ka ta faze kuzas pa djuda povu. Má ningen ka ta ben toma lugar di Jizus, ki é Rei di Reinu di Deus. Deus ‘ta ben traze un Reinu ki ka ta kaba nunka más.’ (Daniel 2:44) Jizus ta ben governa Téra interu i el ta ben trata tudu algen igual. El ta mostra amor, bondadi i justisa. I el ta ben inxina pesoas trata kunpanheru di mésmu manera: ku amor, bondadi i justisa. — Lé Isaías 11:9.
SABE MÁS
Odja pamodi ki Reinu di Deus é mutu más midjór di ki kalker otu govérnu di ómi.
4. Reinu di Deus ta ben governa Téra interu
Jizus Kristu ten mutu más puder pa governa di ki kalker otu governanti ki dja izisti. Lé Mateus 28:18, i dipôs pâpia sobri kel pergunta li:
Pamodi ki Jizus ten mutu más puder pa governa di ki kalker govérnu di ómi?
Govérnus di ómi ta sta sénpri ta muda, i kada governanti ta governa sô un párti di Téra. I Reinu di Deus? Lé Daniel 7:14, i dipôs pâpia sobri kes pergunta li:
Reinu di Deus ‘ka ta distruídu.’ Pamodi ki kel-li é bon?
El ta ben governa Téra interu. Pamodi ki kel-li é bon?
5. Govérnus di ómi meste mudadu
Pamodi ki Reinu di Deus meste governa na lugar di govérnus di ómi? Odja VÍDIU, i dipôs pâpia sobri kel pergunta li:
Kal ki ten stadu ta ser rezultadu di govérnus di ómi?
Lé Eclesiastes 8:9, i dipôs pâpia sobri kes pergunta li:
Bu ta atxa ma Reinu di Deus debe fika na lugar di govérnus di ómi? Pamodi?
6. Reinu di Deus ten governantis ki ta ntende-nu dretu
Dja ki nos Rei Jizus vive li na Téra, el ta konsigi ‘ntende nos frakézas’. (Hebreus 4:15) Jeová skodje 144 mil ómi ku mudjeris fiel pa ba governa ku Jizus. Es é di ‘tudu tribu, língua, povu i nason’. — Apocalipse 5:9.
Bu ka ta xinti konsoladu di sabe ma Jizus i kes ki ta ba governa ku el ta ntende modi ki nu ta xinti i prublémas ki nu ta pasa pa el? Pamodi?
Jeová skodje ómis ku mudjeris di tudu país i kultura pa ba governa ku Jizus
7. Leis di Reinu di Deus é mutu más midjór di ki leis di ómi
Govérnus ta faze leis ki es ta atxa ma ta djuda i proteje ses povu. Reinu di Deus tanbê ten leis ki nu ten ki sigi. Lé 1 Coríntios 6:9-11, i dipôs pâpia sobri kes pergunta li:
Modi ki bu ta atxa ma mundu ta ben ser óras ki tudu algen sigi leis di Deus?a
Bu ta atxa ma Jeová ten direitu di spéra ma nu ta ruspeta leis di se Reinu? Pamodi?
Kuzê ki ta mostra ma kes algen ki ka sta obi ku kes lei li pode muda? — Odja versíklu 11.
Govérnus ta faze leis pa proteje i djuda ses povu. Reinu di Deus ten leis mutu más midjór ki ta proteje-nu i djuda-nu.
UN ALGEN PODE PERGUNTA: “Kuzê ki é Reinu di Deus?”
Modi ki bu ta respondeba?
REZUMU
Reinu di Deus é un govérnu na Séu ki ta ben governa Téra interu.
Perguntas di rezumu
Ken ki é kes ki ta governa na Reinu di Deus?
Pamodi ki Reinu di Deus é mutu más midjór di ki kalker govérnu di ómi?
Kuzê ki Jeová ta spéra di kes algen ki ta ben vive dibaxu di se Reinu?
DJOBE MÁS
Na undi ki Reinu di Deus ta fika? Odja kuzê ki Jizus inxina.
Pamodi ki Tistimunhas di Jeová ta skodje ser lial pa Reinu di Deus, envês di ser lial pa govérnus di ómi?
Odja kuzê ki Bíblia ta fla sobri kes 144 mil algen ki Jeová skodje pa ba governa ku Jizus.
Kuzê ki konvense un mudjer ki staba na kadia ma é sô Deus ki pode traze justisa na mundu?
“Modi ki N atxa respósta pa injustisas ki N ta odjaba” (Nhos korda!, novenbru di 2011)
-
-
Reinu di Deus dja sta ta governa!Vive filís pa tudu ténpu! — Un livru pa studa Bíblia
-
-
LISON 32
Reinu di Deus dja sta ta governa!
Reinu di Deus kumesa ta governa na Séu na 1914. Tanbê é na kel anu la ki kumesa ténpu di fin, kel ténpu ki govérnus di ómi ta staba kuazi ta kaba. Modi ki nu sabe kel-li? Odja kuzê ki Bíblia dja flaba ma ta ben kontiseba na mundu désdi 1914.
1. Kuzê ki Bíblia dja flaba?
Livru di Daniel dja flaba ma Reinu di Deus ta kumesaba ta governa na fin di un ténpu ki ta txomadu ‘seti ténpu’. (Daniel 4:16, 17) Monti anu dipôs, Jizus txoma kel mésmu ténpu di ‘kel ténpu markadu di nasons’, i el fla ma inda el ka kababa. (Lucas 21:24) Sima nu ta ben odja, kes seti ténpu kaba na 1914.
2. Kuzê ki sta ta kontise na mundu désdi 1914?
Disiplus di Jizus pergunta-l: ‘Na ki ténpu ki kes kuza li ta ben kontise i kal ki é sinal di bu prezénsa i di fin di es sistéma?’ (Mateus 24:3) Na respósta ki Jizus da-s, el fla-s txeu kuza ki ta ben kontiseba dipôs ki el kumesaba ta governa na Reinu di Deus na Séu. Alguns di kes kuza éra géra, fómi i tremor di téra. (Lé Mateus 24:7.) Bíblia tanbê dja flaba ma konportamentu di pesoas na ‘ténpu di fin’ ta poba vida ‘difísil di aguenta’. (2 Timóteo 3:1-5) Désdi 1914, kes kuza li sta ta kontise kada bês más txeu.
3. Pamodi ki mundu sta ta piora désdi ki Reinu di Deus kumesa ta governa?
Poku ténpu dipôs ki Jizus bira Rei di Reinu di Deus, el géra na Séu kóntra Satanás i se dimónis. Satanás perde kel géra. Bíblia ta fla ma ‘el botadu pa baxu pa Téra, i se anjus botadu pa baxu djuntu ku el.’ (Apocalipse 12:9, 10, 12) Satanás sta uma xatiadu pamodi el sabe ma el ta ben distruídu. Pur isu, el tene mundu xeiu di dór i sufrimentu. Kel-li ta djuda-nu ntende pamodi ki mundu sta di kabésa pa baxu! Má Reinu di Deus sta ben kaba ku tudu kes prubléma ki ten na mundu.
SABE MÁS
Odja modi ki nu sabe ma Reinu di Deus kumesa ta governa na 1914, i modi ki nu pode mostra ma nu ta kridita ma Reinu dja sta ta governa.
4. Bíblia ta mostra ma Reinu di Deus kumesa ta governa na 1914
Deus poi Nabukudunuzor, ki éra rei di Babilónia, ta ten un sonhu sobri kuzê ki ta ben kontiseba na futuru. Kuzê ki Nabukudunuzor odja i splikason ki Daniel da sobri kel sonhu, ta mostraba ma kes kuza tinha aver ku vida di Nabukudunuzor i ku Reinu di Deus tanbê. — Lé Daniel 4:17.a
Lé Daniel 4:20-26, i dipôs uza kuadru pa responde kes pergunta li:
(1) Kuzê ki Nabukudunuzor odja na kel sonhu? — Odja versíklus 20 i 21.
(2) Kuzê ki ta kontiseba ku kel arvi? — Odja versíklu 23.
(3) Kuzê ki ta kontiseba na fin di kes ‘seti ténpu’? — Odja versíklu 26.
Kuzê ki kel sonhu sobri arvi ten aver ku Reinu di Deus
PROFESIA (Daniel 4:20-36)
Ta governa
(1) Un arvi grandi
Govérnu para
(2) ‘Nhos bota kel arvi na txon’ i nhos dexa ‘pasa seti ténpu’
Govérnu kumesa otu bês
(3) ‘Nhu ta torna dadu reinu di nho otu bês’
Primeru kunprimentu di kel profesia li. . .
(4) Kenha ki kel arvi ta reprizentaba? — Odja versíklu 22.
(5) Ki ténpu ki el para di governa? — Lé Daniel 4:29-33.
(6) Kuzê ki kontise ku Nabukudunuzor na fin di kes ‘seti ténpu’? — Lé Daniel 4:34-36.
PRIMERU KUNPRIMENTU
Ta governa
(4) Nabukudunuzor, rei di Babilónia
Govérnu para
(5) Dipôs di 606 A.J., Nabukudunuzor bira dodu i el ka konsigi governa pa 7 anu
Govérnu kumesa otu bês
(6) Nabukudunuzor bira prontu otu bês i el kumesa ta governa
Sugundu kunprimentu di kel profesia li. . .
(7) Kenha ki kel arvi ta reprizentaba? — Lé 1 Crónicas 29:23.
(8) Ki ténpu ki es para di governa? Modi ki nu sabe ma es ka staba ta governa kantu Jizus staba na Téra? — Lé Lucas 21:24.
(9) Na ki ténpu i na undi ki kel govérnu li ta torna governaba?
SUGUNDU KUNPRIMENTU
Ta governa
(7) Reis israelita ki ta reprizenta govérnu di Deus
Govérnu para
(8) Jiruzalen distruídu i kes rei di Israel para di governa pa 2.520 anu
Govérnu kumesa otu bês
(9) Jizus ki é Rei di Reinu di Deus kumesa ta governa na Séu
Kantu ténpu ki dura kes seti ténpu?
Ten alguns párti na Bíblia ki ta djuda-nu ntende otus párti. Pur izénplu, livru di Apocalipse ta fla ma três ténpu i meiu ta da 1.260 dia. (Apocalipse 12:6, 14) Seti ténpu é dobru di 1.260 dia, ki ta da 2.520 dia. Alvês na Bíblia un dia ta reprizenta un anu. (Ezequiel 4:6) Mésmu kuza ta kontise ku kes seti ténpu ki livru di Daniel ta pâpia di el: es ta reprizenta 2.520 anu.
5. Mundu muda désdi 1914
Jizus dja flaba modi ki mundu ta sérba dipôs ki el biraba Rei. Lé Lucas 21:9-11, i dipôs pâpia sobri kel pergunta li:
Kal di kes kuza li bu sta odja ta kontise na mundu oji?
Apóstlu Polu fla modi ki pesoas ta sérba na ténpu di fin, óras ki govérnus di ómi ta staba kuazi ta kaba. Lé 2 Timóteo 3:1-5, i dipôs pâpia sobri kel pergunta li:
Bu sta ta odja pesoas ta konporta di kel manera li?
6. Mostra ma bu ta kridita ma Reinu dja sta ta governa
Lé Mateus 24:3, 14, i dipôs pâpia sobri kes pergunta li:
Ki trabadju inportanti ta mostra ma Reinu di Deus dja sta ta governa?
Modi ki bu pode partisipa na kel trabadju?
Reinu di Deus dja sta ta governa, i sta kuazi ta txiga kel dia ki el ta ben governa Téra interu. Lé Hebreus 10:24, 25, i dipôs pâpia sobri kel pergunta li:
Kuzê ki kada un di nos debe faze ‘sima nu ta ba ta odja kel dia ta txiga’?
Si bu sabia di algun kuza ki pode djudaba otus i salvaba ses vida, kuzê ki bu ta fazeba?
UN ALGEN PODE PERGUNTA: “Pamodi ki Tistimunhas di Jeová ta pâpia txeu di 1914?”
Modi ki bu ta respondeba?
REZUMU
Kes profesia di Bíblia i kuzas ki sta kontise na mundu oji, ta mostra ma Reinu di Deus dja sta ta governa. Nu ta mostra ma nu ta kridita na kel-li óras ki nu ta prega sobri el i nu ta sisti runion na kongregason.
Perguntas di rezumu
Kuzê ki kontise na fin di kes seti ténpu, sima sta na livru di Daniel?
Kuzê ki ta konvense-u ma Reinu di Deus kumesa ta governa na 1914?
Modi ki bu ta mostra ma bu ta kridita ma Reinu dja sta ta governa?
DJOBE MÁS
Odja kuzê ki alguns storiador i otus algen fla sobri mudansas ki kontise na mundu désdi 1914.
“Ki ténpu ki konportamentu na mundu kumesa ta straga más txeu” (Nhos korda!, abril di 2007)
Lé sobri modi ki kel profesia ki sta na Mateus 24:14 muda vida di un ómi.
“N ta gostaba di djuga beizebol más ki kalker kuza!” (Sentinéla, nunbru 3 di 2017)
Modi ki nu sabe ma profesia ki sta na Daniel kapítlu 4 ta aplika na Reinu di Deus?
“Ki ténpu ki Reinu di Deus kumesa ta governa? (Párti 1)” (Sentinéla, 1 di otubru di 2014)
Kuzê ki ta mostra ma kes ‘seti ténpu’ ki sta na kapítlu 4 di Daniel tirmina na 1914?
“Ki ténpu ki Reinu di Deus kumesa ta governa? (Párti 2)” (Sentinéla, 1 di novenbru di 2014)
a Odja kes dôs últimu artigu na párti “Djobe más” di kel lison li.
-
-
Kuzê ki Reinu di Deus ta ben faze?Vive filís pa tudu ténpu! — Un livru pa studa Bíblia
-
-
LISON 33
Kuzê ki Reinu di Deus ta ben faze?
Reinu di Deus dja sta ta governa. Ka ta dura el ta ben faze txeu mudansa na Téra. Nu ben odja alguns di kes kuza sábi ki Reinu di Deus ta ben faze.
1. Modi ki Reinu di Deus ta ben traze pas i justisa na Téra?
Jizus, ki é Rei di Reinu di Deus, ta ben kaba ku kes algen mau i govérnus di ómi na géra di Armajedon. (Apocalipse 16:14, 16) Na kel ténpu la, kel promésa di Bíblia li ta ben kunpri: ‘Ka ta dura kes algen mau ta ben dexa di izisti’. (Salmo 37:10) Jizus ta ben uza Reinu pa traze pas i justisa pa Téra interu. — Lé Isaías 11:4.
2. Modi ki nos vida ta ben ser óras ki vontadi di Deus fazedu na Téra?
Dibaxu di Reinu di Deus, ‘Téra ta ben ser di kes algen justu i es ta ben vive na el pa tudu ténpu.’ (Salmo 37:29) Imajina vive na un mundu undi ki tudu algen é justu, es ta ama Jeová i es ta ama kunpanheru! Ningen más ka ta fika duenti i tudu algen ta ben vive pa tudu ténpu.
3. Kuzê ki Reinu di Deus ta ben faze dipôs ki kes algen mau distruídu?
Dipôs ki kes algen mau distruídu, Jizus ta ben governa pa mil anu. Duránti kel ténpu, Jizus, djuntu ku kes 144 mil ki ta ba governa ku el, ta ben djuda pesoas na Téra bira perfetu. Na fin di kes mil anu, Téra ta sta un paraízu, xeiu di algen filís pamodi es ta obi ku leis di Jeová. Nton, Jizus ta ntrega Reinu pa se Pai, Jeová. Sima nunka ka fazedu antis, ‘nómi di Jeová ta ben ser santifikadu.’ (Mateus 6:9, 10) Ta ben fika provadu ma Jeová é un bon Governanti ki ta preokupa ku pesoas. Dipôs Jeová ta ben distrui Satanás, se dimónis i kalker algen ki disidi rabela kóntra Se govérnu. (Apocalipse 20:7-10) Reinu di Deus ta ben da-nu un vida perfetu ki ta dura pa tudu ténpu.
SABE MÁS
Odja pamodi ki nu pode kunfia ma Deus ta ben uza se Reinu pa kunpri tudu promésa sobri futuru ki sta na Bíblia.
4. Reinu di Deus ta ben kaba ku govérnus di ómi
‘Ómi ta manda na ómi pa se disgrasa.’ (Eclesiastes 8:9) Jeová ta ben uza se Reinu pa kaba ku kel injustisa li.
Lé Daniel 2:44 i 2 Tessalonicenses 1:6-8, i dipôs pâpia sobri kes pergunta li:
Kuzê ki Jeová i se Fidju, Jizus, ta ben faze ku govérnus di ómi i ku kes ki ta apoia-s?
Kuzê ki bu prende sobri Jeová i se Fidju ki ta da-u sertéza ma kes kuza ki es ta ben faze ta ser justu?
5. Jizus é midjór Rei ki ten
Jizus, ki é Rei di Reinu di Deus, ta ben faze txeu kuza pa djuda pesoas na Téra. Odja VÍDIU ki ta mostra ma Jizus krê djuda pesoas i ma Deus da-l puder pa el faze kel-la.
Kes kuza ki Jizus faze kantu el staba na Téra mostra kuzê ki Reinu di Deus ta ben faze. Kal di kes benson ki sta na kuadru bu tene vontadi di odja ta kontise? Lé kes testu di Bíblia pa djuda-u prende más sobri kes benson.
KANTU JIZUS STABA NA TÉRA, EL. . .
LA DI SÉU, JIZUS TA BEN. . .
kontrola kes forsa di naturéza. — Marcos 4:36-41.
rezolve prublémas di anbienti. — Isaías 35:1, 2.
da monti algen kumida. — Mateus 14:17-21.
kaba ku fómi na mundu. — Salmo 72:16.
kura tudu tipu di duénsa. — Lucas 18:35-43.
da tudu algen saúdi perfetu. — Isaías 33:24.
resusita pesoas. — Lucas 8:49-55.
resusita pesoas. — Apocalipse 21:3, 4.
6. Reinu di Deus ta ben da-nu un futuru rei di sábi
Reinu ta ben da-nu kel vida ki Jeová sénpri kreba pa nu tinha. Pesoas ta ben vive pa tudu ténpu na un paraízu na Téra. Odja VÍDIU pa sabe modi ki Jeová sta ta uza se Fidju, Jizus, pa kunpri Se vontadi.
Lé Salmo 145:16, i dipôs pâpia sobri kel pergunta li:
Modi ki bu ta xinti di sabe ma Jeová ta ben ‘faze vontadi di tudu kuza bibu’?
ALGUNS ALGEN TA FLA: “Si nu djunta mô, nu ta konsigi kaba ku tudu prubléma na mundu.”
Ki prublémas Reinu di Deus ta ben rezolve ki govérnus di ómi ka ta konsigi rezolve?
REZUMU
Reinu di Deus ta ben faze kel ki Deus krê pa el faze. El ta ben bira Téra interu un paraízu, xeiu di algen dretu ki ta adora Jeová pa tudu ténpu.
Perguntas di rezumu
Modi ki Reinu di Deus ta ben santifika nómi di Jeová?
Pamodi ki nu pode kridita ma Reinu di Deus ta ben kunpri tudu promésa ki sta na Bíblia?
Di tudu kes kuza ki Reinu ta ben faze, kal di es ki bu tene más vontadi di odja ta kontise?
DJOBE MÁS
Prende kuzê ki é Armajedon.
Sabe más sobri kes kuza ki sta ben kontise duránti kel ténpu ki Jizus txoma di “grandi tribulason”. — Mateus 24:21.
Odja modi ki famílias pode imajina ta vive djuntu na Paraízu.
Na artigu “N tinha txeu pergunta ki ta preokupaba mi”, odja modi ki un ómi ki rabela kóntra pulítika di se país, atxa soluson pa prublémas ki ta preokupaba el.
“Bíblia ta muda vida di algen” (Sentinéla, 1 di janeru di 2012)
-