Bu sabia?

Na ténpu di Jizus, ki tipu di inpostu ki pesoas tinha ki pagaba?

DURÁNTI txeu ténpu, israelitas ta daba dinheru pa apoiaba adorason verdaderu. Má, na ténpu di Jizus, judeus tinha ki pagaba txeu inpostu i kel-li poi ses vida ta bira difísil.

Pa apoiaba adorason ki es ta fazeba pa Deus na tabernákulu i dipôs na ténplu, tudu judeu adultu tinha ki pagaba meiu siklu (dôs drakma). Na ténpu di Jizus, es ta uzaba kes inpostu pa konpoba kel ténplu ki Eródis fazeba i pa kunpraba kes sakrifisiu ki es ta fazeba la. Alguns judeu pergunta Pedru si Jizus ta pagaba kel inpostu la. I Jizus splika ma ka éra eradu pagaba kel inpostu. I ti el fla Pedru na undi ki el ta atxaba un muéda pa pagaba kel inpostu. — Mat. 17:24-27.

Povu di Jeová tanbê tinha ki pagaba otu inpostu ki ta txomadu dízimu. Kel dízimu éra 10 pursentu di ses kodjéta ô di kel ki es ta ganhaba. (Lev. 27:30-32; Núm. 18:26-28) Kes xéfi di relijion ta insistiba ma povu devia pagaba dízimu di kada verdura, ti mésmu di ‘ortolon, di endru i di kuminhu’. Jizus ka éra kóntra paga dízimu. Má el txoma kes xéfi di relijion i kes farizeu di finjidus, pamodi manera ki es ta aplikaba lei di dízimu. — Mat. 23:23.

Na kel ténpu, éra romanus ki ta governaba judeus. Pur isu, tanbê es tinha ki pagaba es txeu inpostu. Pur izénplu, kes ki tinha téra, tinha ki pagaba inpostu ku dinheru ô ku kes kuza ki txon ta daba. Povu tinha ki pagaba entri 20 i 25 pursentu di kel ki téra ta daba. Tanbê kada judeu devia pagaba inpostu pa kabésa. É sobri kel inpostu li ki farizeus pergunta Jizus si es devia pagaba. Jizus mostra kuzê ki nu debe pensa sobri paga inpostu, kantu el fla: ‘Nhos paga Séza kel ki é di Séza, má nhos da Deus kel ki é di Deus.’ — Mat. 22:15-22.

Tanbê, kes algen ki ta resebeba produtus ô ki ta mandaba pa otus lugar, tinha ki pagaba inpostu. Ta staba algen pa resebeba inpostu na kais, na pontis, na alguns strada, na entradas di sidadis i na merkadus.

Kes inpostu ki es tinha ki pagaba pa Roma, éra un karga pizadu dimás pa es. Un storiador di Roma ki txoma Tásitu, fla un kuza ki kontise na ténpu ki Jizus staba na Téra, kantu Tibériu éra governador di Inpériu di Roma. El fla: “Síria ku Judea, pidi pa baxa-s inpostu, pamodi staba ta ser difísil pa es.”

Manera ki es ta kobraba inpostu, ta poba vida di pesoas más difísil inda. Kes algen ki ta pagaba inpostu más txeu, podia kunpraba direitu di kobra inpostu tanbê. Kes algen li, ta kontrataba otus algen pa kobraba inpostu pa es, i tudu es ta tenta ganhaba di algun manera. Ta parse ma Zakeu kontrataba alguns algen pa kobraba inpostu pa el. (Luc. 19:1, 2) Pur isu, ta da pa ntende pamodi ki povu ta staba xatiadu ku kel manera di kobraba inpostu i es ta odiaba kes algen ki ta kobraba inpostu.