Bu pode vive pa tudu ténpu

1. Modi ki midita na promésa di Jeová di da-nu vida pa tudu ténpu ta afeta-nu?

JEOVÁ ta promete ma kes algen ki ta obi ku el ta ben ten ‘vida pa tudu ténpu’. (Rom. 6:23) Óras ki nu ta midita na kel promésa li, nos amor pa Jeová ta fika más fórti. Pensa na kel-li: Nos Pai ki sta na séu ta ama-nu di tal manera ki nunka nu ka ta ben sipara di el.

2. Modi ki promésa di vive pa tudu ténpu ta djuda-nu?

² Promésa di Deus di vive pa tudu ténpu ta djuda-nu aguenta prublémas ki nu ta pasa pa el gósi. Sikrê nos inimigus ta amiasa-nu di mórti, nu ka ta para di sirbi Jeová. Pamodi? Un di kes motivu é pamodi nu sabe ma si nu móre fiel pa Jeová el ta ben resusita-nu ku speransa di vive pa tudu ténpu otu bês. (João 5:28, 29; 1 Cor. 15:55-58; Heb. 2:15) Pamodi ki nu pode ten sertéza ma nu ta konsigi vive pa tudu ténpu? Nu ben odja alguns motivu.

JEOVÁ TA VIVE PA TUDU TÉNPU

3. Pamodi ki nu pode ten sertéza ma Jeová ta konsigi da-nu vida pa tudu ténpu? (Salmo 102:12, 24, 27)

³ Nu sabe ma Jeová ta konsigi da-nu vida pa tudu ténpu pamodi el é Fonti di vida i el ta vive pa tudu ténpu. (Sal. 36:9) Nu ben odja alguns testu di Bíblia ki ta prova ma Jeová sénpri izisti i ma sénpri el ta kontinua ta izisti. Salmo 90:2 ta fla ma Jeová izisti ‘désdi sénpri i pa tudu ténpu’. Salmo 102 ta fla un kuza kuazi sima kel-li. (Lé Salmo 102:12, 24, 27.) I proféta Abakuki fla kel-li di nos Pai ki sta na séu: ‘Ó Jeová, abo sénpri bu ka izisti? Ó nha Deus, nha Santu, abo bu ka ta móre.’ — Hab. 1:12.

4. Nu debe fika preokupadu si nu ta atxa ma é difísil nu ntende ma Jeová sénpri izisti? Splika.

⁴ Bu ta atxa difísil ntende ma Jeová ta izisti ‘pa tudu ténpu’? (Isa. 40:28) Txeu otus algen tanbê ta atxa difísil ntende kel-li. Eliú fla kel-li sobri Deus: ‘Nunbru di anus ki el ten ta fuji di nos ntendimentu.’ (Jó 36:26) Má sô pamodi nu ka ta ntende alguns kuza, kel-li ka krê fla ma es é ka verdadi. Pur izénplu, nbóra nu pode ka ntende dretu modi ki lus ta funsiona, kel-li ka krê fla ma el ka izisti. Di mésmu manera, talvês nunka nu ka ta konsigi ntende dretu ma Jeová sénpri izisti i ma sénpri el ta kontinua ta izisti. Má kel-li ka krê fla ma Deus ka ta vive pa tudu ténpu. Nos Kriador sénpri izisti, sikrê nu ta ntende ô nau. (Rom. 11:33-36) Antis di kalker kuza na mundu izisti, sima sól i strélas, Jeová sénpri izistiba. Jeová ta garanti-nu ma ‘el é Kel ki faze téra ku se puder’. I el izisti antis di el ‘stende séu’. (Jer. 51:15; Atos 17:24) Ki otu motivu ta da-nu sertéza ma nu pode vive pa tudu ténpu?

DEUS FAZE-NU PA NU VIVE PA TUDU TÉNPU

5. Ki speransa ki Adon ku Eva tinha?

⁵ Tudu kuza bibu ki Jeová faze na téra ku ténpu pode móre, má algen é diferenti. El da-nu speransa di vive sen móre. Má Jeová aviza Adon: ‘Kel arvi di konhisimentu di kel ki é dretu i di kel ki é mariadu, bu ka debe kume, pamodi dia ki bu kume-l, di sertéza bu ta móre.’ (Gén. 2:17) Si Adon ku Eva obiba ku Jeová, es ka ta moreba. Nu pode kridita ma dipôs Jeová ta ben dexaba es kume di kel ‘arvi di vida’. Kel-li pode krê fla ma es ta ben tinha garantia di Jeová ma es ta viveba pa ‘tudu ténpu’.b — Gén. 3:22.

6-7. (a) Kuzê más ki ta mostra ma nu ka fazedu pa nu móre? (b) Kuzê ki bu krê faze na mundu novu? (Odja fotu i dizenhus.)

⁶ É interesanti ma alguns sientista atxa próva ki ta mostra ma nos sérbru pode guarda mutu más informason di ki kel ki nu ta prende duránti nos vida gósi. Na 2010, un artigu na un jornalc fla ma nos sérbru pode guarda informason mutu más txeu di ki 3 milhon di óra (ô más di 300 anu) di prugrama di tilivizon gravadu. I pode ser ki nos sérbru pode guarda mutu más informason di ki kel-li. Kel-li ta mostra ma Jeová faze nos sérbru pa guarda informason mutu más txeu di ki kel ki nu ta prende sô na 70 ô 80 anu. — Sal. 90:10.

⁷ Jeová tanbê faze-nu ku dizeju fórti di kontinua ta vive. Bíblia ta fla ma Deus ‘poi ténpu sen fin na korason’ di algen. (Ecl. 3:11) Kel-li é un di kes kuza ki ta pô-nu ta atxa ma mórti é sima un inimigu. (1 Cor. 15:26) Si nu tene un duénsa gravi, nu ka ta faze nada i nu ta spéra pa nu móre? Normalmenti nu ta konsulta na un dotor i alvês nu ta toma ramedi pa nu trata kel duénsa. Na verdadi, nu ta faze tudu kel ki nu pode pa nu ka móre. I óras ki un algen ki nu ta ama móre, ka ta nporta si el é jóven ô algen grandi, nu ta fika ku dór na korason i pa txeu ténpu. (João 11:32, 33) Nu pode kontinua ta prende pa tudu ténpu i nu ten un dizeju fórti di vive pa tudu ténpu pamodi nos Kriador, ki krê-nu txeu, faze-nu asi. Ta fika klaru ma el pode ben pô-nu ta vive pa tudu ténpu. Má ten otus motivu pa nu kridita ma nu pode vive pa tudu ténpu. Gósi nu ben odja kuzê ki Jeová faze na pasadu i kuzê ki el sta ta faze gósi ki ta prova ma kuzê ki el kreba désdi komésu ka muda.

KUZÊ KI JEOVÁ KREBA KA MUDA

8. Kuzê ki Isaías 55:11 ta inxina-nu sobri kuzê ki Jeová krê pa nos?

⁸ Nbóra Adon ku Eva peka, i pamodi kel-li ses fidjus dipôs ben móre, Jeová ka muda kuzê ki el kreba. (Lé Isaías 55:11.) Ti inda el krê da vida pa tudu ténpu pa kes algen ki é lial pa el. Nu sabe ma kel-li é simé pamodi kes kuza ki Jeová fla i ki el faze pa kunpri se vontadi.

9. Kuzê ki Deus promete? (Daniel 12:2, 13)

⁹ Jeová promete resusita kes algen ki móre i da-s vida pa tudu ténpu. (Atos 24:15; Tito 1:1, 2) Jó, ki éra un ómi fiel, tinha sertéza ma Jeová krê resusitaba kes algen ki móre. (Jó 14:14, 15) Proféta Daniel sabia ma algen pode resusitadu ku xansi di vive pa tudu ténpu. (Sal. 37:29; lé Daniel 12:2, 13.) Kes judeu na ténpu di Jizus tanbê sabia ma Jeová pode da kes algen ki ta sirbi-l di manera fiel ‘vida pa tudu ténpu’. (Luc. 10:25; 18:18) Jizus pâpia di kel promésa li txeu bês i se Pai resusita-l. — Mat. 19:29; 22:31, 32; Luc. 18:30; João 11:25.

10. Kuzê ki kes resureison na pasadu ta prova? (Odja dizenhu.)

¹⁰ É Jeová ki da-nu vida i el ten puder di resusita ken ki dja móre. El da proféta Elias puder di resusita fidju di un viúva di Sarefá. (1 Reis 17:21-23) Dipôs, ku ajuda di Deus, proféta Elizeu resusita fidju di un mudjer sunamita. (2 Reis 4:18-20, 34-37) Kes-li i otus resureison ta prova ma Jeová ten puder di resusita algen. Kantu Jizus staba na téra, el prova ma se Pai da-l kel puder li. (João 11:23-25, 43, 44) Gósi Jizus sta na séu i el dadu ‘tudu autoridadi na Séu i na Téra.’ Nton, el pode kunpri kel promésa ma ‘tudu kes ki sta na sipultura mimorial’ ta ben resusitadu ku speransa di kontinua bibu pa tudu ténpu. — Mat. 28:18; João 5:25-29.

11. Modi ki resgati abri kaminhu pa nu ten vida pa tudu ténpu?

¹¹ Pamodi ki Jeová dexa se Fidju, ki el krê txeu, móre di un manera ki el ta sufreba txeu? Jizus da respósta kantu el fla: ‘Deus ama mundu di tal manera ki el da se Fidju unijénitu, pa tudu kenha ki mostra fé na el ka ser distruídu, má pa ten vida pa tudu ténpu.’ (João 3:16) Kantu Deus da se Fidju pa salva-nu di nos pekadus, el abri kaminhu pa nu ten vida pa tudu ténpu. (Mat. 20:28) Apóstlu Polu splika kel párti inportanti li di vontadi di Deus kantu el fla: ‘Dja ki mórti ben através di un ómi, resureison di algen mortu tanbê ta ben através di un ómi. Pamodi, sima tudu algen ta móre na Adon, tanbê tudu algen ta ben resebe vida na Kristu.’ — 1 Cor. 15:21, 22.

12. Modi ki Reinu ta ben poi kel ki Jeová krê pa nos kontise?

¹² Jizus inxina se disiplus pa ora i pa pidi pa Reinu di Deus ben i pa vontadi di Deus fazedu na téra. (Mat. 6:9, 10) Un párti di vontadi di Deus é pa algen vive na téra pa tudu ténpu. Pa faze kel-li, Jeová skodje se Fidju pa ser Rei di Se Reinu. Deus dja skodje 144 mil algen li di téra, pa ba trabadja ku Jizus pa poi vontadi di Deus ta fazedu. — Apo. 5:9, 10.

13. Kuzê ki Jeová sta ta faze gósi i kuzê ki nu debe faze pa djuda kel-li kontise?

¹³ Gósi Jeová sta ta djunta ‘un monti di algen’ i el sta ta trena-s pa es vive dibaxu di se Reinu. (Apo. 7:9, 10; Tia. 2:8) Sikrê maioria di algen na mundu gósi sta divididu pamodi ódiu i géra, kes monti di algen ta sforsa txeu pa kaba ku tudu tipu di ódiu ki es tinha. Pa kuzas ki es ta faze, es sta ta mostra ma es sta ta transforma ses spada na aradu. (Miq. 4:3) Envês di partisipa na géra, ki ta poi txeu algen ta móre, es ta inxina algen sobri Deus verdaderu i se vontadi, asi es ta djuda-s atxa kel ‘vida di verdadi.’ (1 Tim. 6:19) Kes algen di ses família pode fika kóntra es ô es pode perde dinheru pamodi es ta apoia Reinu di Deus. Má Jeová ta da-s tudu kes kuza ki es meste. (Mat. 6:25, 30-33; Luc. 18:29, 30) Kel-li ta da-nu sertéza ma Reinu di Deus é un govérnu rial i ma el ta kontinua ta kunpri vontadi di Jeová.

UN FUTURU SÁBI STA PA BEN

14-15. Modi ki promésa di Jeová di kaba ku mórti pa tudu ténpu ta ben kunpri?

¹⁴ Gósi Jizus é Rei di Reinu di Deus na séu i el ta ben kunpri tudu promésa ki Jeová faze. (2 Cor. 1:20) Désdi 1914 Jizus sta ta domina se inimigus. (Sal. 110:1, 2) Ka ta dura, Jizus ku kes 144 mil ta ben distrui tudu kes algen mau. — Apo. 6:2.

¹⁵ Duránti Govérnu di mil anu di Jizus, el ta ben resusita kes algen ki móre i el ta djuda tudu kes ki obi ku Jeová bira perfeitu. Dipôs di próva final, kes ki Jeová atxa ma é justu ‘ta ben toma kónta di Téra i es ta ben vive na el pa tudu ténpu.’ (Sal. 37:10, 11, 29) Filismenti, ‘mórti ki é kel últimu inimigu ta ben kabadu ku el.’ — 1 Cor. 15:26.

16. Kal ki debe ser nos obijetivu prinsipal pa sirbi Jeová?

¹⁶ Sima dja nu odja, nos speransa di vive pa tudu ténpu ten bazi na Palavra di Deus. Kel speransa li pode djuda-nu kontinua lial duránti es ténpu di fin ki é difísil di vive. Má pa nu dexa Jeová kontenti, nu debe sirbi-l ka sô pamodi nu krê kontinua bibu. Nos obijetivu prinsipal pa nu kontinua lial pa Jeová i Jizus debe ser nos amor pa es. (2 Cor. 5:14, 15) Kel amor li ta pô-nu ku gana di imita-s i pâpia ku otus di kel speransa ki nu ten. (Rom. 10:13-15) Óras ki nu ta prende ka pensa sô na nos kabésa i gosta di da, Jeová ta krê ser nos amigu pa tudu ténpu. — Heb. 13:16.

17. Ki disizon kada un di nos debe toma? (Mateus 7:13, 14)

¹⁷ Nu ta ben ser un di kes ki ta ben ten vida pa tudu ténpu? Jeová ta da-nu kel oportunidadi li. Má é kada un di nos ki debe skodje kontinua na kaminhu ki ta leba pa vida. (Lé Mateus 7:13, 14.) Modi ki vida ta ben ser óras ki nu ben vive pa tudu ténpu? Nu ta ben odja respósta di kel pergunta li na kel otu studu.