Perguntas ki leitoris ta faze

2 Tesalonisensis 3:14 ta fla pa toma nóta di alguns algen. É ansions ô irmons na kongregason ki debe faze kel-li?

Apóstlu Paulu skrebe pa irmons na Tesalónika i el fla-s: “Si algen ka obi ku kel ki nu fla na es karta, nhos toma nóta di el”. (2 Tes. 3:14) Antis, nu ta flaba ma kel orientason li é pa ansions. Si un algen kontinua ta iginoraba prinsípius di Bíblia, sikrê dipôs di resebe txeu konsedju, ansions pode fazeba un diskursu pa kongregason. Pur isu, irmons ka ta pasaba ténpu ku kel algen alén di runion ku pregason.

Má, nu meste faze un mudansa. Gósi nu ta intende ma konsedju di Paulu é un disizon ki kada irmon debe toma di akordu ku kada situason. Nton gósi ansions ka meste faze un diskursu pa toma nóta di un algen. Pamodi ki nu sta faze kel mudansa li? Odja sobri kuzê ki apóstlu Paulu staba ta pâpia di el kantu ki el da kel konsedju li.

Paulu da kónta ma alguns irmon na kongregason éra “dizobidienti”. Es ka staba ta sigi kes konsedju di Palavra di Deus. Na un vizita ki apóstlu Paulu fazeba es antis, el fla: “Si un algen ka krê trabadja, tanbê pa el ka kume.” Má simé, alguns algen ka staba ta trabadja pa sustenta ses kabésa, enbóra es ta konsigi fazeba kel-la. Alén di kel-li, es staba ta mete na asuntus di otus algen. Modi ki kristons debe trataba kes algen li ki éra dizobidienti? — 2 Tes. 3:6, 10-12.

Paulu fla: “Nhos toma nóta di el”. Kel palavra gregu ta da ideia di djobe i toma kuidadu pa kel algen ka ser un mau influénsia pa nos. Paulu staba ta da kel konsedju li pa tudu algen na kongregason, ka sô pa ansions. (2 Tes. 1:1; 3:6) Nton si un irmon repara ma un otu irmon ô irman ka sta ta obi ku kes konsedju ki sta na Bíblia, el pode disidi “para di konvive” ku kel algen dizobidienti.

Kel-li krê fla ma kel algen debe tratadu sima un algen ki tradu di kongregason? Nau. Paulu fla: “Nhos kontinua ta konsedja-l sima un irmon.” Nton irmons pode kontinua ta sta ku el na runion i na pregason, má es pode disidi ka pasa ténpu ku el na otus okazion ô ta divirti. Pamodi? Paulu fla: “Pa el pode xinti vergónha.” Pamodi kel-li, kel irmon ô irman talvês pode xinti vergónha di se konportamentu i el pode muda. — 2 Tes. 3:14, 15.

Modi ki irmons pode sigi kel konsedju li gósi? Primeru, sima Paulu fla, nu meste ten serteza ma konportamentu di kel algen ta mostra ma el é “dizobidienti”. Paulu ka staba ta pâpia di pesoas ki ten opinion diferenti ki di nos na asuntus ki ten aver ku konsénsia ô asuntus pesoal. Tanbê, el ka staba ta pâpia di un algen ki magua-nu. Envês di kel-li, Paulu staba ta pâpia di kes algen ki dadu konsedju ku bazi na Bíblia, má simé es ka obi.

Oji, si nu repara ma un irmon ô un irman ka sta obi ku prinsípius di Bíblia,a nu ta disidi ka pasa ténpu ku el ô divirti ku el. Dja ki kel-li é un disizon di kada algen, nu debe pâpia di kel asuntu li sô ku kes algen di nos família ki nu ta mora djuntu. Inda nu pode sta ku kel algen na runion ô na pregason. I óras ki el muda se atitudi ô se konportamentu nu pode torna konvive ku el.