Kuzê ki pode djuda-u studa tudu simana
É DIFÍSIL pa bo studa tudu simana? Alvês bu ta xinti ma studa Bíblia é ka interesanti? Talvês nos tudu un óra ô otu dja xinti si. Má pensa na alguns kuza ki nu ta faze sénpri, sima toma banhu. Toma banhu ta leba ténpu i sforsu, má dipôs bu ta xinti sábi! Tanbê studa Bíblia pode ser konparadu ku toma banhu, ki dipôs ta pô-nu ta xinti frésku. (Efé. 5:26) Odja alguns sujiston ki pode djuda:
Faze un prugrama pa kada simana. Studu pesoal sta entri kes kuza “más inportanti” ki un sérvu di Jeová meste faze. (Flp. 1:10) Pa djuda-u sigi bu prugrama, bu pode skrebe dia i óra na un papel i pô-l na un lugar ki bu ta konsigi odja-l faxi. Ô bu pode poi alarmi na bu telemóvel ki ta lenbra-u un ténpu antis di bu óra di studu.
Pensa na kuzê ki ta djuda-u mante konsentradu. É más fásil pa bu konsentra si bu studa duránti txeu ténpu ô duránti poku ténpu, má más di ki un bês? Bo ki sabe kuzê ki ta ser midjór pa bo. Nton, pensa na kel-li óras ki bu ta faze un prugrama di studu. Si bu xinti ma bu ka ta konsigi studa na kel óra ki bu marka, pamodi ki bu ka ta tenta studa nen si for pa 10 minutu? Studa sikrê pa poku ténpu é más midjór di ki ka studa nada. I dipôs di studa 10 minutu, talvês bu ta gosta i bu ta krê studa pa más ténpu. — Flp. 2:13.
Disidi antis kuzê ki bu ta ba studa. Si bu xinta i dipôs bu pergunta kuzê ki bu sta bai studa, talvês bu pode ka sta ta ‘uza ténpu di midjór manera’. (Efé. 5:16) Pamodi ki bu ka ta faze un lista di artigus i asuntus ki bu ta gostaba di studa? Pur izénplu, si bu ten un pergunta sobri un asuntu ki bu ka ta intende dretu, skrebe-l na bu lista. I na fin di kada studu, bu pode poi otus ideia na bu lista di kuzê ki bu ta gostaba di studa.
Óras ki meste, muda bu prugrama. Más inportanti é pa bu studa tudu simana. Pa bu faze kel-li, si meste bu pode muda dia i óra ki bu ta studa, kantu ténpu ki bu ta studa, ô ki asuntu ki bu ta ba studa.
Nu ta ten bons rezultadu óras ki nu ta studa tudu simana. Nu ta bira más amigu di Jeová, nu ta prende aji ku sabedoria i nu ta xinti más inkorajadu. — Jos. 1:8.