Bu sabia?

Kuzê ki kes saserdóti ta fazeba ku sangi di kes animal ki es ta sakrifikaba na ténplu?

TUDU anu, kes saserdóti na Israel ta ofereseba milharis di sakrifisiu di animal na altar, na ténplu. Di akordu ku Juzefu, ki éra un storiador judeu na primeru séklu, na Páskua, más di 250 mil ovelha éra sakrifikadu. I pamodi kel-li un monti sangi ta bazaba na altar. (Lev. 1:10, 11; Nun. 28:16, 19) Kuzê ki ta kontiseba ku tudu kel sangi li?

Arkiólogus koba na vólta di ténplu ki Eródis faze i ki uzadu ti ki el distruídu na anu 70. La es atxa un lugar ki sangi ta pasaba pa sai pa fóra di ténplu.

Nu ben odja dôs kuza ki ta djudaba kel altar fika linpu:

• Kes braku na bazi ô pé di altar: Un livru antigu di leis i tradison di judeus, ki txoma Míxena, ki skrebedu dipôs di anu 200, ta splika modi ki éra kel lugar ki sangi ta saíba di altar. El ta fla: “Na ladu sudoésti tinha dôs braku. ... Kel sangi ki es ta bazaba na ladu oésti i na ladu sul ta koreba ti kel braku i el ta misturaba ku kel agu ki es ta uzaba pa linpa altar. Dipôs el ta koreba ti vali di Sedron.” Un otu livru ki ta konta stória di judeus ta pâpia di kel mésmu lugar ki kes arkiólogu atxa. Di akordu ku kuzê ki kes arkiólogu diskubri es ta konkorda ma talvês es ta uzaba kes braku pa tra sangi di altar.

• Txeu agu: Kes saserdóti ta mesteba txeu agu pa es manteba kel bazi ô pé di altar linpu i pa djudaba kel sangi pasa na kel braku. Pa fazeba kel-li, kes saserdóti ta mesteba txeu agu di sidadi. Kel agu ki kes saserdóti ta uzaba ta binha di sidadi através di kes kanal, sistérna i tanki. Arkiólogu Joseph Patrich fla ma “ninhun otu ténplu ki tinha na kel ténpu, ka tinha un bon manera sima kel-li di lebaba agu pa ténplu pa linpaba altar.”