Modi ki N pode ten bons nóta na skóla?

“Alguns di nhas koléga di skóla ta fika xintadu na aula sen livru i ku skutador, ta obi múzika timenti profesor ta pâpia. I es ta fika ta pergunta pamodi ki es ka ten bons nóta na skóla. Má tanbê ten kes algen ki sima mi, ta da ses midjór, ta studa sima dodu i simé ta ten nóta mariadu na testi. Pa N fla verdadi, N ka ta intende pamodi ki kel-li ta kontise. N ka ta xinti sábi óras ki N ta tra un nóta mariadu dipôs di pasa un simana ta studa ti tardi di noti.” — Yolanda.

Bu ta xinti sima Yolanda? É verdadi ki ten un nóta mariadu ô txeu nóta mariadu, pode poi algen ta xinti dizanimadu.

Alguns jóven ki ta kustuma ten nóta mariadu na skóla pode dizisti di tenta midjora ses nóta i otus pode ti larga skóla. Faze kel-li pode ser un tentason, má ten un otu manera di lida ku kel prubléma. Odja 6 kuza ki bu pode faze pa bu midjora bus nóta.

• Kuzê ki bu pode faze

• Kuzê ki otus jóven ta fla

Kuzê ki bu pode faze

• Sisti tudu aula. Pode parse ma kel-li é un kuza ki tudu algen sabe, má si bu falta txeu aula kel-li di serteza ta afeta bus nóta.

  “Na nha skóla kes mininu ki ka ta inportaba ku ses nóta é kes ki más ta faltaba aula, ki é un kuza ki ta prujudikaba es.” — Matthew.

  Konsedju di Bíblia: “Kel ki un algen símia, é kel ki el ta kodje tanbê.” — Gálatas 6:7.

• Presta atenson na aula. Sisti tudu aula dja é un kuza bon, má óras ki bu sta la, sforsa pa bu presta atenson. Tra bons apontamentu. Tenta kunpanha splikason di bu profesor. Si el dexa-u, faze perguntas duránti aula.

  “N ta faze txeu pergunta duránti aula pamodi N da kónta ma profesor ta splika midjór un asuntu óras ki el odja ma un alunu ka intende-l.” — Olivia.

  Konsedju di Bíblia: “Nhos presta atenson na modi ki nhos ta obi”. — Lukas 8:18.

• Ka bu kai na tentason di ser dizonéstu. Ten txeu manera di ser dizonéstu na skóla. Un di es é kôpia trabadju di otu algen. Kel-li é ka un kuza dretu i tanbê el ka ta dexa-u prende nada.

  “Si bu ka intende un kuza, ka bu kôpia respósta di testi di bus koléga. Óras ki bo é dizonéstu, kel-li ka ta djuda-u. Envês di prende rezolve prublémas bo sô, bu ta prende dipende di otus algen.” — Jonathan.

  Konsedju di Bíblia: “Pa kada un presta atenson na kuzê ki el ta faze, asi el ta ten motivu pa fika kontenti sô ku se kabésa”. — Gálatas 6:4.

• Poi trabadju di skóla na primeru lugar. Si ta da, faze bus trabadju di skóla antis di otus kuza, prinsipalmenti antis di bu tra ténpu pa diskansa i divirti.a Dipôs di tirmina bus trabadju di skóla, bu ta tra mutu más pruvetu di bu ténpu livri.

  “N disidi poi trabadju di skóla na primeru lugar i kel-li faze txeu diferénsa na nhas nóta. Kantu N ta txigaba na kaza N ta xintiba vontadi di durmi ô di obi múzika. Má N tenta faze nhas trabadju di skóla primeru i dipôs relaxa.” — Calvin.

  Konsedju di Bíblia: “Nhos djobe dretu kuzê ki é más inportanti”. — Filipensis 1:10.

• Pidi ajuda. Ka bu xinti vergónha di pidi ajuda di otus algen. Pidi konsedju di bu pai ku bu mai. Pidi ajuda di bu profesor pa bu midjora bus nóta. Na alguns situason, bai pa splikason pode djuda-u.

  “Pâpia ku bu profesor. Pidi-l pa el djuda-u intende matéria i midjora bus nóta. Bu profesor pode fika kontenti ku kel sforsu ki bu sta faze pa midjora bus nóta i el pode djuda-u.” — David.

  Konsedju di Bíblia: ‘Ku konsedju di txeu algen ta ten bons rezultadu.’ — Provérbios 15:22.

• Pruveta di kada oportunidadi. Na alguns país, testi ten perguntas spesial ki pode djuda-u ten nótas más altu. Tanbê bu pode oferese pa faze otus trabadju ki pode da-u xansi di subi bus nóta. Óras ki bu ten un nóta baxu na testi, si bu pidi, bu pode ten oportunidadi di torna faze-l.

  

  “Si N krê midjora nhas nóta na un disiplina, é mi ki ten ki da primeru pasu. N ta pergunta nhas profesor si ten algun otu trabadju ki N pode faze ô torna faze pa N subi nhas nóta.” — Mackenzie.

  Konsedju di Bíblia: ‘Ten vantajen na tudu tipu di trabadju duru’. — Provérbios 14:23.