Apocalipsis
3 »Tzʼiibʼa li ánjel re li chʼuut re Sardis: Aʼin li naxye li wank rikʼin li wuqubʼ chi chahim ut li wuqubʼ chi santil metzʼew li wank rikʼin li Yos: “Ninnaw laabʼaanuhom ut chanchan tawiʼ yoʼyokat abʼan kamenaqat. 2 Ajʼajaq aawu ut kawresi li toj xkanaak ut kachʼin chik ma kikamk xbʼaan naq inkʼaʼ xwil naq tzʼaqlojenaq laabʼaanuhom chiru Linyos. 3 Joʼkan bʼiʼ, jultikoʼq aawe junelik li xaakʼul ut xaawabʼi. Maakanabʼ xpaabʼankil ut yotʼ aachʼool ut jal laanaʼlebʼ. Joʼkan ajwiʼ, wi inkʼaʼ nakat-aj, tinchalq joʼ jun aj elqʼ ut maajoqʼe taanaw saʼ kʼaru hoonal tinwulaq.
4 »”Abʼan aran Sardis wank aawikʼin wiibʼ oxibʼ* li inkʼaʼ xeʼxtzʼajni li xtʼikrebʼ ut teʼbʼeeq wochbʼeen rikʼin saqi tʼirk xbʼaan naq xkʼulubʼebʼ. 5 Li tqʼaxoq u tiqtooq chi joʼkan rikʼin saqi tʼikr ut maajunwa tinbʼor li xkʼabʼaʼ saʼ xhuhil li yuʼam, tinye bʼan chiru Linyuwaʼ ut chiruhebʼ li xʼánjel naq ninnaw li xkʼabʼaʼ. 6 Li wank xxik chixkʼehaq xchʼool chi rabʼinkil li naxye li santil musiqʼej rehebʼ li chʼuut”.
7 »Tzʼiibʼa li ánjel re li chʼuut re Filadelfia: Aʼin li naxye li saant, li yoʼyo, li wank rikʼin xlaawil laj David, li naxte li okebʼaal ut maaʼani naru xtzʼapbʼal, li naxtzʼap li okebʼaal ut maaʼani naru xteebʼal: 8 “Ninnaw laabʼaanuhom. (Kʼe reetal, xinte chaawu jun li okebʼaal li maaʼani naru xtzʼapbʼal). Ut ninnaw naq, usta moko naabʼal ta aametzʼew, xaapaabʼ li waatin ut inkʼaʼ xaaye naq inkʼaʼ nakaanaw linkʼabʼaʼ. 9 Kʼe reetal, tinbʼaanu naq li wankebʼ saʼ xchʼuut laj Tza teʼchalq ut teʼxwiqʼibʼ ribʼ chaawoq ut tinbʼaanu naq teʼxnaw naq xatinra. Ebʼ li qas qiitzʼin li wankebʼ saʼ li chʼuut aʼin nekeʼxkʼe ribʼ choʼq aj judiiy abʼan moko joʼkan ta, ebʼ aj tikʼtiʼ. 10 Saʼ xkʼabʼaʼ naq xaakʼam aawe rikʼin linkuyum, laaʼin ajwiʼ tatinkol saʼ xhoonalil li tzʼilok ix li tchalq saʼ xbʼeen chixjunil li ruuchichʼochʼ re naq teʼtzʼilmanq rix li wankebʼ saʼ ruuchichʼochʼ. 11 Chi seebʼ tinchalq. Maakanabʼ xchapbʼal aawibʼ chi kaw rikʼin li ak wank aawikʼin re naq maaʼani tixmaqʼ laakoroon.
12 »”Li tqʼaxoq u tinkʼe choʼq roqechal li rochoch Linyos ut maajunwa t-elq aran. Ut saʼ xbʼeen xpeekem tintzʼiibʼa li xkʼabʼaʼ Linyos, linʼakʼil kʼabʼaʼ ut li xkʼabʼaʼ li xtenamit Linyos aʼ li Akʼ Jerusalén li naʼelk chaq saʼ choxa bʼarwiʼ wank Linyos. 13 Li wank xxik chixkʼehaq xchʼool chi rabʼinkil li naxye li santil musiqʼej rehebʼ li chʼuut”.
14 »Tziibʼa li ánjel re li chʼuut re Laodicea: Li naxkʼabʼaʼi Joʼkan Taxaq, li inkʼaʼ naxtzʼeqtaana li Yos ut paabʼajel ut li kiyobʼtesiik xbʼeenwa xbʼaan li Yos, naxye aʼin: 15 “Ninnaw laabʼaanuhom ut ninnaw naq inkʼaʼ kehat chi moko tiqat. Us raj naq kehat malaj tiqat. 16 Abʼan, saʼ xkʼabʼaʼ naq luluhat, tatinxaʼwa xbʼaan naq moko tiqat ta chi moko kehat. 17 Laaʼat nakaaye «bʼihomin, xintaw inbʼihomal ut maakʼaʼ chik paalt we» abʼan inkʼaʼ nakaakʼe reetal naq inkʼaʼ sa aachʼool, toqʼobʼ aawu, nebʼaʼat, mutzʼat ut tʼustʼukat. 18 Joʼkan naq tinkʼe aawe jun li naʼlebʼ naq taaloqʼ wikʼin li oor li nachaabʼilobʼresimank rikʼin xaml re naq tatbʼihomoʼq, taaloqʼ li saqi tʼikr re naq tatxik chi tiqto, chi joʼkan ebʼ li junchʼol inkʼaʼ teʼril naq tʼustʼukat ut tchalq aaxutaan ut taaloqʼ ajwiʼ xbʼanol saʼ laawu re naq taayul chiru ut tatruuq chi ilok.
19 »”Laaʼin ninqʼus ut nintij chixjunilebʼ li ninrahebʼ. Joʼkan naq yotʼ aachʼool ut jal laanaʼlebʼ ut kʼanjelan chiru li Yos chi anchal laachʼool. 20 Kʼe reetal, xaqxokin chiru li okebʼaal ut yookin xchʼeʼbʼal. Wi junaq li qas qiitzʼin narabʼi xyaabʼ inkux ut naxte li okebʼaal, tinʼoq saʼ rochoch ut ewu tinwaʼaq rochbʼeen ut aʼan twaʼaq wochbʼeen. 21 Li tqʼaxoq u tinkʼe chi chunlaak wikʼin saʼ linkʼojaribʼaal, joʼ chanru naq laaʼin xinqʼaxok u ut xinchunlaak rikʼin Linyuwaʼ saʼ li xkʼojaribʼaal. 22 Li wank xxik chixkʼehaq xchʼool chi rabʼinkil li naxye li santil musiqʼej rehebʼ li chʼuut”».