Apocalipsis
4 Chirix chik aʼan xwil chi teeto jun li okebʼaal saʼ choxa ut li xbʼeen yaabʼ kuxej li yook chi aatinank we chanchan xyaabʼ jun li trompeet ut kixye we: «Taaqen chaq arin ut tinkʼut chaawu li tento tkʼulmanq». 2 Tikto xinkanaak rubʼel xwankil li santil musiqʼej. Tojaʼ naq xwil jun li kʼojaribʼaal saʼ choxa ut wank jun li chunchu saʼ li kʼojaribʼaal. 3 Li chunchu saʼ li kʼojaribʼaal nalemtzʼunk joʼ li chʼinaʼusil pek jaspe ut sardio* ut saʼ xsutam li kʼojaribʼaal wank jun li kaqlaaqʼ* chanchan li chʼinaʼusil pek esmeralda xkʼabʼaʼ.
4 Ut xwil naq saʼ xsutam li kʼojaribʼaal wank 24 li kʼojaribʼaal bʼarwiʼ chunchukebʼ 24 li cheekel winq li tiqtokebʼ rikʼin saqi tʼikr ut wankebʼ xkoroon re oor saʼebʼ li xjolom. 5 Saʼ li kʼojaribʼaal kiʼelk chaq li xrepom kaaq, ebʼ li xyaabʼ kuxej ut li kaaq ut chiru li kʼojaribʼaal wank wuqubʼ li kandil* li lochlo rikʼin xaml. Aʼin reetalil li wuqubʼ chi santil metzʼew li wank rikʼin li Yos. 6 Ut xwil chiru li kʼojaribʼaal jun li nimla pumpukil haʼ, li chanchan lem, nalemtzʼunk ut kutan ru. Saʼ xyi li kʼojaribʼaal ut chi xsutam li kʼojaribʼaal wank kaahibʼ li ánjel ut nujenaqebʼ rikʼin saʼuhej joʼ chiruhebʼ joʼ chirixebʼ. 7 Li xbʼeen ánjel chanchan jun li kaqkoj, li xkabʼ ánjel chanchan jun li teelom wakax li toj saaj, li rilobʼaal li rox ánjel chanchan rilobʼaal winq ut li xka ánjel chanchan jun li tʼiw li yook chi rupupik. 8 Wank kaahibʼ li ánjel ut li junjunq wank waqibʼ xxikʼ ut ebʼ li xikʼ nujenaq rikʼin saʼuhej joʼ chirix joʼ chiru. Ut nekeʼxnumsi kutan ut qʼoqyink chi xyeebʼal: «Saant, saant, saant li Jehobʼa* Yos, li Nimajwal, li xwank chaq, li wank ut li tchalq».
9 Rajlal naq ebʼ li ánjel nekeʼxkʼe xloqʼal, nekeʼxnima ut nekeʼbʼanyoxink chiru li chunchu saʼ li kʼojaribʼaal, li yoʼyo ut twanq chi junelik, 10 li 24 chi cheekel winq nekeʼxwiqʼibʼ ribʼ chiru li chunchu saʼ li kʼojaribʼaal ut nekeʼxloqʼoni ru li wank chi junelik. Nekeʼxkʼe li xkoroon chiru li kʼojaribʼaal ut nekeʼxye: 11 «At Jehobʼa* li Qayos, aakʼulubʼ xkʼulbʼal li loqʼal, li nimaak ut li wankilal xbʼaan naq laaʼat xatyobʼtesink re chixjunil ut chixjunil wank xyuʼam xbʼaan naq joʼkan xaawaj laaʼat».