Ma jultik aawe?

Ma xaakʼe aachʼool chi rilbʼal ebʼ li hu Laj Kʼaakʼalehom li tojeʼ xeʼelk? Kʼe reetal ma tatruuq xsumenkil ebʼ li patzʼom aʼin:

Kʼaru naraj xyeebʼal xʼakʼobʼresinkil li qakʼaʼuxl? (Rom. 12:2).

Moko naraj ta xyeebʼal naq tqabʼaanu wiibʼ oxibʼ li chaabʼil naʼlebʼ. Naraj bʼan xyeebʼal naq tqatzʼil rix li wank saʼ xchamal li qachʼool ut xjalbʼal li aajel ru re naq chaabʼilaq li qayuʼam chiru li Jehobʼa (w23.01, perel 8 ut 9).

Kʼaʼut inkʼaʼ tsachq qachʼool rilbʼal li yook chi kʼulmank saʼ ruuchichʼochʼ?

Naqaj xnawbʼal li yook chi kʼulmank saʼ ruuchichʼochʼ ut chanru naxchap ribʼ rikʼin xtzʼaqlojik ru ebʼ li propesiiy. Abʼan inkʼaʼ naqaj xyeebʼal li naqakʼoxla li truuq xjachbʼal li chʼuut, naqaj bʼan naq chixjunil li naqaye elenaq chaq saʼebʼ li qatasal hu (1 Cor. 1:10) (w23.02, perel 16).

Kʼaru xjalanil li xkubʼik xhaʼ li Jesús rikʼin li xtzolom?

Moko aajel ta ru naq li Jesús tixqʼaxtesi li xyuʼam chiru li Yos xbʼaan naq kiyoʼlaak saʼ jun li tenamit li ak qʼaxtesinbʼil chiru li Jehobʼa. Xbʼaan naq maakʼaʼ xmaak, moko aajel ta ru naq tixpatzʼ xkuybʼal xmaak chiru li Yos (w23.03, perel 5).

Kʼaru tooruuq xbʼaanunkil re naq ebʼ li junchʼol teʼruuq chi tzʼaqonk saʼebʼ li chʼutam?

Moko nimaq ta roq li qasumenk, chi kamaʼan naabʼalebʼ naru nekeʼtzʼaqonk. Joʼkan ajwiʼ, miqaye chixjunil li xninqal ru naʼlebʼ re naq ebʼ li junchʼol wank kʼaru teʼxye (w23.04, perel 23).

Kʼaru li «Loqʼlaj Bʼe» li naxye saʼ Isaías 35:8?

Choʼq rehebʼ laj judiiy, aʼan li bʼe li wank joʼ eetalil li naʼelk chaq Babilonia toj Israel. Ut saʼebʼ li qakutan? Naabʼal siʼeent chihabʼ rubʼelaj li chihabʼ 1919, xeʼxtikibʼ xchaabʼilobʼresinkil li bʼe, joʼ eetalil kiʼok chi isimank chi huhil ut kijalmank saʼ jalan jalanq chi aatinobʼaal li Santil Hu. Li «Loqʼlaj Bʼe» naxbʼaanu naq li xtenamit li Yos teʼxloqʼoni ru li Jehobʼa ut saʼ li kutan chalk re teʼxyal xsahil li osobʼtesihom li tixkʼam chaq li Xʼawabʼejilal (w23.05, perel 15 toj 19).

Chirix kʼaru wiibʼ chi ixq naʼaatinak li tasal bʼeleebʼ re li hu Proverbios?

Li hu Proverbios naʼaatinak chirix li ixq li «maakʼaʼ naxnaw» ut naxye naq xpaabʼankil li xbʼoqom tooxkʼam saʼ «xnaʼajebʼ li kamenaq». Joʼkan ajwiʼ naʼaatinak chirix jun li ixq li naxkʼutbʼesi «li chaabʼil naʼlebʼ» ut naxye naq xkʼulubʼankil li xbʼoqom tooxkʼam saʼ «xbʼehil li seebʼal kʼaʼuxl» ut saʼ li yuʼam (Prov. 9:​1, 6, 13, 18) (w23.06, perel 22 toj 24).

Chanru xkʼutbʼesi li Jehobʼa naq naxkubʼsi ribʼ ut naq nanaʼlebʼak chiʼus rikʼin laj Lot?

Li Jehobʼa kixye re laj Lot naq t-elq saʼ li tenamit Sodoma ut txik saʼ li tzuul. Naq laj Lot kixtzʼaama re naq txik Zóar, li Yos kixkʼulubʼa (w23.07, perel 21).

Kʼaru truuq xbʼaanunkil jun li ixq wi li xbʼeelom naril li nekeʼxkʼut ribʼ chi tʼustʼu?

Jultika naq moko laaʼat ta wank aawe. Joʼkan naq us naq taakʼe aachʼool chirix laaʼamiiwil rikʼin li Jehobʼa ut naʼlebʼa rix ebʼ li eetalil li wank saʼ li Santil Hu chirixebʼ li ixq li xeʼxnumsi naabʼal li chʼaʼajkilal ut chanru li Jehobʼa kixkʼojobʼebʼ xchʼool. Naru taatenqʼa laabʼeelom re naq inkʼaʼ tixkʼe ribʼ saʼ junaq li naʼlebʼ li tixbʼaanu naq ttaneʼq wiʼ chik (w23.08, perel 14 toj 17).

Chanru nokooxtenqʼa naʼlebʼak chiʼus re naq tuulanaqo naq ani naxwechʼ rix li qapaabʼal?

Rikʼin li xpatzʼom tqanaw li naxkʼoxla malaj li naxik wiʼ xkʼaʼuxl. Aʼin tooxtenqʼa chi sumenk saʼ tuulanil (w23.09, perel 17).

Kʼaru nakaatzol rikʼin li kixbʼaanu li xMaría re xkʼulbʼal xmetzʼew?

Naq xrabʼi naq twanq joʼ xnaʼ li Mesiiy, li xMaría kixsikʼ xtenqʼ rikʼinebʼ li junchʼol. Laj Gabriel ut li xʼElisabet xeʼxwaklesi xchʼool rikʼin li Raatin li Yos. Jalanebʼ chik xmoos li Yos teʼruuq xkawubʼresinkil qachʼool (w23.10, perel 15).

Chanru truuq xsumenkil li Jehobʼa ebʼ li qatij?

Naxye qe naq trabʼi li qatij ut naxkʼe saʼ ajl li rajom naq naxsume li qatij (Jer. 29:12). Truuq xsumenkil li naqapatzʼ re saʼ jalan jalanq li naʼlebʼ, abʼan junelik tooxtenqʼa (w23.11, perel 21 ut 22).

Wi saʼ Romanos 5:2 ak naʼaatinak chirix li oybʼenihom, kʼaʼut naxye wiʼ chik saʼ li raqal kaahibʼ?

Naq jun li kristiʼaan narabʼi li chaabʼil esil, maare naroybʼeni wank chi junelik saʼ jun li chʼinaʼusil naʼajej arin saʼ Ruuchichʼochʼ. Abʼan, naq naxnumsi ebʼ li chʼaʼajkilal, xkuybʼal ut xnawbʼal naq sahaq saʼ xchʼool li Yos rikʼin, li roybʼenihom qʼaxal nakawuuk ut wank xwankil choʼq re (w23.12, perel 12 ut 13).