Bansangu ya Zole

24 Yehoashi vandaka ti bamvula nsambwadi ntangu yandi kumaka ntotila,+ mpi yandi yalaka bamvula 40 na Yeruzalemi. Zina ya mama na yandi Sibia muntu ya Bere-sheba.+ 2 Yehoashi landaka kusala mambu ya mbote na meso ya Yehowa bilumbu yonso ya nganga-nzambi Yehoyada.+ 3 Yehoyada solaka bankento zole sambu na yandi, mpi yandi butaka bana ya babakala ti ya bankento.

4 Na nima, nzala ya ntima ya Yehoashi vandaka ya kuyidika nzo ya Yehowa.+ 5 Yo yina, yandi vukisaka banganga-nzambi ti Balevi mpi yandi tubilaka bo nde: “Beno kwenda na bambanza ya Yuda mpi beno kutika mbongo na Izraele ya mvimba sambu na kuyidika nzo ya Nzambi na beno+ konso mvula; mpi beno sala diambu yai nswalu.” Kansi Balevi salaka ve nswalu.+ 6 Yo yina, ntotila bingaka mfumu Yehoyada mpi tubilaka yandi nde:+ “Sambu na nki nge me lomba ve Balevi na kubaka na Yuda mpi na Yeruzalemi mpaku ya santu yina Moize+ nsadi ya Yehowa tubaka, mpaku ya santu ya dibundu ya Izraele, sambu na tenta ya Kimbangi?+ 7 Sambu bana ya Atalia,+ nkento yina ya mbi, kotaka na ngolo na nzo ya Nzambi ya kieleka,+ mpi bo sadilaka bima yonso ya santu ya nzo ya Yehowa sambu na Babaale.” 8 Ebuna, na kulanda mambu yina ntotila tubaka, bo salaka sanduku+ mosi mpi bo tulaka yo na kielo ya nzo ya Yehowa,+ na nganda. 9 Na nima, bo tindaka nsangu na Yuda mpi na Yeruzalemi ya mvimba sambu bantu kunatila Yehowa mpaku ya santu+ yina Moize, nsadi ya Nzambi ya kieleka, zengilaka Izraele na ntoto-makanga. 10 Bamfumu yonso ti bantu yonso waka kiese,+ mpi bo landaka kunata makabu mpi kutula yo na sanduku tii kuna yo fulukaka.*

11 Konso ntangu yina Balevi vandaka kunata sanduku sambu bo pesa yo na ntotila mpi bo vandaka kumona nde mbongo vandaka mingi na kati, sekretere ya ntotila ti mumonisi ya mfumu ya banganga-nzambi vandaka kukwisa mpi kubasisa mbongo yonso yina vandaka na kati ya sanduku,+ na nima bo vandaka kuvutula yo na kisika na yo. Bo vandaka kusala mutindu yina konso kilumbu, mpi bo bakaka mbongo mingi. 12 Na nima, ntotila ti Yehoyada vandaka kupesa yo na bantu yina vandaka kutala kisalu ya nzo ya Yehowa, ebuna bo vandaka kubaka na kisalu bantu yina ke zengaka matadi ti bantu yina ke salaka bisalu ya maboko sambu na kuyidika nzo ya Yehowa;+ bo vandaka kubaka mpi na kisalu bantu yina ke salaka bisalu ya bibende mpi ya kwivre sambu bo yidika nzo ya Yehowa. 13 Bantu yina vandaka kutala kisalu yantikisaka yo, mpi kisalu ya kuyidika vandaka kukwenda na ntwala na nsi ya lutwadisu na bo; bo vutulaka nzo ya Nzambi ya kieleka mutindu yo vandaka ntete mpi bo kumisaka yo ngolo. 14 Ntangu bo manisaka, bo natilaka ntotila ti Yehoyada mbongo yina bikalaka, mpi bo sadilaka yo sambu na kusala bisadilu ya nzo ya Yehowa, bisadilu sambu na kisalu mpi sambu na kupesa makabu, makopa, mpi bisadilu ya wolo ti ya arza.+ Mpi bo vandaka kupesa bimenga ya kuyoka+ na nzo ya Yehowa mbala na mbala bilumbu yonso ya Yehoyada.

15 Ntangu Yehoyada kumaka mununu mpi ti bamvula mingi, yandi fwaka; yandi vandaka ti bamvula 130 ntangu yandi fwaka.16 Ebuna bo zikaka yandi na Mbanza ya Davidi kumosi ti bantotila,+ sambu yandi salaka mambu ya mbote na Izraele+ sambu na Nzambi ya kieleka mpi nzo na yandi.

17 Na nima ya lufwa ya Yehoyada, bamfumu ya Yuda kwisaka mpi fukamaka na ntwala ya ntotila, ebuna ntotila wilaka bo. 18 Bo yambulaka nzo ya Yehowa Nzambi ya ba-nkaka na bo mpi bo yantikaka kusadila banti ya santu* ti biteki, yo yina Nzambi wilaka Yuda ti Yeruzalemi makasi sambu na makambu na bo yina bo nataka. 19 Yehowa landaka kutindila bo bambikudi sambu na kuvutula bo na yandi, mpi bo landaka kukebisa* bo, kansi bo buyaka kuwa.+

20 Mpeve ya Nzambi kwisilaka* Zekaria mwana ya nganga-nzambi Yehoyada,+ ebuna yandi telamaka na ntwala ya bantu mpi tubilaka bo nde: “Nzambi ya kieleka ke tuba nde, ‘Sambu na nki beno ke fwa bansiku ya Yehowa? Beno ta nunga ve! Sambu beno me yambula Yehowa, yandi mpi ta yambula beno.’”+ 21 Kansi bo sadilaka yandi komplo+ mpi ntotila pesaka ntuma nde bo losila yandi matadi na kibansala ya nzo ya Yehowa.+ 22 Na mutindu yina, ntotila Yehoashi yibukaka ve zola ya kwikama yina tata* na yandi Yehoyada monisilaka yandi, mpi yandi fwaka mwana ya Yehoyada, yina tubaka mutindu yai ntangu yandi vandaka kufwa: “Bika nde Yehowa kutala diambu yai mpi kusambisa nge.”+

23 Na luyantiku ya mvula, basoda ya Siria kwisaka kunwanisa Yehoashi, ebuna bo kotaka na ngolo na Yuda mpi na Yeruzalemi.+ Na nima bo fwaka bamfumu yonso+ ya bantu, mpi bo tindilaka ntotila ya Damasi bima yonso yina bo botulaka. 24 Ata basoda ya Siria yina kwisaka kukota na ngolo vandaka fioti, Yehowa pesaka na maboko na bo basoda mingi kibeni,+ sambu bo yambulaka Yehowa Nzambi ya ba-nkaka na bo; yo yina bo* sambisaka Yehoashi mpi pesaka yandi ndola. 25 Ntangu bo bikisaka yandi (sambu bo bikaka yandi yandi me lwala ngolo*), bansadi na yandi sadilaka yandi komplo sambu yandi tiamunaka menga ya bana* ya nganga-nzambi Yehoyada.+ Bo fwaka yandi na mbeto na yandi.+ Yo yina yandi fwaka, mpi bo zikaka yandi na Mbanza ya Davidi,+ kansi bo zikaka yandi ve na maziamu ya bantotila.+

26 Yai bantu yina sadilaka yandi komplo:+ Zabadi mwana ya Shimeati mwana-nkento ya insi ya Amoni mpi Yehozabadi mwana ya Shimriti mwana-nkento ya insi ya Moabi. 27 Sambu na bana na yandi, baluzayisu mingi yina bo tindilaka yandi,+ mpi mutindu yandi yidikaka nzo ya Nzambi ya kieleka,+ bo me sonikaka mambu yai yonso na masonama* ya Mukanda ya Bantotila. Ebuna mwana na yandi Amasia kumaka ntotila na kisika na yandi.