Yeremia
51 Yehowa ke tuba nde:
2 Mono ta tindila Babilone bantu yina ke katulaka bampusu,
Bo ta katula yandi bampusu mpi bo ta bikisa insi na yandi mpamba;
Bo ta kwisa kunwanisa yandi na bandambu yonso na kilumbu ya mpasi.+
3 Muntu ya ke sadilaka munduki ya tolo-tolo kukonika* ve munduki na yandi ya tolo-tolo.
Mpi muntu mosi ve kutelama ti kinkutu na yandi ya kibende.
Beno wila ve baleke na yandi ya babakala mawa.+
Beno fwa basoda na yandi yonso.
4 Bo ta bwa mpi ta fwa na insi ya bantu ya Kaldea,
Bo me tobula bo na babala-bala na yandi.+
5 Sambu Izraele ti Yuda, Nzambi na bo, Yehowa ya makesa,+ me bikisaka bo ve bonso bankento ya mifwidi.
Kansi insi na bo* me fuluka ti mbi na meso ya Santu ya Izraele.
Beno fwa ve sambu na kifu na yandi.
Sambu yo kele ntangu yina Yehowa ke vutula mbi.
Yandi ke vutudila yandi mbi sambu na mambu yina yandi salaka.+
7 Babilone vandaka dikopa ya wolo na maboko ya Yehowa;
Yandi lawusaka ntoto ya mvimba.
8 Na mbala mosi Babilone me bwa mpi me bukana.+
Beno dila yandi!+
Beno baka balsami sambu na mpasi na yandi; ziku yandi lenda beluka.”
9 “Beto mekaka kubelula Babilone, kansi yandi lendaka kubeluka ve.
Beno bikisa yandi mpi beto kwenda, konso muntu na insi na yandi.+
Sambu lusambisu na yandi me kuma tii na zulu;
Yo kele na zulu kibeni tii na matuti.+
10 Yehowa me tula lunungu sambu na beto.+
Beno kwisa, beto tubila na Sioni kisalu ya Yehowa Nzambi na beto.”+
11 “Beno tula batolo-tolo makasi;+ beno baka bitaninu ya kele bonso dimbuma.*
Yehowa me simba ntima ya bantotila ya bantu ya Media,+
Sambu yandi kele ti ngindu ya kufwa Babilone.
Sambu yai mutindu Yehowa ke vutula mbi, mutindu yandi ke vutula mbi sambu na tempelo na yandi.
12 Beno tedimisa kidimbu*+ na bibaka ya Babilone.
Beno kengila ngolo, beno tula bankengidi.
Beno yidika bantu yina ta bumbana sambu na kunwanisa yo.
Sambu Yehowa me yindula mutindu ya kusala mambu,
Mpi yandi ta lungisa mambu yina yandi me sila sambu na bantu ya Babilone.”+
13 “O nkento yina ke zingaka na zulu ya bamasa mingi,+
Ti bimvwama mingi,+
Nsuka na nge me kwisa, nsuka* ya baluta yina nge vandaka kubaka.+
14 Yehowa ya makesa me zenga kieleka na zina na yandi mosi,*
‘Mono ta fulusa nge ti bantu, bantu mingi kibeni bonso bampasu,
Mpi bo ta tula milolo sambu bo me nunga nge.’+
15 Yandi Muntu salaka ntoto na ngolo na yandi,
Muntu yina na mayele na yandi+ tulaka ngolo ntoto ya ke butaka
Mpi yina tandulaka zulu na mayele na yandi ya kubakisa mambu.+
16 Ntangu yandi ke salaka nde ndinga na yandi kuwakana,
Bamasa yina kele na zulu ke kumaka kisaka-saka,
Mpi yandi ke salaka nde matuti* kutombuka katuka na nsuka ya ntoto.
Yandi ke basisaka nzasi* sambu na mvula,
Mpi yandi ke basisaka mupepe na banzo na yandi ya kubumbila bima.+
17 Konso muntu ke sala mambu na buzoba mpi kukonda nzayilu.
Konso muntu ya ke salaka bima ya bibende ta wa nsoni sambu na kiteki;+
Sambu kiteki na yandi ya kibende* kele luvunu,
18 Yo kele luvunu,*+ kisalu ya bo fwete seka.
Ntangu kilumbu ya kupesa yo ndola ta lunga, yo ta fwa.
19 Dikabu ya Yakobi kele ve bonso bima yina,
Sambu yandi Muntu salaka bima yonso,
Mpi nti ya dikabu na yandi.+
Zina na yandi Yehowa ya makesa.”+
20 “Nge kele nti ya bitumba sambu na mono, kinwaninu sambu na bitumba,
Sambu mono ta sadila nge sambu na kupanza makanda.
Mono ta sadila nge sambu na kufwa bimfumu.
21 Mono ta sadila nge sambu na kupanza mpunda mpi muntu yina ke tambusa yo.
Mono ta sadila nge sambu na kupanza pusu-pusu mpi muntu yina ke tambusa yo.
22 Mono ta sadila nge sambu na kupanza bakala mpi nkento.
Mono ta sadila nge sambu na kupanza mununu mpi mwana-bakala.
Mono ta sadila nge sambu na kupanza leke ya bakala mpi leke ya nkento.
23 Mono ta sadila nge sambu na kupanza ngungudi mpi bitwisi na yandi.
Mono ta sadila nge sambu na kupanza muntu ya ke salaka bilanga mpi bambisi na yandi.
Mono ta sadila nge sambu na kupanza bamfumu ya bambanza mpi bilandi ya bamfumu.
24 Mpi mono ta pesa Babilone mpi bantu yonso ya Kaldea ndola
Sambu na mambu yonso ya mbi yina bo salaka na Sioni na meso na beno,”+ Yehowa muntu me tuba.
25 “Tala! Mono ke nwanisa nge,+ O ngumba yina ke fwaka bantu,” Yehowa muntu me tuba,
“Nge muntu yina ke bebisaka ntoto ya mvimba.+
Mono ta tandula diboko na mono sambu na kupesa nge ndola mpi mono ta bwisa nge na matadi ya nene
Mpi mono ta kumisa nge ngumba yina bo me yokaka tiya.”
26 “Bantu ta baka ve na kisika na nge ditadi ya kinkonko to ditadi ya fondasio,
Sambu nge ta bikala mpamba kimakulu,”+ Yehowa muntu me tuba.
27 “Beno tedimisa kidimbu* na insi yai.+
Beno bula kibongo na kati ya makanda.
Beno sola* makanda sambu bo nwanisa yandi.
Beno binga bimfumu ya Ararati,+ ya Mini, mpi ya Ashkenazi+ sambu bo nwanisa yandi.
Beno bakila yandi mfumu ya basoda yina ke bakaka basoda ya mpa.
Beno nata bampunda bonso bana-bampasu.
28 Beno sola* makanda sambu bo nwanisa yandi.
Bantotila ya Media,+ bamfumu ya bambanza na yo, bilandi ya bamfumu na yo yonso,
Mpi bansi yonso yina bo ke yala.
29 Ntoto ta nikana mpi ta tekita,
Sambu bangindu yina Yehowa kele na yo sambu na Babilone ta lungana
Sambu na kukumisa insi ya Babilone kima ya ke pesa boma, kukonda muntu ya ke zinga kuna.+
30 Basoda ya Babilone me yambula kunwana.
Bo me vanda na bisika na bo ya ngolo.
Ngolo na bo me mana.+
Bo me kuma bonso bankento.+
Bo me tula banzo na yandi tiya.
Banti na yandi ya kukangila bakielo me bukana.+
31 Muntu mosi ya ke bakaka ntinu ke baka ntinu sambu na kukutana ti muntu ya nkaka ya ke bakaka ntinu,
Mpi kinati-nsangu mosi ke baka ntinu sambu na kukutana ti kinati-nsangu ya nkaka,
Sambu na kuzabisa ntotila ya Babilone nde bo me botula mbanza na yandi na bandambu yonso,+
32 Nde bo me botula+ bisika yina bo ke sabukaka na makulu,
Nde bo me yoka bamaswa ya bapapirusi tiya,
Mpi nde basoda kele na boma ya ngolo.”
33 Sambu Yehowa ya makesa, Nzambi ya Izraele, ke tuba nde:
“Mwana-nkento ya Babilone kele bonso kisika ya bo ke tutaka bambuma sambu na kukatula yo bampusu.
Yai ntangu ya kuniata-niata yandi ngolo.
Kubika fioti kibeni ntangu ya kukatula bima na bilanga ta lunga sambu na yandi.”
Yandi me tulula mono bonso dibungu ya mpamba.
Yandi me mina mono bonso nioka ya nene;+
Yandi me fulusa divumu na yandi ti bima na mono ya kitoko.
Yandi me yobisa mono mpi me losa mono.
35 ‘Mubulu yina bo salaka mono mpi nitu na mono kuvanda na zulu ya Babilone!’ muntu ya ke zingaka na Sioni+ muntu me tuba.
‘Mpi menga na mono kuvanda na zulu ya bantu ya Kaldea!’ Yeruzalemi muntu me tuba.”
36 Yo yina, Yehowa ke tuba nde:
Mono ta yumisa nzadi-mungwa na yandi mpi mono ta yumisa mabulu na yandi ya masa.+
37 Mpi Babilone ta kuma bita ya matadi,+
Kisika bambwa ya nseke ke lalaka,+
Kima ya ke pesa boma mpi kima ya kubudila mwita,
Kukonda bantu ya ke zinga kuna.+
38 Bo yonso ta ngana kaka bonso bana-bantambu.*
Bo ta ngana bonso bana ya ntambu.”
39 “Ntangu bo ta vanda na nzala ya ngolo, mono ta sadila bo nkinsi mpi mono ta lawusa bo,
Sambu bo vanda na kiese;+
Na nima bo ta lala mpongi ya kimakulu,
Yina bo ta telama ve,”+ Yehowa muntu me tuba.
40 “Mono ta nata bo bonso bana-mameme ya babakala ya bo ke nata sambu na kufwa,
Bonso mameme ya babakala kumosi ti bankombo.”
Mutindu Babilone me kuma kima ya ke pesa boma na kati ya makanda!
42 Nzadi-mungwa me luta na zulu ya Babilone.
Bitembo na yo ya mingi me fika yandi.
43 Bambanza na yandi me kuma kima ya ke pesa boma, ntoto ya kukonda masa mpi ntoto ya zelo na zelo.
Insi yina muntu mosi ve ta zinga mpi yina muntu mosi ve ta lutila.+
44 Mono ta tudila Bele+ dikebi na Babilone,
Mpi mono ta basisa na munoko na yandi bima yina yandi me mina.+
Makanda ta kwisa diaka ve kufuluka na yandi,
Mpi kibaka ya Babilone ta bwa.+
45 Beno basika na kati na yandi, beno bantu na mono!+
Beno tina makasi ya ngolo ya Yehowa+ sambu na kugulusa luzingu* na beno!+
46 Beno vanda kikesa mpi beno wa boma ve sambu na nsangu yina beno ta wa na insi.
Na mvula mosi nsangu ta kwisa,
Mpi na mvula ya ke landa nsangu ya nkaka ta kwisa,
Nsangu ya mubulu na insi yai mpi nsangu ya mfumu mosi ke nwana ti mfumu ya nkaka.
47 Yo yina beno tala! bilumbu ke kwisa
Ntangu mono ta tudila biteki ya Babilone dikebi.
Bo ta pesa insi na yandi ya mvimba nsoni,
Mpi bantu na yandi yonso yina bo ta fwa ta bwa na kati na yandi.+
48 Zulu ti ntoto mpi bima yonso ya kele na kati na yo
Ta tula milolo ya kiese ntangu Babilone ta bwa,+
Sambu bantu yina ke bebisaka ta katuka na nordi mpi ta kwisila yandi,”+ Yehowa muntu me tuba.
49 “Babilone salaka kaka ve nde bantu ya Izraele kubwa mpi kufwa+
Kansi bantu ya ntoto ya mvimba bwaka mpi fwaka na Babilone.
50 Beno bantu yina ke tina mbele ya bitumba, beno landa kukwenda, beno telama ve!+
Beno yibuka Yehowa katuka na kisika ya ntama,
Mpi beno yindula Yeruzalemi na ntima na beno.”+
51 “Bo me pesa beto nsoni, sambu beto me wa mutindu bo ke sosila beto.
Nsoni me simba baluse na beto,
Sambu banzenza me kwisa kunwanisa bisika ya santu ya nzo ya Yehowa.”+
52 “Yo yina beno tala! bilumbu ke kwisa,” Yehowa muntu me tuba,
“Ntangu mono ta tudila biteki na yandi dikebi,
Mpi na insi na yandi ya mvimba bantu ya me lwala ta dila.”+
53 “Ata kana Babilone kutombuka na zulu,+
Ata kana yandi kumisa ngolo bisika na yandi ya ngolo ya nda,
Bantu yina ke bebisaka ta katuka na mono mpi ta kwisa,”+ Yehowa muntu me tuba.
54 “Beno wa! Kudila ke katuka na Babilone,+
Makelele ya mpasi ya ngolo ke katuka na insi ya bantu ya Kaldea,+
55 Sambu Yehowa ke fwa Babilone,
Yandi ta kumisa ndinga na yandi ya nene pima,
Mpi bitembo na bo ta tula makelele bonso bamasa mingi.
Makelele ya ndinga na bo ta wakana.
56 Sambu muntu yina ke bebisaka ta kwisila Babilone;+
Bo ta kanga basoda na yandi,+
Bo ta zenga-zenga minduki na bo ya batolo-tolo,
Sambu Yehowa kele Nzambi yina ke pesaka ndola.+
Yandi ta pesa kibeni ndola.+
57 Mono ta lawusa bamfumu na yandi ti bantu na yandi ya mayele,+
Bamfumu ya bambanza na yandi, bilandi ya bamfumu na yandi, mpi basoda na yandi,
Mpi bo ta lala mpongi ya kimakulu,
Yina bo ta telama ve,”+ Ntotila muntu me tuba, yina zina na yandi kele Yehowa ya makesa.
58 Yehowa ya makesa ke tuba nde:
“Kibaka ya Babilone, ata yo kele nene, bo ta bwisa yo kimakulu,+
Mpi bakielo na yandi, ata yo kele nda, bo ta yoka yo tiya.
Bantu ta sala ngolo sambu na mpamba;
Makanda ta kudilembisa kaka sambu na kukumisa tiya ngolo.”+
59 Yai mambu yina mbikudi Yeremia songaka Seraya mwana ya Neria+ mwana ya Maseya ntangu yandi kwendaka ti Sidikiya ntotila ya Yuda na Babilone na mvula ya iya ya luyalu na yandi; Seraya vandaka muntu yina ke talaka bima ya ntotila. 60 Yeremia sonikaka na mukanda mosi bampasi yonso yina zolaka kubwila Babilone, mambu yai yonso ya bo sonikaka sambu na Babilone. 61 Diaka, Yeremia tubilaka Seraya nde: “Ntangu nge ta kuma na Babilone mpi ta mona yandi, nge fwete tanga mambu yai yonso na ndinga ya ngolo. 62 Na nima tuba nde, ‘O Yehowa, nge tubaka sambu na kisika yai nde bo ta fwa yo mpi nde yo ta bikala kukonda bantu, muntu to mbisi, mpi nde yo ta bikala mpamba kimakulu.’+ 63 Mpi ntangu nge ta manisa kutanga mukanda yai, kangisa yo na ditadi mpi losa yo na kati-kati ya Efrate. 64 Na nima tuba nde, ‘Yai mutindu Babilone ta dinda mpi yo ta telama diaka ve+ sambu na mpasi yina mono ke natila yo; mpi bo ta lemba.’”+
Bangogo ya Yeremia me suka awa.