Bansangu ya Ntete

23 Ntangu Davidi kumaka mununu mpi kumaka pene-pene ya nsuka ya luzingu na yandi,* yandi tulaka mwana na yandi Salomo ntotila ya Izraele.+ 2 Na nima yandi vukisaka bamfumu yonso ya Izraele, banganga-nzambi,+ mpi Balevi.+ 3 Bo tangaka ntalu ya Balevi yina vandaka na bamvula 30 mata;+ ntalu na bo, muntu mosi-mosi, vandaka 38 000. 4 Na kati na bo, bantu 24 000 vandaka kusala bonso bantwadisi ya kisalu ya nzo ya Yehowa; bantu 6 000 vandaka bamfumu mpi bazuzi,+ 5 bantu 4 000 vandaka bankengidi ya bakielo,+ mpi bantu 4 000 vandaka kupesa Yehowa lukumu+ ti bima ya kubudila miziki; Davidi tubaka sambu na yo nde, “Mono me sala yo sambu na kupesa Nzambi lukumu.”

6 Na nima Davidi yidikaka* bo na bimvuka+ na kutadila bana ya Levi: Gershoni, Kohati, mpi Merari.+ 7 Na bana ya Gershoni: Ladani ti Shimei. 8 Bana ya Ladani bo yai: Yehiele mfumu, Zetami, mpi Yoele,+ tatu. 9 Bana ya Shimei bo yai: Shelomoti, Haziele, mpi Arani, tatu. Bantu yai vandaka bamfumu ya banzo ya batata sambu na Ladani. 10 Bana ya Shimei bo yai: Yahati, Zina, Yeushi, mpi Beria. Bantu iya yai vandaka bana ya Shimei. 11 Yahati vandaka mfumu mpi Zizah, muntu ya zole. Kansi sambu Yeushi ti Beria vandaka ve na bana mingi bo tangaka bo bonso nzo mosi ya batata mpi bo vandaka ti kiyeka mosi.

12 Bana ya Kohati bo yai: Amrami, Yisare,+ Ebroni, mpi Uziele,+ iya. 13 Bana ya Amrami bo yai: Aroni+ ti Moize.+ Kansi bo tulaka Aroni na kingenga+ kimakulu sambu na kusantisa Kisika ya Kuluta Santu, yandi ti bana na yandi, sambu na kupesa bimenga na ntwala ya Yehowa, sambu na kusadila yandi, mpi sambu na kusakumuna bantu na zina na yandi konso ntangu.+ 14 Kansi Moize muntu ya Nzambi ya kieleka, bo tangaka bana na yandi na dikanda ya Balevi. 15 Bana ya Moize bo yai: Gershomi+ ti Eliezere.+ 16 Na bana ya Gershomi, Shebuele+ vandaka mfumu. 17 Na bana ya Eliezere, Rehabia+ vandaka mfumu; Eliezere vandaka ve na bana ya nkaka, kansi bana ya Rehabia vandaka mingi kibeni. 18 Na bana ya Yisare,+ Shelomiti+ vandaka mfumu. 19 Bana ya Ebroni bo yai: Yeria mfumu, Amaria muntu ya zole, Yahaziele muntu ya tatu, mpi Yekameami+ muntu ya iya. 20 Bana ya Uziele+ bo yai: Mika mfumu mpi Yishia muntu ya zole.

21 Bana ya Merari bo yai: Mali ti Mushi.+ Bana ya Mali bo yai: Eleazare ti Kishi. 22 Eleazare fwaka, kansi yandi vandaka ve na bana-babakala, kaka bana-bankento. Yo yina bampangi na bo bana ya Kishi kwelaka bo. 23 Bana ya Mushi bo yai: Mali, Edere, mpi Yeremoti, tatu.

24 Yai bana ya Levi na kutadila banzo ya batata na bo, bamfumu ya banzo ya batata, na kulanda bantu yina bo sonikaka bazina, yina bo tangaka, yina bo tulaka bazina na bo na lisiti, mpi yina vandaka kusala kisalu ya nzo ya Yehowa, yantika na bamvula 20 mata. 25 Sambu Davidi tubaka nde: “Yehowa Nzambi ya Izraele me pesa bantu na yandi ngemba,+ mpi yandi ta zingaka na Yeruzalemi kimakulu.+ 26 Diaka yo ta lomba ve nde Balevi kunata nzo-tenta to konso kisadilu na yo sambu na kisalu na yo.”+ 27 Sambu na kulanda bantuma ya nsuka ya Davidi, bo tangaka Balevi yina vandaka na bamvula yantika 20 mata. 28 Kisalu na bo vandaka ya kusadisa bana ya Aroni+ sambu na kisalu ya nzo ya Yehowa, ya kutala bibansala,+ basuku ya kudila madia, kukumisa bima yonso ya santu bunkete, mpi kusala konso kisalu yina vandaka mfunu sambu na nzo ya Nzambi ya kieleka. 29 Bo sadisaka na mampa ya kutetika,*+ fufu ya kitoko sambu na dikabu ya mbuma, bagaleti ya mampa ya kukonda levire,+ bagato ya bo me sala na kikalungu, pate ya fufu ya bo me vukisa ti bima ya nkaka,+ mpi bitesilu yonso ya kilo mpi ya nda. 30 Yo vandaka kulomba nde bo telama konso suka+ sambu na kutonda mpi kukumisa Yehowa, mpi kusala mutindu mosi na nkokila.+ 31 Bo vandaka kusadisa konso ntangu yina bo vandaka kupesa Yehowa bimenga ya kuyoka na Bisabatu,+ na bangonda ya mpa,+ mpi na bansungi ya bankinsi,+ na kulanda ntalu na bo mutindu minsiku vandaka kulomba, bo vandaka kusala yo mbala na mbala na ntwala ya Yehowa. 32 Bo vandaka mpi kulungisa bisalu na bo sambu na tenta ya lukutakanu, sambu na kisika ya santu, mpi sambu na bampangi na bo bana ya Aroni sambu na kisalu ya nzo ya Yehowa.