Bansangu ya Ntete

5 Yai bana ya Rubeni,+ mwana ya ntete ya Izraele. Yandi vandaka mwana ya ntete, kansi sambu yandi vwezaka* mbeto ya tata na yandi,+ bo pesaka nswa na yandi ya mwana ya ntete na bana ya Yozefi+ mwana ya Izraele, yo yina bo sonikaka ve zina na yandi na bandonga ya ba-nkaka na bo sambu na nswa ya mwana ya ntete. 2 Ata Yuda+ lutaka bampangi na yandi, mpi ntwadisi basikaka na yandi,+ nswa ya mwana-ntete vandaka ya Yozefi. 3 Bana ya Rubeni mwana ya ntete ya Izraele bo yai: Anoki, Palu, Esroni, mpi Karmi.+ 4 Bana ya Yoele bo yai: Shemaya mwana na yandi, Gogi mwana na yandi, Shimei mwana na yandi, 5 Mika mwana na yandi, Reaya mwana na yandi, Baale mwana na yandi, 6 mpi Beerah mwana na yandi, yina ntotila Tilgati-pilnesere+ ya Asiria nataka na insi ya nkaka; yandi vandaka mfumu ya bana ya Rubeni. 7 Bampangi na yandi na kutadila mabuta na bo, mutindu bo sonikaka bazina na bo na kulanda bandonga ya ba-nkaka na bo, mpi na kulanda bana na bo, bo yai: mfumu Yeyele, Zekaria, 8 mpi Bela mwana ya Azazi mwana ya Shema mwana ya Yoele, yina vandaka kuzinga na Aroere,+ tii na Nebo mpi Baale-meoni.+ 9 Na esti, yandi vandaka kuzinga tii na luyantiku ya ntoto-makanga, pene-pene ya Nzadi ya Efrate,+ sambu bitwisi na bo kumaka mingi na ntoto ya Gileadi.+ 10 Na bilumbu ya Saule, bo nwanaka ti bantu ya Agri, mpi bo bedisaka bantu yina, ebuna bo zingaka na batenta na bo na teritware ya mvimba ya esti ya Gileadi.

11 Bana ya Gadi vandaka kuzinga pene-pene na bo na ntoto ya Bashani tii na Saleka.+ 12 Yoele vandaka mfumu, Shafami kilandi, na nima Yanai mpi Shafati na Bashani. 13 Bampangi na bo yina vandaka bantu ya banzo ya batata na bo, bo yai: Mikaele, Meshulami, Sheba, Yorai, Yakani, Zia, mpi Ebere, na kimvuka nsambwadi. 14 Bantu yai vandaka bana ya Abihaile mwana ya Huri, mwana ya Yaroa, mwana ya Gileadi, mwana ya Mikaele, mwana ya Yeshishai, mwana ya Yado, mwana ya Buze. 15 Ahi mwana ya Abdiele, mwana ya Guni, vandaka mfumu ya banzo ya batata na bo. 16 Bo vandaka kuzinga na Gileadi,+ na Bashani+ mpi na babwala yina kele na nziunga na yo, mpi na banseke yonso ya Sharoni tii na bansuka na yo. 17 Bo sonikaka bazina na bo yonso na kulanda bandonga ya ba-nkaka na bo na bilumbu ya Yotami+ ntotila ya Yuda mpi na bilumbu ya Yeroboami*+ ntotila ya Izraele.

18 Bana ya Rubeni, bana ya Gadi, mpi ndambu ya dikanda ya Manase vandaka ti basoda ya ngolo 44 760 na makesa na bo yina vandaka kunata bitaninu mpi bambele ya bitumba mpi yina vandaka ti minduki ya batolo-tolo,* mpi bo zabaka bitumba mbote-mbote. 19 Bo nwanaka ti bantu ya Agri,+ Yeture, Nafishi,+ mpi Nodabi. 20 Nzambi sadisaka bo ntangu bo vandaka kunwana ti bantu yina, yo yina yandi pesaka bantu ya Agri ti bantu yonso yina vandaka ti bo na maboko na bo, sambu bo lombaka Nzambi na kusadisa bo na bitumba yina, ebuna yandi ndimaka kisambu na bo sambu bo tudilaka yandi ntima.+ 21 Bo botulaka bitwisi na bo: bashamo 50 000, mameme 250 000, ti bampunda 2 000; mpi bantu* 100 000. 22 Bantu mingi bwaka mpi fwaka, sambu Nzambi ya kieleka muntu nwanaka bitumba yina.+ Mpi bo zingaka na kisika na bo tii na ntangu ya bo nataka bo na insi ya nkaka.+

23 Bana ya ndambu ya dikanda ya Manase+ vandaka kuzinga na ntoto yina kele katuka na Bashani tii na Baale-ermoni, Senire, mpi Ngumba ya Ermoni.+ Bo vandaka mingi. 24 Bantu yai vandaka bamfumu ya banzo ya batata na bo: Efere, Yishi, Eliele, Azriele, Yeremia, Odavia, mpi Yadiele; bo vandaka basoda ya ngolo, bantu ya lukumu, mpi bamfumu ya banzo ya batata na bo. 25 Kansi bo salaka mambu kukonda kwikama na ntwala ya Nzambi ya ba-nkaka na bo mpi bo salaka pite ti banzambi ya bantu ya insi yina,+ bantu yina Nzambi manisaka na ntwala na bo. 26 Yo yina Nzambi ya Izraele pusaka ntima ya Pule ntotila ya Asiria+ (disongidila, Tilgati-pilnesere+ ntotila ya Asiria) ebuna yandi nataka bana ya Rubeni, bana ya Gadi, mpi ndambu ya dikanda ya Manase na Ala, na Abore, na Hara, mpi na nzadi ya Gozani,+ kisika bo kele tii bubu yai.