Bansangu ya Ntete

11 Na nima, bantu yonso ya Izraele vukanaka pene-pene ya Davidi na Ebroni+ mpi tubaka nde: “Beto kele bampangi na nge ya menga.*+ 2 Ntete, ntangu Saule vandaka ntotila, nge muntu vandaka kutwadisa Izraele na bitumba.*+ Ebuna Yehowa Nzambi na nge tubilaka nge nde: ‘Nge ta gungula bantu na mono Izraele, mpi nge ta kuma ntwadisi ya bantu na mono Izraele.’”+ 3 Yo yina bankuluntu yonso ya Izraele kwisaka na Ebroni kisika ntotila vandaka, ebuna Davidi salaka kuwakana ti bo na Ebroni na ntwala ya Yehowa. Ebuna bo tulaka Davidi mafuta sambu yandi kuma ntotila ya Izraele,+ na kuwakana ti mambu yina Yehowa tubaka na nzila ya Samuele.+

4 Na nima, Davidi ti Izraele ya mvimba kwendaka na Yeruzalemi, disongidila, Yebusi,+ insi yina bantu ya Yebusi+ vandaka kuzinga. 5 Bantu ya Yebusi sosilaka Davidi nde: “Nge ta kota ve awa ata fioti!”+ Kansi Davidi botulaka kisika ya ngolo ya lutaninu ya Sioni,+ yina kele ntangu yai Mbanza ya Davidi.+ 6 Yo yina Davidi tubaka nde: “Muntu ya ntete yina ta bula bantu ya Yebusi ta kuma ntwadisi mpi mfumu.” Ebuna Yoabi+ mwana ya Seruya kwendaka muntu ya ntete, mpi yandi kumaka mfumu. 7 Na nima, Davidi kumaka kuzinga na kisika yina ya ngolo ya lutaninu. Yo yina bo bingaka yo Mbanza ya Davidi. 8 Yandi yantikaka kutunga mbanza yina na nziunga, katuka na Mwa-Ngumba* tii na bisika yina vandaka na nziunga na yo, mpi Yoabi yidikaka mbanza yina bikalaka. 9 Ebuna Davidi vandaka kukuma kaka ngolo mingi,+ mpi Yehowa ya makesa vandaka ti yandi.

10 Yai bamfumu ya basoda ya ngolo ya Davidi, yina sadisaka yandi mingi kibeni na kimfumu na yandi, kumosi ti Izraele ya mvimba, sambu na kukumisa yandi ntotila na kuwakana ti mambu yina Yehowa tubaka sambu na Izraele.+ 11 Yai lisiti ya basoda ya ngolo ya Davidi: Yashobeami+ mwana ya muntu mosi ya Akmoni, mfumu ya bantu tatu.+ Yandi taka dikonga na yandi na zulu ya bantu 300 mpi bo fwaka na mbala mosi.+ 12 Na nima na yandi kuvandaka Eleazare+ mwana ya Dodo, muntu ya Ahohi.+ Yandi vandaka na kati ya basoda tatu ya ngolo. 13 Yandi vandaka ti Davidi na Pasi-damimi,+ kisika bantu ya Filistia vukanaka sambu na bitumba. Kuvandaka ti kitini mosi ya ntoto ya kufuluka ti orze, ebuna bantu tinaka sambu na bantu ya Filistia. 14 Kansi yandi, yandi telamaka na kati-kati ya kilanga yina, yandi nwaninaka yo mpi landaka kufwa bantu ya Filistia, ebuna Yehowa pesaka luguluku ya nene.*+

15 Bantu tatu na kati ya bamfumu yina 30 kulumukaka na ditadi, kisika Davidi vandaka na dibulu ya Adulami,+ kansi basoda ya Filistia tulaka camp na Muwanda* ya Refayimi.+ 16 Na ntangu yina, Davidi vandaka na kisika ya ngolo ya lutaninu, mpi kimvuka mosi ya basoda ya Filistia vandaka na Betelemi. 17 Ebuna Davidi monisaka nzala na yandi ya ngolo nde: “A kana mono lendaka kunwa masa ya dibulu ya masa yina kele pene-pene ya kielo ya Betelemi!”+ 18 Ebuna bantu yina tatu kotaka na kingolo-ngolo na camp ya bantu ya Filistia mpi bo bakaka masa na dibulu ya masa yina kele pene-pene ya kielo ya Betelemi, ebuna bo natilaka yo Davidi; kansi yandi buyaka kunwa yo mpi tiamunaka yo sambu na Yehowa. 19 Yandi tubaka nde: “Na kutadila mabanza ya Nzambi na mono, ngindu ya kusala diambu yai lenda kwisila mono ve ata fioti! Keti mono fwete nwa menga ya bantu yai ya me tula luzingu* na bo na kigonsa?+ Sambu bo tulaka luzingu* na bo na kigonsa sambu na kunata yo.” Yo yina yandi buyaka kunwa yo. Yai mambu yina basoda na yandi tatu ya ngolo salaka.

20 Abishai+ mpangi ya Yoabi+ kumaka mfumu ya bantu tatu ya nkaka; yandi taka dikonga na yandi na zulu ya bantu 300 mpi bo fwaka, mpi yandi vandaka na lukumu kiteso mosi ti bantu yina tatu.+ 21 Na kati ya bantu tatu yina ya nkaka, yandi vandaka na lukumu mingi kuluta bantu zole na kati na bo, mpi yandi vandaka mfumu na bo; kansi yandi kumaka ve na ndonga ya bantu tatu ya ntete.

22 Benaya+ mwana ya Yehoyada vandaka muntu ya kikesa* yina salaka mambu mingi ya nene na Kabseele.+ Yandi fwaka bana zole ya Ariele ya Moabi, mpi yandi kulumukaka na dibulu mosi ya masa na kilumbu yina mvula ya mpembe* vandaka kunoka mpi yandi fwaka ntambu.+ 23 Yandi fwaka mpi muntu mosi ya Ezipte yina vandaka nda mingi kibeni, nda maboko tanu.*+ Ata muntu yina ya Ezipte vandaka ti dikonga na diboko na yandi yina vandaka bonso nti ya bantu yina ke tungaka bilele,+ yandi kwendaka kunwanisa yandi ti nti mpi botulaka dikonga na maboko ya muntu yina ya Ezipte mpi fwaka yandi ti dikonga na yandi mosi.+ 24 Yai mambu yina Benaya mwana ya Yehoyada salaka, mpi yandi vandaka na lukumu kiteso mosi ti basoda tatu ya ngolo. 25 Ata yandi vandaka na lukumu mingi kibeni kuluta bantu makumi tatu, yandi kumaka ve na ndonga ya bantu yina tatu.+ Kansi Davidi tulaka yandi mfumu ya bantu yina vandaka kukengila yandi.

26 Basoda ya ngolo yina vandaka na kimvuka ya basoda bo yai: Asaele+ mpangi ya Yoabi, Elanani mwana ya Dodo muntu ya Betelemi,+ 27 Shamoti muntu ya Harori, Elesi muntu ya Peloni, 28 Ira+ mwana ya Ikeshi muntu ya Tekoa, Abi-ezere+ muntu ya Anatoti, 29 Sibekai+ muntu ya Usha, Ilai muntu ya Ahohi, 30 Maharai+ muntu ya Netofa, Eledi+ mwana ya Baanah muntu ya Netofa, 31 Itai mwana ya Ribai muntu ya Gibea ya bana ya Benyamini,+ Benaya muntu ya Piratoni, 32 Urai muntu ya miwanda* ya Gaashi,+ Abiele muntu ya Arbati, 33 Azmaveti muntu ya Bahurimi, Eliaba muntu ya Shaalboni, 34 bana ya Ashemi muntu ya Gizoni, Yonatani mwana ya Shage muntu ya Arare, 35 Ahiami mwana ya Sakare muntu ya Arare, Elifale mwana ya Ure, 36 Hefere muntu ya Mekerati, Ahiya muntu ya Peloni, 37 Esro muntu ya Karmele, Naarai mwana ya Ezbai, 38 Yoele mpangi ya Natani, Mibare mwana ya Agri, 39 Seleki muntu ya Amoni, Naharai muntu ya Beroti, muntu ya ke nataka binwaninu ya Yoabi mwana ya Seruya; 40 Ira muntu ya Yitri, Garebi muntu ya Yitri, 41 Uria+ muntu ya Heti, Zabadi mwana ya Alai, 42 Adina mwana ya Shiza mwana ya Rubeni, mfumu ya bana ya Rubeni, mpi bantu 30 vandaka ti yandi; 43 Hanane mwana ya Maaka, Yoshafati muntu ya Mitni, 44 Uzia muntu ya Ashterati, Shama mpi Yeyele, bana ya Otami muntu ya Aroere; 45 Yediayele mwana ya Shimri, mpi Yoha mpangi na yandi muntu ya Tisite; 46 Eliele muntu ya Mahava, Yeribai mpi Yoshavia bana ya Elnaami, mpi Yitma muntu ya Moabi; 47 Eliele, Obedi, mpi Yaasiele muntu ya Mesobe.