Kulonga
17 “Nge fwete pesa ve Yehowa Nzambi na nge kimenga ya ngombe ya bakala to ya dimeme yina kele ti kifu na nitu to yina kele ti konso kima ya mbi, sambu yo kele kima ya nzanzi na meso ya Yehowa Nzambi na nge.+
2 Kana bo me mona bakala mosi to nkento mosi na kati na beno, na konso mbanza yina Yehowa Nzambi na nge ke pesa nge, yina ke sala mambu ya mbi na meso ya Yehowa Nzambi na nge mpi ke fwa kuwakana na yandi,+ 3 yandi me vila nzila mpi me sambila banzambi ya nkaka mpi me fukimina bo to me fukimina ntangu to ngonda to makesa yonso ya zulu,+ diambu yina mono songaka beno ve na kusala,+ 4 kana bo me songa nge diambu yina to nge me wa yo, nge fwete zikisa diambu yina mbote-mbote. Kana yo monana nde yo kele ya kieleka,+ nde diambu yina ya nzanzi salamaka na Izraele, 5 nge fwete nata bakala to nkento yina me sala diambu yina ya mbi na nganda ya mbanza, ebuna bo fwete fwa+ bakala to nkento yina na matadi. 6 Bo fwete fwa muntu yina yo ke lomba nde bo fwa kana bambangi zole to bambangi+ tatu me ta kimbangi. Bo fwete fwa yandi ve kana mbangi mosi mpamba me ta kimbangi.+ 7 Bambangi yina fwete vanda bantu ya ntete yina ta nangula diboko sambu na kufwa yandi, ebuna bantu yonso ta nangula diboko na bo na nima. Nge fwete katula kima ya mbi na kati na beno.+
8 Kana diambu mosi kubasika na kati ya mbanza na nge ya kele mpasi mingi sambu nge sambisa yo, mu mbandu kana muntu mosi me fwa muntu,+ me funda muntu, to me sala diambu ya nku, to kana mambu ya nkaka ya ke nata kuswana me basika, nge fwete telama mpi kukwenda na kisika yina Yehowa Nzambi na nge me sola.+ 9 Kwenda na banganga-nzambi yina kele Balevi mpi na zuzi yina ke sambisa+ bilumbu yina, mpi zabisa bo diambu yina, ebuna bo ta zabisa nge lukanu ya bo ta baka.+ 10 Ebuna nge fwete sala mambu na kuwakana ti lukanu yina bo me zabisa nge na kisika yina Yehowa me sola. Sala ngolo na kusala mambu na kuwakana ti mambu yonso yina bo ke longa nge. 11 Nge fwete sala mambu na kuwakana ti nsiku yina bo ke songa nge mpi na kuwakana ti lukanu yina bo ke zabisa nge.+ Kuyambula ve lukanu yina bo ta zabisa nge, sambu na kukwenda na diboko ya kitata to na diboko ya kimama.+ 12 Muntu yina ke sala mambu na lulendo yonso na mutindu yandi ke wila ve nganga-nzambi yina ke sadila Yehowa Nzambi na nge mpi ke widikila ve zuzi, yandi fwete fwa.+ Nge fwete katula kima yina kele ya mbi na kati ya Izraele.+ 13 Bantu yonso ta wa yo mpi ta wa boma, ebuna bo ta sala diaka ve mambu na lulendo yonso.+
14 “Ntangu nge ta kota na insi yina Yehowa Nzambi na nge ke pesa nge mpi ntangu nge ta baka yo mpi ta zinga na kati na yo, ebuna nge tuba nde, ‘Bika mono tula ntotila mosi na zulu na mono bonso makanda yonso yina kele na nziunga na mono,’+ 15 nge fwete tula kibeni ntotila yina Yehowa Nzambi na nge ta sola.+ Nge fwete tula ntotila yina me katuka na kati ya bampangi na nge. Nge fwete tula ve munzenza yina kele ve mpangi na nge na zulu na nge. 16 Kansi, yandi fwete baka ve bampunda mingi+ to kusala nde bantu kuvutuka na Ezipte sambu na kubaka bampunda mingi,+ mpamba ve Yehowa songaka beno nde, ‘Beno fwete vutuka diaka ve ata fioti na nzila yai.’ 17 Yandi fwete baka mpi ve bankento mingi, sambu ntima na yandi kuvila ve nzila;+ yandi fwete baka mpi ve arza ti wolo ya mingi.+ 18 Ntangu yandi ta vanda na kiti na yandi ya kimfumu, yandi fwete sonika sambu na yandi mosi Nsiku yai na mukanda* mosi, yina yandi ta baka na mukanda ya Nsiku yina banganga-nzambi ya kele Balevi+ ke bumbaka.
19 “Yandi fwete vanda kaka ti yo, mpi yandi fwete tangaka yo bilumbu yonso ya luzingu na yandi,+ mpidina yandi ta longuka na kuwa Yehowa Nzambi na yandi boma mpi ta zitisa mambu yonso yina kele na Nsiku yai ti bantuma yai mpi kulungisa yo.+ 20 Mpidina ntima na yandi ta kuditula ve na zulu ya bampangi na yandi mpi yandi ta yambula ve nsiku yina sambu na kukwenda na diboko ya kitata to na diboko ya kimama, mpidina yandi ta bikala ntangu mingi na kimfumu na yandi, yandi ti bana na yandi na kati ya Izraele.