Na Bakolosai
4 Beno bamfumu, beno sadila bampika na beno mambu na lunungu mpi na mutindu ya mbote, sambu beno me zaba nde beno mpi beno kele ti Mfumu na zulu.+
2 Beno kwamina na kisambu,+ beno bikala ya kusikama na kisambu mpi beno pesa matondo.+ 3 Na ntangu yina mosi, beno samba mpi sambu na beto,+ sambu Nzambi kukangudila ndinga kielo sambu beto zabisa kinsweki ya santu ya Kristu, yina mono me kotilaka boloko,+ 4 mpi sambu mono zabisa yo mbote-mbote mutindu mono fwete tuba.
5 Beno landa kutambula na mayele na ntwala ya bantu ya nganda, beno sadila ntangu na beno mbote kibeni.*+ 6 Mambu ya beno ke tuba kuvanda ntangu yonso ya mbote mpi ya bo me kumisa ntomo ti mungwa,+ ebuna beno ta zaba mutindu beno fwete pesa konso muntu mvutu.+
7 Tisike,+ mpangi na mono ya mono ke zolaka mingi, nsadi ya kwikama, mpi nduku na mono ya mpika na Mfumu, ta zabisa beno bansangu yonso ya me tala mono. 8 Mono ke tinda yandi na beno sambu beno zaba nki mutindu beto kele mpi sambu yandi lembika bantima na beno. 9 Yandi ke kwisa ti Onezime,+ mpangi na mono ya kwikama mpi ya mono ke zolaka mingi, yina kele muntu na beno; bo ta zabisa beno mambu yonso yina ke salama awa.
10 Aristarke,+ nduku na mono ya boloko me tindila beno mbote; mpi Marko+ kisoni ya Barnabasi me tindila beno mbote (bo songaka beno na kuyamba yandi+ mbote kana yandi kwisa kuna na beno), 11 mpi Yezu ya bo ke bingaka Yustusi me tindila beno mpi mbote. Bo kele na kati ya bantu yina bo me yotisaka. Kaka bo bantu kele banduku na mono ya kisalu sambu na Kimfumu ya Nzambi, mpi bo ke lembikaka mono mingi.* 12 Epafrasi,+ mpika ya Kristu Yezu yina kele muntu na beno, me tindila beno mbote. Yandi ke salaka ngolo ntangu yonso sambu na beno na bisambu na yandi, sambu na nsuka beno vanda ya kulunga mpi ti kundima ya ngolo na luzolo yonso ya Nzambi. 13 Mono ke ta kimbangi nde yandi ke sala bikesa mingi sambu na beno mpi sambu na bantu yina kele na Laodisea mpi na Yerapolisi.
14 Luka,+ munganga ya beto ke zolaka mingi me tindila beno mbote, Demasi+ mpi me tindila beno mbote. 15 Beno pesa mbote na bampangi yina kele na Laodisea, beno pesa mpi mbote na Nimfa ti na dibundu yina kele na nzo na yandi.+ 16 Mpi ntangu beno ta manisa kutanga mukanda yai, beno sala na mpila nde bo tanga+ yo mpi na dibundu ya bantu ya Laodisea, beno mpi, beno tanga yina ta katuka na Laodisea. 17 Beno songa mpi Arshipe+ nde: “Tula dikebi na kisalu yina nge ndimaka na Mfumu, sambu na kulungisa yo.”
18 Yai mbote na mono, mono Polo, yina mono me sonika na diboko na mono mosi.+ Beno landa kuyibuka miniololo na mono.+ Ntima ya mbote ya nene kuvanda ti beno.