Bantotila ya Zole

6 Kimvuka ya bambikudi+ tubilaka Elisha nde: “Tala! Kisika yina beto ke zinga ti nge kele fioti mingi sambu na beto. 2 Pardo pesa beto nswa ya kukwenda na Yordani. Konso muntu kubaka kitini ya nti mpi kuyidika kisika mosi kuna, kisika beto lenda zinga.” Yandi tubaka nde: “Beno kwenda.” 3 Mosi na kati na bo tubaka nde: “Keti nge ta kwisa ti bansadi na nge?” Yandi tubaka nde: “Mono ta kwisa.” 4 Yo yina yandi kwendaka ti bo, ebuna bo kumaka na Yordani mpi bo yantikaka kuzenga banti. 5 Ntangu mosi na kati na bo vandaka kuzenga nti, kibende ya disoka bwaka na masa, ebuna yandi bokaka nde: “Mawa mfumu na mono, yo vandaka ya kudefa!” 6 Muntu ya Nzambi ya kieleka tubaka nde: “Yo me bwa na wapi?” Yandi songaka yandi kisika yina. Ebuna yandi zengaka kitini ya nti, yandi losaka yo pana, mpi yandi salaka nde kibende ya disoka kuleluka. 7 Yandi tubaka nde: “Basisa yo.” Yo yina yandi tandulaka diboko mpi bakaka yo.

8 Ntotila ya Siria kwendaka kunwanisa Izraele.+ Yandi solulaka ti bansadi na yandi mpi tubaka nde: “Beno ta sala camp ti mono na kisika yina.” 9 Ebuna muntu ya Nzambi ya kieleka+ tindilaka ntotila ya Izraele ndinga nde: “Keba, kulutila ve kisika yina, sambu yo kele kisika yina bantu ya Siria ke kwisa kukulumuka.” 10 Yo yina ntotila ya Izraele tindaka ndinga na kisika yina muntu ya Nzambi ya kieleka kebisaka yandi. Yandi vandaka kaka kukebisa yandi, mpi yandi bikalaka ntama ti kisika yina; diambu yai salamaka mbala mingi.*+

11 Diambu yai pesaka ntotila* ya Siria makasi ya ngolo, yo yina yandi bingaka bansadi na yandi mpi tubilaka bo nde: “Beno songa mono! Nani na kati na beto kele na lweka ya ntotila ya Izraele?” 12 Ebuna nsadi na yandi mosi tubaka nde: “Ata muntu mosi ve, mfumu na mono ntotila! Yo kele Elisha, mbikudi ya Izraele; yandi muntu ke songaka ntotila ya Izraele mambu yina nge ke tubaka na suku na nge ya kulala.”+ 13 Yandi tubaka nde: “Beno kwenda mpi beno sosa kisika yandi kele, sambu mono tinda bantu sambu na kukanga yandi.” Na nima bo songaka yandi nde: “Yandi kele na Dotani.”+ 14 Na mbala mosi, yandi tindaka bampunda mpi bapusu-pusu ya bitumba kuna, ti basoda mingi; bo kwisaka na mpimpa mpi bo ziungaka mbanza yina.

15 Ntangu nsadi ya muntu ya Nzambi ya kieleka telamaka na suka-suka mpi basikaka na nganda, yandi monaka basoda ti bampunda mpi bapusu-pusu me ziunga mbanza. Na mbala mosi nsadi yina tubilaka yandi nde: “Mawa mfumu na mono! Beto ta sala inki?” 16 Kansi yandi tubaka nde: “Kuwa boma ve!+ Bantu yina kele ti beto kele mingi kuluta bantu yina kele ti bo.”+ 17 Ebuna Elisha yantikaka kusamba mpi kutuba nde: “O Yehowa, pardo, kangula meso na yandi sambu yandi mona.”+ Na mbala mosi Yehowa kangulaka meso ya nsadi yina ebuna yandi monaka, mpi tala! ntoto ya bangumba vandaka ya kufuluka ti bampunda mpi bapusu-pusu ya bitumba ya tiya+ na nziunga ya Elisha.+

18 Ntangu bantu ya Siria kwisaka kisika yandi vandaka, Elisha sambaka Yehowa mpi tubaka nde: “Pardo, fwa dikanda yai meso.”+ Yo yina yandi fwaka bo meso, kaka mutindu Elisha lombaka. 19 Ebuna Elisha tubilaka bo nde: “Nzila yina yo yai ve, mpi mbanza yina yo yai ve. Beno landa mono, ebuna mono ta nata beno na muntu yina beno ke sosa.” Kansi yandi nataka bo na Samaria.+

20 Ntangu bo kumaka na Samaria, Elisha tubaka nde: “O Yehowa, kangula meso na bo sambu bo mona.” Yehowa kangulaka meso na bo, ebuna bo monaka nde bo vandaka na kati-kati ya Samaria. 21 Ntangu ntotila ya Izraele monaka bo, yandi tubilaka Elisha nde: “Keti mono fwete fwa bo, keti mono fwete fwa bo, tata na mono?” 22 Kansi yandi tubaka nde: “Nge fwete fwa bo ve. Keti nge ke fwaka bantu yina nge ke kangaka na kimpika na mbele na nge ya bitumba mpi munduki na nge ya tolo-tolo? Pesa bo mampa ti masa, sambu bo dia, bo nwa,+ mpi bo vutuka na mfumu na bo.” 23 Yandi sadilaka bo nkinsi mosi ya nene; bo diaka mpi nwaka, na nima yandi bikisaka bo sambu bo vutuka na mfumu na bo. Bimvuka ya miyibi ya bantu ya Siria+ kwisaka diaka ve kuvutuka ata mbala mosi na insi ya Izraele.

24 Na nima, Bene-adadi ntotila ya Siria vukisaka basoda* na yandi yonso, yandi kwendaka, mpi ziungaka Samaria.+ 25 Nzala ya ngolo+ kotaka na Samaria, mpi bo ziungaka yo tii kuna ntalu ya ntu mosi ya mpunda+ kumaka mbongo 80 ya bibende, mpi ntalu ya ndambu mosi na kati ya bandambu iya ya kabi* ya bitodi ya pizio kumaka mbongo 5 ya bibende. 26 Ntangu ntotila ya Izraele vandaka kuluta na zulu ya kibaka, nkento mosi tubilaka yandi na ndinga ya ngolo nde: “Sadisa beto, O mfumu na mono ntotila!” 27 Ntotila tubaka nde: “Kana Yehowa kusadisa nge ve, na wapi mono lenda baka lusadisu sambu na nge? Na kisika ya bo ke tutaka bambuma sambu na kukatula yo bampusu? To na kikamuninu ya vinu to ya mafuta?” 28 Ntotila yulaka nkento yina nde: “Inki kele mambu na nge?” Yandi vutulaka nde: “Nkento yai tubilaka mono nde, ‘Pesa mwana na nge, beto dia yandi bubu yai, ebuna mbasi beto ta dia mwana na mono.’+ 29 Yo yina beto tokisaka mwana na mono mpi beto diaka yandi.+ Kilumbu yina landaka mono tubilaka yandi nde, ‘Pesa mwana na nge sambu beto dia yandi.’ Kansi yandi bumbaka mwana na yandi.”

30 Ntangu ntotila waka mambu ya nkento yina tubaka, yandi pasulaka bilele na yandi.+ Ntangu yandi vandaka kuluta na zulu ya kibaka, bantu monaka nde yandi me lwata saki na nsi ya bilele na yandi.* 31 Ebuna yandi tubaka nde: “Nzambi kupesa mono ndola ya ngolo kana ntu ya Elisha mwana ya Shafati kubikala na nitu na yandi bubu yai!”+

32 Elisha vandaka na kati ya nzo, mpi bankuluntu vandaka ti yandi. Ntotila tindaka muntu mosi na ntwala na yandi, kansi na ntwala nde kinati-nsangu yina kukuma, Elisha tubilaka bankuluntu nde: “Keti beno me mona mutindu mwana ya muntu yai ya ke fwaka bantu+ me tinda muntu sambu na kuzenga mono ntu? Beno tala ntangu kinati-nsangu yina ta kuma, beno kanga kielo, mpi beno simba yo ngolo sambu yandi kota ve. Keti makelele ya makulu ya mfumu na yandi kele ve na nima na yandi?” 33 Ntangu yandi vandaka kaka kutuba ti bo, kinati-nsangu yina kumaka kisika yandi vandaka, ebuna ntotila tubaka nde: “Mpasi yai me katuka na Yehowa. Sambu na nki mono fwete kinga diaka Yehowa?”