Bansangu ya Zole

36 Ebuna bantu ya insi yina bakaka Yehoahazi+ mwana ya Yoziasi mpi bo kumisaka yandi ntotila na Yeruzalemi na kisika ya tata na yandi.+ 2 Yehoahazi vandaka ti bamvula 23 ntangu yandi kumaka ntotila, mpi yandi yalaka bangonda tatu na Yeruzalemi. 3 Kansi, ntotila ya Ezipte katulaka yandi na kimfumu na Yeruzalemi mpi futisaka insi yina kibawu ya batalanta* 100 ya arza ti talanta mosi ya wolo.+ 4 Diaka, ntotila ya Ezipte kumisaka Eliakimi, mpangi ya Yehoahazi, ntotila ya Yuda mpi ya Yeruzalemi mpi pesaka yandi zina ya nkaka, Yehoyakimi; kansi Neko+ bakaka mpangi na yandi Yehoahazi mpi nataka yandi na Ezipte.+

5 Yehoyakimi+ vandaka ti bamvula 25 ntangu yandi kumaka ntotila, mpi yandi yalaka bamvula 11 na Yeruzalemi. Yandi landaka kusala mambu ya mbi na meso ya Yehowa Nzambi na yandi.+ 6 Nebukadenezare+ ntotila ya Babilone kwisaka kunwanisa yandi sambu na kukanga yandi ti miniololo zole ya kwivre mpi kunata yandi na Babilone.+ 7 Ebuna Nebukadenezare nataka ndambu ya bisadilu ya nzo ya Yehowa na Babilone mpi tulaka yo na nzo na yandi na Babilone.+ 8 Sambu na mambu ya nkaka ya Yehoyakimi salaka, mambu ya nzanzi yina yandi salaka mpi mambu ya mbi yina bo monaka sambu na yandi, bo me sonikaka yo na Mukanda ya Bantotila ya Izraele mpi ya Yuda; ebuna mwana na yandi Yehoyakini kumaka ntotila na kisika na yandi.+

9 Yehoyakini+ vandaka ti bamvula 18 ntangu yandi kumaka ntotila, mpi yandi yalaka bangonda tatu ti bilumbu kumi na Yeruzalemi; yandi landaka kusala mambu ya mbi na meso ya Yehowa.+ 10 Na luyantiku ya mvula,* ntotila Nebukadenezare tindaka bantu sambu na kunata yandi na Babilone+ kumosi ti bima ya ntalu ya nzo ya Yehowa.+ Ebuna yandi kumisaka Sidikiya mpangi ya tata na yandi ntotila ya Yuda mpi ya Yeruzalemi.+

11 Sidikiya+ vandaka ti bamvula 21 ntangu yandi kumaka ntotila, mpi yandi yalaka bamvula 11 na Yeruzalemi.+ 12 Yandi landaka kusala mambu ya mbi na meso ya Yehowa Nzambi na yandi. Yandi kudikulumusaka ve na ntwala ya mbikudi Yeremia,+ yina vandaka kutuba na kulanda nsiku ya Yehowa. 13 Yandi kolamaka mpi na ntwala ya ntotila Nebukadenezare,+ yina lombaka yandi na kudia ndefi na zina ya Nzambi, mpi yandi vandaka kaka ntu-ngolo* mpi ntima-ngolo mpi yandi buyaka kuvutukila Yehowa Nzambi ya Izraele. 14 Bamfumu yonso ya banganga-nzambi mpi bantu kondaka kwikama na kiteso ya mingi kibeni, bo vandaka kusala mambu yonso ya nzanzi ya makanda, mpi bo kumisaka mvindu nzo ya Yehowa+ yina yandi santisaka na Yeruzalemi.

15 Yehowa Nzambi ya ba-nkaka na bo landaka kukebisa bo na nzila ya binati-nsangu na yandi, yandi vandaka kukebisa bo mbala na mbala, sambu yandi vandaka kuwa mawa sambu na bantu na yandi mpi sambu na kisika yina yandi ke zingaka. 16 Kansi bo vandaka kuseka binati-nsangu ya Nzambi ya kieleka;+ bo vandaka kuvweza ndinga na yandi+ mpi kuseka bambikudi na yandi,+ tii kuna makasi ya Yehowa bwilaka bantu na yandi,+ tii kuna mpila ya kubelula bo vandaka diaka ve.

17 Yo yina, yandi tindilaka bo ntotila ya bantu ya Kaldea,+ yina fwaka baleke na bo ya babakala na mbele ya bitumba+ na nzo ya kisika na bo ya santu;+ yandi waka ve mawa sambu na leke ya bakala to mwense, sambu na mununu to muntu ya kele ti kifu.+ Nzambi pesaka bima yonso na maboko na yandi.+ 18 Bisadilu yonso ya nzo ya Nzambi ya kieleka, ya nene mpi ya fioti, ti bimvwama ya nzo ya Yehowa mpi bimvwama ya ntotila mpi ya bamfumu na yandi, yandi nataka bima yonso na Babilone.+ 19 Yandi yokaka nzo ya Nzambi ya kieleka tiya,+ bwisaka kibaka ya Yeruzalemi,+ yokaka banzo-zulu na yo yonso yina kele ti bibaka ya ngolo na tiya, mpi bebisaka bima yonso ya ntalu.+ 20 Yandi nataka na kimpika na Babilone bantu yina fwaka ve na mbele ya bitumba,+ mpi bo kumaka bansadi na yandi+ mpi ya bana na yandi tii kuna kimfumu ya Persia yantikaka kuyala,+ 21 sambu na kulungisa mambu yina Yehowa tubaka na nzila ya Yeremia,+ tii kuna insi futaka bisabatu na yo.+ Bilumbu yonso yina yo bikalaka mpamba, yo vandaka na kisabatu, sambu na kulungisa bamvula 70.+

22 Na mvula ya ntete ya Sirusi+ ntotila ya Persia, sambu mambu yina Yehowa tubaka na nzila ya Yeremia+ kulungana, Yehowa pusaka ntima ya Sirusi ntotila ya Persia na kupesa nsiku nde bo zabisa na kimfumu na yandi ya mvimba, ebuna yandi sonikaka+ mpi nsiku yina nde: 23 “Sirusi ntotila ya Persia me tuba nde, ‘Yehowa Nzambi ya zulu me pesa mono bimfumu yonso ya ntoto,+ mpi yandi me pesa mono kisalu ya kutungila yandi nzo na Yeruzalemi, yina kele na Yuda.+ Konso muntu na kati na beno yina kele na kati ya bantu na yandi yonso, bika nde Yehowa Nzambi na yandi kuvanda ti yandi, mpi bika nde yandi tombuka.’”+