Samuele ya Zole

20 Ntangu yai, kuvandaka ti muntu mosi ya mavwanga zina na yandi Sheba+ mwana ya Bikri, muntu ya Benyamini. Yandi bulaka kibongo+ mpi tubaka nde: “Beto kele ve ti dikabu na Davidi, mpi beto kele ve ti dikabu na mwana ya Yese.+ Konso muntu kukwenda na banzambi* na yandi, O Izraele!”+ 2 Ebuna bantu yonso ya Izraele yambulaka kulanda Davidi sambu na kulanda Sheba mwana ya Bikri;+ kansi bantu ya Yuda kangamaka na ntotila na bo, katuka na Yordani tii na Yeruzalemi.+

3 Ntangu Davidi kwisaka na nzo na yandi* na Yeruzalemi,+ ntotila bakaka bamakangu kumi yina yandi bikaka sambu na kukeba nzo,+ ebuna yandi tulaka bo na nzo mosi mpi tulaka bantu sambu na kukengila bo. Yandi vandaka kupesa bo madia, kansi yandi vukisaka ve nitu ti bo.+ Bo bikalaka ya kukanga tii kilumbu ya lufwa na bo, bo vandaka kuzinga bonso mifwidi ya bankento, ata bakala na bo vandaka na luzingu.

4 Ebuna ntotila tubilaka Amasa+ nde: “Binga bantu ya Yuda bo vukana na ntwala na mono na nsungi ya bilumbu tatu, nge mpi fwete vanda awa.” 5 Yo yina Amasa kwendaka kubinga Yuda, kansi yandi sukininaka, yandi kwisaka ve na ntangu yina bo tudilaka yandi. 6 Ebuna Davidi tubilaka Abishai+ nde: “Sheba+ mwana ya Bikri lenda sala beto mbi kuluta yina Absalomi salaka.+ Baka bansadi ya mfumu na nge mpi landa yandi, na mpila nde yandi mona ve bambanza ya ngolo mpi yandi tina beto.” 7 Yo yina bantu ya Yoabi,+ bantu ya Kereti, bantu ya Peleti,+ ti bantu yonso ya ngolo basikaka mpi landaka yandi; bo bikisaka Yeruzalemi sambu na kulanda Sheba, mwana ya Bikri. 8 Ntangu bo vandaka pene-pene ya ditadi ya nene na Gibeoni,+ Amasa+ kwisaka sambu na kukutana ti bo. Ntangu yai Yoabi vandaka me lwata lele na yandi ya bitumba, mpi yandi vandaka ti mbele ya bitumba yina vandaka na poshi na yo yina vandaka ya kukanga na luketo na yandi. Ntangu yandi pusanaka na ntwala, mbele yina bwaka.

9 Yoabi tubilaka Amasa nde: “Mpangi na mono, keti nge kele mbote?” Ebuna na diboko ya kitata, Yoabi simbaka mandefo ya Amasa bonso nde yandi ke zola kupesa yandi beze. 10 Amasa tulaka ve dikebi na mbele ya bitumba yina vandaka na diboko ya Yoabi, ebuna Yoabi kotisaka yandi yo na divumu,+ mpi misopo na yandi basikaka mpi bwaka na ntoto. Yo vandaka ve mfunu nde yandi kotisa yandi yo diaka; mbala mosi fwanaka sambu na kufwa yandi. Ebuna Yoabi ti mpangi na yandi Abishai landaka Sheba mwana ya Bikri.

11 Mosi na kati ya bana-babakala yina vandaka ti Yoabi telamaka pene-pene na yandi mpi vandaka kutuba nde: “Konso muntu yina kele na lweka ya Yoabi mpi konso muntu yina kele muntu ya Davidi, bika yandi landa Yoabi!” 12 Na ntangu yina yonso, Amasa vandaka kubaluka-baluka na menga na yandi na kati-kati ya nzila. Ntangu muntu yina monaka nde bantu yonso vandaka kutelama, yandi katulaka Amasa na nzila mpi pusaka yandi na mfinda. Ebuna yandi fikaka yandi lele, sambu yandi monaka nde konso muntu vandaka kutelama ntangu bo vandaka kukuma kisika yandi vandaka. 13 Na nima ya kukatula yandi na nzila, bantu yonso landaka Yoabi sambu na kulanda Sheba+ mwana ya Bikri.

14 Sheba lutaka makanda yonso ya Izraele sambu na kukwenda na Abele ya Bete-maka.+ Bantu ya Bikri vukanaka kisika mosi ebuna bo mpi kotaka na mbanza sambu na kulanda yandi.

15 Yoabi ti bantu na yandi* kwisaka mpi ziungaka yandi na Abele ya Bete-maka mpi salaka mwa ngumba ya ntoto sambu na kunwanisa mbanza yina, sambu mbanza yina vandaka na kati ya kibaka. Bantu yonso yina vandaka ti Yoabi vandaka kubebisa kibaka sambu na kubwisa yo. 16 Ebuna nkento mosi ya mayele bingaka na ndinga ya ngolo katuka na mbanza yina nde: “Beno wa, beno wa! Mono ke bondila beno, beno songa Yoabi nde, ‘Kwisa awa mono tubila nge.’” 17 Yo yina, yandi pusanaka pene-pene ya nkento yina, mpi nkento yina tubaka nde: “Keti nge Yoabi?” Yandi vutulaka nde: “Ee.” Ebuna nkento yina tubilaka yandi nde: “Wa mambu yina nsadi na nge ke tuba.” Yandi tubaka nde: “Mono ke wa.” 18 Nkento yina tubaka diaka nde: “Na ntangu ya ntama bo vandaka kutuba ntangu yonso nde, ‘Bika bo yula na Abele,’ mpi yo vandaka nsuka ya mambu. 19 Mono ke monisa bantu ya ngemba ti ya kwikama ya Izraele. Nge ke sosa kufwa mbanza mosi yina kele bonso mama na Izraele. Sambu na nki nge fwete katula* dikabu ya Yehowa?”+ 20 Yoabi pesaka mvutu nde: “Ngindu lenda kwisila mono ve ata fioti na kukatula yo mpi kufwa yo. 21 Yo kele ve mutindu yina ata fioti. Kansi, muntu mosi zina na yandi Sheba+ mwana ya Bikri ya ntoto ya bangumba ya Efrayimi+ me kolama na* ntotila Davidi. Kana nge pesa muntu yai mosi mpamba na maboko na beto, mono ta katuka na mbanza yai.” Ebuna nkento yina tubilaka Yoabi nde: “Tala! Bo ta losila nge ntu na yandi na kibaka!”

22 Na mbala mosi, nkento yina ya mayele kotaka kisika ya bantu yonso, mpi bo zengaka ntu ya Sheba mwana ya Bikri mpi losilaka yo Yoabi. Ebuna yandi bulaka kibongo, mpi bo katukaka na mbanza yina, konso muntu vutukaka na nzo na yandi;+ Yoabi vutukaka na Yeruzalemi kisika ya ntotila.

23 Yoabi vandaka mfumu ya basoda yonso ya Izraele;+ Benaya+ mwana ya Yehoyada+ vandaka ti kiyeka na zulu ya bantu ya Kereti mpi ya bantu ya Peleti.+ 24 Adorami+ vandaka ti kiyeka na zulu ya bantu yina bo bakaka na kusala bisalu ya ngolo; Yehoshafati+ mwana ya Ahiludi vandaka muntu ya ke sonikaka mambu. 25 Sheva vandaka sekretere; Zadoki+ ti Abiatare+ vandaka banganga-nzambi. 26 Ira muntu ya Yaire mpi kumaka nsadi ya kuluta nene* ya Davidi.