NEHEMIA

1 Bangogo ya Nehemia*+ mwana ya Akalia: Na ngonda ya Kislevi,* na mvula ya 20, mono vandaka na Shushane*+ kisika ya ngolo.* 2 Na ntangu yina, Hanani,+ mpangi na mono, katukaka ti babakala ya nkaka na Yuda mpi kwisaka kukuma, ebuna mono yulaka bo nsangu ya me tala Bayuda yina bikalaka, bayina tinaka kimpika+ mpi nsangu ya me tala Yeruzalemi. 3 Bo vutulaka nde: “Bantu yina me bikala kuna na provense,* bayina me guluka na kimpika, bo kele na mpasi mosi ya nene kibeni mpi na nsoni.+ Bibaka ya Yeruzalemi kele ya kubwa,+ mpi bo me yoka bakielo na yo tiya.”+

4 Ntangu mono waka mambu yai, mono vandaka mpi mono yantikaka kudila mpi kuwa mawa bilumbu mingi, ebuna mono landaka kubuya madia+ mpi kusamba na ntwala ya Nzambi ya zulu. 5 Mono tubaka nde: “O Yehowa, Nzambi ya zulu, Nzambi ya nene mpi ya ke pesaka boma, Nzambi yina ke zitisaka kuwakana na yandi mpi ke monisaka zola ya kwikama na bantu yina ke zolaka yandi mpi ke zitisaka bansiku na yandi,+ 6 pardo, bika nde dikutu na nge kutula dikebi mpi meso na nge kuvanda ya kukanguka sambu na kuwa kisambu ya nsadi na nge yina mono ke sala na nge bubu yai, mpimpa ti mwini,+ na yina me tala bansadi na nge bantu ya Izraele, na ntangu mono ke funguna masumu yina bantu ya Izraele me sala na meso na nge. Beto me sala masumu, mono ti nzo ya tata na mono.+ 7 Ya kieleka beto me sala mambu ya mbi na meso na nge+ na mutindu beto me zitisa ve bantuma, bansiku, mpi bankanu yina nge pesaka na nsadi na nge Moize.+

8 “Pardo, yibuka mambu yina nge songaka* nsadi na nge Moize: ‘Kana beno sala mambu kukonda kwikama, mono ta panza beno na kati ya bantu.+ 9 Kansi, kana beno vutuka na mono mpi beno zitisa bansiku na mono mpi beno lemfukila yo, ata bantu na beno yina me panzanaka kuvanda tii na nsuka ya zulu, mono ta vukisa bo+ kuna mpi ta nata bo na kisika yina mono me ponaka sambu zina na mono kuvanda.’+ 10 Bo kele bansadi na nge mpi bantu na nge, bayina nge sumbaka diaka na ngolo na nge ya nene mpi na diboko na nge ya ngolo.+ 11 O Yehowa, pardo, bika nde dikutu na nge kutula dikebi na kisambu ya nsadi na nge, na kisambu ya bansadi na nge yina ke waka kiese na kuwa zina na nge boma, mpi pardo, sala nde nsadi na nge kununga bubu yai mpi bika nde muntu yai kuwila mono mawa.”+

Mono vandaka muntu ya ke pesaka ntotila malafu.+

2 Na ngonda ya Nisani,* na mvula ya 20+ ya ntotila Artazeresesi,+ bo tulaka vinu na ntwala na yandi, mpi mutindu vandaka kikalulu na mono, mono bakaka vinu yina mpi pesaka yo ntotila.+ Kansi, mono me monanaka ntete ve mawa-mawa na ntwala na yandi. 2 Yo yina ntotila tubilaka mono nde: “Sambu na nki nge ke monana mawa-mawa kansi nge ke bela ve? Mawa yai lenda vanda kaka mawa ya ntima.” Mono waka boma mingi.

3 Ebuna mono tubilaka ntotila nde: “Luzingu ya nda na ntotila! Sambu na nki mono fwete monana ve mawa-mawa na ntangu mbanza, kisika yina bo me zikaka ba-nkaka na mono, kele mayumbu, mpi bakielo na yo me piaka tiya?”+ 4 Yo yina ntotila tubilaka mono nde: “Nge ke sosa inki?” Na mbala mosi mono sambaka Nzambi ya zulu.+ 5 Ebuna mono tubilaka ntotila nde: “Kana yo ke sepedisa ntotila mpi kana nsadi na nge me ndimama na meso na nge, tinda mono na Yuda, na mbanza yina bo me zikaka ba-nkaka na mono, sambu mono tunga yo diaka.”+ 6 Ebuna ntotila tubilaka mono (mpi na ntangu yina ntotila-nkento vandaka ya kuvanda pene-pene na yandi) nde: “Nzietelo na nge ta sala bilumbu ikwa, mpi nki ntangu nge ta vutuka?” Yo sepedisaka ntotila na kutinda mono,+ ebuna mono pesaka yandi ntangu.+

7 Na nima mono tubilaka ntotila nde: “Kana yo ke sepedisa ntotila, bika nde bo pesa mono mikanda sambu na bamfumu ya bambanza ya ntoto yina kele na Simu ya Nzadi,*+ sambu bo pesa mono nzila ya kuluta kukonda mpasi tii kuna mono ta kuma na Yuda, 8 mpi mukanda sambu na Asafi muntu yina ke taninaka Kilanga ya Ntotila,* sambu yandi pesa mono banti sambu na mabaya ya bakielo ya Kisika ya Ngolo ya Nzo,*+ sambu na kibaka ya mbanza,+ mpi sambu na nzo yina mono ta kwenda.” Ebuna ntotila pesaka mono yo,+ sambu diboko ya mbote ya Nzambi na mono vandaka ti mono.+

9 Nsuka-nsuka mono kwisaka na bamfumu ya bambanza ya ntoto yina kele na Simu ya Nzadi mpi mono pesaka bo mikanda ya ntotila. Ntotila tindaka mpi ti mono bamfumu ya basoda ti bantu yina ke tambusaka bampunda. 10 Ntangu Sanbalati+ muntu ya Oroni mpi Tobia+ muntu ya Amoni+ yina vandaka kapita* waka yo, bo waka ve kiese ata fioti nde muntu mosi me kwisa kusala diambu mosi ya mbote sambu na bantu ya Izraele.

11 Nsuka-nsuka mono kumaka na Yeruzalemi, mpi mono bikalaka kuna bilumbu tatu. 12 Mono telamaka na mpimpa, mono ti ndambu ya bantu yina vandaka ti mono, mpi mono songaka ve ata muntu mosi mambu yina Nzambi na mono tulaka na ntima na mono ya kusala sambu na Yeruzalemi, mpi mono vandaka ve ata ti mbisi ya nkaka katula kaka yina mono vandaka kunata. 13 Ebuna mono basikaka na mpimpa na Kielo ya Muwanda,+ mono lutaka na ntwala ya Nto ya Masa ya Nioka ya Nene tii na Kielo ya Bita ya Putulu ya Tiya,+ mpi mono talaka mbote-mbote bibaka ya Yeruzalemi yina bwaka mpi bakielo na yo yina piaka tiya.+ 14 Mono lutaka na Kielo ya Nto ya Masa+ mpi na Kiziba ya Ntotila, mpi kisika vandaka fioti sambu mbisi yina mono vandaka kunata kuluta. 15 Kansi mono landaka kutombuka na muwanda+ na mpimpa, mpi mono landaka kutala kibaka mbote-mbote, ebuna na nima, mono balukaka mpi kotilaka na Kielo ya Muwanda, mpi mono vutukaka.

16 Bilandi ya bamfumu+ zabaka ve kisika mono kwendaka mpi mambu yina mono vandaka kusala, sambu mono tubaka ntete ve ata kima mosi na Bayuda, na banganga-nzambi, na bantu ya lukumu, na bilandi ya bamfumu, mpi na bantu ya nkaka ya kisalu. 17 Nsuka-nsuka mono tubilaka bo nde: “Beno ke mona mpasi ya nene kibeni yina beto kele na yo, mutindu Yeruzalemi kele mayumbu mpi mutindu bo me yoka bakielo na yo tiya. Beno kwisa beto tunga diaka kibaka ya Yeruzalemi, mpidina nsoni yai ta mana.” 18 Ebuna mono songaka bo mutindu diboko ya mbote ya Nzambi na mono vandaka ti mono,+ mono songaka bo mpi mambu yina ntotila tubilaka mono.+ Ebuna bo tubaka nde: “Beto telama mpi beto tunga.” Yo yina bo kudipesaka* kikesa sambu na kusala kisalu yina ya mbote.+

19 Ntangu Sanbalati muntu ya Oroni, Tobia+ muntu ya Amoni+ yina vandaka kapita,* ti Geshemi muntu ya Arabia+ waka mambu yai, bo yantikaka kuseka beto+ mpi kuvweza beto nde: “Inki beno ke na kusala? Keti beno ke kolama na ntotila?”+ 20 Kansi mono vutulaka nde: “Nzambi ya zulu kele Muntu yina ta sadisa beto na kununga,+ ebuna beto bansadi na yandi, beto ta telama mpi ta tunga; kansi beno kele ve ti dikabu, to nswa, to kima ya kuyibuka* na Yeruzalemi.”+

3 Nganga-nzambi ya nene Eliashibi+ ti bampangi na yandi banganga-nzambi telamaka sambu na kutunga Kielo ya Mameme.+ Bo santisaka* yo+ mpi tedimisaka bakielo na yo; bo santisaka yo tii na Nzo-Zulu ya Mea,+ tii na Nzo-Zulu ya Ananele.+ 2 Pene-pene na bo bantu ya Yeriko+ vandaka kutunga, mpi pene-pene na bo Zakure mwana ya Imri vandaka kutunga.

3 Bana ya Asenaya tungaka Kielo ya Bambisi ya Masa;+ bo tulaka yo mabaya+ ebuna bo tulaka bakielo na yo, bima ya kukangila yo, mpi banti na yo. 4 Pene-pene na bo Meremoti+ mwana ya Uriya mwana ya Akosi salaka kisalu ya kuyidika, pene-pene na bo Meshulami+ mwana ya Berekia mwana ya Meshezabele salaka kisalu ya kuyidika, mpi pene-pene na bo Zadoki mwana ya Baana salaka kisalu ya kuyidika. 5 Pene-pene na bo bantu ya Tekoa+ salaka kisalu ya kuyidika, kansi bantu na bo ya lukumu kudikulumusaka ve sambu na kusala* kisalu ya bamfumu na bo.

6 Yoyada mwana ya Pasea ti Meshulami mwana ya Besodeya yidikaka Kielo ya Mbanza ya Ntama;+ bo tulaka yo mabaya ebuna bo tulaka bakielo na yo, bima ya kukangila yo, mpi banti na yo. 7 Pene-pene na bo Melatia muntu ya Gibeoni+ ti Yadoni muntu ya Meronoti salaka kisalu ya kuyidika, bantu ya Gibeoni ti ya Mispa+ yina vandaka na nsi ya kiyeka ya* mfumu ya mbanza ya ntoto yina kele na Simu ya Nzadi.*+ 8 Pene-pene na bo Uziele mwana ya Araya, mosi na kati ya bantu yina ke salaka bima ya wolo, salaka kisalu ya kuyidika, mpi pene-pene na yandi Hanania, mosi na kati ya bantu yina ke vukisaka mafuta ya nsudi ya kitoko,* salaka kisalu ya kuyidika; mpi bo tulaka pavema* na Yeruzalemi tii na Kibaka ya Nene.+ 9 Pene-pene na bo Refaya mwana ya Hure, mfumu ya ndambu ya distrike ya Yeruzalemi, salaka kisalu ya kuyidika. 10 Pene-pene na bo Yedaya mwana ya Arumafi salaka kisalu ya kuyidika na ntwala ya nzo na yandi, mpi pene-pene na yandi Atushi mwana ya Ashabneya salaka kisalu ya kuyidika.

11 Malkiya mwana ya Arimi+ mpi Ashubi mwana ya Pahati-moabi+ yidikaka kitini ya nkaka,* mpi Nzo-Zulu ya Bafulu ya Kuyokila Mampa.+ 12 Pene-pene na bo Shalumi mwana ya Aloheshi, mfumu ya ndambu ya distrike ya Yeruzalemi, salaka kisalu ya kuyidika, kumosi ti bana na yandi ya bankento.

13 Anuni ti bantu ya Zanoa+ yidikaka Kielo ya Muwanda;+ bo tungaka yo ebuna bo tulaka bakielo na yo, bima ya kukangila yo, mpi banti na yo, ebuna bo yidikaka kibaka yina maboko* 1 000 tii na Kielo ya Bita ya Putulu ya Tiya.+ 14 Malkiya mwana ya Rekabi, mfumu ya distrike ya Bete-akeremi,+ yidikaka Kielo ya Bita ya Putulu ya Tiya; yandi tungaka yo mpi tulaka bakielo na yo, bima ya kukangila yo, mpi banti na yo.

15 Shaluni mwana ya Koloze, mfumu ya distrike ya Mispa,+ yidikaka Kielo ya Nto ya Masa;+ yandi tungaka yo ti ludi na yo, tulaka bakielo na yo, bima ya kukangila yo, mpi banti na yo; yandi yidikaka mpi kibaka ya Kiziba+ ya Nzila ya Masa tii na Kilanga ya Ntotila+ mpi tii na Kimatilu+ yina ke katuka na Mbanza ya Davidi mpi ke kulumuka.+

16 Na nima na yandi, Nehemia mwana ya Azbuki, mfumu ya ndambu ya distrike ya Bete-sure,+ salaka kisalu ya kuyidika katuka na ntwala ya Maziamu ya Davidi+ tii na kiziba+ yina bo tungaka mpi tii na Nzo ya Bantu ya Ngolo.

17 Na nima na yandi, Balevi salaka kisalu ya kuyidika: Rehumi mwana ya Bani; pene-pene na yandi Ashabia, mfumu ya ndambu ya distrike ya Keila,+ salaka kisalu ya kuyidika sambu na distrike na yandi. 18 Na nima na yandi, bampangi na bo salaka kisalu ya kuyidika: Bawai mwana ya Enadadi, mfumu ya ndambu ya distrike ya Keila.

19 Pene-pene na yandi Ezere mwana ya Yeshua,+ mfumu ya Mispa, vandaka kuyidika kitini ya nkaka na ntwala ya mwa-ngumba ya ke nataka na Kisika ya Kubumba Binwaninu na Dikunzi ya Ke Simbaka Kibaka.+

20 Na nima na yandi, Baruki mwana ya Zabai+ salaka ti kikesa mpi yidikaka kitini ya nkaka, katuka na Dikunzi ya Ke Simbaka Kibaka tii na munoko ya nzo ya nganga-nzambi ya nene Eliashibi.+

21 Na nima na yandi, Meremoti+ mwana ya Uriya mwana ya Akosi yidikaka kitini ya nkaka, katuka na munoko ya nzo ya Eliashibi tii na nsuka ya nzo ya Eliashibi.

22 Na nima na yandi, banganga-nzambi, bantu ya distrike ya Yordani,*+ salaka kisalu ya kuyidika. 23 Na nima na bo, Benyamini ti Ashubi salaka kisalu ya kuyidika na ntwala ya nzo na bo. Na nima na bo, Azaria mwana ya Maaseya mwana ya Anania salaka kisalu ya kuyidika pene-pene ya nzo na yandi. 24 Na nima na yandi, Binwi mwana ya Enadadi yidikaka kitini ya nkaka, katuka na nzo ya Azaria tii na Dikunzi ya Ke Simbaka Kibaka+ mpi tii na kinkonko.

25 Na nima na yandi, Palale mwana ya Uzai salaka kisalu ya kuyidika na ntwala ya Dikunzi ya Ke Simbaka Kibaka mpi ya nzo-zulu yina ke basika katuka na Nzo ya Ntotila,+ nzo ya zulu ya Kibansala ya Bankengidi.+ Na nima na yandi vandaka Pedaya mwana ya Paroshi.+

26 Bansadi ya tempelo*+ yina vandaka kuzinga na Ofeli+ salaka kisalu ya kuyidika tii na ntwala ya Kielo ya Masa+ na ndambu ya esti mpi na nzo-zulu yina me basikaka.

27 Na nima na bo, bantu ya Tekoa+ yidikaka kitini ya nkaka, katuka na ntwala ya nzo-zulu ya nene yina me basikaka tii na kibaka ya Ofeli.

28 Banganga-nzambi salaka kisalu ya kuyidika na zulu ya Kielo ya Bampunda,+ konso muntu na ntwala ya nzo na yandi.

29 Na nima na bo, Zadoki+ mwana ya Imere salaka kisalu ya kuyidika na ntwala ya nzo na yandi.

Mpi na nima na yandi, Shemaya mwana ya Shekania, muntu yina ke taninaka Kielo ya Esti,+ salaka kisalu ya kuyidika.

30 Na nima na yandi, Hanania mwana ya Shelemia ti Anuni mwana ya sambanu ya Salafi yidikaka kitini ya nkaka.

Na nima na yandi, Meshulami+ mwana ya Berekia salaka kisalu ya kuyidika na ntwala ya suku na yandi.

31 Na nima na yandi, Malkiya, yina vandaka na kimvuka ya bantu ya ke salaka bima ya wolo, salaka kisalu ya kuyidika tii na nzo ya bansadi ya tempelo*+ ti ya bantu ya mumbongo, na ntwala ya Kielo ya Kutala mpi tii na suku ya zulu ya kinkonko.

32 Bantu yina ke salaka bima ya wolo ti bantu ya mumbongo salaka kisalu ya kuyidika na kati-kati ya suku ya zulu ya kinkonko ti ya Kielo ya Mameme.+

4 Kaka ntangu Sanbalati+ waka nde beto vandaka kutunga diaka kibaka, yandi waka makasi mpi kiseku* mingi, ebuna yandi vandaka kuseka Bayuda. 2 Mpi na meso ya bampangi na yandi ti ya basoda ya Samaria, yandi tubaka nde: “Bayuda yai ya me lembaka ke sala inki? Keti bo ta sala yo bo mosi? Keti bo ta pesa bimenga? Keti bo ta manisa yo na kilumbu mosi? Keti bo ta vutula na luzingu matadi ya kuzika yina kele na kati ya bita ya mvindu ya kufuluka na putulu?”+

3 Ebuna Tobia+ muntu ya Amoni,+ yina vandaka ya kutelama pene-pene na yandi, tubaka nde: “Nkutu kana mukengi kumata na kibaka yina bo ke tunga, yo ta bwisa kibaka na bo ya matadi.”

4 O Nzambi na beto, wa, sambu bo ke vweza beto,+ sala nde nsoni na bo kuvutukila bo,+ mpi sala nde bo kuma bonso kima ya bo me botula mpi bo kuma bampika na insi ya kimpika. 5 Kubumba ve mbi na bo mpi kufwanza ve masumu na bo na ntwala na nge,+ sambu bo me finga bantu yina ke tunga.

6 Yo yina beto landaka kutunga kibaka, ebuna beto kangisaka kibaka ya mvimba mpi tungaka yo diaka tii na kati-kati, katuka na ntoto tii na zulu, mpi bantu landaka kutula ntima na bo na kisalu.

7 Ebuna, ntangu Sanbalati, Tobia,+ bantu ya Arabia,+ bantu ya Amoni, ti bantu ya Ashdodi+ waka nde kisalu ya kuyidika bibaka ya Yeruzalemi vandaka kukwenda na ntwala mpi nde beto vandaka kukangisa mabulu, bo waka makasi mingi. 8 Bo salaka komplo sambu na kukwisa kunwanisa Yeruzalemi mpi kukotisa mavwanga na kati na yo. 9 Kansi beto sambaka Nzambi na beto mpi tulaka bantu sambu na kutanina beto mpimpa ti mwini sambu bo nwanisa beto ve.

10 Kansi bantu ya Yuda vandaka kutuba nde: “Ngolo ya bantu ya ke sala kisalu ya ngolo* me mana, mpi mvindu kele mingi kibeni; beto ta kuka ve ata fioti kutunga kibaka.”

11 Mpi bambeni na beto landaka kutuba nde: “Na ntwala nde bo zaba yo to bo mona beto, beto ta kwisa na kati na bo, beto ta fwa bo mpi ta sukisa kisalu yina.”

12 Konso ntangu yina Bayuda yina vandaka kuzinga pene-pene na bo vandaka kukwisa, bo vandaka kusonga beto mbala na mbala* nde: “Bo ta kwisila beto na bandambu yonso.”

13 Yo yina mono tulaka bantu na nima ya kibaka na bisika yina vandaka na nsi mpi pwelele, mpi mono tulaka bo na kulanda ndonga ya mabuta na bo ti bambele na bo ya bitumba, makonga na bo, mpi minduki na bo ya batolo-tolo. 14 Ntangu mono monaka nde bo vandaka na boma, na mbala mosi mono telamaka mpi tubilaka bantu ya lukumu,+ bilandi ya bamfumu, ti bantu ya nkaka nde: “Beno wa bo boma ve.+ Beno yibuka Yehowa, yina kele nene mpi ke pesaka boma;+ beno nwana sambu na bampangi na beno, bana na beno ya babakala ti ya bankento, bankento na beno ti banzo na beno.”

15 Ebuna, ntangu bambeni na beto waka nde beto zabaka mambu yina bo vandaka kusala mpi nde Nzambi ya kieleka bebisaka bangindu na bo, beto yonso vutukaka kusala kisalu na kibaka. 16 Yantika kilumbu yina, bantu ndambu na kati ya bantu na mono vandaka kusala kisalu+ mpi ndambu ya nkaka na kati na bo vandaka kusimba makonga, bitaninu, minduki ya batolo-tolo, ti binkutu ya bibende. Ebuna bamfumu+ telamaka na nima ya nzo ya mvimba ya Yuda 17 yina vandaka kutunga kibaka. Bantu yina vandaka kunata bizitu vandaka kusala kisalu diboko mosi, kansi diboko ya nkaka vandaka kusimba kinwaninu. 18 Konso muntu na kati ya bantu yina vandaka kutunga vandaka ti mbele ya bitumba ya kukanga na luketo na yandi ntangu yandi vandaka kutunga, mpi muntu yina fwete bula kibongo+ vandaka kutelama pene-pene na mono.

19 Ebuna mono tubilaka bantu ya lukumu, bilandi ya bamfumu, ti bantu ya nkaka nde: “Kisalu kele nene mpi mingi, mpi beto me tandama na zulu ya kibaka ntama-ntama. 20 Kana beno wa makelele ya kibongo, beno vukana kisika beto kele. Nzambi na beto ta nwana sambu na beto.”+

21 Mpidina beto landaka kusala kisalu na ntangu ndambu ya nkaka ya bantu vandaka kusimba makonga, yantika na suka-suka tii kuna bambwetete vandaka kubasika. 22 Na ntangu yina, mono tubilaka bantu nde: “Bika nde babakala, konso muntu ti nsadi na yandi, kulala na kati ya Yeruzalemi, mpidina bo ta kengila beto na mpimpa mpi ta sala kisalu na mwini.” 23 Yo yina, yo vanda mono, bampangi na mono, bansadi na mono,+ to bankengidi yina landaka mono, beto katulaka ve bilele na beto ata fioti, mpi konso muntu na kati na beto vandaka kaka ti kinwaninu na yandi na diboko na yandi ya kitata.

5 Kansi, bantu ti bankento na bo yantikaka kudila ngolo sambu na bampangi na bo Bayuda.+ 2 Bantu ya nkaka vandaka kutuba nde: “Beto ti bana na beto ya babakala ti ya bankento, beto kele mingi. Beto fwete baka bambuma sambu na kudia mpi kuvanda kaka na luzingu.” 3 Bantu ya nkaka vandaka kutuba nde: “Beto ke simbisa bilanga na beto ya ble, bilanga na beto ya vinu, mpi banzo na beto bonso kidimbu sambu na kubaka bambuma na ntangu ya nzala.” 4 Bantu ya nkaka diaka vandaka kutuba nde: “Beto me defa mbongo na bilanga na beto ya ble ti na bilanga na beto ya vinu sambu na kufuta kitadi ya ntotila.+ 5 Beto kele nsuni mosi mpi menga mosi ti bampangi na beto,* mpi bana na beto kele bonso bana na bo; ata mpidina beto fwete sala nde bana na beto ya babakala ti ya bankento kukuma bampika, mpi bana na beto ya nkaka ya bankento kele dezia na kimpika.+ Kansi beto kele ve ti ngolo ya kusukisa diambu yai, sambu bilanga na beto ya ble ti bilanga na beto ya vinu kele ya bantu ya nkaka.”

6 Mono waka makasi mingi ntangu mono waka kudila na bo mpi bangogo yai. 7 Yo yina mono tadilaka mambu yai na ntima na mono, ebuna mono nganinaka kibeni bantu ya lukumu ti bilandi ya bamfumu mpi tubilaka bo nde: “Konso muntu na kati na beno ke lomba luta na mpangi na yandi mosi.”+

Diaka, mono yidikaka lukutakanu mosi ya nene sambu na bo. 8 Mono tubilaka bo nde: “Na kutadila makuki na beto, beto me sumba diaka bampangi na beto Bayuda yina bo tekaka na makanda; kansi ntangu yai, keti beno ta teka bampangi na beno mosi,+ mpi keti bo fwete tekila beto bo diaka?” Bo vandaka pima, mpi bo monaka ve kima ya kutuba. 9 Ebuna mono tubaka nde: “Mambu yina beno ke sala kele mbote ve. Keti beno fwete tambula ve na boma ya Nzambi+ na beto sambu makanda, bambeni na beto, kufinga beto ve? 10 Diaka, mono, bampangi na mono, mpi bansadi na mono, beto ke defisa bo mbongo ti bambuma. Pardo, beto bika kudefisa mbongo ti luta.+ 11 Pardo, beno vutudila bo kaka bubu yai bilanga na bo ya ble,+ bilanga na bo ya vinu, banti na bo ya olive, banzo na bo, mpi ndambu mosi na kati ya bandambu nkama* ya mbongo, ya bambuma, ya vinu ya mpa, mpi ya mafuta yina beno ke lomba bo bonso luta.”

12 Ebuna bo tubaka nde: “Beto ta vutudila bo bima yai mpi ta lomba ve ata kima mosi. Beto ta sala kaka mutindu nge me tuba.” Yo yina mono bingaka banganga-nzambi mpi songaka bantu yina na kuzenga kieleka sambu na kuzitisa lusilu yai. 13 Diaka, mono nikisaka lele na mono* mpi tubaka nde: “Bika nde konso muntu yina ke zitisa ve lusilu yai, Nzambi ya kieleka kunikisa yandi mutindu yai na nzo na yandi mpi na bima na yandi; mpi bika nde bo nikisa muntu yina mutindu yai mpi bo bika yandi maboko mpamba.” Yo yina dibundu ya mvimba tubaka nde: “Amen!”* Ebuna bo pesaka Yehowa lukumu, mpi bantu salaka mutindu bo silaka.

14 Diaka, yantika kilumbu yina yandi pesaka mono kisalu ya kukuma mfumu ya mbanza+ na bo na insi ya Yuda, katuka na mvula ya 20+ tii na mvula ya 32+ ya ntotila Artazeresesi,+ bamvula 12, yo vanda mono to bampangi na mono, beto diaka ve madia ya bo ke pesaka mfumu ya mbanza.+ 15 Kansi bamfumu ya ntete ya mbanza yina vandaka na ntwala na mono pesaka bantu kizitu mpi bo vandaka kubaka konso kilumbu na maboko na bo bashekele* 40 ya arza sambu na mampa mpi vinu. Diaka, bansadi na bo monisaka bantu mpasi. Kansi mono salaka yo ve+ sambu na boma ya Nzambi.+

16 Diaka, mono pesaka maboko na kisalu ya kibaka yai, mpi beto bakaka ata kilanga mosi ve;+ bansadi na mono yonso vukanaka pana sambu na kisalu. 17 Kuvandaka ti Bayuda 150 ti bilandi ya bamfumu yina vandaka kudia na mesa na mono, mpi bantu yina katukaka na makanda mpi kwisaka na beto. 18 Konso kilumbu bo vandaka kulambila mono* ngombe mosi ya bakala, mameme sambanu ya kitoko, ti bandeke, mpi mbala mosi na bilumbu kumi beto vandaka kunwa vinu mingi ya mutindu na mutindu. Ata mpidina, mono vandaka ve kulomba madia yina bo ke pesaka mfumu ya mbanza, sambu bantu vandaka dezia kunata bizitu na bo ya kisalu. 19 O Nzambi na mono, yibuka mono na mutindu ya mbote* sambu na mambu yonso ya mono me sala sambu na bantu yai.+

6 Kaka ntangu bo songaka Sanbalati, Tobia,+ Geshemi muntu ya Arabia,+ ti bambeni na beto ya nkaka nde mono me tunga diaka kibaka+ mpi nde ata dibulu mosi ve me bikala na kibaka (ata tii na ntangu yina mono vandaka me tedimisa ntete ve bikangilu na bakielo),+ 2 na mbala mosi Sanbalati ti Geshemi tindilaka mono nsangu yai: “Kwisa beto tula ntangu mosi sambu na kukutana na babwala ya Muwanda ya Ono.”+ Kansi bo vandaka kukana kusala mono mbi. 3 Yo yina mono tindilaka bo binati-nsangu sambu na kutuba nde: “Mono ke sala kisalu mosi ya nene, mono lenda kulumuka ve. Sambu na nki kisalu fwete telama na ntangu mono ke bika yo sambu na kukwisa na beno?” 4 Bo tindilaka mono nsangu yina mosi mbala iya, mpi konso mbala mono vandaka kupesa bo mvutu ya mutindu mosi.

5 Ebuna Sanbalati tindilaka mono nsadi na yandi ti nsangu ya mutindu mosi na mbala ya tanu, ti mukanda ya kukanguka na diboko na yandi. 6 Bo sonikaka na mukanda yango nde: “Yo me wakana na kati ya makanda, Geshemi+ mpi ke tuba yo, nde nge ti Bayuda beno ke kana kukolama.+ Yo yina nge ke tunga kibaka; mpi nsangu yina ke monisa nde nge ke zola kukuma ntotila na bo. 7 Diaka, nge me tula bambikudi sambu na kuzabisa nsangu na nge na Yeruzalemi ya mvimba nde, ‘Ntotila mosi kele na Yuda!’ Ntangu yai bo ta songa ntotila mambu yai. Yo yina kwisa beto tubila yo kumosi.”

8 Kansi, mono tindilaka yandi mvutu yai: “Ata diambu mosi ve na mambu ya nge ke tuba me salama; nge mosi ke ganga yo na bangindu na nge.”* 9 Bo yonso vandaka kusosa kupesa beto boma mpi kutuba nde: “Maboko na bo ta lemba na kisalu, mpi yo ta salama ve.”+ Ntangu yai mono ke samba, pesa maboko na mono kikesa.+

10 Ebuna mono kwendaka na nzo ya Shemaya mwana ya Delaya mwana ya Mehetabele ntangu yandi kudikangaka kuna. Yandi tubaka nde: “Beto tula ntangu mosi sambu na kukutana na nzo ya Nzambi ya kieleka, na kati ya tempelo, mpi beto kanga bakielo ya tempelo, sambu bo ke kwisa kufwa nge. Bo ke kwisa kufwa nge na mpimpa.” 11 Kansi mono tubaka nde: “Keti muntu bonso mono fwete tina? Keti muntu bonso mono lenda kota na tempelo mpi kuzinga?+ Mono ta kota ve!” 12 Ebuna mono bakisaka nde Nzambi ve muntu tindaka yandi, kansi Tobia ti Sanbalati+ bantu futaka yandi sambu na kutuba mbikudulu yai sambu na mono. 13 Bo futaka yandi sambu na kupesa mono boma mpi kupusa mono na kusala disumu, mpidina bo zolaka kuvanda ti kikuma ya kubebisa lukumu na mono, sambu na kufinga mono.

14 O Nzambi na mono, yibuka Tobia+ ti Sanbalati mpi mambu yai, yibuka mpi mbikudi ya nkento Noadia ti bambikudi ya nkaka yina vandaka ntangu yonso kusosa kupesa mono boma.

15 Ebuna kibaka manaka na kilumbu ya 25 ya Elule,* na nsungi ya bilumbu 52.

16 Kaka ntangu bambeni na beto yonso waka yo mpi makanda yonso ya nziunga monaka yo, bo waka nsoni mingi,*+ mpi bo bakisaka nde kisalu yai salamaka ti lusadisu ya Nzambi na beto. 17 Na bilumbu yina, bantu ya lukumu+ ya Yuda vandaka kutindila Tobia mikanda mingi, ebuna Tobia vandaka kupesa bo mvutu. 18 Bantu mingi na Yuda zengaka kieleka nde bo ta vanda ya kwikama na yandi, sambu yandi vandaka bokilo ya Shekania mwana ya Arah,+ mpi mwana na yandi ya bakala Yehohanani kwelaka mwana ya Meshulami+ mwana ya Berekia. 19 Diaka, bo vandaka ntangu yonso kusonga mono mambu ya mbote sambu na yandi ebuna bo vandaka kuzabisa yandi mambu yina mono tubaka. Na nima, Tobia vandaka kutinda mikanda sambu na kupesa mono boma.+

7 Kaka na ntangu bo manisaka kutunga diaka+ kibaka, mono tedimisaka bakielo,+ ebuna, mono tulaka bankengidi ya bakielo,+ miyimbi-bankunga,+ ti Balevi.+ 2 Na nima, mono tulaka mpangi na mono Hanani+ na kuyala Yeruzalemi, kumosi ti Hanania mfumu ya Kisika ya Ngolo,+ sambu yandi vandaka kibeni muntu ya me fwana na kutudila ntima mpi yandi vandaka kuwa Nzambi ya kieleka+ boma kuluta bantu mingi ya nkaka. 3 Yo yina mono tubilaka bo nde: “Bo fwete kangula ve bakielo ya Yeruzalemi tii kuna ntangu ta kuma ngolo, mpi na ntangu bo ke telama sambu na kukengila, bo fwete kanga bakielo mpi kutula yo bikangilu. Ebuna tula bantu ya Yeruzalemi bo vanda bankengidi, konso muntu na kisika ya bo me pesa yandi na kukengila mpi konso muntu na ntwala ya nzo na yandi.” 4 Mbanza vandaka nene mpi nda, bantu vandaka mingi ve na kati,+ mpi bo tungaka ntete ve banzo mingi.

5 Kansi Nzambi na mono tulaka na ntima na mono ngindu ya kuvukisa bantu ya lukumu, bilandi ya bamfumu, ti bantu sambu bo sonikisa bazina na kulanda ndonga ya ba-nkaka.+ Ebuna mono monaka mukanda ya bazina ya bantu yina kwisaka ntete yina bo sonikisaka bazina na kulanda ndonga ya ba-nkaka, mpi mono monaka bo me sonika na kati nde:

6 Bantu yai vandaka bantu ya provense* yina vandaka na kati ya bantu yina katukaka na kimpika, bayina Nebukadenezare+ ntotila ya Babilone nataka na kimpika+ mpi bayina vutukaka na Yeruzalemi ti na Yuda na nima, konso muntu na mbanza na yandi,+ 7 bayina kwisaka ti Zorobabele,+ Yeshua,+ Nehemia, Azaria, Raamia, Nahamani, Mordekai, Bilshani, Mispereti, Bigwai, Nehumi, ti Baanah.

Yai ntalu ya babakala ya Izraele:+ 8 bana ya Paroshi 2 172; 9 bana ya Shefatia 372; 10 bana ya Arah+ 652; 11 bana ya Pahati-moabi,+ na bana ya Yeshua ti ya Yoabi,+ 2 818; 12 bana ya Elami+ 1 254; 13 bana ya Zatu 845; 14 bana ya Zakai 760; 15 bana ya Binwi 648; 16 bana ya Bebai 628; 17 bana ya Azgadi 2 322; 18 bana ya Adonikami 667; 19 bana ya Bigwai 2 067; 20 bana ya Adini 655; 21 bana ya Atere, ya Ezekiasi, 98; 22 bana ya Ashumi 328; 23 bana ya Besai 324; 24 bana ya Arifi 112; 25 bana ya Gibeoni+ 95; 26 babakala ya Betelemi ti Netofa 188; 27 babakala ya Anatoti+ 128; 28 babakala ya Bete-azmaveti 42; 29 babakala ya Kiriati-yearimi,+ Kefira, ti Beeroti+ 743; 30 babakala ya Rama ti Geba+ 621; 31 babakala ya Mikmasi+ 122; 32 babakala ya Betele+ ti Ai+ 123; 33 babakala ya Nebo ya nkaka 52; 34 bana ya Elami ya nkaka 1 254; 35 bana ya Arimi 320; 36 bana ya Yeriko 345; 37 bana ya Lodi, Adidi, ti Ono+ 721; 38 bana ya Senaa 3 930.

39 Banganga-nzambi:+ bana ya Yedaya ya nzo ya Yeshua 973; 40 bana ya Imere 1 052; 41 bana ya Pashure+ 1 247; 42 bana ya Arimi+ 1 017.

43 Balevi:+ bana ya Yeshua, ya Kadmiele,+ na bana ya Odeva 74. 44 Miyimbi-bankunga:+ bana ya Asafi,+ 148. 45 Bankengidi ya bakielo:+ bana ya Shalumi, bana ya Atere, bana ya Talmoni, bana ya Akubu,+ bana ya Atita, bana ya Shobai, 138.

46 Bansadi ya tempelo:*+ bana ya Siha, bana ya Asufa, bana ya Tabaoti, 47 bana ya Kerosi, bana ya Sia, bana ya Padoni, 48 bana ya Lebana, bana ya Agaba, bana ya Salmai, 49 bana ya Hanane, bana ya Gidele, bana ya Gahare, 50 bana ya Reaya, bana ya Resini, bana ya Nekoda, 51 bana ya Gazami, bana ya Uza, bana ya Pasea, 52 bana ya Besai, bana ya Meunimi, bana ya Nefushesimi, 53 bana ya Bakbuku, bana ya Akufa, bana ya Arure, 54 bana ya Basliti, bana ya Mehida, bana ya Arsha, 55 bana ya Barkosi, bana ya Sisera, bana ya Tema, 56 bana ya Nesia, bana ya Atifa.

57 Bana ya bansadi ya Salomo:+ bana ya Sotai, bana ya Sofereti, bana ya Perida, 58 bana ya Yaala, bana ya Darkoni, bana ya Gidele, 59 bana ya Shefatia, bana ya Atili, bana ya Pokereti-hazebayimi, bana ya Amone. 60 Bansadi yonso ya tempelo*+ ti bana ya bansadi ya Salomo vandaka 392.

61 Bantu yai tombukaka katuka na Tele-mela, Tele-arsha, Kerubi, Adoni, mpi Imere, kansi mpila ya kuzaba nzo ya batata na bo ti kisina na bo vandaka ve, kana bo vandaka bantu ya Izraele to ve:+ 62 bana ya Delaya, bana ya Tobia, bana ya Nekoda, 642. 63 Na banganga-nzambi: bana ya Abaya, bana ya Akosi,+ bana ya Barzilai, yina bakaka nkento na kati ya bana-bankento ya Barzilai+ muntu ya Gileadi mpi yina bo kumaka kubinga na zina na bo. 64 Bantu yai sosaka bazina ya mabuta na bo na balisiti sambu na kuzaba ndonga ya ba-nkaka na bo, kansi yo monanaka ve, yo yina bo katulaka bo na kisalu ya kinganga-nzambi.*+ 65 Mfumu ya mbanza*+ songaka bo nde bo fwete dia ve bima ya kuluta santu+ tii kuna nganga-nzambi mosi yina lenda yula Urimi ti Tumimi ta basika.+

66 Ntalu yonso ya dibundu ya mvimba vandaka 42 360,+ 67 katula bampika na bo ya babakala ti ya bankento,+ yina vandaka 7 337; bo vandaka mpi ti miyimbi-bankunga ya babakala ti ya bankento 245.+ 68 Bampunda na bo ya bitumba vandaka 736, bampunda na bo ya nkaka 245, 69 bashamo na bo 435, bampunda na bo 6 720.

70 Bamfumu ya nkaka ya banzo ya batata pesaka makabu sambu na kisalu.+ Mfumu ya mbanza* tulaka na kisika ya kubumba bimvwama badrakime* 1 000 ya wolo, babolo 50, ti bamvwela 530 ya banganga-nzambi.+ 71 Bamfumu ya nkaka ya banzo ya batata pesaka na sanduku ya makabu sambu na kisalu badrakime 20 000 ya wolo ti bamine* 2 200 ya arza. 72 Mpi bantu ya nkaka pesaka badrakime 20 000 ya wolo, bamine 2 000 ya arza, ti bamvwela 67 ya banganga-nzambi.

73 Ebuna banganga-nzambi, Balevi, bankengidi ya bakielo, miyimbi-bankunga,+ bantu ya nkaka, bansadi ya tempelo,* mpi bantu ya Izraele yonso ya nkaka* zingaka na bambanza na bo.+ Ntangu ngonda ya nsambwadi lungaka,+ bantu ya Izraele vandaka kuzinga na bambanza na bo.+

8 Ebuna bantu yonso vukanaka ti ngindu mosi na bala-bala ya nene na ntwala ya Kielo ya Masa,+ mpi bo songaka Esdrasi+ kalaki ya mikanda* na kunata mukanda ya Nsiku ya Moize,+ yina Yehowa songaka Izraele.+ 2 Yo yina nganga-nzambi Esdrasi nataka Nsiku na ntwala ya dibundu+ ya babakala, ya bankento, mpi ya bantu yonso yina lendaka kuwa mpi kubakisa, na kilumbu ya ntete ya ngonda ya nsambwadi.+ 3 Ebuna yandi tangaka yo+ na ndinga ya ngolo na bala-bala ya nene yina ke talana ti Kielo ya Masa, yantika na suka-suka tii na midi, na ntwala ya babakala, bankento, mpi bantu yonso yina lendaka kubakisa; mpi bantu widikilaka na dikebi yonso+ mambu ya mukanda ya Nsiku. 4 Esdrasi kalaki ya mikanda* vandaka ya kutelama na zulu ya estrade ya mabaya yina bo salaka sambu na dibaku yina; ebuna Matitia, Shema, Anaya, Uria, Hilkia, ti Maaseya vandaka ya kutelama pene-pene na yandi na diboko na yandi ya kitata, mpi Pedaya, Mishaele, Malkiya,+ Ashumi, Ashe-badana, Zekaria, ti Meshulami na diboko na yandi ya kimama.

5 Esdrasi kangulaka mukanda yina na meso ya bantu yonso, sambu yandi vandaka na zulu ya bantu yonso. Ntangu yandi kangulaka yo, bantu yonso telamaka. 6 Ebuna Esdrasi kumisaka Yehowa Nzambi ya kieleka, Nzambi ya nene, ebuna bantu yonso vutulaka nde, “Amen!* Amen!”+ mpi bo nangulaka maboko na bo na zulu. Na nima, bo bwaka na ntoto mpi fukamaka na ntwala ya Yehowa baluse na ntoto. 7 Yeshua, Bani, Sherebia,+ Yamini, Akubu, Shabetai, Odia, Maaseya, Kelita, Azaria, Yozabadi,+ Hanane, ti Pelaya, bayina vandaka Balevi, vandaka kutendudila bantu Nsiku,+ kansi bantu bikalaka ya kutelama. 8 Mpi bo landaka kutanga mukanda yina na ndinga ya ngolo, Nsiku ya Nzambi ya kieleka, bo vandaka kutendula yo pwelele mpi kupesa ngindu na yo; mpidina bo sadisaka bantu na kubakisa mambu yina bo vandaka kutanga.*+

9 Ebuna Nehemia yina vandaka mfumu ya mbanza* na ntangu yina, Esdrasi+ yina vandaka nganga-nzambi mpi kalaki ya mikanda,* mpi Balevi yina vandaka kulonga bantu, bo tubilaka bantu yonso nde: “Bubu yai kele kilumbu mosi ya santu sambu na Yehowa Nzambi na beno.+ Beno vanda na mawa ve mpi beno dila ve.” Sambu bantu yonso vandaka kudila ntangu bo waka bangogo ya Nsiku. 10 Yandi tubilaka bo nde: “Beno kwenda, beno dia bima ya kuluta kitoko,* beno nwa bima ya sukadi, mpi beno tinda ndambu ya madia+ na bantu yina me lamba ve ata kima; sambu yai kele kilumbu ya santu sambu na Mfumu na beto, mpi beno wa ve mawa, sambu kiese ya Yehowa kele kisika na beno ya ngolo ya lutaninu.”* 11 Balevi vandaka kulembika bantu yonso ntima mpi kutuba nde: “Beno vanda pima! sambu bubu yai kele kilumbu ya santu, mpi beno wa mawa ve.” 12 Yo yina bantu yonso kwendaka sambu na kudia, kunwa, kutindila bantu ya nkaka ndambu ya madia, mpi kulanda kuvanda na kiese ya ngolo,+ sambu bo bakisaka mambu yina bo zabisaka bo.+

13 Na kilumbu ya zole, bamfumu ya banzo ya batata ya bantu yonso, banganga-nzambi, mpi Balevi vukanaka pene-pene ya Esdrasi kalaki ya mikanda* sambu na kubakisa diaka mbote-mbote bangogo ya Nsiku. 14 Ebuna bo monaka bo me sonika na kati ya Nsiku yina ya Yehowa pesaka na nzila ya Moize nde bantu ya Izraele fwete zinga na bisasa* na nsungi ya nkinsi yina na ngonda ya nsambwadi,+ 15 mpi nde bo fwete samuna mpi kuzabisa+ na bambanza na bo yonso mpi na Yeruzalemi ya mvimba nde: “Beno basika mpi beno kwenda na ntoto ya bangumba mpi beno kwisa kunata balutangu ya banti ya olive yina kele ti matiti mingi, ya banti ya pini, ya mirte ti ya maba, mpi balutangu ya banti ya nkaka yina kele ti matiti mingi sambu na kusala bisasa, na kuwakana ti mambu yina kele ya kusonika.”

16 Yo yina bantu basikaka mpi kwisaka kunata yo sambu na kusala bisasa sambu na bo mosi, konso muntu na zulu ya ludi na yandi, mpi na bibansala na bo, na bibansala ya nzo ya Nzambi ya kieleka,+ na bala-bala ya nene ya Kielo ya Masa,+ mpi na bala-bala ya nene ya Kielo ya Efrayimi.+ 17 Mpidina bantu yonso ya dibundu yina katukaka na kimpika mpi kwisaka kuvutuka salaka bisasa mpi vandaka kuzinga na bisasa, sambu bantu ya Izraele salaka yo ve mutindu yina tuka bilumbu ya Yozue+ mwana ya Nuni tii na kilumbu yina, yo yina kiese vandaka mingi kibeni.+ 18 Ebuna konso kilumbu bo vandaka kutanga mukanda ya Nsiku ya Nzambi ya kieleka,+ yantika na kilumbu ya ntete tii na kilumbu ya nsuka. Bo salaka nkinsi bilumbu nsambwadi, ebuna na kilumbu ya nana kuvandaka ti lukutakanu mosi ya santu, mutindu nsiku vandaka kulomba yo.+

9 Na kilumbu ya 24 ya ngonda yai, bantu ya Izraele vukanaka; bo vandaka kubuya madia, bo lwataka basaki mpi kuditulaka putulu.+ 2 Ebuna bantu ya dibuta ya Izraele kabwanaka ti banzenza yonso,+ bo telamaka mpi fungunaka masumu na bo mosi ti bifu ya batata na bo.+ 3 Na nima, bo telamaka kisika bo vandaka mpi bo tangaka na ndinga ya ngolo mukanda ya Nsiku+ ya Yehowa Nzambi na bo bangunga tatu na mwini; mpi bangunga tatu ya nkaka bo vandaka kufunguna masumu na bo mpi kufukimina Yehowa Nzambi na bo.

4 Yeshua, Bani, Kadmiele, Shebania, Buni, Sherebia,+ Bani, ti Kenani telamaka na estrade+ ya Balevi yina bo tedimisaka, mpi bo bokaka na Yehowa Nzambi na bo. 5 Ebuna Balevi yai Yeshua, Kadmiele, Bani, Ashabneya, Sherebia, Odia, Shebania, ti Petaya tubaka nde: “Beno telama mpi beno kumisa Yehowa Nzambi na beno mvula na mvula.*+ Bika nde bo kumisa zina na nge ya nkembo, yina kele ya kunanguka kuluta lusakumunu yonso ti nkembo.

6 “Nge mpamba kele Yehowa;+ nge salaka zulu, ee, zulu ya zulu ti makesa na yo yonso, ntoto ti bima yonso yina kele na zulu na yo, banzadi-mungwa ti bima yonso yina kele na kati na yo. Nge ke taninaka yo yonso na luzingu, mpi makesa ya zulu ke fukimina nge. 7 Nge kele Yehowa Nzambi ya kieleka, yina solaka Abrami+ mpi basisaka yandi na Ure+ ya bantu ya Kaldea mpi pesaka yandi zina Abrahami.+ 8 Nge monaka nde ntima na yandi vandaka ya kwikama na ntwala na nge,+ yo yina nge salaka kuwakana ti yandi sambu na kupesa yandi insi ya bantu ya Kanana, ya bantu ya Heti, ya bantu ya Amore, ya bantu ya Perizi, ya bantu ya Yebusi, ti ya bantu ya Girgashi, sambu na kupesa yo na bana* na yandi;+ ebuna nge zitisaka balusilu na nge, sambu nge kele muntu ya lunungu.

9 “Yo yina nge monaka mpasi ya ba-nkaka na beto na Ezipte,+ mpi nge waka kudila na bo na Nzadi-Mungwa ya Mbwaki. 10 Ebuna nge salaka bidimbu ti bimangu sambu na kunwanisa Farao ti bansadi na yandi yonso ti bantu yonso ya insi na yandi,+ sambu nge zabaka nde bo sadilaka bantu na nge mambu na lulendo yonso.+ Nge kudisadilaka zina yina kele kaka tii bubu yai.+ 11 Nge kabulaka nzadi-mungwa na bitini zole na ntwala na bo, mpidina bo sabukaka nzadi-mungwa na ntoto ya kuyuma,+ ebuna nge losaka bantu yina vandaka kulanda bo na mudindu kibeni bonso ditadi mosi ya bo me losa na masa ya ke nikana ngolo.+ 12 Na mwini nge twadisaka bo ti dikunzi mosi ya dituti, mpi na mpimpa ti dikunzi mosi ya tiya, sambu na kupesa nsemo na nzila yina bo fwete kwenda.+ 13 Ebuna nge kwisaka kukulumuka na Ngumba ya Sinai+ mpi tubilaka bo katuka na zulu+ mpi nge pesaka bo bankanu ya lunungu, bansiku ya kieleka,* balutwadisu ya mbote ti bantuma.+ 14 Nge salaka nde bo zaba Kisabatu na nge ya santu,+ mpi nge pesaka bo bantuma, bansiku, ti nsiku na nzila ya nsadi na nge Moize. 15 Nge pesaka bo mampa katuka na zulu ntangu bo vandaka na nzala,+ nge basisaka masa na ditadi ntangu bo vandaka na nzala ya masa,+ ebuna nge songaka bo na kukota mpi na kubaka insi yina nge silaka* na kupesa bo.

16 “Kansi bo, ba-nkaka na beto, bo salaka mambu na lulendo yonso+ mpi kumaka ntu-ngolo,*+ ebuna bo vandaka kuwa ve bantuma na nge. 17 Bo buyaka kuwa,+ bo yibukaka ve bisalu ya kuyituka yina nge salaka na kati na bo, kansi bo kumaka ntu-ngolo* mpi tulaka mfumu mosi sambu na kuvutuka na kimpika na bo na Ezipte.+ Kansi nge kele Nzambi yina ke vandaka ya kuyilama na kulolula,* yina ke fwilaka bantu nkenda* mpi ke wilaka bo mawa, yina ke waka makasi nswalu ve mpi yina kele ya kufuluka na zola ya kwikama,*+ mpi nge yambulaka bo ve.+ 18 Ata ntangu bo kudisadilaka kiteki ya kibende* ya mwana-ngombe ya bakala mpi vandaka kutuba nde, ‘Yai kele Nzambi na nge yina basisaka nge na Ezipte,’+ mpi bo salaka mambu ya nene ya kukonda luzitu, 19 ata na ntangu yina, nge, na mawa na nge ya nene, nge yambulaka bo ve na ntoto-makanga.+ Dikunzi ya dituti katukaka ve na zulu na bo na mwini sambu na kutwadisa bo na nzila, to dikunzi ya tiya na mpimpa sambu na kupesa nsemo na nzila yina bo fwete kwenda.+ 20 Nge pesaka bo mpeve na nge ya mbote sambu na kupesa bo mayele ya kubakisa mambu mbote-mbote,+ nge yiminaka bo ve mana na nge,+ mpi nge pesaka bo masa ntangu bo vandaka na nzala ya masa.+ 21 Nge pesaka bo madia na ntoto-makanga bamvula 40.+ Bo kondaka kima ve. Bilele na bo bebaka ve,+ mpi makulu na bo vimbaka ve.

22 “Nge pesaka bo bimfumu ti bantu, nge kabisaka yo kitini-kitini,+ yo yina bo bakaka insi ya Sihoni,+ disongidila insi ya ntotila ya Eshboni,+ mpi insi ya Ogi+ ntotila ya Bashani. 23 Nge kumisaka bana na bo mingi kibeni bonso bambwetete ya zulu.+ Ebuna nge nataka bo na insi yina nge silaka na ba-nkaka na bo nde bo fwete kota mpi kubaka.+ 24 Yo yina bana na bo kotaka mpi bakaka insi yina,+ ebuna nge bedisaka na ntwala na bo bantu ya Kanana,+ bayina vandaka kuzinga na insi yina, mpi nge pesaka bo na maboko na bo, yo vanda bantotila na bo to bantu ya insi yina, sambu na kusala bo mutindu bo me zola. 25 Bo botulaka bambanza ya ngolo+ mpi ntoto ya ke butaka mingi,*+ mpi bo bakaka banzo ya kufuluka ti bima ya mbote ya mutindu na mutindu, mabulu ya masa ya bo me timunaka dezia, bilanga ya vinu,+ banti ya olive, ti banti ya bambuma mingi. Yo yina bo diaka, bo fulukaka, bo kumaka mafuta-mafuta, mpi bo waka kiese na bumbote na nge ya nene.

26 “Kansi bo kondaka bulemfu, bo kolamaka na ntwala na nge+ mpi bo pesaka Nsiku na nge mukongo.* Bo fwaka bambikudi na nge yina vandaka kukebisa bo sambu na kuvutula bo na nge, mpi bo salaka mambu ya kukonda luzitu kibeni.+ 27 Sambu na diambu yai, nge pesaka bo na maboko ya bambeni na bo,+ yina landaka kupesa bo mpasi.+ Kansi na ntangu yina bo vandaka na mpasi, bo vandaka kudidila nge, ebuna nge vandaka kuwa tuka na zulu; mpi sambu na mawa na nge ya nene, nge vandaka kupesa bo bangulusi sambu na kugulusa bo na maboko ya bambeni na bo.+

28 “Kansi kaka na ntangu yina bo vandaka kupema, bo vandaka kusala diaka mambu yina kele mbi na ntwala na nge,+ mpi nge vandaka kuyambula bo na maboko ya bambeni na bo, bayina vandaka kuyala bo.*+ Ebuna bo vandaka kuvutuka mpi kubinga nge sambu na kulomba lusadisu,+ mpi nge vandaka kuwa tuka na zulu mpi kugulusa bo mbala na mbala sambu na mawa na nge ya nene.+ 29 Ata nge vandaka kukebisa bo sambu na kuvutula bo na Nsiku na nge, bo vandaka kusala mambu na lulendo yonso mpi kubuya kuwa bantuma na nge;+ mpi bo salaka masumu na bansiku na nge, yina muntu ke zingilaka kana yandi zitisa yo.+ Kansi na ntu-ngolo yonso bo pesaka mukongo mpi kumisaka nkingu na bo ngolo, mpi bo buyaka kuwa. 30 Nge monisilaka bo kikalulu ya kukanga-ntima+ na nsungi ya bamvula mingi mpi nge vandaka kaka kukebisa bo na nsadisa ya mpeve na nge na nzila ya bambikudi na nge, kansi bo buyaka kuwa. Nsuka-nsuka nge pesaka bo na maboko ya bantu ya bansi.+ 31 Kansi na mawa na nge ya nene, nge manisaka bo ve+ mpi nge yambulaka bo ve, sambu nge kele Nzambi mosi ya ke fwilaka bantu nkenda* mpi ke wilaka bo mawa.+

32 “Ntangu yai, O Nzambi na beto, Nzambi ya nene, ya ngolo, mpi ya ke pesaka boma, yina me zitisaka kuwakana na yandi mpi me monisaka zola ya kwikama,+ kumona ve mpamba mpasi yonso yina me bwila beto, bantotila na beto, bamfumu na beto,+ banganga-nzambi na beto,+ bambikudi na beto,+ ba-nkaka na beto, ti bantu na nge yonso katuka bilumbu ya bantotila ya Asiria+ tii bubu yai. 33 Nge me monisaka lunungu na mambu yonso yina me kuminaka beto, sambu nge me salaka mambu na kwikama yonso; kansi beto bantu me salaka mambu na nku.+ 34 Na yina me tala bantotila na beto, bamfumu na beto, banganga-nzambi na beto, mpi ba-nkaka na beto, bo zitisaka ve Nsiku na nge, bo tulaka mpi ve dikebi na bantuma na nge mpi na bangibusa* na nge ya nge sadilaka sambu na kukebisa bo. 35 Ata ntangu bo vandaka na kimfumu na bo mpi vandaka kusepela na mambote mingi yina nge pesaka bo mpi bo vandaka na ntoto ya nene mpi ya ke butaka mingi* ya nge pesaka bo, bo sadilaka nge ve+ mpi yambulaka ve bikalulu na bo ya mbi. 36 Tala! Beto kele bampika+ bubu yai, ee, bampika na insi yina nge pesaka ba-nkaka na beto sambu na kudia mbuma na yo mpi bima na yo ya mbote. 37 Bima ya mingi yina yo ke basisa kele sambu na bantotila yina nge me tula na zulu na beto sambu na masumu na beto.+ Bo ke yala nitu na beto ti bitwisi na beto mutindu bo me zola, mpi beto kele na mpasi ya nene.

38 “Yo yina na kutadila mambu yai yonso, beto ke sala kuwakana mosi ya ngolo+ ya kusonika, mpi kashe ya bamfumu na beto, Balevi na beto, ti banganga-nzambi na beto ke ndimisa yo.”+

10 Bantu yina ndimisaka yo mpi tulaka yo kashe+ na bo vandaka:

9 Mpi Balevi: Yeshua mwana ya Azania, Binwi na bana ya Enadadi, Kadmiele,+ 10 ti bampangi na bo Shebania, Odia, Kelita, Pelaya, Hanane, 11 Mika, Rehobi, Ashabia, 12 Zakure, Sherebia,+ Shebania, 13 Odia, Bani, mpi Beninu.

14 Bamfumu ya bantu: Paroshi, Pahati-moabi,+ Elami, Zatu, Bani, 15 Buni, Azgadi, Bebai, 16 Adoniya, Bigwai, Adini, 17 Atere, Ezekiasi, Azure, 18 Odia, Ashumi, Besai, 19 Arifi, Anatoti, Nebai, 20 Magpiashi, Meshulami, Ezire, 21 Meshezabele, Zadoki, Yadua, 22 Pelatia, Hanane, Anaya, 23 Oshea, Hanania, Ashubi, 24 Aloheshi, Pila, Shobeki, 25 Rehumi, Ashabna, Maaseya, 26 Ahiya, Hanane, Anane, 27 Maluke, Arimi, ti Baanah.

28 Bantu ya nkaka—banganga-nzambi, Balevi, bankengidi ya bakielo, miyimbi-bankunga, bansadi ya tempelo,* mpi konso muntu yina kabwanaka ti bantu ya bansi sambu na kulanda Nsiku ya Nzambi ya kieleka,+ kumosi ti bankento na bo, bana na bo ya babakala, mpi bana na bo ya bankento, bantu yonso yina vandaka ti nzayilu mpi mayele ya kubakisa mambu*— 29 vukanaka ti bampangi na bo, bantu na bo ya lukumu, mpi diaka ndefi, na kuzitisa Nsiku ya Nzambi ya kieleka, yina bo pesaka na nzila ya Moize nsadi ya Nzambi ya kieleka, mpi na kuzitisa mbote-mbote bantuma yonso ya Yehowa Mfumu na beto, balusambisu na yandi, ti bansiku na yandi. 30 Beto ta pesa ve bana na beto ya bankento na bantu ya insi, mpi beto ta baka ve bana na bo ya bankento sambu na bana na beto ya babakala.+

31 Kana bantu ya insi kukwisa kunata bima na bo ya kuteka mpi bambuma ya mutindu na mutindu sambu na kuteka na kilumbu ya Kisabatu, beto ta sumba ve ata kima mosi na maboko na bo na kilumbu ya Kisabatu+ to na kilumbu mosi ya santu.+ Beto ta yambula mpi bima ya bilanga ya mvula ya nsambwadi+ mpi konso mfuka yina bo me futa ntete ve.+

32 Diaka, beto kudipesaka nsiku konso muntu na kati na beto na kupesa ndambu mosi na kati ya bandambu tatu ya shekele* mosi konso mvula sambu na kisalu ya nzo* ya Nzambi na beto,+ 33 sambu na mampa ya kutetika,*+ dikabu ya mbuma ya bo fwete pesa mbala na mbala,+ dikabu ya kuyoka ya mbala na mbala ya Bisabatu,+ bangonda ya mpa,+ mpi sambu na bankinsi ya bo me tulaka, sambu na bima ya santu,+ makabu sambu na disumu sambu na kufika masumu+ sambu na Izraele, mpi sambu na kisalu yonso ya nzo ya Nzambi na beto.

34 Diaka, beto bulaka zeke na yina me tala bankuni yina banganga-nzambi, Balevi mpi bantu fwete nata na nzo ya Nzambi na beto na kutadila banzo ya batata na beto, na bantangu na yo, konso mvula, sambu na kuyoka na zulu ya mesa-kimenga ya Yehowa Nzambi na beto, na kuwakana ti mambu yina kele ya kusonika na Nsiku.+ 35 Beto ta nata mpi bambuma ya ntete ya kuyela ya ntoto na beto mpi bambuma ya ntete ya kuyela ya banti ya bambuma ya mutindu na mutindu, konso mvula, na nzo ya Yehowa,+ 36 mpi bana ya ntete na kati ya bana na beto ya babakala mpi bana ya ntete ya bitwisi na beto+—na kuwakana ti mambu yina kele ya kusonika na Nsiku—mpi bana ya ntete ya bangombe na beto mpi ya mameme na beto. Beto ta nata yo na nzo ya Nzambi na beto, na banganga-nzambi yina ke salaka kisalu na nzo ya Nzambi na beto.+ 37 Diaka, fufu ya ntete ya bambuma na beto ya ntete,+ makabu na beto, bambuma ya konso mutindu ya nti,+ vinu ya mpa, mpi mafuta,+ beto fwete nata yo na banganga-nzambi na basuku ya kubumbila bima* ya nzo ya Nzambi na beto,+ ti ndambu mosi na kati ya bandambu kumi* ya bima ya me katuka na ntoto na beto, beto fwete nata yo na Balevi,+ sambu Balevi bantu ke bakaka bandambu ya kumi na bambanza na beto yonso yina bo ke salaka bilanga.

38 Ebuna nganga-nzambi, mwana ya Aroni, fwete vanda ti Balevi ntangu Balevi ke baka ndambu mosi na kati ya bandambu kumi; mpi Balevi fwete pesa ndambu mosi na kati ya bandambu kumi ya ndambu mosi na kati ya bandambu kumi na nzo ya Nzambi na beto,+ na basuku* ya nzo ya kubumbila bima. 39 Bantu ya Izraele mpi bana ya Balevi fwete nata dikabu+ ya bambuma, vinu ya mpa, mpi mafuta,+ na basuku ya kubumbila bima,* mpi kuna kele kisika yina malonga ya santu, banganga-nzambi yina ke salaka kisalu, bankengidi ya bakielo, ti miyimbi-bankunga ke vandaka. Beto ta yambula ve nzo ya Nzambi na beto.+

11 Ntangu yai, bamfumu ya bantu vandaka kuzinga na Yeruzalemi;+ kansi bantu yina ya nkaka bulaka zeke+ sambu na kunata muntu mosi na kati ya bantu kumi na kuzinga na Yeruzalemi, mbanza ya santu, kansi bantu uvwa yina ya nkaka bikalaka na bambanza ya nkaka. 2 Diaka, bantu sakumunaka babakala yonso yina kudipesaka na luzolo yonso sambu na kuzinga na Yeruzalemi.

3 Yai bamfumu ya provense* yina zingaka na Yeruzalemi. (Bantu ya nkaka ya Izraele, banganga-nzambi, Balevi, bansadi ya tempelo,*+ ti bana ya bansadi ya Salomo,+ zingaka na bambanza ya nkaka ya Yuda, konso muntu na ntoto na yandi na mbanza na yandi.+

4 Diaka, bantu ya nkaka ya Yuda ti ya Benyamini zingaka na Yeruzalemi.) Na bantu ya Yuda, kuvandaka ti Ataya mwana ya Uziya mwana ya Zekaria mwana ya Amaria mwana ya Shefatia mwana ya Mahalalele na bana ya Peresi,+ 5 ti Maaseya mwana ya Baruki mwana ya Koloze mwana ya Azaya mwana ya Adaya mwana ya Yoyaribi mwana ya Zekaria mwana ya muntu ya Shela. 6 Bana yonso ya Peresi yina vandaka kuzinga na Yeruzalemi vandaka babakala 468 yina me fwana.

7 Yai bantu ya Benyamini: Salu+ mwana ya Meshulami mwana ya Yoedi mwana ya Pedaya mwana ya Kolaya mwana ya Maaseya mwana ya Itiele mwana ya Yeshaya, 8 mpi na nima na yandi Gabai ti Salai, 928; 9 Yoele mwana ya Zikri vandaka nkengi na bo, mpi Yuda mwana ya Asenua vandaka kilandi ya mfumu ya mbanza.

10 Na banganga-nzambi: Yedaya mwana ya Yoyaribi, Yakini,+ 11 Seraya mwana ya Hilkia mwana ya Meshulami mwana ya Zadoki mwana ya Merayoti mwana ya Ahitubi,+ ntwadisi mosi ya nzo* ya Nzambi ya kieleka, 12 mpi bampangi na bo yina salaka kisalu ya nzo, 822; mpi Adaya mwana ya Yerohami mwana ya Pelalia mwana ya Amsi mwana ya Zekaria mwana ya Pashure+ mwana ya Malkiya, 13 ti bampangi na yandi, bamfumu ya banzo ya batata, 242; mpi Amashesai mwana ya Azarele mwana ya Azai mwana ya Meshilemoti mwana ya Imere, 14 ti bampangi na bo yina vandaka babakala ya ngolo mpi ya kikesa, 128; mpi nkengidi na bo vandaka Zabdiele, muntu ya dibuta mosi ya lukumu.

15 Na Balevi: Shemaya+ mwana ya Ashubi mwana ya Azrikami mwana ya Ashabia mwana ya Buni, 16 mpi Shabetai+ ti Yozabadi,+ bamfumu ya Balevi, yina vandaka kutwadisa bisalu na nganda ya nzo ya Nzambi ya kieleka; 17 Matania,+ mwana ya Mika mwana ya Zabdi mwana ya Asafi,+ ntwadisi ya bankunga, yina vandaka kuyimbisa bankunga ya lukumu na ntangu ya kisambu,+ mpi Bakbukia, kilandi ya bampangi na yandi, mpi Abda mwana ya Shamua mwana ya Galale mwana ya Yedutuni.+ 18 Balevi yonso na mbanza ya santu vandaka 284.

19 Bankengidi ya bakielo vandaka Akubu, Talmoni,+ ti bampangi na bo yina vandaka kukengila bakielo, 172.

20 Bantu ya nkaka ya Izraele, banganga-nzambi, ti Balevi vandaka na bambanza yonso ya nkaka ya Yuda, konso muntu na kisika na yandi mosi yina yandi bakaka bonso dikabu.* 21 Bansadi ya tempelo*+ vandaka kuzinga na Ofeli,+ mpi Siha ti Gishpa vandaka kutwadisa bansadi ya tempelo.*

22 Nkengi ya Balevi na Yeruzalemi vandaka Uzi mwana ya Bani mwana ya Ashabia mwana ya Matania+ mwana ya Mika, na bana ya Asafi, miyimbi-bankunga; yandi vandaka kutwadisa kisalu ya nzo ya Nzambi ya kieleka. 23 Sambu ntotila pesaka nsiku mosi sambu na bo,+ mpi kuvandaka ti ngidika mosi ya bo salaka sambu na miyimbi-bankunga sambu na kulungisa banzala na bo ya konso kilumbu. 24 Petaya mwana ya Meshezabele na bana ya Zera mwana ya Yuda vandaka ndongisi ya ntotila* sambu na mambu yonso ya bantu.

25 Na yina me tala babwala ti bilanga na yo, bantu ya nkaka ya Yuda zingaka na Kiriati-arba+ mpi babwala yina kele na nziunga na yo, na Diboni mpi babwala yina kele na nziunga na yo, na Yekabsele+ ti babwala na yo, 26 na Yeshua, na Molada,+ na Bete-paleti,+ 27 na Azare-shuale,+ na Bere-sheba mpi na babwala yina kele na nziunga na yo, 28 na Siklagi,+ na Mekona mpi na babwala yina kele na nziunga na yo, 29 na Ene-rimoni,+ na Sora,+ ti na Yarmuti, 30 na Zanoa,+ na Adulami ti babwala na yo, na Lakishi+ ti bilanga na yo, mpi na Azeka+ mpi babwala yina kele na nziunga na yo. Bo zingaka* katuka na Bere-sheba tii na Muwanda ya Inomi.+

31 Bana ya Benyamini vandaka na Geba,+ Mikmashi, Aiya, Betele+ mpi babwala yina kele na nziunga na yo, 32 Anatoti,+ Nobi,+ Anania, 33 Asore, Rama,+ Gitayimi, 34 Adidi, Seboyimi, Nebalati, 35 Lodi, mpi Ono,+ muwanda ya bantu yina ke salaka bisalu ya maboko. 36 Bo tindaka bimvuka ya nkaka ya Balevi ya Yuda na Benyamini.

12 Bantu yai vandaka banganga-nzambi ti Balevi yina tombukaka ti Zorobabele+ mwana ya Shealtiele,+ ti Yeshua:+ Seraya, Yeremia, Esdrasi, 2 Amaria, Maluke, Atushi, 3 Shekania, Rehumi, Meremoti, 4 Ido, Ginetoi, Abiya, 5 Miyamini, Maadia, Bilga, 6 Shemaya, Yoyaribi, Yedaya, 7 Salu, Amoki, Hilkia, ti Yedaya. Bantu yai vandaka bamfumu ya banganga-nzambi ti ya bampangi na bo na bilumbu ya Yeshua.

8 Balevi vandaka Yeshua, Binwi, Kadmiele,+ Sherebia, Yuda, ti Matania,+ bayina vandaka kuyimbisa bankunga ya kupesa Nzambi matondo kumosi ti bampangi na yandi ya babakala. 9 Bakbukia ti Uni bampangi na bo vandaka ya kutelama mpi ke talana ti bo sambu na bisalu ya kukengila.* 10 Yeshua butaka Yoyakimi, Yoyakimi butaka Eliashibi,+ mpi Eliashibi butaka Yoyada.+ 11 Yoyada butaka Yonatani, mpi Yonatani butaka Yadua.

12 Na bilumbu ya Yoyakimi, yai vandaka banganga-nzambi, bamfumu ya banzo ya batata: sambu na Seraya,+ Meraya; sambu na Yeremia, Hanania; 13 sambu na Esdrasi,+ Meshulami; sambu na Amaria, Yehohanani; 14 sambu na Maluki, Yonatani; sambu na Shebania, Yozefi; 15 sambu na Arimi,+ Adna; sambu na Merayoti, Elkai; 16 sambu na Ido, Zekaria; sambu na Ginetoni, Meshulami; 17 sambu na Abiya,+ Zikri; sambu na Miniamini, . . . ;* sambu na Moadia, Piltai; 18 sambu na Bilga,+ Shamua; sambu na Shemaya, Yehonatani; 19 sambu na Yoyaribi, Matenai; sambu na Yedaya,+ Uzi; 20 sambu na Salai, Kalai; sambu na Amoki, Ebere; 21 sambu na Hilkia, Ashabia; sambu na Yedaya, Netanele.

22 Bo sonikaka bazina ya bamfumu ya banzo ya batata ya Balevi na bilumbu ya Eliashibi, Yoyada, Yohanani, ti Yadua,+ mpi ya banganga-nzambi, tii na luyalu ya Dariusi muntu ya Persia.

23 Balevi yina vandaka bamfumu ya banzo ya batata, bo sonikaka bazina na bo na mukanda ya bansangu, tii na bilumbu ya Yohanani mwana ya Eliashibi. 24 Bamfumu ya Balevi vandaka Ashabia, Sherebia, ti Yeshua+ mwana ya Kadmiele,+ mpi bampangi na bo ya babakala vandaka ya kutelama mpi ke talana ti bo sambu na kupesa lukumu mpi matondo na kuwakana ti bantuma ya Davidi+ muntu ya Nzambi ya kieleka, kimvuka mosi ya bankengidi ke talana ti kimvuka ya nkaka ya bankengidi. 25 Matania,+ Bakbukia, Obadia, Meshulami, Talmoni, mpi Akubu+ vandaka kukengila bonso bankengidi ya bakielo,+ bo vandaka kukengila basuku ya kubumbila bima pene-pene na bakielo. 26 Bantu yai salaka na bilumbu ya Yoyakimi mwana ya Yeshua+ mwana ya Yosadaki mpi na bilumbu ya Nehemia mfumu ya mbanza ti Esdrasi+ nganga-nzambi mpi kalaki ya mikanda.*

27 Ntangu bo yantikaka kusadila bibaka ya Yeruzalemi, bo sosaka Balevi na bisika yonso yina bo vandaka kuzinga mpi bo nataka bo na Yeruzalemi sambu na kusala nkinsi yina ya kuyantika kusadila bibaka sambu na mbala ya ntete ti kuyangalala, ti bankunga ya kupesa Nzambi matondo,+ ti basembale, ti bima ya kubudila miziki ya kele ti bansinga, mpi ti bakidare. 28 Bana ya miyimbi-bankunga* vukanaka katuka na distrike,* na nziunga ya Yeruzalemi, na babwala ya bantu ya Netofa,+ 29 na Bete-gilgale,+ mpi na banseke ya Geba+ ti ya Azmaveti,+ sambu miyimbi-bankunga tungaka babwala sambu na bo mosi na nziunga ya Yeruzalemi. 30 Banganga-nzambi ti Balevi kudikumisaka bunkete, mpi bo kumisaka bantu,+ bakielo,+ ti kibaka+ bunkete.

31 Ebuna mono nataka bamfumu ya Yuda na nsongi ya kibaka. Diaka, mono tulaka bimvuka zole ya nene ya miyimbi-bankunga yina ke pesaka matondo mpi bimvuka sambu na kulanda bo, kimvuka mosi vandaka kutambula na diboko ya kitata na zulu ya kibaka na ndambu ya Kielo ya Bita ya Putulu ya Tiya.+ 32 Oshaya ti ndambu ya bamfumu ya Yuda vandaka kulanda bo na nima, 33 kumosi ti Azaria, Esdrasi, Meshulami, 34 Yuda, Benyamini, Shemaya, mpi Yeremia. 35 Bo vandaka ti bantu ya nkaka na kati ya bana ya banganga-nzambi yina vandaka ti bampungi:+ Zekaria mwana ya Yonatani mwana ya Shemaya mwana ya Matania mwana ya Mikaya mwana ya Zakure mwana ya Asafi,+ 36 ti bampangi na yandi Shemaya, Azarele, Milalai, Gilalai, Maai, Netanele, Yuda, mpi Hanani, bayina vandaka ti bima ya kubudila miziki ya Davidi+ muntu ya Nzambi ya kieleka; Esdrasi+ kalaki ya mikanda* vandaka kukwenda na ntwala na bo. 37 Na Kielo ya Nto ya Masa,+ bo mataka mpi landaka kaka nzila yina na Kimatilu+ ya Mbanza ya Davidi+ na mwa-ngumba ya kibaka na zulu ya Nzo ya Davidi mpi na zulu ya Kielo ya Masa+ na ndambu ya esti.

38 Kimvuka ya nkaka ya miyimbi-bankunga yina ke pesaka matondo vandaka kutambula na ndambu yina ya nkaka,* mpi mono vandaka kulanda yo ti ndambu ya bantu, na zulu ya kibaka na zulu ya Nzo-Zulu ya Bafulu ya Kuyokila Mampa+ mpi na zulu ya Kibaka ya Nene+ 39 mpi na zulu ya Kielo ya Efrayimi+ tii na Kielo ya Mbanza ya Ntama+ mpi tii na Kielo ya Bambisi ya Masa,+ na Nzo-Zulu ya Ananele,+ Nzo-Zulu ya Mea, mpi tii na Kielo ya Mameme;+ ebuna bo telamaka na Kielo ya Bankengidi.

40 Nsuka-nsuka, bimvuka yonso zole ya miyimbi-bankunga yina ke pesaka matondo telamaka na ntwala ya nzo ya Nzambi ya kieleka; mono mpi telamaka ti ndambu ya bilandi ya bamfumu yina vandaka ti mono, 41 ti banganga-nzambi Eliakimi, Maaseya, Miniamini, Mikaya, Elioenai, Zekaria, Hanania, bayina vandaka ti bampungi, 42 ti Maaseya, Shemaya, Eleazare, Uzi, Yehohanani, Malkiya, Elami, mpi Azere. Ebuna miyimbi-bankunga yimbaka na ndinga ya ngolo na lutwadisu ya Yizraya.

43 Na kilumbu yina, bo pesaka bimenga mingi mpi yangalalaka,+ sambu Nzambi ya kieleka salaka nde bo yangalala ti kiese mingi.+ Bankento ti bana mpi yangalalaka, na mpila nde bantu waka makelele ya kuyangalala yina na ntama.+

44 Na kilumbu yina, bo tulaka babakala na kutwadisa banzo ya kubumbila+ makabu,+ bambuma ya ntete,+ mpi bandambu ya kumi.*+ Na kati na yo, yo lombaka nde bo vukisa bima ya bilanga ya bambanza mutindu Nsiku vandaka kulomba+ yo sambu na banganga-nzambi ti Balevi,+ sambu kuyangalala vandaka na Yuda sambu na banganga-nzambi ti Balevi yina vandaka kusala kisalu. 45 Ebuna bo yantikaka kusala bisalu yina Nzambi na bo pesaka bo mpi mukumba ya kudikumisa bunkete, mutindu miyimbi-bankunga ti bankengidi ya bakielo mpi salaka, na kuwakana ti bantuma ya Davidi ti ya mwana na yandi Salomo. 46 Sambu banda ntama na bilumbu ya Davidi ti Asafi, kuvandaka ti bantwadisi* ya miyimbi-bankunga mpi ya bankunga ya lukumu ti ya kupesa Nzambi matondo.+ 47 Na bilumbu ya Zorobabele+ mpi na bilumbu ya Nehemia, bantu yonso ya Izraele vandaka kupesa makabu na miyimbi-bankunga+ ti na bankengidi ya bakielo,+ na kutadila banzala na bo ya konso kilumbu. Bo vandaka kutula mpi na kingenga makabu sambu na Balevi,+ ebuna Balevi vandaka kutula na lweka makabu sambu na bana ya Aroni.

13 Na kilumbu yina, bo tangaka mukanda ya Moize na makutu ya bantu,+ mpi bo monaka bo me sonika na kati nde ata muntu mosi ve ya Amoni to ya Moabi+ fwete kota na dibundu ya Nzambi ya kieleka,+ 2 sambu bo pesaka ve bantu ya Izraele mampa ti masa, kansi bo futaka Balami sambu yandi singa bo.+ Ata mpidina, Nzambi na beto sobaka kusinga yina, yo kumaka lusakumunu.+ 3 Kaka ntangu bo waka Nsiku yina, bo yantikaka kukatula na Izraele bantu yonso yina vandaka na ndonga ya banzenza.+

4 Na ntwala nde diambu yai kusalama, nganga-nzambi yina vandaka ti mukumba ya basuku ya kubumbila bima* ya nzo* ya Nzambi na beto+ vandaka Eliashibi,+ muntu mosi ya dibuta ya Tobia.+ 5 Yandi yidikilaka yandi suku mosi ya nene ya kubumbila bima,* kisika bo vandaka ntete kutula dikabu ya mbuma, ndumbu ya mpembe, bisadilu, ndambu mosi na kati ya bandambu kumi* ya bambuma, vinu ya mpa, ti mafuta,+ yina nsiku vandaka kulomba na kupesa na Balevi,+ na miyimbi-bankunga, mpi na bankengidi ya bakielo, kumosi ti makabu sambu na banganga-nzambi.+

6 Na nsungi ya ntangu yai yonso mono vandaka ve na Yeruzalemi, sambu mono kwendaka na ntotila na mvula ya 32+ ya ntotila Artazeresesi+ ya Babilone; mpi na nima ya mwa ntangu mono lombaka ntotila nswa ya kuvutuka. 7 Ebuna mono kumaka na Yeruzalemi mpi mono monaka diambu ya mbi kibeni yina Eliashibi+ salaka sambu na Tobia+ na mutindu yandi yidikilaka yandi suku mosi ya kubumbila bima na kibansala ya nzo ya Nzambi ya kieleka. 8 Diambu yai sepedisaka mono ve ata fioti, yo yina mono losaka bima yonso ya nzo ya Tobia na nganda ya nzo ya kubumbila bima.* 9 Na nima mono pesaka bantuma, ebuna bo yobisaka basuku yina ya kubumbila bima;* mpi mono vutulaka bima ya nzo ya Nzambi ya kieleka+ kuna, ti dikabu ya mbuma mpi ndumbu ya mpembe.+

10 Mono monaka mpi nde bo pesaka+ ve Balevi+ makabu na bo, na mpila nde Balevi ti miyimbi-bankunga yina vandaka kusala kisalu kwendaka, konso muntu na ntoto na yandi mosi.+ 11 Yo yina mono nganinaka bilandi ya bamfumu+ mpi tubaka nde: “Sambu na nki bo me yambula nzo ya Nzambi ya kieleka?”+ Ebuna mono vukisaka bo mpi tulaka bo na bisika na bo ya kisalu. 12 Ebuna bantu yonso ya Yuda nataka ndambu mosi na kati ya bandambu kumi+ ya bambuma, vinu ya mpa, ti mafuta na basuku ya kubumbila bima.+ 13 Ebuna mono tulaka nganga-nzambi Shelemia, Zadoki kalaki ya mikanda,* ti Pedaya yina vandaka na kati ya Balevi, bamfumu ya basuku ya kubumbila bima, mpi Hanane mwana ya Zakure mwana ya Matania vandaka nsadisi na bo, sambu bo vandaka kutadila bantu yai nde bo vandaka bantu ya kutudila ntima. Bo vandaka ti mukumba ya kukabisa bima na bampangi na bo.

14 O Nzambi na mono,+ yibuka mono sambu na diambu yai, mpi kuvwansa ve mambu na mono ya ke monisa zola ya kwikama yina mono me salaka sambu na nzo ya Nzambi na mono ti bisalu na yo.*+

15 Na bilumbu yina, mono monaka bantu na Yuda ke niata-niata bambuma ya vinu na bikamuninu ya vinu na Kisabatu,+ bo ke nata bita ya bambuma mpi ke tula yo na zulu ya bampunda, mpi bo ke nata vinu, bambuma ya vinu, bafige, mpi kilo ya mutindu na mutindu na Yeruzalemi na kilumbu ya Kisabatu.+ Yo yina mono kebisaka bo na kuteka ve bima na kilumbu yina.* 16 Bantu ya Tire yina vandaka kuzinga na mbanza vandaka kunata bambisi ya masa ti bima ya mutindu na mutindu ya kuteka, mpi bo vandaka kutekila yo bantu ya Yuda mpi na Yeruzalemi na Kisabatu.+ 17 Yo yina mono nganinaka bantu ya lukumu ya Yuda mpi tubilaka bo nde: “Inki diambu ya mbi yai beno ke sala, nkutu beno ke vweza kilumbu ya Kisabatu? 18 Keti yai kele ve mambu yina ba-nkaka na beno salaka, yo yina Nzambi na beto nataka mpasi yai yonso na zulu na beto mpi na zulu ya mbanza yai? Ntangu yai beno ke yika diaka makasi ya ngolo yina Nzambi wilaka Izraele na mutindu beno ke vweza Kisabatu.”+

19 Yo yina, ntangu mpimpa yantikaka kubwa na bakielo ya Yeruzalemi na ntwala nde Kisabatu kuyantika, mono songaka bantu na kukanga bakielo. Mono tubaka mpi nde bo fwete kangula yo ve tii kuna Kisabatu ta luta, mpi mono tulaka bansadi na mono mosi ya nkaka na bakielo sambu bantu kukotisa ve ata kizitu mosi na kilumbu ya Kisabatu. 20 Yo yina bantu ya mumbongo ti bantu ya ke tekaka bima ya mutindu na mutindu lalaka na nganda ya Yeruzalemi mbala mosi to mbala zole. 21 Ebuna mono kebisaka bo mpi tubilaka bo nde: “Sambu na nki beno ke lala na ntwala ya kibaka? Kana beno sala yo diaka, mono ta kula beno na ngolo.” Yantika ntangu yina, bo kwisaka diaka ve na Kisabatu.

22 Ebuna mono songaka Balevi nde bo fwete kudikumisa bunkete mbala na mbala mpi kukwisa kukengila bakielo sambu kilumbu ya Kisabatu kulanda kuvanda ya santu.+ Sambu na diambu yai mpi, O Nzambi na mono, yibuka mono, mpi wila mono mawa na kutadila zola na nge ya kwikama ya mingi.+

23 Na bilumbu yina, mono monaka mpi Bayuda yina kwelaka* bankento+ ya Ashdodi,+ ya Amoni, ti ya Moabi.+ 24 Ndambu ya bana na bo vandaka kutuba ndinga ya Ashdodi mpi ndambu ya nkaka vandaka kutuba bandinga ya bantu ya nkaka, kansi muntu mosi ve zabaka kutuba ndinga ya Bayuda. 25 Yo yina mono nganinaka bo mpi singaka bo, mono bulaka bantu ya nkaka,+ mono tumunaka nsuki na bo mpi songaka bo na kuzenga kieleka na zina ya Nzambi nde: “Beno fwete pesa ve bana na beno ya bankento na bana na bo ya babakala, mpi beno fwete ndima ve ata mwana na bo mosi ya nkento sambu na bana na beno ya babakala to sambu na beno mosi.+ 26 Keti ntotila Salomo ya Izraele salaka ve disumu sambu na bankento yai? Na kati ya makanda mingi, kuvandaka ve ti ntotila bonso yandi;+ mpi Nzambi na yandi zolaka yandi,+ yo yina Nzambi tulaka yandi ntotila na Izraele ya mvimba. Kansi bankento ya banzenza pusaka yandi na kusala disumu.+ 27 Keti beno me waka ve diambu yai yo yina beno ke sala diambu yai ya mbi kibeni na mutindu beno ke sala mambu kukonda kwikama na meso ya Nzambi na beto na ntangu beno ke kwela bankento ya banzenza?”+

28 Mwana mosi ya Yoyada+ mwana ya Eliashibi+ nganga-nzambi ya nene kumaka bokilo ya Sanbalati+ muntu ya Oroni. Yo yina mono kulaka yandi na lweka na mono.

29 O Nzambi na mono, yibuka bo, sambu bo me bebisa kinganga-nzambi mpi kuwakana ya kinganga-nzambi+ ti ya Balevi.+

30 Ebuna mono kumisaka bo bunkete na mvindu yonso ya banzenza, mpi mono pesaka banganga-nzambi ti Balevi mikumba, konso muntu na kisalu na yandi,+ 31 mpi mono bakaka bangidika sambu bantu kupesa bankuni+ na ntangu na yo mpi sambu na bambuma ya ntete ya kuyela.

O Nzambi na mono, yibuka mono na mutindu ya mbote.*+