NKUNGA YA SALOMO
1 Nkunga ya bankunga,* yina kele ya Salomo:+
2 “Bika yandi pesa mono beze ti babeze ya munoko na yandi,
Sambu mitindu na nge ya kumonisa zola kele mbote kuluta vinu.+
3 Nsudi ya mafuta na nge kele kitoko.+
Zina na nge kele bonso mafuta ya nsudi ya kitoko yina bo me tiamuna.+
Yo yina bana-bankento ke zolaka nge.
4 Nata mono;* beto baka ntinu.
Ntotila me kotisa mono na basuku na yandi ya kati!
Bika beto vanda na kiese mpi beto yangalala.
Bika beto kumisa* mitindu na nge ya kumonisa zola kuluta vinu.
Bo* kele ti bikuma ya mbote ya kuzola nge.
5 Mono kele ndombe, kansi kitoko, O bana-bankento ya Yeruzalemi,
6 Beno tala mono ve sambu mono kele ndombe,
Sambu ntangu me yoka mono.
Bampangi na mono ya babakala wilaka mono makasi;
Bo pesaka mono kisalu ya kukengila bilanga ya vinu,
Kansi mono kengilaka ve kilanga na mono ya vinu.
7 Nge muntu ya mono* ke zolaka mingi, songa mono,
Na wapi nge ke disaka bitwisi na nge,+
Na wapi nge ke bikaka bo na midi sambu bo pema.
Sambu na nki mono fwete vanda bonso nkento yina me fika luse ti lele*
Na kati ya bitwisi ya banduku na nge?”
8 “O nkento yina me luta bankento yonso na kitoko, kana nge me zaba ve,
Kwenda kulanda bitambi ya bitwisi
Mpi disa bana-bankombo na nge pene-pene ya batenta ya bangungudi.”
9 “Nkento ya mono ke zolaka mingi, mono ke fwanisa nge ti mpunda* ya nkento yina kele na bapusu-pusu ya Farao.+
10 Matama na nge kele kitoko ti bima ya ke kumisaka nitu kitoko,*
Nkingu na nge ti mayaka.
11 Beto ta sadila nge bima ya wolo ya kukumisa nitu kitoko*
Ti bambuma ya fioti ya arza.”
12 “Ntangu ntotila me vanda na mesa na yandi ya kele bonso dimbuma,
13 Bakala ya mono ke zolaka kele bonso saki ya mananasi ya mire+ sambu na mono,
Na mpimpa yandi ke lala na kati-kati ya mabele na mono.
14 Bakala ya mono ke zolaka kele bonso kisuka ya bintuntu ya hena+ sambu na mono
Na kati ya bilanga ya vinu ya Ene-gedi.”+
15 “Tala! O nkento ya mono ke zolaka mingi, nge kele kitoko.
Tala! Nge kele kitoko. Meso na nge kele bonso meso ya bapizio.”+
16 “Tala! O bakala ya mono ke zolaka, nge kele kitoko mpi nge ke pesa kiese.+
Mbeto na beto kele na kati ya matiti.
17 Makunzi ya nzo na beto* kele banti ya sedre,
Mitandala na beto kele banti ya yenevriye.
2 “Mono kele kaka kintuntu ya safrani* ya ntoto ya kukonda ngumba ya nzadi-mungwa,
Kintuntu ya lisi ya miwanda.”+
2 “Bonso kintuntu ya lisi na kati ya bansende,
Nkento ya mono ke zolaka mingi kele mutindu yina na kati ya bana-bankento.”
3 “Bonso nti ya bapome na kati ya banti ya mfinda,
Bakala ya mono ke zolaka kele mutindu yina na kati ya bana-babakala.
Mono kele na nzala ya ngolo ya kuvanda na nsi ya kivudi na yandi,
Mpi mbuma na yandi kele ntomo na ludimi na mono.
4 Yandi nataka mono na nzo yina bo ke sala nkinsi,*
Mpi kidimbu na yandi yina vandaka kunikana na zulu na mono vandaka zola.
5 Beno pesa mono bagato ya bo me sala na bambuma ya vinu+ sambu mono kuma ngolo;
Beno pesa mono bapome sambu mono kuma ngolo,
Sambu mono ke bela maladi ya zola.
6 Diboko na yandi ya kimama kele na nsi ya ntu na mono,
Mpi diboko na yandi ya kitata me simba mono.+
7 O bana-bankento ya Yeruzalemi, mono ke lomba beno na kudia ndefi,
Na zina ya bambambi+ mpi ya bakabuluku ya nseke nde:
Beno meka ve kusikimisa to kutedimisa zola na kati na mono tii kuna yo mosi ta zola.+
8 Mono ke wa mungungu ya bakala ya mono ke zolaka!
Yandi ke kwisa,
Yandi ke mata bangumba, yandi ke pumbuka na bangumba ya fioti.
9 Bakala ya mono ke zolaka kele bonso mbambi, bonso mwana ya mvudi.+
Yandi kele kuna, yandi me telama na nima ya kibaka na beto,
Yandi ke tala na banela,
Yandi ke tala na miyungulu ya banela.
10 Bakala ya mono ke zolaka ke tuba, yandi ke tubila mono nde:
‘Telama, nkento ya mono ke zolaka mingi,
Nkento ya kitoko ya mono ke zolaka, kwisa beto kwenda.
11 Tala, nsungi ya madidi* me luta.
Mvula me mana mpi yo me kwenda.
12 Bintuntu me basika na ntoto,+
Ntangu ya kuyidika banti me lunga,+
Mpi nkunga ya diyembe ke wakana na ntoto na beto.+
13 Na nti ya bafige, bambuma ya ntete+ me tela;
Banti ya vinu ke basisa bintuntu mpi nsudi na yo.
Muntu ya mono ke zolaka mingi, telama mpi kwisa.
Nkento ya kitoko ya mono ke zolaka, kwisa beto kwenda.
14 O pizio na mono, na mabulu ya ditadi,+
Na banzila ya nda na nsi ya ditadi,
Bika mono mona nge mpi mono wa ndinga na nge,+
Sambu ndinga na nge kele kitoko mpi nge kele kitoko mingi.’”+
15 “Kangila beto mikengi,
Mikengi ya fioti yina ke bebisa bilanga ya vinu,
Sambu bilanga na beto ya vinu me fuluka ti bintuntu.”
16 “Bakala ya mono ke zolaka kele ya mono mpi mono kele ya yandi.+
Yandi ke disa mameme+ na kati ya bintuntu ya lisi.+
17 Tii kuna mupepe ya suka ta yantika kubula* mpi bivudi ta vila,
O bakala ya mono ke zolaka, kwisa kuvutuka nswalu,
Bonso mbambi+ to mwana ya mvudi+ na zulu ya bangumba ya kukabwana.*
Mono sosaka yandi, kansi mono monaka yandi ve.+
2 Mono ta telama mpi ta tambula-tambula na mbanza;
Na babala-bala mpi na babala-bala ya nene,
Beno bika mono sosa bakala ya mono* ke zolaka.
Mono sosaka yandi, kansi mono monaka yandi ve.
3 Bankengidi yina vandaka kutambula na mbanza monaka mono.+
‘Keti beno me mona bakala ya mono* ke zolaka?’
4 Kaka ntangu mono lutaka pene-pene na bo
Mono monaka bakala ya mono* ke zolaka.
Mono simbaka yandi, mono bikaka yandi ve yandi kwenda
Tii kuna mono kotisaka yandi na nzo ya mama na mono,+
Na suku ya kati ya nzo ya nkento yina butaka mono.
5 O bana-bankento ya Yeruzalemi, mono ke lomba beno na kudia ndefi,
Na zina ya bambambi mpi ya bakabuluku ya nseke nde:
Beno meka ve kusikimisa to kutedimisa zola na kati na mono tii kuna yo mosi ta zola.”+
6 “Inki yina ke kwisa kutombuka na ntoto-makanga bonso bandonga ya midinga,
Yina bo me tula mananasi ya mire mpi ndumbu ya mpembe,
Ti bapudre yonso ya nsudi ya kitoko ya muntu ya mumbongo?”+
7 “Tala! Yo kele mbeto ya Salomo.
Babakala ya ngolo 60 me ziunga yo,
Bo kele na kati ya babakala ya ngolo ya Izraele,+
8 Bo yonso kele ti bambele ya bitumba,
Bo yonso me zaba bitumba mbote-mbote,
Konso muntu kele ti mbele na yandi ya bitumba na lweka
Sambu na kuditanina na bima yina ke pesaka boma na mpimpa.”
10 Yandi salaka makunzi na yo na arza,
Banti na yo na wolo.
Kiti na yo kele ya lene ya mbwaki-ble;
Bo kumisaka kati na yo kitoko na zola yonso
Na bana-bankento ya Yeruzalemi.”
11 “Beno basika, O bana- bankento ya Sioni,
Beno tala ntotila Salomo
Yandi me lwata mpu ya makwela* yina mama na yandi+ sadilaka yandi
Na kilumbu ya makwela na yandi,
Na kilumbu yina ntima na yandi waka kiese.”
4 “Tala! O nkento ya mono ke zolaka mingi, nge kele kitoko.
Tala! Nge kele kitoko.
Meso na nge kele bonso meso ya bapizio na nsi ya lele na nge ya kufika luse.
Nsuki na nge kele bonso kimvuka ya bankombo
Yina ke kulumuka na bangumba ya Gileadi.+
2 Meno na nge kele bonso kimvuka ya mameme yina bo me katuka kuzenga mika
Yina bo me katuka kuyobisa mpi ke kwisa kutombuka,
Yonso kele ti mapasa,
Mpi ata mosi ve me vidisa mwana na yo.
3 Bikobo na nge kele bonso nsinga ya mbwaki mingi,
Mpi bangogo na nge kele kitoko.
Matama* na nge na nsi ya lele na nge ya kufika luse
Kele bonso kitini ya mbuma ya grenade.
4 Nkingu na nge+ kele bonso nzo-zulu ya Davidi,+
Yina bo me tunga ti bandonga ya matadi
Yina bo me tula bitaninu funda mosi na zulu na yo,
Bitaninu yonso ya bantu ya ngolo+ yina kele bonso dimbuma.
5 Mabele na nge yonso zole kele bonso bana zole ya kabuluku,+
Bana-mapasa ya mbambi,
Yina ke dia na kati ya bintuntu ya lisi.”
6 “Tii kuna mupepe ya suka ta yantika kubula* mpi bivudi ta vila,
Mono ta kwenda na ngumba ya mire
Mpi na ngumba ya fioti ya ndumbu ya mpembe.”+
8 Nkento ya mono ta kwela, kwisa beto katuka na Libani,
Beto katuka na Libani.+
Beto kulumuka, beto katuka na nsongi ya ngumba ya Amana,*
Na nsongi ya ngumba ya Senire, nsongi ya ngumba ya Ermoni,+
Na bisika yina bantambu ke lalaka, na bangumba ya bankoyi.
9 Nge me yiba ntima+ na mono, mpangi na mono ya nkento, nkento ya mono ta kwela,
Nge me yiba ntima na mono ntangu nge me tala mono mbala mosi na meso na nge,
Ti kima yina ke lela na mayaka ya nkingu na nge.
10 Mitindu na nge ya kumonisa zola kele kitoko kibeni,+ mpangi na mono ya nkento, nkento ya mono ta kwela!
Mitindu na nge ya kumonisa zola kele mbote kuluta vinu,+
Mpi nsudi ya mananasi na nge kele mbote kuluta konso kima ya nsudi ya kitoko!+
11 Nkento ya mono ta kwela, bikobo na nge ke nokisa bwiki ya ke katuka na nzo ya bwiki.+
Bwiki ti miliki* kele na nsi ya ludimi na nge,+
Mpi nsudi ya kitoko ya bilele na nge kele bonso nsudi ya kitoko ya Libani.
12 Mpangi na mono ya nkento, nkento ya mono ta kwela, kele bonso kilanga ya bo me kanga ti lupangu,
Kilanga ya bo me kanga ti lupangu, nto ya masa yina bo me kanga mbote-mbote.
13 Balutangu* na nge kele paladisu* ya bagrenade
Ti bambuma ya kuluta kitoko, ti banti ya hena kumosi ti banti ya nardi,
14 Nardi+ mpi safrani, mukuku*+ mpi sinamome,+
Ti banti ya mitindu yonso ya ndumbu ya mpembe, mire, mpi aloesi,+
Kumosi ti mananasi yonso ya kuluta kitoko.+
15 Nge kele kilanga ya kele ti masa, dibulu ya masa ya madidi,
Mpi bamasa ya ke kulumuka katuka na Libani.+
16 Telama, O mupepe ya nordi;
Kota, O mupepe ya sudi.
Bula* na kilanga na mono.
Bika nsudi na yo ya kitoko kupanzana.”
“Bika bakala ya mono ke zolaka kukota na kilanga na yandi
Mpi yandi dia bambuma na yo ya kuluta kitoko.”
5 “Mono me kota na kilanga na mono,+
O mpangi na mono ya nkento, nkento ya mono ta kwela.
Mono me buka mire na mono mpi kima na mono ya nsudi ya kitoko.+
“Banduku ya mono ke zolaka, beno dia!
Beno nwa mpi beno lawuka zola!”+
2 “Mono me lala, kansi ntima na mono kele ya kutelama.+
Mono ke wa makelele ya bakala ya mono ke zolaka ke bula na kielo!
‘Kangudila mono, O mpangi na mono ya nkento, nkento ya mono ke zolaka mingi,
Pizio na mono, nkento na mono ya me konda kifu!
Sambu ntu na mono me pola na malulu,
Nsuki na mono ya kudimba-dimba me pola na malulu ya mpimpa.’+
3 Mono me katula mvwela na mono.
Keti mono fwete lwata yo diaka?
Mono me yobisa makulu na mono.
Keti mono fwete kumisa yo diaka mvindu?
4 Bakala ya mono ke zolaka katulaka diboko na yandi na dibulu ya kielo,
Mpi mawi na mono sambu na yandi telamaka.
5 Mono telamaka sambu na kukangudila bakala ya mono ke zolaka kielo;
Maboko na mono vandaka kunokisa mire,
Mpi misapi na mono vandaka kunokisa mafuta ya mire,
Na matobo ya kima ya bo ke kangilaka kielo.
6 Mono kangudilaka bakala ya mono ke zolaka kielo,
Kansi bakala ya mono ke zolaka me baluka, yandi me kwenda.
Mono katulaka kivuvu* ntangu yandi kwendaka.*
Mono sosaka yandi, kansi mono monaka yandi ve.+
Mono bingaka yandi, kansi yandi ndimaka ve.
7 Bankengidi yina vandaka kutambula na mbanza monaka mono.
Bo bulaka mono, bo lwadisaka mono.
Bankengidi ya bibaka katulaka mono kitambala* yina mono ke kudifikaka.
8 O bana-bankento ya Yeruzalemi, mono ke lomba beno na kudia ndefi:
Kana beno mona bakala ya mono ke zolaka,
Beno songa yandi nde mono ke bela maladi ya zola.”
9 “Bakala ya nge ke zolaka me luta konso bakala ya nkaka yina bantu ke zolaka na nki,
Nge nkento ya me luta bankento yonso na kitoko?
Bakala ya nge ke zolaka me luta babakala ya nkaka yina bantu ke zolaka na nki
Sambu nge lomba beto na kudia ndefi ya mutindu yai?”
10 “Bakala ya mono ke zolaka ke sema ngolo mpi yandi kele mbwaki;
Na kati ya babakala mafunda kumi, yandi me luta.
11 Ntu na yandi kele wolo, wolo ya kuluta mbote.
Nsuki na yandi ya kudimba-dimba kele bonso mandala ya ke nikana na diba,*
Ndombe bonso kwanga-kwanga.
12 Meso na yandi kele bonso bapizio na lweka ya bamasa,
Yina ke yobila na mabele,
Yina me vanda pene-pene ya kiziba ya me fuluka na masa.*
13 Matama na yandi kele bonso masamba ya bima ya nsudi ya kitoko,+
Mwa-bangumba ya matiti ya nsudi ya kitoko.
Bikobo na yandi kele bintuntu ya lisi, yina ke nokisa mafuta ya mire.+
14 Misapi ya maboko na yandi kele ya wolo, ya bo me tula matadi ya krisolite.
Divumu na yandi kele meno ya nzioko ya bo me ngengisa yina bo me fika matadi ya safire.
15 Makulu na yandi kele makunzi ya marbre yina bo me tula na mabulu ya wolo ya kuluta mbote.
Yandi ke monana bonso Libani, yandi kele kitoko kibeni bonso banti ya sedre.+
Yai bakala ya mono ke zolaka, yai bakala ya mono ke zolaka mingi, O bana-bankento ya Yeruzalemi.”
6 “Bakala ya nge ke zolaka me kwenda na wapi,
O nkento ya me luta bankento yonso na kitoko?
Bakala ya nge ke zolaka kwendaka na nki nzila?
Beto sosa yandi ti nge.”
2 “Bakala ya mono ke zolaka me kwenda na kilanga na yandi,
Na masamba ya banti ya nsudi ya kitoko,
Sambu na kudisa bitwisi na kati ya bilanga
Mpi kubuka bintuntu ya lisi.+
3 Mono kele ya bakala ya mono ke zolaka,
Mpi bakala ya mono ke zolaka kele ya mono.+
Yandi ke disa mameme na kati ya bintuntu ya lisi.”+
4 “Nkento ya mono ke zolaka mingi,+ nge kele kitoko bonso Tirsa,*+
Kitoko mingi bonso Yeruzalemi,+
Mpi nge ke pesa boma bonso basoda yina kele na nziunga ya bidimbu na bo.+
Nsuki na nge kele bonso kimvuka ya bankombo
Yina ke kulumuka na bangumba ya Gileadi.+
6 Meno na nge kele bonso kimvuka ya mameme
Yina bo me katuka kuyobisa mpi ke kwisa kutombuka,
Yonso kele ti mapasa,
Mpi ata mosi ve me vidisa bana na yo.
7 Matama* na nge na nsi ya lele na nge ya kufika luse
Kele bonso kitini ya mbuma ya grenade.
9 Kansi mosi mpamba kele pizio na mono,+ nkento na mono ya me konda kifu.
Mwana mosi mpamba ya mama na yandi.
Yandi kele mwana yina nkento ya butaka yandi ke zolaka mingi.*
Bana-bankento ke mona yandi, mpi bo ke tuba nde yandi kele muntu ya kiese;
Bantotila-nkento ti bamakangu ke mona yandi, mpi bo ke kumisa yandi.
10 ‘Nani kele nkento yina ke sema* bonso kutana ya ntongo,
Yina kele kitoko bonso ngonda ya kele ya mvimba,
Yina kele bunkete bonso nsemo ya mwini,
Yina ke pesa boma bonso basoda yina kele na nziunga ya bidimbu na bo?’”+
11 “Mono kulumukaka na kilanga ya banti+ yina ke butaka bambuma ya ke vandaka ti mikanzi
Sambu na kumona banti ya ndendi ya ke yela na muwanda,
Sambu na kutala kana vinu me basisa matiti,*
Kana banti ya bagrenade me basisa bintuntu.
12 Na ntwala nde mono zaba yo,
Nzala* na mono me tula mono
Na bapusu-pusu ya bantu na mono ya lukumu.”*
13 “Vutuka, vutuka, O mwana-nkento ya Shulami!
Vutuka, vutuka,
Sambu beto tala nge!”
“Sambu na nki beno ke tala mwana-nkento ya Shulami?”+
“Yandi kele bonso makinu ya bimvuka zole!”*
7 “Makulu na nge na kati ya basandale na nge kele kitoko kibeni,
O mwana-nkento ya lukumu!
Bambendi na nge kele bonso bima ya ke kumisaka nitu kitoko,
Kisalu ya maboko ya muntu ya me zaba kisalu.
2 Mutolo na nge kele bolo ya kele bonso dimbuma.
Bika yo vanda ntangu yonso ti vinu ya bo me vukisa.
Divumu na nge kele kita ya ble,
Yina bintuntu ya lisi me ziunga.
3 Mabele na nge yonso zole kele bonso bana zole ya kabuluku,
Bana-mapasa ya mbambi.+
4 Nkingu na nge+ kele bonso nzo-zulu ya bo me sala na meno ya nzioko.+
Mbombo na nge kele bonso nzo-zulu ya Libani,
Yina ke tala na ndambu ya Damasi.
5 Ntu na nge me kumisa nge kitoko bonso Karmele,+
Mpi nsuki na nge ya kudimba-dimba*+ kele bonso lene ya mbwaki-ble.+
Nsuki ya nda yina me lala me benda* ntotila.
6 Nge kele kitoko mingi, mpi nge ke pesa kibeni kiese,
O mwana-nkento ya mono ke zolaka mingi, nge me luta bima yonso ya ke pesaka kiese!
7 Nda na nge kele bonso diba,
Mpi mabele na nge kele bonso bisuka ya dati.+
8 Mono tubaka nde, ‘Mono ta mata na diba
Sambu na kusimba bisuka na yo ya ngasi.’
Bika mabele na nge kuvanda bonso bisuka ya vinu,
Mpema na nge kuvanda ti nsudi ya kitoko bonso bapome,
9 Mpi munoko* na nge kuvanda bonso vinu ya kitoko.”
“Bika yo kulumuka kukonda mpasi sambu na muntu ya mono ke zolaka,
Yo kulumuka malembe- malembe na bikobo ya bantu yina ke lala.
10 Mono kele ya bakala yina mono ke zolaka,+
Mpi nzala na yandi kele sambu na mono.
11 Kwisa, O bakala ya mono ke zolaka,
Beto basika, beto kwenda na bilanga;
Beto kwenda kulala na kati ya banti ya hena.+
12 Beto telama na suka-suka mpi beto kwenda na bilanga ya vinu
Sambu na kutala kana banti ya vinu me basisa matiti,*
Kana bintuntu me kanguka,+
Kana banti ya bagrenade me fuluka ti bintuntu.+
Kuna mono ta songa nge zola na mono.+
13 Bamandragore+ ke basisa nsudi na yo ya kitoko;
Bambuma ya kitoko ya mitindu yonso kele na bakielo na beto.
Bambuma ya mpa mpi ya ntama,+
O bakala ya mono ke zolaka, mono me bumbilaka nge yo.
8 “A kana nge vandaka bonso mpangi na mono ya bakala,
Yina nwaka mabele ya mama na mono!
Ebuna kana mono monaka nge na nganda, mono zolaka kupesa nge beze,+
Mpi muntu mosi ve zolaka kuvweza mono.
Mono zolaka kupesa nge vinu ya bo me tula bima ya nsudi ya kitoko sambu nge nwa,
Masa ya madidi ya bagrenade.
3 Diboko na yandi ya kimama zolaka kuvanda na nsi ya ntu na mono,
Mpi diboko na yandi ya kitata zolaka kusimba mono.+
4 O bana-bankento ya Yeruzalemi, mono ke lomba beno na kudia ndefi:
Beno meka ve kusikimisa to kutedimisa zola na kati na mono tii kuna yo mosi ta zola.”+
5 “Nani kele nkento yina ke kwisa kutombuka na ntoto-makanga,
Yandi me yekamina bakala yina yandi ke zolaka?”
“Mono tedimisaka nge na nsi ya nti ya bapome.
Kuna mama na nge vandaka na mpasi sambu na nge.
Kuna nkento yina butaka nge vandaka na mpasi.
6 Tula mono bonso kashe na ntima na nge,
Bonso kashe na diboko na nge,
Sambu zola kele ngolo bonso lufwa,+
Mpi kukangama kaka na muntu kele ngolo bonso Maziamu.*
Tiya na yo kele tiya yina ke pela, tiya ya Yah.*+
Kana muntu kumeka kupesa kimvwama yonso ya nzo na yandi sambu na zola,
Bo ta vweza yo* kibeni.”
8 “Beto kele ti leke mosi ya nkento,+
Mpi yandi kele ve na mabele.
Beto ta sala nki sambu na mpangi na beto ya nkento
Kilumbu yina bo ta yula yandi na makwela?”
9 “Kana yandi kele kibaka,
Beto ta tunga zulu ya ludi ya arza na zulu na yandi,
Kansi kana yandi kele kielo,
Beto ta kanga yandi ti dibaya ya sedre.”
10 “Mono kele kibaka,
Mpi mabele na mono kele bonso banzo-zulu.
Yo yina na meso na yandi mono me kuma
Bonso muntu yina me kuma na ngemba.
11 Salomo vandaka ti kilanga ya vinu+ na Baale-amoni.
Yandi pesaka kilanga yina na bantu yina ke kebaka yo.
Konso muntu vandaka kunata mbongo ya bibende difunda mosi sambu na bambuma na yo.
12 Mono kele ti kilanga ya vinu yina kele ya mono.
Mbongo ya bibende difunda mosi* kele ya nge, O Salomo,
Mpi nkama zole kele ya bantu yina ke kebaka bambuma na yo.”
13 “O nge muntu yina ke zingaka na bilanga,+
Banduku ke waka ndinga na nge.
Bika mono wa yo.”+
14 “Muntu ya mono ke zolaka, sala nswalu,
Vanda ntinu bonso mbambi+
To mwana ya mvudi
Na bangumba ya bima ya nsudi ya kitoko.”
To “Nkunga ya kuluta kitoko.”
Na kisina, “Benda mono na nima na nge.”
To “tubila.”
Disongidila, baleke ya bankento.
To “ya moyo na mono.”
To “me fika lele ya bo ke fikaka muntu na ntangu ya mafwa.”
To “mpunda na mono.”
To mbala ya nkaka, “kana nge me tunga nsuki.”
To “bashene ya wolo.”
Na kisina, “Mananasi na mono ya nardi.”
To “nzo na beto ya nene.”
To “kintuntu ya krokusi.”
Na kisina, “nzo ya vinu.”
To “ya mvula.”
Na kisina, “Tii kuna kilumbu ta pema.”
To mbala ya nkaka, “bangumba ya kele ti mabulu.” To “bangumba ya Betere.”
To “moyo na mono.”
To “moyo na mono.”
To “moyo na mono.”
To “moyo na mono.”
Kiti mosi ya kufika ya bo vandaka kusadila sambu na kunata muntu mosi ya lukumu.
To “mpu ya bintuntu.”
To “Balweka ya ntu, pene-pene ya makutu.”
Na kisina, “Tii kuna kilumbu ta pema.”
To “Anti-Libani.”
To “mabele.”
To mbala ya nkaka, “Mpusu ya nitu.”
To “kilanga.”
Lukengi mosi ya nsudi ya kitoko.
To “Bula na malembe.”
To “mabele.”
To “Moyo na mono basikaka.”
To mbala ya nkaka, “Moyo na mono bikisaka mono ntangu yandi tubaka.”
To “lele ya bo ke fikaka na luse.”
To mbala ya nkaka, “bonso bisuka ya mbuma ya dati.”
To mbala ya nkaka, “bandilu ya nto ya masa.”
Na kisina, “Kitini ya zulu ya kati ya munoko.”
To “Mbanza ya Kitoko.”
To “Balweka ya ntu, pene-pene ya makutu.”
Na kisina, “kele mwana ya bunkete ya nkento yina butaka yandi.”
Na kisina, “ke tala na nsi.”
To “bintuntu.”
To “Moyo.”
To “ya kele na luzolo ya mbote.”
To “makinu ya Mahanayimi.”
Na kisina, “nsuki ya kudimba-dimba ya ntu na nge.”
To “me kanga.”
Na kisina, “kitini ya zulu ya kati ya munoko.”
To “bintuntu.”
To “Sheole,” disongidila, maziamu ya bantu yonso. Tala Bantendula ya Bangogo.
“Yah” kele zina ya Yehowa na bunkufi.
To mbala ya nkaka, “yandi.”
Na kisina, “Difunda mosi.”