NAHUMI
1 Nsangu sambu na Ninive:+ Mukanda ya mbona-meso ya Nahumi* muntu ya Elkoshi:
2 Yehowa kele Nzambi yina ke lombaka nde bo kangama kaka na yandi+ mpi yandi ke vutulaka mbi;
Yehowa ke vutulaka mbi mpi yandi kele ya kuyilama na kumonisa makasi na yandi.+
Yehowa ke vutudilaka bambeni na yandi mbi,
Mpi yandi ke bumbaka makasi sambu na bambeni na yandi.
3 Yehowa ke waka ve makasi nswalu+ mpi yandi kele ngolo mingi,+
Kansi Yehowa ta konda ve ata fioti kupesa ndola yina me fwana.+
Nzila na yandi kele na kati ya mupepe yina ke fwaka mpi na kati ya mupepe ya ngolo,
Mpi matuti kele mfututu ya makulu na yandi.+
4 Yandi ke nganinaka nzadi-mungwa,+ yandi ke yumisaka yo;
Mpi yandi ke salaka nde banzadi yonso kuyuma.+
Bashani ti Karmele ke kawuka,+
Mpi bintuntu ya Libani ke yuma.
5 Bangumba ke nikana sambu na yandi,
Mpi bangumba ya fioti ke kuma masa-masa.+
Ntoto ta kuma kisaka-saka sambu na luse na yandi,
Kumosi ti insi mpi bantu yonso yina ke zingaka na kati na yo.+
6 Nani lenda telama na ntwala ya makasi na yandi?+
Mpi nani lenda telamina makasi na yandi ya ngolo?+
Yandi ta monisa nganzi na yandi bonso tiya,
Mpi matadi ta panzana bitini-bitini sambu na yandi.
7 Yehowa kele mbote,+ kisika ya ngolo ya lutaninu na kilumbu ya mpasi.+
Yandi ke yindulaka* bantu yina ke kwisaka kutina na yandi.+
8 Yandi ta fwa kisika na yandi* kimakulu ti masa ya mvula ya ngolo yina ke kombaka,
Mpi mpimpa ta landa bambeni na yandi.
9 Inki nge ta kana kusala Yehowa?
Yandi ke nata lufwa ya kimakulu.
Mpasi ta basika diaka ve mbala ya zole.+
10 Sambu bo kele ya kukangama-kangama bonso bansende,
Mpi bo kele bonso bantu yina me lawuka malafu;*
Kansi bo ta pia na tiya bonso nianga ya kuyuma.
11 Muntu yina ke kana kusala Yehowa mbi ta katuka na nge,
Yandi ke pesa bandongisila ya kukonda mfunu.
12 Yehowa ke tuba nde:
“Ata bo vandaka ngolo kibeni mpi mingi,
Bo ta bwisa bo mpi bo ta fwa.*
Mono me monisa nge* mpasi, kansi mono ta monisa nge diaka ve mpasi.
13 Ntangu yai mono ta zenga nti ya vangu na yandi sambu yo katuka na zulu na nge,+
Mpi mono ta zenga bansinga yina bo kangaka nge.
14 Yehowa me pesa nsiku sambu na nge,*
‘Bo ta tanina diaka ve zina na nge.
Mono ta fwa bifwanisu mpi biteki ya bibende* na nzo* ya banzambi na nge.
Mono ta sadila nge maziamu, sambu nge kele nzanzi.’
15 Tala na zulu ya bangumba makulu ya muntu yina ke nata nsangu ya mbote,
Muntu yina ke samuna ngemba.+
O Yuda, sala bankinsi na nge+ mpi lungisa balusilu na nge,
Sambu muntu ya kukonda mfunu ta luta diaka ve na kati na nge.
Bo ta fwa yandi kimakulu.”
2 Muntu yina ke panzaka me kwisa kunwanisa nge.*+
Tanina balupangu ya ngolo.
Kengila nzila.
Beno yilama* mpi beno vukisa ngolo na beno yonso.
2 Sambu Yehowa ta vutula lulendo ya Yakobi,
Kumosi ti lulendo ya Izraele,
Sambu bantu yina ke bebisaka me bebisa bo;+
Mpi bo me bebisa balutangu na bo.
3 Bo me pakula mukubu ya mbwaki na bitaninu ya bantu na yandi ya ngolo,
Basoda na yandi me lwata bilele ya mbwaki ya ngolo.
Bibende ya bapusu-pusu na yandi ya bitumba ke sema bonso tiya
Na kilumbu yina yandi ke yilama sambu na bitumba,
Mpi bo ke songa makonga ya banti ya yenevriye.
4 Bapusu-pusu ya bitumba ke kwenda na kilawu na babala-bala.
Yo ke kwenda ntinu ndambu na ndambu na bisika ya bantu yonso.
Yo ke pela bonso minda mpi ke sema bonso nzasi.
5 Yandi ta binga bamfumu ya basoda na yandi.
Bo ta bula sakuba ntangu bo ke kwenda na ntwala.
Bo ke kwenda ntinu na kibaka na yandi;
Bo ke kanga nzila.
7 Bo me zenga mambu: Bo me bikisa yandi kinkonga,
Bo me nata yandi, mpi bampika na yandi ya bankento ke dila;
Bo ke tula makelele bonso bapizio ntangu bo ke bula bantulu* na bo.
8 Ninive+ vandaka bonso kiziba ya masa na bilumbu na yandi yonso,
Kansi ntangu yai bo ke tina.
“Beno telama! Beno telama!”
Kansi muntu mosi ve ke baluka.+
9 Beno yiba arza, beno yiba wolo!
Bimvwama kele na nsuka ve.
Bo me bumba yo kisika mosi ti bima ya ntalu ya mitindu yonso.
10 Mbanza kele mpamba, bantu kele ve, yo me beba!+
Bantima na bo me lemba na boma, mabolongo na bo ke nikana, baluketu na bo ke tekita;
Baluse na bo yonso me kuma mbwaki.
11 Wapi kisika bantambu ke lalaka,+ kisika bana-bantambu* ke diaka?
Wapi kisika ntambu ke basikaka mpi ke nataka bana na yandi,
Kukonda muntu ya ke pesa bo boma?
12 Ntambu zenga-zengaka mbisi ya kufwana sambu na bana na yandi
Mpi yandi kangaka mbisi na nkingu sambu na bantambu ya bankento.
Yandi fulusaka banzo na yandi ti bambisi,
Bisika na yandi ya kulala ti bambisi yina yandi zenga-zengaka.
13 “Tala! Mono ke nwanisa nge,” Yehowa ya makesa muntu me tuba,+
“Mono ta yoka bapusu-pusu na yandi ya bitumba na midinga,+
Mpi mbele ya bitumba ta dia bana-bantambu na nge.*
Mono ta katula bambisi na nge na ntoto,
Mpi bantu ta waka diaka ve ndinga ya binati-nsangu na nge.”+
3 Mawa na mbanza yina ke tiamunaka menga!
Yandi me fuluka kibeni ti luvunu mpi muyibi.
Yandi ke kondaka ve mbisi ya kudia!
2 Kele ti makelele ya fimbu mpi makelele ya makulu ya pusu-pusu,
Mpunda yina ke kwenda ntinu mpi pusu-pusu yina ke pumbuka.
3 Muntu yina ke tambusaka mpunda yina me mata na zulu na yo, mbele ya bitumba ya ke sema, mpi dikonga ya ke basisa nsemo,
Bantu mingi ya bo me fwa mpi bamvumbi mingi
—Mpila ya kutanga bamvumbi yina kele ve.
Bo ke landa kubula sakuba na bamvumbi yina.
4 Yo kele sambu na kindumba ya mingi ya nkento ya ndumba,
Nkento yina ke benda bantu na kitoko na yandi, nkento yina kele ndoki,
Yina ke kanga makanda na kindumba na yandi mpi mabuta na kindoki na yandi.
5 “Tala! Mono ke nwanisa nge,”* Yehowa ya makesa muntu me tuba,+
“Mono ta tombula bilele na nge na luse na nge;
Mono ta sala nde makanda kumona kinkonga na nge,
Mpi bimfumu kumona nsoni na nge.
6 Mono ta losila nge mvindu
Mpi mono ta kumisa nge kima ya kuvweza;
Mono ta kumisa nge kima ya ke pesa boma.+
7 Konso muntu yina ke mona nge ta tina nge+ mpi ta tuba nde,
‘Bo me bebisa Ninive!
Nani ta kuditula na kisika na yandi?’
Na wapi mono ta mona bantu ya kulembika nge?
8 Keti nge kele mbote kuluta No-amoni,*+ yina vandaka pene-pene ya tu-bamasa ya Nile?+
Bamasa ziungaka yandi;
Kimvwama na yandi vandaka nzadi-mungwa mpi kibaka na yandi vandaka nzadi-mungwa.
9 Etiopia vandaka nto ya ngolo na yandi ya kukonda ndilu, ti Ezipte mpi.
Puti+ mpi bantu ya Libia vandaka kusadisa nge.+
10 Kansi ata yandi, bo nataka yandi na insi ya nkaka;
Yandi kwendaka na kimpika.+
Bo zengaka bana na yandi bitini-bitini na konso kinkonko ya bala-bala.*
Bo bulaka zeke sambu na bantu na yandi ya lukumu,
Mpi bo me kanga bantu na yandi yonso ya nene miniololo.
11 Nge mpi ta lawuka;+
Nge ta kwenda kubumbana.
Nge ta sosa kisika ya kutina mbeni.
12 Bisika na nge yonso ya ngolo kele bonso banti ya bafige yina kele ti bambuma ya ntete ya kuyela;
Kana bo nikisa yo, bambuma yina ta bwa na minoko ya bantu yina ke dia.
13 Tala! Basoda na nge kele bonso bankento yina kele na kati na nge.
Bakielo ya insi na nge ta vanda ya kukangula nene sambu na bambeni na nge.
Tiya ta yoka banti ya bakielo na nge.
14 Baka masa sambu na kusala kibaka ya ku- ziunga bwala!+
Kumisa ngolo balupangu na nge ya ngolo.
Kulumuka na poto-poto mpi niata-niata ntoto ya tuma;
Simba masini ya kubula babriki.
15 Ata kuna tiya ta yoka nge.
Mbele ya bitumba ta fwa nge.+
Yo ta dia nge mutindu bana-bampasu ke diaka.+
Kuma mingi bonso bana-bampasu!
Ee, kuma mingi bonso bampasu!
16 Nge me kumisa ntalu ya bantu na nge ya mumbongo mingi kuluta bambwetete ya zulu.
Bana-bampasu ke katula bampusu na yo mpi ke pumbuka.
17 Bankengidi na nge kele bonso bampasu,
Mpi bamfumu na nge ya basoda kele bonso kimvuka ya bampasu.
Bo me vanda na camp na balupangu ya matadi na kilumbu ya madidi,
Kansi kana ntangu kusema, bo ke pumbuka;
Mpi muntu mosi ve ke zaba kisika bo kele.
18 Bangungudi na nge kele na mpongi, O ntotila ya Asiria;
Bantu na nge ya lukumu me vanda kaka na banzo na bo.
Bantu na nge me panzana na bangumba,
Mpi muntu mosi ve ke vukisa bo.+
19 Bo ta lembika nge ve sambu na mpasi na nge.
Mpila ya kubelula mputa na nge kele ve.
Bantu yonso yina ke wa nsangu na nge ta bula maboko;+
Sambu nani monaka ve mpasi ya mambu na nge ya nku ya ngolo?”+
Yo ke tendula “Muntu Yina Ke Lembikaka Bantu.”
To “ke kebaka.”
Disongidila, ya Ninive.
To “malafu ya bo me sala ti ble.”
To mbala ya nkaka, “mpi yandi ta luta.”
Disongidila, Yuda.
Disongidila, Asiria.
To “biteki ya bibende ya bo me lamba na tiya.”
To “tempelo.”
Disongidila, Ninive.
Na kisina, “Kumisa baluketo ngolo.”
To “ta bwa.”
Na kisina, “bantima.”
To “bana-bantambu yina kele ti mika mingi na nkingu.”
To “bana-bantambu na nge yina kele ti mika mingi na nkingu.”
Disongidila, Ninive.
Disongidila, Tebesi.
Na kisina, “na ntu ya babala-bala yonso.”