Diambu ya Ke Yangisa Mwana Mosi ya Nzo-nkanda
Peter me vanda na kiti, yandi ke baluka-baluka mpi ke kudiyangisa mingi. Longi na yandi ya nkento yina yandi ke zitisaka mingi me katuka kulonga bo nde Charles Darwin mpi dilongi na yandi ya evolisio me salaka nde mambu ya siansi kukwenda na ntwala mpi nde yo me katulaka bantu na kimpika ya malongi ya luvunu. Sesepi yai, longi yango ke lomba bana ya nzo-nkanda na kupesa bangindu na bo.
Peter ke zaba mpenza ve nki yandi fwete sala. Bibuti na yandi me longaka yandi nde Nzambi muntu salaka ntoto mpi bima yonso ya ke zingaka na zulu na yo. Bo ke songaka yandi nde disolo ya Biblia ya ke tubaka nde Nzambi muntu salaka bima yonso kele ya kieleka mpi nde dilongi ya evolisio kele ya luvunu sambu yo kele ve ti mambu ya ke ndimisaka nde yo kele ya kieleka. Longi ya Peter ke sosa kumonisa yandi nde mambu yina yandi ke longa kele ya kieleka mpi bibuti na yandi ke zola mpi nde yandi zaba nde mambu yina bo ke songaka yandi kele ya kieleka. Kansi Peter fwete ndimina nani?
Konso mvula, mambu ya mutindu yai ke salamaka na banzo-nkanda mingi na ntoto ya mvimba. Ebuna Peter mpi bana ya nzo-nkanda ya nkaka fwete sala nki? Yo ta lomba kibeni nde bo mosi kutadila mambu mbote-mbote na ntwala ya kupona mambu yina bo fwete ndima. Bo fwete tadila mambu ya dilongi ya evolisio ke tubilaka mpi mambu ya ke ndimisaka nde Nzambi muntu salaka bima yonso. Na nima bo mosi fwete tala mambu yina bo fwete ndima.
Biblia ke kebisaka beto na kuvanda ve bindima-ndima na mambu yina bantu ya nkaka ke tuba. Muntu mosi yina sonikaka mpi Biblia tubaka nde: “Muntu ya kukonda mayele ke ndimaka mambu yonso, kansi muntu ya mayele ke tadilaka konso kitambi na yandi.” (Bingana 14:15) Biblia ke songaka Bakristu na kusadila ‘mayele na bo ya kuyindula’ sambu na kutadila bo mosi mambu yina bo ke longa bo.—Baroma 12:1, 2.
Beto me basisa ve kamukanda yai sambu na kusadisa mabundu yina ke zolaka nde bo longa na nzo-nkanda nde Nzambi muntu salaka bima yonso. Kansi beto me basisa yo sambu na kutadila mambu yai ya bantu ke tubaka: nde luzingu kudibasikilaka mpi nde disolo ya Biblia ya ke tubaka nde Nzambi muntu salaka bima yonso kele ya luvunu.
Beto ta tubila mingi selile sambu yo kele kima ya kuluta mfunu na nitu ya bima yonso ya ke zingaka. Nge ta longuka mambu ya kuyituka ya ke monisa mutindu baselile ke salamaka. Nge ta vanda mpi ti dibaku ya kutadila diaka mambu yina bantu ke tubaka sambu na kundimisa nde dilongi ya evolisio kele ya kieleka.
Bantu yonso ke kudiyulaka nde: Keti bo gangaka luzingu to keti yo kudibasikilaka? Mbala ya nkaka nge me kudiyulaka dezia ngiufula yai. Kamukanda yai ke tubila kaka mwa bikuma ya me pusaka bantu mingi na kundima nde Nzambi muntu salaka luzingu.