Yezu Me Futumuna Mwana ya Mufwidi Mosi

Ntangu fioti na nima ya kubelula nsadi ya mfumu mosi ya basoda, Yezu me katuka na Kapernaumi mpi me kwenda na mbanza Naini. Yo kele na kitamina ya bakilometre kuluta 32 na sudi-westi ya Kapernaumi. Yandi kele ve yandi mosi. Yandi ke kwenda ti balongoki na yandi mpi kibuka ya nene ya bantu. Ziku, beto kele na nkokila ntangu bo me kuma na luyantiku ya mbanza Naini. Bo me kutana ti Bayuda mingi ke kwenda kuzika mvumbi. Bo ke nata mvumbi ya mwana-bakala mosi yina bo ke kwenda kuzika na nganda ya mbanza.

Mama ya mwana yina kele na mawa ya ngolo kuluta bantu yonso. Yandi kele mufwidi, mpi ntangu yai mwana na yandi mosi kaka me fwa. Ntangu bakala na yandi fwaka, yandi bikalaka ti mwana na yandi yina yandi vandaka kuzola mingi. Ya kieleka, yandi vandaka ti bangwisana ya ngolo ti mwana na yandi sambu yandi vandaka ti kivuvu nde mwana na yandi ta tanina yandi mpi ta sadisa yandi na bilumbu ke kwisa. Kansi ntangu yai, mwana yango me fwa. Nani diaka ta vandaka ti yandi mpi ta sadisaka yandi?

Ntangu Yezu me mona nkento yai, yandi me wa mpasi na ntima sambu nkento yai kele na mawa ya ngolo mpi luzingu na yandi me kuma na mpasi. Yandi me zabisa nkento yina na mawete yonso mpi ti kivuvu nde: “Bika kudila.” Kansi, Yezu me sala diaka diambu ya nkaka. Yandi me pusana mpi me simba mbeto yina bo tulaka mvumbi. (Luka 7:13, 14) Ntangu bantu ya mbanza yina vandaka kudila me mona diambu yina, bo me telema na mbala mosi. Yo fwete vanda nde bantu mingi me kudiyula nde, ‘Mambu yai ke tendula nki mpi nki yandi ke zola kusala?’

Inki beto lenda tuba sambu na bantu yina ke sala nzietelo ti Yezu, bayina me monaka bimangu yina yandi me salaka mu mbandu kubelula bambefo mingi? Ziku bo me monaka ntete ve Yezu me futumuna muntu. Ata bo me zaba nde bantu ya nkaka futumunaka bantu na ntangu ya ntama, keti Yezu mpi lenda sala yo? (1 Bantotila 17:17-23; 2 Bantotila 4:32-37) Yezu me tuba ti kiyeka nde: “Mwana-bakala, mono ke tubila nge nde, telama!” (Luka 7:14) Mwana-bakala yina me futumuka. Yandi me telema mpi me yantika kutuba. Yezu me pesa yandi na mama na yandi yina ke yituka kansi kele na kiese. Nkento yai kele diaka ve yandi mosi.

Ntangu bantu me mona nde mwana-bakala yai me vutuka na luzingu, bo me kumisa Yehowa, Mupesi ya Luzingu; bo me tuba nde: “Mbikudi mosi ya nene me basika na kati na beto.” Bantu ya nkaka me bakisa ntendula ya diambu ya mbote yina Yezu me sala, bo me tuba nde: “Nzambi me tudila bantu na yandi dikebi.” (Luka 7:16) Nsangu ya diambu yai ya kuyituka me panzana na bambanza ya pene-pene, mpi ziku na Nazareti bwala yina Yezu butukaka na bakilometre kiteso ya 10 na Naini. Nsangu yango me kuma tii na Yudea na sudi ya Naini.

Yoane Mbotiki kele kaka na boloko, mpi yandi ke tula dikebi ya mingi na mambu yina Yezu ke sala. Balongoki na yandi bantu ke zabisa yandi nsangu ya bimangu yai. Yandi ta sala nki?