Moize Ponaka na Kusambila Yehowa

Na Ezipte, bo kumaka kubinga dibuta ya Yakobi bantu ya Izraele. Ntangu Yakobi ti Yozefi fwaka, Farao ya mpa yantikaka kuyala. Yandi vandaka kuwa boma nde bantu ya Izraele ke kuma ngolo kuluta bantu ya Ezipte. Yo yina Farao yai kumisaka bantu ya Izraele bampika. Yandi pusaka bo na ngolo na kusala babriki mpi na kusala ngolo na bilanga. Kansi ntangu bantu ya Ezipte vandaka kupusa bo na kusala ngolo, bantu ya Izraele vandaka kukuma mingi. Sambu Farao vandaka kuzola ve diambu yina, yandi pesaka nsiku nde bo fwa bana-babakala yonso ya Izraele yina ke butuka. Keti nge lenda yindula mutindu bantu ya Izraele waka boma?

Nkento mosi ya Izraele, zina na yandi Yokebede, butaka mwana-bakala mosi ya kitoko. Sambu na kutanina mwana yina, yandi tulaka yandi na kitunga mpi bumbaka yo na balukengi ya Nzadi Nile. Mpangi-nkento ya mwana yina, Miriami, bikalaka pene-pene sambu na kutala mambu yina ta salama.

Mwana ya Farao ya nkento kwisaka kuyobila na nzadi mpi yandi monaka kitunga yina. Yandi monaka mwana ke dila na kati, mpi yandi wilaka mwana yina mawa. Miriam yulaka yandi nde: ‘Keti mu fwete kwenda kusosila nge nkento yina lenda nwisa mwana yai?’ Mwana ya Farao ya nkento ndimaka, ebuna Miriam kwendaka kubinga mama na yandi, Yokebedi. Mwana ya Farao songaka yandi nde: ‘Baka mwana yai, nwisa yandi sambu na mono, mpi mu ta futa nge.’

Ntangu mwana yina yelaka, Yokebedi nataka yandi na mwana ya Farao. Mwana ya Farao pesaka mwana yina zina Moize mpi sansaka yandi bonso mwana na yandi. Moize yelaka bonso mwana ya ntotila mpi yandi lendaka kuvanda ti bima yonso yina yandi vandaka kuzola. Kansi Moize vilaka ve Yehowa. Yandi vandaka kuzaba nde yandi vandaka muntu ya Izraele kansi muntu ya Ezipte ve. Mpi yandi ponaka na kusadila Yehowa.

Ntangu yandi kumaka ti bamvula 40, Moize bakaka lukanu ya kusadisa bampangi na yandi. Ntangu yandi monaka muntu mosi ya Ezipte ke bula mpika mosi ya Izraele, Moize bulaka muntu yina ya Ezipte ngolo yo yina yandi fwaka. Moize bumbaka mvumbi ya muntu yina na zelo. Ntangu Farao zabaka diambu yina, yandi sosaka kufwa Moize. Kansi Moize tinaka na insi ya Madiani. Yehowa taninaka yandi kuna.