‘Bisalu na yandi kelanda yandi’

NA NGONDA ya Yuli  28, 1994, na kilumbu ya iya na 8h50 ya ntwala ya midi, George D. Gangas kumanisaka ntinu na yandi na zulu ya ntoto. Yandi vandaka na bamvula 98. Mosi na kati ya bakristu bansolami, George Gangas kuvandaka mambere na kati ya Nto-kimvuka ya Bambangi ya Yehowa tuka Oktobri 15, 1971.

Bayina yonso kutambulaka ti Mpangi Gangas kuzabaka zola na yandi ya lunungu ti kuyina na yandi ya mambi. Bau kemona yandi dyaka na kutubila Satana bonso mukusi ya nene, ya kuluta mbi, ya nsoki, ya kisina mpi ya kuvweza. Kansi, yandi vandaka kutubila Yehowa bonso Tata ya zola, ya mbote, ya nkenda, ya kewaka, mpi ya ketulaka dikebi. Bamingi keyibuka dyaka nde yandi vandaka kuzola kuyula bangyufula ya Biblia. Na konso disolo, yandi vandaka kukonda ve kuyula bangyufula na ntangu ya disolo mosi​—⁠bamosi na yau kuvandaka ya pete, ya nkaka na kati na yau kuvandaka ya kuluta mpasi. Ya kyeleka, yandi vandaka kuzola kyeleka ya metulama na Biblia.

Mpangi Gangas kubakaka mbotika na ngonda ya Yuli 15, 1921. Yandi kuyantikaka kisalu na yandi ya mupasudi nzila na Marsi 1928. Na yau, yandi kusalaka bamvula 66 na kati ya kisalu ya ntangu yonso. Na Oktobri 31, 1928, yandi kukumaka mambere na kimvuka ya bantu ya nto ya nza ya mvimba ya la Société Watch Tower na Brooklyn.

Nkenda ya luzingu na yandi kubasikaka na kati ya Nzozulu ya Nkengi ya Septembri 1, 1967 (ya Kifalansa). Yau ketendula muntu ya Nzambi, ya kufuluka na kimpeve. Na kati ya disolo yina, yandi kesala komantere yai ya kusyamisa nde: “Mono kezola luzingu, mpi mono kezola nde bampangi na mono, bau mpi kubaka luzingu. Bonso ntumwa Polo, mono ketadila bima yina yonso ya nkaka bonso ‘mvidisa sambu na mbalu ya nene ya nzayilu ya Kristu Yezu.’ ”​—⁠Filipi 3:​8, NW.

Mpangi Gangas kumonisaka na bisalu na yandi nde yandi vandaka mpenza kuzola luzingu, mpi yandi kusamunaka ti kikesa “nzayilu na yandi ya Kristu Yezu” na bankaka. Beto kewa mawa sambu na kukonda na yandi, kansi mutindu beto keyangalala nde ntangu yai yandi mebakaka nsendo na yandi ya zulu! Ntangu yai, ‘yandi kele na kupema na kisalu na yandi ya ngolo, kadi bisalu na yandi kelanda yandi.’​—⁠Kusonga 14:⁠13.