Masolo Ya Bansamuni Ya Kimfumu

Bau Kumaka na Babwala ya Groënland

NA MAKUMI mingi ya bamvu, Bambangi ya Yehowa kesadilaka Nzozulu ya Nkengi ti Réveillez-vous! na kisalu na bau ya kusamuna nsangu ya mbote. Bazulunalu yai kekumisaka mayele ya Yehowa mutindu yau ketendulama na Ndinga na yandi, Biblia. Yau ketalaka mambu ya nza yina bambikudulu ya Biblia ketubilaka, ye yau kemonisaka ndongisila ya mbote ya Biblia sambu na makambu ya ntangu na beto.​—⁠Yakobo 3:⁠17.

Na 1994, Bambangi ya Groënland kusalaka ngolo kibeni na kukabula Nzozulu ya Nkengi ti Réveillez-vous! na kiteso ya mingi na bantu ya bau lendaka. Na nsungi ya été, bau kusalaka bangidika sambu na kwenda kutala babwala ya ntama ya Groënland. Kimvuka mosi ya bansamuni ya Kimfumu kusalaka nzyetelo ya kiteso ya bakilometere 4000 na kutombukaka na maswa sambu na kukwenda na Qaanaaq (Thule), na kukutanaka ti ntalu ya mingi ya bimvuka ya Nordi ya mweta. Nzyetelo na bau kusalaka bamposo nsambwadi. Na simu ya Esti, bankwelani zole kukumaka na Ittoqqortoormiit ye na mbala ya ntete bau kufulusaka yau mbotembote ti nsangu ya mbote.

Na luyantiku ya mvula yina, na ngonda ya Aprili, bansononono 7513 ya Nzozulu ya Nkengi ti Réveillez-vous! kupesamaka na bantu ya Groënland. Yau ketendula nde, konso muntu na kati ya bansamuni yina 127 kupesaka kiteso ya bazulunalu 59. Kiteso ya zulunalu 1 sambu na bantu 7 kupesamaka. Na ngonda yina, Réveillez-vous! kubasisaka ndandana ya masolo ya kuvandaka na ntu dyambu “Le cancer du sein ​—⁠ Hantise de toutes les femmes.” Mbangi mosi, ya kukabulaka bazulunalu 140 kupesaka bansononono ya Réveillez-vous! yina na mwangi-nsangu mosi ya televizio. Mwa bilumbu fyoti na nima, manaka mosi ya bansangu ya televizio kutubilaka cancer ya mabele. Mutubi kumonisaka zulunalu yango na televizio, na kusongaka balutiti mingi sambu yandi kusikisaka mbalula na yau na ndinga ya Kigroenland. Yandi mpi kutendulaka bangindu ya nsadilu ya kupesamaka na Réveillez-vous! bonso malongi ya kutanina mavimpi.

Bau kuyufulaka Mbangi yina kupesaka bazulunalu na mwangi-nsangu bangyufula na manaka yango ya televizio. Yandi kuvutulaka bamvutu na bangyufula ya vandaka kutadila Bambangi ya Yehowa mpi kutubilaka kukabulama ya bazulunalu mingi ya kusalamaka na ngonda yina. Yandi mpi kutendulaka mayele ya nsadilu ya kele na Biblia mpi kumonisaka nde ndongisila ya kitoko ya mutindu yina kesadisa beto na kununga makambu ya bilumbu yai.

Manaka kusukaka na bangyufula ya bau kuyulaka na prezida ya société de cancer ya Groënland. Yandi kutendulaka nde, na ntu-dyambu yina, yandi memonaka ntete ve malongi ya kitoko ya mutindu yina na ndinga na bau. Ebuna yandi kusyamisaka bantu yonso yina vandaka kutula dikebi na dyambu ya cancer ya mabele na kutanga Réveillez-vous! yina. Yandi kutubaka nde yau lombamaka nde bau kupesa matondo mingi na Bambangi ya Yehowa sambu na dibansa na bau ya kusala buna.

Bonso na Groënland, Bambangi ya Yehowa na ntoto ya mvimba kelanda na kusamuna nsangu ya mbote na “lugangu yonso ya kele na nsi ya zulu.” (NW) (Kolosai 1:23; Bisalu 1:⁠8) Na kusadilaka mikanda ya ketendula Biblia, na kati na yau Nzozulu ya Nkengi ti Réveillez-vous!, bau kesadisa bantu ya mitindu yonso na kununga makambu ya bilumbu yai mpi bau kepesa kivuvu ya makwisa mosi ya mbote.

[Caption on page 8]

[Ntendula ya Bifwanisu ya lutiti 8]

Qaanaaq (Thule), Ittoqqortoormiit, Nuuk (Godthåb)