Kumona bantu ya mpusu ya nitu yankaka mpamba ti mabundu

NA INTERVIEW yina yandi salaka na zulunalu mosi (Time), Mark Mathabane, nsoniki mosi yina mebutukaka na Afrika ya Sudi, kutubaka nde: “Ntangu mono kwisaka na États-Unis na 1978, mu vandaka kuyindula nde Amerika memanisaka makambu na yo ya kukabula bantu ya mpusu ya nitu ya kuswaswana, nde bandombe mekumaka kiteso mosi ti bamindele.” Yandi keyika nde: “Mu kemona nde dyambu yai kesalama na mitindu mingi. Yo vandaka kumonana nde États-Unis meluta mpenza Afrika ya Sudi na mambu mingi. Kansi, mu memona na mutindu mosi ya kupesaka mono mpasi nde, mambu mingi ve kibeni mesobaka na ntima ya bantu.” Inki kunataka yandi na kumona ti kuyituka yonso nde mambu vandaka mutindu yina?

Mathabane tubaka nde: “Kilumbu ya kelutaka kumonisa kukabwana na Amerika kevandaka Lumingu na 11:00 na ntwala midi.” Yandi monaka nde ata na nzo-Nzambi, bantu lenda kundima ve kusamba kifulu mosi ti bantu ya mpusu ya nitu yankaka. Yandi yulaka nde, “Ebuna, nki mutindu bo kebakaka bo na bilumbu yankaka ya mposo?” Mathabane kumonaka nde sambu mambu kusoba mpenza, yo kelomba nde bantu kulonguka. Yandi ketuba nde: “Kulonguka kesadisaka bantu na kundima nde bantu yonso ya kele na inza kele kiteso mosi.”

Bambangi ya Yehowa kendima nde ya kyeleka kulonguka kele kima ya lenda sadisa bantu na kusoba, kansi bo ketubilaka mingimingi kulonguka malongi yina kekatukaka na Ndinga ya Nzambi. Ya kyeleka, Biblia kesadisaka bo na kulosa bangindu ya mbi yina bantu kevandaka na yo sambu na bantu ya mpusu ya kuswaswana, ata na bansi yina bantu ya bandinga ya kuswaswana kewakanaka ve. Konso mposo na Banzo ya Kimfumu na bo, bantu ya bampusu ya nitu mpi ya bansi ya kuswaswana kevukanaka sambu na kulonguka bansiku ti minsiku yina kele na Ndinga ya Nzambi, Biblia. Bo kesalaka nsisani ve na balukutakanu yai. Beto kelomba nge na kukwenda na balukutakanu yango!