Ngemba ya Inza: Inki Mutindu yo Tasalama?

KETI ngemba ya inza mekuma penepene? Bantu mingi vandaka kuyindula mutindu yina kansi bubu yai bo mekumaka ti badute. Lapolo mosi yina vandaka kutubila mambu yina tabwa na luzingu na bilumbu kekwisa yina kubasikaka na zulunalu mosi ya Afrika ya Sudi (Daily Mail & Guardian), kutubaka nde: “Mambu yina bo tubaka na ntwala bamvula 10 meluta dezia sambu na yina metala luzingu ya mpa ya inza ya mvimba kele ata na nsudi ya kulungana ve.”

Bansoniki ya disolo yango kuyindulaka na yina metala kivuvu yina bantu vandaka na yo na nsungi ya bamvula kumi ya mekatuka kuluta. Mvita ya kukonda kusadila minduki yina vandaka kusalama na kati ya bansi yina meluta ngolo na inza mekatuka kumana, bansi yango kenwana dyaka ve. Dyambu yai kumonisaka nde yo vandaka luyantiku ya luzingu ya mpa, mpi bantu mingi kutulaka kivuvu nde bantu tayantika na kusala ngolo sambu na kumanisa bunsukami, maladi, ti mambu yina metala bisika beto kezingaka. Lapolo yango ketuba nde: “Mambu yina yonso ya bo vandaka kuyindula na ntwala kemonana bubu yai nde yo vandaka bivuvu ya mpamba. Bamavwanga ya mpa mebasika na bisika yina bantu vandaka kuyindula ve ata fyoti. Bunsukami ke na kukuma kaka mingi na inza ya mvimba. Bansi zole ya mpa mekatuka kuyikama na kati ya bansi yina kele ti binwaninu ya nikleyere. Lukumu yonso yina O.N.U. kuvandaka na yo mekita sambu na bamavwanga yina kelandana kukonda kumana. Bangindu ya bantu vandaka na yo melungana ve ebuna bo mekuma boma-boma.”

Balongoki ya Biblia kebakisaka nde bikesa yonso ya muntu lenda sala, ata yo kele ya mbote, lenda nunga ve na mambu yonso. Sambu na nki? Sambu, mutindu Biblia ketuba: “Nsi-ntoto kele na maboko ya Muntu ya Mbi.” (1 Yoane 5:19) Na ntangu yo kele na maboko ya Satana, inza lenda kituka ve Paladisu mutindu Nzambi kusalaka yo.

Ata mpidina, beto kele na kikuma ya kutula kivuvu. Yehowa Nzambi kesila nde yandi tatula ngemba na inza ya mvimba. Yandi tasala yo ve na kutomisaka ngidika ya bima yai, kansi na mpila yandi tatula “ntoto ya mpa” kisika “lunungu tazingaka.” (2 Piere 3:13, NW) Ya kyeleka, na nsadisa ya Kimfumu ya Nzambi, ntoto yai takuma kisika mosi ya ngemba, mpi ya kyese, kifulu luzingu ti kisalu tavanda mambu ya kepesa konso ntangu kyese na bantu ya bulemfu yonso. Dyaka, Nzambi kesila nde yandi “ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo mpi ta dilaka diaka ve, bo mpi ta waka diaka mpasi ve.” Mambu yai mekatuka ve na bangindu ya bantu yina mefwana ve na kutudila ntima. Kansi, yo mekatuka na Ndinga ya Ngangi yina kelunganaka kaka, yina lenda tuba luvunu ve.​—Kusonga 21:4; Tito 1:2.