Kikesa Sambu na Bantu Yina Kesosa Lusadisu

BIBLIA kele ve mukanda mosi ya ketubilaka mavimpi ya mabanza ya bantu. Kansi, yo kepesaka beto kikesa mpi kesadisaka beto na kusepela na luzingu ata beto kekutana ti mambu mingi ya mpasi. Yo yina, Biblia ketuba nde: “Muntu yonso me butuka na ntoto yai ke na luzingu mosi ya nkufi ti ya mpasi.” (Yobi 14:1) Kimuntu na beto ya kukonda kukuka kevandaka na kisina ya bampasi yankaka ya beto kekutanaka na yo. Kansi nani kele kisina ya ntetentete ya bampasi ya bantu kemonaka?

Biblia ketuba nde muntu yango kele mpeve mosi ya mbi ya bo kebingaka Dyabulu mpi Satana. Yandi ke “kusaka bantu yonso” mpi yandi kebasisaka mavwanga mingi yina kemonisaka bantu mpasi. Kansi, Biblia kezabisa beto dyaka nde ntangu na yandi ke na kukuma na nsuka. (Kusonga 12:9, 12) Ntama mingi ve bampasi yonso yina Satana menataka na ntoto tamana na lusadisu ya Nzambi. Biblia ketuba nde, inza ya mpa ya lunungu ya Nzambi mesilaka tamanisa mambu yonso ya mpasi yina kekatulaka bantu kivuvu.​—2 Piere 3:13.

Yo kepesa kikesa mpenza na kuzaba nde bampasi ya bantu ke na kumona kele kaka sambu na mwa ntangu fyoti! Na luyalu ya Kimfumu ya Nzambi ya zulu yina Yezu Kristu tayala, kukonda lunungu ti mpasi tamana. Sambu na Ntotila yina Nzambi meponaka, Biblia ketuba nde: “Yandi ta sadisaka bantu ya mawa yina ke didila yandi ti bantu ya kukonda muntu ya kusadisa bo. Bansukami ti bantu yina ke na ngolo ve, yandi ta wilaka bo mawa; yandi ta sadisaka bantu yina ke na mpasi. Yandi ta gulusaka bo na maboko ya bantu ya nku, na yandi luzingu na bo kele mfunu mingi.”​—Nkunga 72:12-14.

Ntangu ya kulungana ya bangogo yai ya mbikudulu mekuma penepene mpenza. Beto tavanda na luzingu ya mvula na mvula na paladisu na ntoto kisika mambu yonso tavanda mbote. (Luka 23:43; Yoane 17:3) Kuzaba balusilu yai ya Masonuku ya kepesaka kikesa kepesa kivuvu mpi kikesa na bantu yina kesosa lusadisu.

[Bangogo ya kemonisa kisina ya foto ya kele na lutiti 32]

Mwana-nkento ya kenyokwama na basusi: Photo ILO/J. Maillard