Kele ti Ntangu Balusilu Yonso Talungana

LUZINGU ya bantu mefulukaka ti balusilu yina kelunganaka ve. Mbala mingi, bansi kezitisaka ve balusilu na bo ata bo mewakana na meso ya bantu mpi bo metula maboko na mikanda nde bo tanwana dyaka ve. Kikalulu yai kenataka bantu na bo na kunwana bitumba ya ngolo. Kilumbu mosi, Napoléon kutubaka nde: “Baluyalu kelungisaka balusilu na bo kaka kana bantu kepusa bo na kusala yo na kingolongolo, to kana bo kebakisa nde yo tavanda sambu na mambote na bo mosi.”

Inki beto lenda tuba sambu na balusilu yina bantu kesalaka? Yo kesalaka mpasi mpenza kana muntu mesila nge kima kansi yandi melungisa yo ve! Mingimingi kana nge mezaba muntu yango mpi nge ketudilaka yandi ntima. Na kutuba ya mbote, bantu kelungisaka ve balusilu na bo mbala yankaka sambu bo kekukaka ve to bo kekondaka luzolo ya mbote.

Luswaswanu kele ya nene kibeni na kati ya balusilu ya bantu ti ya Nzambi! Balusilu ya Nzambi kevandaka mpenza ya kutudila ntima. Balusilu yonso ya Yehowa Nzambi kelunganaka. Yo kelunganaka kaka. Sambu na yina metala ndinga ya Nzambi yina kelunganaka kaka, Yezaya 55:10 ketuba nde: “Mutindu yo yina mpi mambu yina ke katukaka na munoko na mono, yo ke vutuka[ka] ve mpamba na mono kana yo me sala ve ntete luzolo na mono, kana yo me lungisa ve bangindu na mono.”

Ebuna, inki mutindu beto fwete tadilaka balusilu ya Nzambi yina kele na Biblia? Ya kyeleka, beto lenda tudila yo ntima. Mu mbandu, ntumwa Yoane kusonikaka nde: “Ntangu yai Nzambi ke zinga na kati ya bantu! Yandi ta zinga ti bo, bo ta vanda bantu na yandi. Yandi mosi Nzambi ta vandaka ti bo, yandi ta vandaka Nzambi na bo. Yandi ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve. Na ntangu yina mambu ya ntama ta vanda me vila.” (Kusonga 21:3, 4) Nge lenda baka mambote ya mutindu yai kana nge sala mambu yai ya Yezu kutubaka nde: “Kana bo [longuka na kuzaba nge, NW] Nzambi mosi ya kieleka, ti Yesu Kristo yina ya nge tindaka, yo ke songa nde bo ke na moyo ya mvula na mvula.”​—Yoane 17:3.