Kikesa Sambu na Bantu Yina Kemona Mpasi

NTANGU babakala ti banketo ya kwikama na ntangu ya ntama vandaka kumona mpasi, bo vandaka kusamba Nzambi na masonga yonso sambu yandi twadisa bo. Kansi, bo vandaka mpi kusala kitambi ya ntete sambu na kufyotuna mpasi yango, mu mbandu, bo vandaka kusadila mayele sambu na kutina bantu ya kepesaka bankaka mpasi. Mu mbandu, kutudila Yehowa ntima kumosi ti bikesa na yandi mosi kusadisaka Davidi na kukanga ntima na bampasi ya yandi kutanaka na yo. Ebuna beto bubu yai?

Na ntangu nge kekutanaka ti mpasi, ntembe kele ve nde nge kesalaka bitambi ya ntete sambu na kumanisa dikambu na nge. Mu mbandu, kana nge kele ve ti kisalu, keti nge tasala ve kikesa sambu na kuzwa kisalu ya mbote yina tasadisa nge ti dibuta na nge? (1 Timoteo 5:8) To kana nge kebela, keti nge tasosa ve nkisi mosi ya mbote sambu yo sadisa nge? Yo kebenda dikebi na beto na kumona nde Yezu, yina kuvandaka ti ngolo ya Nzambi kupesaka yandi ya kubelula bamaladi ya mitindu yonso, kundimaka nde “bayina ke na maladi, bo bantu ke na mfunu ya munganga.” (Matayo 9:12) Ata mpidina, mbala yankaka bampasi na nge takatuka kaka ve, yo lenda lomba nde nge landa na kukangila yo ntima na kiteso mosi buna.

Sambu na nki ve kutubila Yehowa dyambu yango na kisambu? Mu mbandu, ntangu ya beto kesosa kisalu, kutudila Yehowa ntima na kisambu tasadisa beto na kununga konso mpukumuna ya kundima kisalu yina kewakana ve ti minsiku ya Biblia. Beto tazola mpi ve ‘kuvidisa lukwikilu’ sambu na nzala to zola ya mbongo. (1 Timoteo 6:10) Ya kyeleka, ntangu beto kebaka badesizio ya mfunu na yina metala kisalu, dibuta to mambu ya mavimpi, beto lenda landa ndongisila ya Davidi yina ketuba nde: “Bikila Mfumu Nzambi kilo na nge, yandi ta sadisa nge; yandi ta bika ve muntu ya mbote bo bwisa yandi.”​—Nkunga 55:23.

Kisambu ya masonga tasadisa beto dyaka na kutanina bukatikati na beto ya mabanza na mpila nde mpasi na beto kubwisa beto ve. Ntumwa Polo, Mukristu mosi ya kyeleka, kusonikaka nde: “Konso ntangu ya beno ke samba Nzambi, beno lomba yandi konso mambu yina ya beno ke na yo mfunu; ntangu beno ke lomba yandi yo, beno pesa yandi mersi.” Na nki mutindu kisambu ya masonga lenda pesa beto kikesa? “Ngemba ya Nzambi, ngemba yina me luta mambu yonso ya bantu ke yindulaka, yo ta keba ntima na beno ti mabanza na beno sambu na kimvuka yina ya beno kele ti Yesu Kristo.” (Filipi 4:6, 7) Ngemba ya Nzambi “me luta mambu yonso ya bantu ke yindulaka.” Yo yina, yo lenda sadisa beto na kuvanda kaka pima ntangu beto kele ti kilo ya mpasi ya mawi. Yo ‘takeba ntima na beto ti mabanza na beto,’ ebuna yo tasadisa beto na kubuya kusala mambu na buzoba yonso mpi ya kukonda mayele, kima yina lenda yika beto mpasi.

Kisambu lenda nkutu kusoba mutindu mambu kesalama. Ntangu ntumwa Polo kukotaka boloko na Roma, yandi lombaka na kudikulumusa yonso nde bampangi Bakristu kusamba sambu na yandi. Sambu na nki Polo kulombaka bo na kusala dyambu yai? Yandi sonikilaka bo nde: “Kansi kima ya ntete ya mono ke luta kubondila beno, nde beno samba Nzambi na mpila nde yandi pesa mono nzila na kwisa kuvutuka nswalu kuna na beno.” (Baebreo 13:19) Na kutuba yankaka, Polo kuzabaka nde kana Yehowa kuwa bisambu yina Bakristu yankaka vandaka kusala mbala na mbala, yo zolaka kufyotuna ntangu yina bo zolaka kubasisa yandi na boloko.​—Filemoni 22.

Keti kisambu tasoba mpasi na beto? Ee, yo lenda sala yo. Kansi beto fwete bakisa nde mbala yankaka Yehowa tapesa ve mvutu na bisambu na beto na mutindu beto tazola. Polo kusambaka mbala mingi na yina metala “nsende na nitu” na yandi, mbala yankaka yo vandaka kifu mosi ya nitu. Kansi, na kisika ya kukatula mpasi yango, Nzambi kutubilaka Polo nde: “Mambote na mono ya nge mefwana ve na kubaka kele mambu yonso ya nge ke na yo mfunu, sambu ngolo na mono kelutaka kumonika na ntangu yina ya nge ke na kikesa ve.”​—2 Korinto 12:7-9, NW.

Yo yina, mbala yankaka mpasi na beto tamana ve mbala mosi. Kansi beto tavanda ti dibaku ya kumonisa nde beto ketudilaka Tata na beto ya zulu ntima. (Yakobo 1:2-4) Vanda na kundima nde ata Yehowa Nzambi kukatula ve mpasi yango, yandi lenda “pesa [beto] ngolo; mpidina mpukumunu lenda bwisa [beto] ve.” (1 Korinto 10:13) Yo yina Biblia kebinga Yehowa nde ‘Nzambi ya bikesa yonso, yina kepesaka beto kikesa na bampasi na beto yonso.’ (2 Korinto 1:3, 4, NW) Nzambi lenda pesa beto kima yina beto kele na yo mfunu sambu na kukanga ntima, mpi beto kele ti kivuvu ya luzingu ya mvula na mvula.

Ndinga ya Nzambi, Biblia, kesila nde Yehowa “ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve.” (Kusonga 21:3, 4) Keti nge kemona nde ngindu ya inza ya kukonda mpasi kele kitoko mingi na mpila nde yo ke mpasi na kundima? Yo lenda vanda mpasi na kundima kana nge meyikanaka na kuzinga ti bampasi. Kansi, Nzambi mesilaka na kukatula boma ti mpasi, mpi lukanu na yandi talungana kaka.​—Yezaya 55:10, 11.

[Bifwanisu ya kele na lutiti 9]

Muntu ya kukonda kivuvu mebaka kikesa