Keti Nge Kesadilaka Mabaku ya Kuzabisa Bankaka Mambu Yina Nge Kekwikilaka?
“KETI yo kevandaka ti kyeleka ya kesobaka ve?” Yo vandaka ntu-dyambu ya ekzame mosi ya kusonika (dissertation) ya bo salaka na Pologne. Bantuma ya bo pesaka sambu na ekzame yango vandaka kutuba nde: “Beto kele ve ti mfunu ya kyeleka yina kesobaka ve. Ata muntu mosi ve kele ti mfunu na yo. Nkutu, kyeleka ya kesobaka ve kevandaka ve.” Agata kele ti bamvula 15, yandi kele na sekondere mpi yandi kele Mbangi ya Yehowa; yandi bakaka lukanu ya kusadila dibaku yai sambu na kuzabisa bantu yankaka mambu yina yandi kekwikilaka.
Sambu na kudibongisa na ekzame yina, Agata kulombaka ntete lutwadisu ya Yehowa mpi na nima yandi vukisaka bangindu yina vandaka kutubila ntu-dyambu yina. Yandi zwaka bansangu yina vandaka kutubila ntu-dyambu yango na Nzozulu ya Nkengi ya Yuli 1, 1995. Yandi vutukilaka ngyufula yina Ponse Pilate kuyulaka Yezu nde: “Kieleka kele nki?” (Yoane 18:38) Yandi tubaka nde ngyufula yina vandaka kumonisa dibanza ya muntu mosi ya kevweza, yina ketuba nde: ‘Kyeleka? Inki yo yina dyaka? Kima ya mutindu yina kele ve!’ Agata kusonikaka nde: “Ngyufula ya Pilate keyibusa munu bantuma ya ekzame yai ya kusonika.”
Na nima, yandi tubilaka dibanza yina ketubaka nde kima yina kele ya kyeleka sambu na muntu mosi lenda vanda ve kyeleka sambu na muntu yankaka mpi bo zole lenda vanda na “raison.” Yandi yulaka bangyufula bonso yai, “Nani na kati na beto tavanda ti kikesa ya kumata na avio kana yandi kendimaka ve nde bansiku yina ketubilaka mutindu bima ketambulaka na mupepe kele bakyeleka ya kesobaka ve?” Na nima, yandi tubilaka Biblia: “Kutula ntima na Ndinga ya Nzambi mesimbama mpenza na mambu yina beto lenda zikisa nde yo kele ya kyeleka.” Yandi tubaka nde yandi ketula kivuvu nde bantu yina kesosa na masonga yonso kyeleka yina kesobaka ve fwete kanga mpenza ntima sambu na kuzwa yo.
Bo pesaka Agata diplome mosi ya sipesiali, mpi yandi zwaka dibaku ya kusala disolo yango na ntwala ya bana ya nzo-nkanda ya mvimba. Banduku na yandi mingi ya nzo-nkanda kundimaka na kulonguka Biblia ti yandi. Agata kele na kyese mingi na mutindu yandi sadilaka dibaku yina sambu na kuzabisa bantu yankaka mambu yina yandi kekwikilaka. Ee, kuvanda ntangu yonso ya kuyilama sambu na kuzabisa lukwikilu na nge lenda buta mbuma. Inki mabaku nge lenda sadila?