Keti Nsi-Ntoto ya Bantu Kezinga na Bumosi Lenda Salama?

KETI kubika fyoti bantu ya nsi-ntoto tazinga na ngemba to na mpasi? Yo kemonana nde bangindu yai zole kele ti bikuma ya kendimisa.

Na ndambu mosi, bamfumu ya nsi-ntoto ketubila ti kivuvu yonso nde kutula ngemba na nsi-ntoto ya mvimba kele lukanu yina bo lenda lungisa, ziku sambu bo kezaba nde kana lukanu yai kulungana ve, mambu tavanda mbi kibeni. Na ndambu yankaka, mingi kewa boma ntangu bo keyindula na bangyufula bonso yai: Inki makanda kele ti minduki ya kefwaka bantu mingi na mbala mosi? Keti bo tasadila yo? Inki tasalama kana bo sadila yo?

Disolo ya luzingu ya bantu kemonisa nde banda ntama, kimbeni mpi kikalulu ya kubuya kundima bantu ya bikanda yankaka kele mambu yina kekangaka bantu nzila na kuvanda ti kivuvu ya kuzinga na bumosi, mpi mbala mingi mabundu kekumisa mambu yai ngolo, na kisika ya kumanisa yo. Muntu mosi ya kemwangaka bansangu, James A. Haught, kusonikaka nde: “Konso kima yina kekabulaka bantu lenda basisa kimbeni, mpi dibundu kele mosi na kati ya bima yina kelutaka kukabula bantu. Ata bantu mingi kendimaka nde dibundu kekumisaka bantu ‘mbote,’ yo ke pwelele nde yo kepusaka bantu yankaka na kusala mambu ya mbi kibeni.” Nsoniki Steven Weinberg kutubaka dyambu ya mutindu mosi. Yandi sonikaka nde: “Dibundu mpamba lenda sala nde bantu ya mbote kusala mambu ya mbi.”

Keti kivuvu kele nde bantu ya nsi-ntoto tazingaka na bumosi? Ee! Kansi, mutindu beto tamona, kisina ya bumosi ya bantu ya nsi-ntoto takatuka ve na bantu to na mabundu.

[Bangogo sambu na kubenda dikebi ya kele na lutiti 3]

Keti nsi-ntoto kele bonso grenade yina kezola kupanzana?