BAMVUTU NA BANGIUFULA YA BIBLIA

Keti bantu lenda zinga mvula na mvula?

[Kifwanisu ya kele na lutiti 16] — Inki mambu lenda katula beto na kimpika ya lufwa?

Adami, muntu ya ntete zingaka bamvu-nkama mingi. Kansi, nsuka-nsuka yandi nunaka mpi fwaka. Yantika ntangu yina, bantu me salaka bikesa sambu na kubuya kukuma minunu. Ata mpidina, ata muntu mosi ve na kati na bo me tinaka lufwa. Sambu na nki? Adami nunaka mpi fwaka sambu yandi salaka disumu na mutindu yandi kolamaka na Nzambi. Beto ke nunaka sambu Adami me bikilaka beto disumu mpi malanda na yo, lufwa.—Tanga Kuyantika 5:5; Baroma 5:12.

Sambu beto baka luzingu ya mvula na mvula, yo lombaka nde muntu mosi kufuta nkudulu sambu na beto. (Yobi 33:24, 25) Nkudulu kele ntalu yina bo ke futaka sambu na kukatula muntu na kimpika, mpi na yina me tala beto, yo lombaka nde bo katula beto na kimpika ya lufwa. (Kubasika 21:29, 30) Yezu futaka ntalu yina ntangu yandi fwaka sambu na beto.—Tanga Yoane 3:16.

Inki mutindu beto lenda baka luzingu ya mvula na mvula?

Muntu yonso ve ta katuka na kimpika ya maladi mpi ya kununa. Nkutu, bantu yina ke kolamaka na Nzambi, bonso Adami, ta vidisa dibaku na bo ya kubaka luzingu. Kaka bantu yina ke bakaka ndolula na masumu na bo ta baka luzingu ya mvula na mvula.—Tanga Yezaya 33:24; 35:3-6.

Kele ti mambu yina beto fwete sala sambu nde Nzambi kulolula beto. Beto fwete zaba Nzambi na kulongukaka Biblia, Ndinga na yandi. Yo ke longaka beto mutindu ya kuvanda ti luzingu ya mbote kuluta mpi diaka mutindu ya kundimama na Nzambi mpi kubaka luzingu ya mvula na mvula.—Tanga Yoane 17:3; Bisalu 3:19.

Sambu na kuzaba mambu mingi, tala kapu ya 3 ya mukanda yai, Inki Biblia Kelongaka Mpenza?, yina Bambangi ya Yehowa me basisaka