Keti nge Zabaka Yo?

Keti Nsiku ya Moize vandaka kusadisa bantu ya Izraele na kuyidika mavwanga yina vandaka kubasika na kati na bo?

YO VANDAKA kusadisa bo bantangu ya nkaka. Mu mbandu, Kulonga 24:14, 15 ke tuba nde: “Nge fwete kusa ve muntu ya kisalu ya ke bakaka lufutu yina kele na mpasi mpi kele nsukami, yo vanda mpangi na nge to munzenza yina kele na insi na nge . . . Kana ve, yandi ta boka na Yehowa sambu na nge, ebuna nge ta sala disumu.”

Disolo mosi ya bo sonikaka na mvu-nkama ya nsambwadi na ntwala ya Kristu ke monisa nde bo sadilaka baverse yai sambu na kuyidika mavwanga. Bo monaka mukanda yango pene-pene ya Ashdodi. Ziku bo sonikaka yo sambu yo monanaka nde musadi-bilanga mosi kukaka ve kupesa mingi ya bambuma yina yo lombaka nde yandi pesa. Bo sonikaka mukanda yai na kipesi ya dibungu ya ntoto, yo ke tuba nde: “Ntangu nsadi na nge [muntu yina ke bondila nge] manisaka kukatula bambuma na bilanga, na nima ya bilumbu fioti, Hoshayahu mwana ya Shobay kwisaka kubotula lele ya nsadi na nge. . . . Nge lenda yula bantu yonso yina vandaka kukatula bambuma ti mono na nsi ya ntangu, bo ta songa nge . . . nde mambu ya mono me tuba kele masonga. Mono me sala ve ata mbi mosi. . . . Kana guvernere me ndima ve kuvutudila nsadi na nge lele, wila mono mawa mpi vutudila mono yo! Kuvanda ve pima sambu nsadi na nge me konda lele.”

Simon Schama, muntu mosi ya mayele, ke tuba nde kudila ya nsadi yai “ke longa beto mambu mingi, beto fwete suka ve kaka na kutadila mutindu yandi vandaka kubondila sambu bo vutula [lele na yandi]. Yo ke monisa mpi nde nsadi yai vandaka kuzaba nsiku ya Biblia mingi-mingi nsiku yina kele na mukanda ya Levi mpi ya Kulonga ya ke monisa nde bo fwete sadila ve bansukami mambu na nku.”