Beto Yonso Lenda Sadisa na Kukumisa Bantu ya Mpa Balongoki

¹ Muntu kekumaka ve longoki ya mpa kaka sambu na bikesa ya mpangi mosi. Yehowa lenda sadila banduku na yandi ya kisalu sambu na kusadisa balongoki ya Biblia na kuyela na kimpeve. (1 Kor. 3:​6-9) Konso muntu na kati na beto kesadisaka balongoki ya mpa kaka na bakomantere ya masonga ya beto kepesaka ve, kansi mpi na bikalulu na beto ya mbote yina kemonisa mpenza nde mpeve ya Nzambi kesalaka na luzingu na beto. (Yoa. 13:35; Gal. 5:​22, 23; Ef. 4:​22, 23) Inki dyaka beto lenda sala sambu na kusadisa bantu ya mpa?

² Dibundu ya Mvimba: Konso muntu na kati na beto lenda tula dikebi na bantu yina meyantika kukwisa na balukutakanu kana yandi kekwenda kupesa bo mbote na kyese yonso mpi kusolula ti bo na ntwala mpi na nima ya balukutakanu. Bakala mosi kutubaka mutindu yai ntangu yandi yindululaka mbala ya ntete ya yandi kwendaka na lukutakanu: “Na kilumbu mosi mpamba, mu kutanaka ti bantu mingi ya mu zabaka ve ata fyoti, yina vandaka kumonisa zola ya masonga. Mu memonaka ntete ve bantu mingi mpidiyai na dibundu ya mono vandaka vukana banda kileke. Yo vandaka kumonana pwelele nde mu zwaka kyeleka.” Bangonda nsambwadi na nima ya kuvukana na lukutakanu ya ntete, yandi bakaka mbotika.

³ Sikisa longoki ya mpa na masonga yonso na ntangu yandi keyela na kimpeve. Keti longoki mosi ya Biblia kekanga ntima na kimbeni? Keti yandi kekwisa na balukutakanu mbala na mbala? Keti yandi kesala kikesa sambu na kupesa bakomantere? Keti yandi mesonikisa zina na Nzo-Nkanda ya Kisalu ya Teokrasi to meyantika kusamuna? Sikisa yandi sambu na kuyela yina. Yo tapesa yandi ngolo ti kikesa.​—⁠Bing. 25:⁠11.

⁴ Muntu ya Ketwadisa Kulonguka ya Biblia: Bansamuni mingi kelombaka bansamuni yankaka yina kele ti bikalulu ya mbote na kusamuna ti bo sambu na kusadisa balongoki na bo ya Biblia na kuyikana ti bampangi ya dibundu. Lomba longoki na kukwisa na balukutakanu ya dibundu kukonda kusukinina. Kana yandi meyantika kukwisa na balukutakanu, songa yandi na bampangi yankaka. Keti yandi kenwana sambu na kuyambula kikalulu mosi ya mbi, bonso kunwa makaya? Keti kele ti muntu mosi ya dibuta na yandi ya kesepela ve nde yandi longuka Biblia? Yandi lenda baka mambote kana yandi solula ti nsamuni mosi yina mekutanaka mpi mekangaka ntima na mpasi ya mutindu mosi.​—⁠1 Pie. 5:⁠9.

⁵ Bantu ya mpa kele na mfunu ya lusadisu ya kimpeve ya bampangi ya dibundu. Bampangi yonso lenda sadisa bo na kuyela kana bo kemonisa bo dikebi ya masonga.