Bamvutu na Bangyufula na Beno

◼ Inki kele bigonsa ya kusolula ti muntu ya nge mezaba ve na nzila ya Enternete?

Basite mingi ya Enternete mesalamaka sambu nde bantu kuzabana mpi kusala kinduku na nzila na yo. Basite yina mingi kepesaka bantu nswa ya kutula ba imformasio na bo mosi, yo lenda vanda bafoto mpi mambu yankaka. Ebuna bantu yina tamona ba imformasio yango lenda sosa bo. Baleke mingi kesadilaka basite yina, mpi baleke yankaka ya dibundu mesadilaka yo sambu na kusala kinduku ti bantu yankaka yina ketubaka nde bo kele Bambangi ya Yehowa.

Yo ke mpasi ve nde muntu yina beto kesolula ti yandi na nzila ya Enternete kukusa beto sambu na yina metala kimuntu, kimpeve, to bampusa na yandi. (Nk. 26:⁠4) Muntu yina ketuba nde yandi kele Mbangi ya Yehowa, yo lenda vanda nde yandi kele ve Mukristu, yandi lenda vanda muntu ya bo me basisaka na dibundu, to nkutu aposta yina kezola kubebisa lukwikilu ya Bakristu. (Gal. 2:⁠4) Bantu ketubaka nde, bantu mingi yina keladisaka bana ya fyoti kesadilaka basite yina sambu na kuzwa bana yina bo kesosa kusala mbi.

Ata beto kendima mpenza nde bantu yina beto kesolula ti bo kele na nkadilu ya mbote na dibundu, yo kele mpasi ve nde masolo ya beto kesolula na nzila ya Enternete kusoba mpi kukuma masolo ya mbi. Yo kele mutindu yina sambu bantu kevandaka ti kikalulu ya kukonda kumonisa kimuntu na bo ya kyeleka na bantu yina bo memonaka ntete ve. Bo lenda yindula mpi nde masolo yina na nzila ya Enternete ketadila kaka bo mpi kuyindula nde ata konso nki mambu yina bo ketuba, yo tazabana ve na bantu yankaka, mu mbandu bibuti na bo to bankuluntu. Nkutu, yo kele mawa na kumona nde baleke mingi yina bibuti na bo kele Bakristu mebwaka na mutambu yai mpi mekumaka kutuba mambu ya nsoni. (Ef. 5:​3, 4; Kol. 3:⁠8) Bankaka mekotisaka bifwanisu na bo ya ketedimisaka mpusa ya kuvukisa nitu, bo mekudipesaka bazina yankaka ya kepusa na kuyindula mambu ya kuvukisa nitu, to mekotisaka na baordinatere na bo miziki yina kele ti bifwanisu ya kemonisaka pwelele kuvukisa nitu.

Na kutadila mambu yai ya beto metubila, bibuti fwete kengila mambu yina bana na bo kesala na baordinatere. (Bing. 29:15) Yo tavanda kigonsa na kuyamba muntu mosi ya beto mezaba ve na nzo na beto to kubikisa muntu yango yandi mosi ti bana na beto. Mutindu mosi, yo kele kigonsa sambu na beto to bana na beto na kusala kinduku ti bantu yina beto mezaba ve na nzila ya Enternete, ata bo ketuba nde bo kele Bambangi ya Yehowa.​—⁠Bing. 22:⁠3.