Inki Mutindu Nge Tapesa Mvutu?

1. Sambu na inki beto fwete landa mbandu ya Yezu kana bo meyula beto ngyufula?

¹ Tii bubu yai, bantu keyitukaka na mutindu ya mbote yina Yezu vandaka kupesa bamvutu na bangyufula yina bantu vandaka kuyula yandi. Ntangu bantu keyula beto bangyufula ya mitindu na mitindu na kisalu ya kusamuna, beto fwete landa mbandu ya Yezu.​—⁠1 Pie. 2:⁠21.

2. Inki lenda sadisa beto na kupesa mvutu ya mbote na ngyufula mosi?

² Widikila Ntete: Yezu vandaka kutadila mabanza ya muntu yina meyula yandi ngyufula. Bantangu yankaka, yo lombaka nde yandi yula bangyufula sambu na kuzaba mpenza mambu yina muntu yango vandaka kuyindula. Mbala yankaka muntu yina keyula nde, “Keti nge kekwikilaka na Yezu?” kekudiyula mpenza sambu na nki nge ketaka ve nkinsi ya Lubutuku. Kana nge bakisa dibanza ya muntu yina keyula nge ngyufula, nge lenda kuka kuyindula mbote mpenza ti yandi.​—⁠Luka 10:​25-37.

3. Inki bisadilu kesadisaka beto na kupesa bamvutu ya mbote ya mekatuka na Masonuku?

³ Pesa Mvutu na Nsadisa ya Ndinga ya Nzambi: Mbala mingi, yo kevandaka mbote na kusadila Biblia sambu na kupesa mvutu. (2 Tim. 3:​16, 17; Baeb. 4:12) Mukanda Comment raisonner mpi “Masolo ya Kusolula na Biblia” ya kele na Les Saintes Écritures ​—⁠ Traduction du monde nouveau mesadisaka mpenza bantu mingi na kupesa mvutu ya mbote. Ata muntu ya keyula ngyufula kendima ve kiyeka ya Biblia, nge lenda kuka kuzabisa yandi na mayele yonso mambu yina Masonuku kelongaka. Syamisa muntu yango na kutadila na dikebi yonso bukyeleka ya mayele yina kele na Biblia. Kana nge kelanda mbandu ya Yezu, bamvutu na nge tavanda “bonso masa ya madidi ya muntu me nwa na dikopa ya ntalu,” disongidila ya luzitu, ya mbote, mpi ya mfunu.​—⁠Bing. 25:⁠11.

4. Na nki ntangu yo kele ve mbote na kusosa kupesa mvutu na konso ngyufula?

⁴ Keti Beto Fwete Pesa Mvutu na Konso Ngyufula? Kana nge mezaba ve mvutu na ngyufula mosi buna, kuwa ve nsoni na kutuba nde: “Mono mezaba ve, kansi mono lenda kwenda kusala bansosa mpi mono takwisa kuvutuka sambu na kupesa nge mvutu.” Kudikulumusa mpi dikebi ya masonga ya mutindu yai lenda pusa muwi na kuzabisa nge na kuvutukila yandi. Kana nge bakisa nde bantu yina keyula ngyufula kele bambeni yina kesosa kubasisa ntembe, landa mbandu ya Yezu na kupesaka mvutu mosi ya nkufi. (Luka 20:​1-8) Mutindu mosi, kana muntu mosi ya kemonisa ve mpusa ya masonga sambu na kyeleka kezola nde beno swana, zenga disolo na luzitu yonso mpi sadila ntangu na nge sambu na kusosa bantu yina kele ti mpusa ya masonga.​—⁠Mat. 7:⁠6.

5. Inki mbandu Yezu kupesaka na yina metala kupesa bamvutu na bangyufula?

⁵ Yezu kuzabaka nde kutula ntima na Yehowa vandaka mfunu sambu na kulungisa kisalu na yandi ya “kutuba kitemwe na mambu yina kele ya kieleka,” tanga mpi kupesa mvutu na bangyufula yina bantu vandaka mpenza na mfunu ya bamvutu na yo. (Yoa. 18:37) Beto kele mpenza ti dibaku ya mbote ya kulanda mbandu ya Yezu na kupesaka mvutu na bantu yina kele ya “kuyilama sambu na kubaka luzingu ya mvula na mvula”!​—⁠Bis. 13:​48, NW.