Sadila Biblia na Mayele Yonso

1. Sambu na nki Biblia kele mfunu mingi?

¹ Kusadila na mayele yonso Ndinga ya kupemama ya Nzambi kesadisaka beto na kuzabisa mpi kulonga kyeleka na pwelele yonso mpi kutungulula malongi ya luvunu mpi binkulu ya bantu.​—⁠2 Tim. 2:15; 1 Pie. 3:⁠15.

2. Inki tasadisa beto na kuzwa baverse ti mayele mingi?

² Yikana Mpenza ti Biblia: Mutindu yo kesalamaka na konso kisadilu, mayele kekwisaka mingi kana nge keyikana ti kisadilu yango. Kutanga Biblia banda na luyantiku tii na nsuka tasadisa nge na kubaka ngindu ya kimvuka ya ntu-dyambu ya Biblia. Yo tasadisa nge mpi na kuyibuka baverse mpi kuzwa yo kukonda mpasi. Ntangu nge keyikana mpenza ti Masonuku, nge tatubaka ti kikesa mpi kundima mpenza ntangu nge keta kimbangi ya dibaku ya mbote mpi kesala kisalu ya bilanga.​—⁠1 Tes. 1:⁠5.

3, 4. (a) Inki kele mwa mitindu yina lenda sadisa beto na kuyikana ti Biblia? (b) Keti nge mesadilaka mitindu yankaka sambu na kuyikana ti Masonuku?

³ Ntangu balukutakanu kesalama, vanda ti kikalulu ya kukangula Biblia na nge mpi ya kulanda ntangu bo ketanga baverse. Ntangu nge kelonguka nge mosi mpi kekudibongisa sambu na balukutakanu ya dibundu, sosa baverse ya Masonuku yina bo mevutukila ve bangogo na yo mpi yindulula mutindu nge lenda sadila yo na luzingu na nge. Bantu mingi kemonaka nde kutanga baverse ya Biblia mbala mosi na kati ya Biblia na kisika ya kutanga yo na ordinatere to na bapapie yina bo menyema, kesadisaka bo na kuzwa baverse yango kukonda mpasi ntangu bo kevandaka na mfunu na yo na kisalu ya bilanga.​—⁠Yoa. 14:⁠26.

⁴ Mabuta yankaka meyidikaka ntangu mosi buna sambu na kukanga baverse ya Biblia na ntu. Bo lenda sala yo na nsadisa ya mwa bakarti to bitini ya bapapie yina bo mesonika bangogo ya verse mosi na ndambu mosi mpi na ndambu yankaka verse yango yo mosi. Konso muntu kesalaka ture na kusadilaka baverse yango sambu na kuzaba kana bo lenda vutukila mambu yina kele ya kusonika na baverse yango to kuyibuka kisika yina mambu yango kele. Kusadisa bansonga ya kemonisa mutindu ya kuta kimbangi mpi kumonisa mutindu ya kupesa mvutu na ntembe to na ngyufula mosi na nsadisa ya Biblia keyedisaka mpi mayele na beto.

5. Sambu na nki beto kezola kuyedisa mayele na beto ya Biblia?

⁵ Ata mukanda mosi ve lenda fwanana ti Biblia. Yo mpamba kele ti masonama yina lenda pesa bantu “mayele yina ta gulusa” bo. (2 Tim. 3:15) Sambu bantu mingi ya teritware na beto mezaba ve bimvwama ya mbalu yina kele na Biblia, beto kele ti kikuma ya mbote ya kuyedisa mayele na beto ya kusonga bo mambu yina Biblia lenda pesa bo mpenza.​—⁠Bing. 2:​1-5.