Kisalu Mosi ya Kepesaka Kyese Mingi
1. Inki kisalu ya kubelula bantu na kimpeve kesalama na bilumbu na beto?
1 Na mvu-nkama ya ntete, bantu yina kumonaka mpila bantu vandaka kubeluka na kinsuni kufulukaka na kyese mingi na ntima. (Luka 5:24-26) Na bilumbu na beto, beto kele na kyese na kisalu ya kubelula bantu na kimpeve. (Kus. 22:1, 2, 17) Yo kevandaka kyese mpenza na kutanga baeksperiansi yina kemonisa nde Ndinga ya Yehowa mpi mpeve santu na yandi kesobaka luzingu ya bantu! Kansi, kusala kisalu yai, na kutwadisaka kulonguka ya Biblia, kepesaka kyese ya mingi.
2. Inki kyese beto lenda baka na ntangu ya beto kelonga muntu kyeleka?
2 Zina ya Nzambi kele nani? Sambu na nki yandi kepesaka nzila na bampasi? Inki mambu Kimfumu ya Nzambi tasala sambu na bantu? Beto kevandaka na kyese ya kupesa kaka ve bamvutu na bangyufula yai kansi mpi na kumona kyese yina longoki ya Biblia kevandaka na yo ntangu yandi kelonguka kyeleka. (Bing. 15:23; Luka 24:32) Ntangu longoki keyela, yandi lenda yantika kusadila zina ya Yehowa, kusala bansoba na mutindu na yandi ya kulwata mpi ya kuyidika nitu, kuyambula bisalu ya mbi mpi kuyantika kuta kimbangi na bantu yankaka. Kana yandi yela tii na kiteso ya kudipesa mpi kubaka mbotika, yandi takuma mpangi na beto mpi nduku ya kisalu. Bitambi yai yonso ya mbote kele bikuma ya kepesaka kyese.—1 Tes. 2:19, 20.
3. Inki bitambi ya mfunu beto lenda sala sambu na kuyantika kulonguka ya Biblia ti muntu?
3 Keti Nge Lenda Sala Mpi? Kana nge kezola kusala kisalu yai ya kyese mingi, samba Yehowa sambu yandi pesa nge dibaku ya kutwadisa kulonguka ya Biblia, mpi na nima sala mambu na kuwakana ti bisambu na nge. (1 Yoa. 5:14) Samuna na kisika mpi na ntangu yina nge lenda zwa bantu. Na konso dibaku ya mbote ya nge takutana na yo, lomba bantu na kulonguka Biblia ti bo. (Lo. 11:6) Kana nge mezwa muntu mosi ya memonisa mpusa mpi nge mekuna nkeni ya kyeleka, vutuka sambu na kulosila yo masa.—1 Kor. 3:6-9.
4. Sambu na nki beto fwete lomba bantu na kulonguka Biblia ti bo na dibanza ya kusala mambu kukonda kusukinina?
4 Bantu kuluta mingi dyaka kele na nzala mpi kiwina ya lunungu. Nani tasadisa bo na kulungisa mpusa na bo ya kuzaba Yehowa na kulongukaka Biblia ti bo? (Mat. 5:3, 6) Bika beto kudipesa na luzolo yonso sambu na kulungisa kisalu ya kusamuna mpi ya kukumisa bantu balongoki na ntwala nde kisalu ya kukatula bambuma kukuma na nsuka.—Yez. 6:8.