Bamvutu na Bangyufula na Beno

◼ Inki beto fwete tadila kana beto kezola nde bima na beto yankaka to yonso kukuma ya organizasio ya Yehowa na nima ya lufwa na beto?

Ntangu bantu kefwaka, bo kevandaka dyaka ve ti kiyeka na zulu ya bima na bo ya kinsuni. (Lo. 9:5, 6) Yo yina bantu mingi kesonikaka na ntwala mukanda mosi to testama ya ketendula mutindu bo kezola nde bantu kukabula bima na bo. (2 Bant. 20:1) Mbala mingi mukanda yai ya kewakana ti nsiku kemonisaka muntu yina munkwa ya bima mepesa mukumba ya kukabula bima na yandi kana yandi mefwa. Na bansi mingi, kana muntu yina mefwa kusonikaka ve mukanda yai, bamfumu ya leta bantu ketadilaka mutindu ya kukabula bima na yandi. Yo yina, kana beto mebaka desizio mosi ya sikisiki sambu na bima na beto, mumbandu kupesa bima yankaka to bima yonso na organizasio ya Yehowa, yo kele mbote na kusonika mambu yai na mukanda mosi ya kewakana ti nsiku mpi kupona mbote-mbote muntu yina tavanda ti mukumba ya kukabula bima.

Muntu yina bo mepona na kukabula bima kele ti mukumba mosi ya nene. Na kutadilaka mingi ya mbongo to ya bima, kisalu na yandi ya kuvukisa bima mpi na nima kukabula yo lenda lomba kusala mambu mingi ya fyoti-fyoti, mpi yo lenda baka ntangu mingi. Dyaka, mbala mingi bamfumu ya leta kepesaka bantuma yina bantu fwete zitisa. Bantu yonso ve na dibundu kevandaka ti makuki ya kulungisa mukumba yai. Muntu yina beto kepona fwete vanda muntu mosi ya beto mezaba nde yandi takuka kusala yo, muntu ya beto ketudilaka ntima, mpi yina tazitisa na luzolo yonso desizio na beto.—Tala disolo, “ Préparer sa succession : une mesure sage, ” na Réveillez-vous ! ya Desembri 8, 1998.

Kana Bo Melomba Nge na Kuvanda Muntu Yina Takabula Bima: Kana muntu mosi melomba nge na kubaka mukumba ya kukabula bima na yandi kana yandi mefwa, zikisa ntete mambu yina yo talomba nde nge sala mpi tadila na kisambu kana nge takuka kulungisa mukumba yai. (Luka 14:28-32) Na nima ya lufwa ya muntu yango, yo talomba nde nge zabisa bantu yonso yina yandi tubaka nde bo tabaka bima. Ntangu nge tabaka kiyeka ya kusala yo, mukumba na nge tavanda ya kukabula bima na kuwakana ti nsiku ya leta mpi na kulandaka kaka bantuma yina kele na testama. Muntu yina bo mepona sambu na kukabula bima fwete zaba nde ata bima yango kele mingi to fyoti, yandi fwete sala mambu kaka mutindu yo kele ya kusonama na testama. Konso dikabu yina bo kepesaka na kimvuka mosi ya Bambangi ya Yehowa yina mezabanaka na bansiku ya leta, yo kekwendaka na konti ya mbongo ya organizasio ya Yehowa.—Luka 16:10; 21:1-4.