Inki Ke Pusaka Beto na Kusamuna?
1. Inki kuwakana kele na kati ya zola mpi kisalu na beto ya kusamuna?
1 Kusamuna nsangu ya Kimfumu ya Nzambi kele kisalu mosi ya mfunu mingi yina beto lenda sala. Ya kieleka, kisalu yai ke sadisaka beto na kumonisa bulemfu na beto na bansiku yai zole ya kuluta nene: kuzola Yehowa mpi kuzola nkweno. (Mar. 12:29-31) Zola ke pusaka beto na kuvanda bansamuni ya kikesa mpenza.—1 Yoa. 5:3.
2. Inki mutindu kisalu na beto ya kusamuna ke monisaka zola sambu na Yehowa?
2 Zola Sambu na Yehowa: Zola sambu na Yehowa, Nduku ya beto ke zolaka mingi, ke pusaka beto na kutuba mambu ya mbote sambu na yandi. Banda bamvula kiteso ya 6000, Satana ke kusilaka yandi makambu. (2 Bak. 4:3, 4) Yo yina, bantu ke kwikilaka nde Nzambi ke niokulaka bansumuki na bilungi ya tiya, nde yandi kele Butatu yina bantu lenda bakisa ve, mpi nde yandi ke kudibanzaka ve sambu na bantu. Nkutu bankaka me kumaka kutuba nde Nzambi kele ve. Beto ke zolaka mpenza nde bantu kuzaba kieleka na yina me tala Tata na beto ya zulu! Bikesa na beto ya masonga ya kuvanda bambangi ya Nzambi ke pesaka yandi kiese ya mingi mpi yo ke pesaka Satana mpasi.—Bing. 27:11; Baeb. 13:15, 16.
3. Inki mutindu kisalu na beto ya kusamuna ke monisaka zola sambu na nkweno?
3 Zola Sambu na Nkweno: Konso ntangu ya beto ke taka kimbangi na muntu mosi, beto ke monisaka zola sambu na yandi. Bantu kele na mfunu mpenza ya kuwa nsangu ya mbote na bilumbu yai ya mpasi. Bantu mingi kele bonso bantu ya Ninive, ya bilumbu ya Yonasi, ‘bayina zabaka ve kusola wapi mambu ya mbote, wapi mambu ya mbi.’ (Yon. 4:11) Kisalu na beto ya kusamuna ke longaka bantu mutindu ya kuzinga mbote mpi na kiese. (Yez. 48:17-19) Yo ke pesaka bo kivuvu. (Bar. 15:4) Kana bo widikila mpi bo sadila mambu ya bo ke longuka, bo “ta guluka.”—Bar. 10:13, 14.
4. Inki Yehowa ke vila ve ata fioti?
4 Bana ya mbote ke monisaka ve zola sambu na bibuti na bo kaka na mwa ntangu mosi buna. Kansi bo ke salaka ngolo sambu na kuzola bo ntangu yonso. Mutindu mosi, zola ya ngolo sambu na Nzambi mpi sambu na nkweno ta pusa beto na kusosa mabaku ya kuta kimbangi ntangu yonso, kansi ve kaka na nsungi ya ntangu mosi buna. Beto ke samunaka kukonda kulemba. (Bis. 5:42) Yehowa ke vilaka ve ata fioti zola ya mutindu yina.—Baeb. 6:10.