Longuka Biblia Mbote-Mbote ti Bantu
1. Bansamuni kele ti nki mukumba?
1 Ata muntu mosi ve lenda sadila Yehowa kana Yehowa yandi mosi me “benda yandi” ve. (Yoa. 6:44) Ata mpidina, bansamuni ya ke longukaka Biblia ti bantu fwete sala ngolo sambu na kusadisa bo na kukwenda pene-pene ya Tata na bo ya zulu. (Yak. 4:8) Sambu na kusadisa balongoki, yo ke lombaka kudibongisa. Kutanga baparagrafe mpi kuyula bangiufula mpamba me fwana ve sambu na kusadisa balongoki na kubakisa nsangu mpi na kuyela na kimpeve.
2. Yo ke lombaka nki sambu na kulonguka Biblia mbote-mbote ti longoki?
2 Sambu na kulonguka Biblia mbote-mbote ti balongoki, bansamuni fwete sadisa bo (1) na kubakisa mambu yina Biblia ke longa, (2) na kundima mambu yina Biblia ke longa mpi (3) na kusadila mambu yina Biblia ke longa. (Yoa. 3:16; 17:3; Yak. 2:26) Yo lenda baka bangonda mingi sambu na kusadisa longoki na kusala bitambi yai. Konso kitambi ya longoki ke sala ke monisaka nde yandi ke yedisa bangwisana ti Yehowa mpi me kudipesa na yandi.
3. Sambu na nki balongi fwete yula bangiufula ya ke pusa balongoki na kupesa mabanza na bo?
3 Inki Kele Dibanza ya Longoki ya Biblia?: Sambu na kuzaba kana longoki ya Biblia ke bakisa mambu yina yandi ke longuka mpi ke ndima yo, siamisa yandi na kupesa dibanza na yandi na kisika ya kutuba kaka nge mosi. (Yak. 1:19) Keti yandi ke bakisa mambu yina Biblia ke tuba na disolo ya beno ke longuka? Keti yandi lenda tendula disolo yango na bangogo na yandi mosi? Inki yandi ke yindula sambu na mambu ya yandi ke longuka? Keti yandi ke kwikila nde mambu yina Biblia ke tuba kele ya kieleka? (1 Bate. 2:13) Keti yandi ke bakisa nde mambu ya yandi ke longuka fwete soba luzingu na yandi? (Bakol. 3:10) Sambu na kubaka bamvutu na bangiufula yai, beto fwete yula longoki na mayele yonso bangiufula ya ke pusa yandi na kupesa mabanza na yandi mpi kuwidikila yandi.—Mat. 16:13-16.
4. Inki nge fwete sala kana longoki ke bakisa na mpasi to ke sadila ve malongi ya Biblia yina nge ke longa yandi?
4 Mbala mingi, yo ke bakaka ntangu sambu muntu kuyambula bikalulu mpi mabanza na yandi yina me kangamaka ngolo. (2 Bak. 10:5) Inki nge ta sala kana longoki ke ndima ve mambu ya nge ke longa yandi to ke sadila yo ve? Yo ke lombaka kuvanda ntima-nda sambu na kubikila Ndinga ya Nzambi mpi mpeve santu ntangu ya me fwana sambu yo sadisa longoki. (1 Bak. 3:6, 7; Baeb. 4:12) Kana longoki ke bakisa na mpasi to ke sadila ve malongi ya Biblia, mbala mingi yo ke vandaka mbote na kuluta na dilongi ya nkaka na kisika ya kupusa yandi na kubakisa na kingolo-ngolo. Sambu nge ke landa na kulonga yandi Biblia na zola yonso mpi ti ntima-nda, yo lenda pusa yandi na kusala bansoba na bilumbu ya ke kwisa.