Bansamuni, Beno Landa na Kuyela
1. Inki bambandu ya mvu-nkama ya ntete ke monisa nde bansamuni fwete yela?
1 Bakristu fwete landa na kuyela. Kikuma yai pusaka Yezu na kupesa balongoki na yandi formasio sambu bo yedisa makuki na bo ya kulonga. (Luka 9:1-5; 10:1-11) Mutindu mosi, Akilasi ti Prisila bakaka Apolo mpi “tendudilaka yandi nzila ya Nzambi na busikisiki kibeni.” (Bis. 18:24-26) Diaka, Polo siamisaka Timoteo, nsamuni mosi ya vandaka ti eksperiansi, na kulanda na kudipesa na malongi na yandi sambu bantu yonso “kumona pwelele nde [yandi] ke kwenda na ntwala.” (1 Tim. 4:13-15) Ata beto kele bansamuni ya nsangu ya mbote ya ke sadilaka Mfumu bonso bampika bamvula mingi, beto fwete landa na kutomisa mutindu na beto ya kulonga na kisalu ya kusamuna.
2. Inki mutindu beto lenda longuka na bantu ya nkaka?
2 Longuka na Bantu ya Nkaka: Kulonguka na bantu ya nkaka kele mutindu mosi ya kutomisa makuki na beto. (Bing. 27:17) Yo yina, tula dikebi na bangogo ya kukotila na masolo yina bansamuni ya nkaka ke sadilaka sambu na kuta kimbangi. Lomba bangindu na bansamuni ya ke samunaka mbote mpi widikila na dikebi yonso mambu ya bo ke zabisa nge. (Bing. 1:5) Keti nge ke zabaka ve mutindu ya kusala mvutukilu ya mpa, ya kuyantika kulonguka Biblia ti muntu to ya kusala bitini ya nkaka ya kisalu ya kusamuna? Sala diambu yai: Lomba nkengi ya kimvuka to nsamuni mosi ya kele ti eksperiansi na kulonga nge. Kuvila ve nde mpeve santu ya Yehowa lenda tomisa makuki na nge, yo yina lomba mpeve yango mbala na mbala na kisambu.—Luka 11:13.
3. Inki mutindu beto fwete tadila bandongisila yina bo ke pesa beto ata beto me lomba yo ve?
3 Kuwa ve makasi kana bo me pesa nge bandongisila sambu na kutomisa makuki na nge ya kulonga, ata nge me lomba yo ve. (Lo. 7:9) Bonso Apolo, ndima lusadisu na kudikulumusa mpi na ntonda yonso. Kusala mutindu yai ke monisaka mayele.—Bing. 12:15.
4. Sambu na nki Yezu siamisaka bansamuni na kuyela?
4 Kuyela na Kimpeve Ke Pesaka Nzambi Lukumu: Na nsadisa ya bambandu, Yezu siamisaka balongoki na yandi na kuyela. Yandi kudifwanisaka ti nti ya vinu mpi fwanisaka balongoki na yandi yina bo me tulaka mafuta ti balutangu. Yandi tubaka nde Tata ke tulaka bunkete na balutangu ya ke butaka bambuma “sambu yo buta mbuma mingi.” (Yoa. 15:2) Kaka mutindu munkwa bilanga ya vinu ke zolaka nde balutangu ya nti ya vinu na yandi kubuta bambuma mingi, Yehowa ke zolaka mpi nde beto landa na kutomisa makuki na beto sambu na kubuta “mbuma ya bikobo na beto.” (Baeb. 13:15) Inki bambuma beto ta buka kana beto ke yela na kimpeve? Yezu ke pesa mvutu nde: “Tata na mono ke bakaka nkembo na diambu yai, nde beno landa na kubuta mbuma mingi.”—Yoa. 15:8.